എന്റെ നെഞ്ചിടിപ്പ് കൂടിക്കൊണ്ടിരുന്നു. സത്യം അറിയാനുള്ള ആവേശത്തേക്കാൾ വലിയൊരു ഭയം എന്നെ മൂടിയിരുന്നു. അടുത്ത കുറച്ച് ദിവസങ്ങൾക്കുള്ളിൽ ഈ സ്ക്രീനിൽ തെളിയാൻ പോകുന്ന ദൃശ്യങ്ങൾ എന്റെ ജീവിതത്തിന്റെ ഗതി തന്നെ മാറ്റുമെന്ന തിരിച്ചറിവിൽ ഞാൻ ആ ടിവി സ്ക്രീനിലേക്ക് കണ്ണുനട്ടിരുന്നു. ഹരി നാരായണൻ എന്ന ഭർത്താവിന്റെ ഏറ്റവും വലിയ പരീക്ഷണം അവിടെ തുടങ്ങുകയായിരുന്നു.
രാത്രിയേറെയായിട്ടും ടിവി സ്ക്രീനിൽ നിന്ന് കണ്ണെടുക്കാൻ എനിക്ക് കഴിഞ്ഞില്ല. ഓരോ നിമിഷവും അച്ചുവിന്റെ ഓരോ ചലനവും ഞാൻ നിരീക്ഷിച്ചുകൊണ്ടിരുന്നു. പക്ഷേ, എന്റെ സംശയങ്ങളെ ബലപ്പെടുത്തുന്ന ഒന്നും അവിടെ കണ്ടില്ല. അവൾ സാധാരണ പോലെ അടുക്കളയിൽ കയറി ഭക്ഷണം ഉണ്ടാക്കുന്നു,
ലിവിംഗ് റൂമിലെ സോഫയിലിരുന്ന് ടിവി കാണുന്നു, ഇടയ്ക്കിടെ ഫോണിൽ നോക്കി ചിരിക്കുന്നു. എല്ലാം വളരെ നോർമലായി തോന്നി.
രാത്രി പത്തുമണിയായപ്പോൾ അവൾ ഫോണിൽ ആരോടോ ചാറ്റ് ചെയ്യുന്നത് കണ്ടു. പിന്നെ ആനന്ദത്തോടെ ഒരാളെ ഡയൽ ചെയ്യുന്നു. ‘ഇതാവാം ആ ആൾ’ എന്ന് കരുതി ഞാൻ ശ്വാസമടക്കിപ്പിടിച്ച് ടിവിയിലേക്ക് നോക്കിയിരുന്നു. പെട്ടെന്നാണ് എന്റെ കയ്യിലിരുന്ന ഫോൺ ശബ്ദിച്ചത്.
നോക്കിയപ്പോൾ സ്ക്രീനിൽ തെളിയുന്നത് അച്ചുവിന്റെ പേര്! ടിവിയിൽ അവൾ ഫോൺ ചെവിയോട് ചേർത്ത് നിൽക്കുന്നത് ഞാൻ ലൈവ് ആയി കാണുന്നു. ഒരു വലിയ ആശ്വാസത്തോടെയും കുറ്റബോധത്തോടെയും ഞാൻ ഫോൺ എടുത്തു.
“ഹലോ അച്ചു…”
“ഹരീ… നീ എത്തിയോടാ? എപ്പോഴാ എത്തിയത്? നീ വിളിക്കുമെന്ന് ഞാൻ വിചാരിച്ചു,”
അവളുടെ ശബ്ദത്തിൽ പതിവ് സ്നേഹവും കരുതലും ഉണ്ടായിരുന്നു.
“ഞാൻ എത്തി അച്ചു… കുറച്ച് നേരം മുമ്പ് എത്തി. ടയേർഡ് ആയതുകൊണ്ട് ഒന്ന് കിടന്നതാ,” ഞാൻ കള്ളം പറഞ്ഞു.
ലൈവ് ആയി അവൾ എന്നോട് സംസാരിക്കുന്നത് കാണുമ്പോൾ എനിക്ക് വല്ലാത്തൊരു വീർപ്പുമുട്ടൽ തോന്നി.
“അമ്മാവനും അമ്മായിക്കും ഒക്കെ സുഖമല്ലേ? അവരൊക്കെ എന്ത് പറയുന്നു?”
അവൾ ഓരോന്നായി ചോദിച്ചു കൊണ്ടിരുന്നു.
“സുഖമാണ് അച്ചു. എല്ലാവരും നിന്നെ അന്വേഷിച്ചു,”
ഞാൻ മറുപടി നൽകി.
പിന്നെ അവൾ പതിഞ്ഞ സ്വരത്തിൽ ഒരു കള്ളച്ചിരിയോടെ പറഞ്ഞു,
“പിന്നെ… മോൻ അവിടെ നിൽക്കുന്നതൊക്കെ കൊള്ളാം. എന്ന് കരുതി ആ അമ്മാവന്റെ മോളുമായി അത്രയ്ക്ക് അടുപ്പം ഉണ്ടാക്കാൻ പോകണ്ട കേട്ടോ. അവളുടെ നോട്ടം അത്ര ശരിയല്ലെന്ന് എനിക്ക് തോന്നിയിട്ടുണ്ട്.”
അവളുടെ ആ കുശുമ്പ് കേട്ടപ്പോൾ എനിക്ക് ചിരി വന്നു. അച്ചു എന്നെ എത്രമാത്രം സ്നേഹിക്കുന്നുണ്ടെന്ന് തോന്നിപ്പോയ നിമിഷം.
ഞങ്ങൾ കുറെ നേരം ഓരോന്ന് പറഞ്ഞ് ചിരിച്ചു. പഴയ യു.കെയിലെ ദിനങ്ങളെക്കുറിച്ചും വരാനിരിക്കുന്ന അവളുടെ ബർത്ത്ഡേയെക്കുറിച്ചും ഒക്കെ സംസാരിച്ചു. അവസാനം
“ലവ് യു ഹരി, ഗുഡ് നൈറ്റ്” എന്ന് പറഞ്ഞ് അവൾ ഫോൺ വെച്ചു.
ടിവിയിൽ നോക്കുമ്പോൾ, ഫോൺ വെച്ച അച്ചു ലൈറ്റ് ഓഫ് ചെയ്ത് പുതപ്പിനുള്ളിലേക്ക് ചുരുണ്ടുകൂടി കിടക്കുന്നത് ഞാൻ കണ്ടു. കുറച്ചു കഴിഞ്ഞപ്പോൾ അവളുടെ ശ്വാസഗതി ശാന്തമായി, അവൾ നല്ല ഉറക്കത്തിലേക്ക് വഴുതിവീണു.
സ്ക്രീനിലെ ആ ശാന്തമായ മുഖം നോക്കി ഞാൻ തളർന്നിരുന്നു. ‘ഹരി… നീ എന്താണ് ഈ കാണിച്ചു കൂട്ടുന്നത്?’ എന്റെ മനസ്സ് എന്നോട് തന്നെ ചോദിച്ചു. സ്വന്തം ഭാര്യയെ ഇങ്ങനെ ചാരക്കണ്ണുകളിലൂടെ നോക്കാൻ തോന്നിയല്ലോ എന്നോർത്ത് എനിക്ക് എന്നോട് തന്നെ പുച്ഛം തോന്നി. ഒരുപക്ഷേ ആ വയസ്സായ ആൾ പറഞ്ഞതും ആ ബെഡ്ഷീറ്റിലെ പാടുകളുമൊക്കെ എന്റെ വെറും തോന്നലുകൾ മാത്രമായിരുന്നോ?
അച്ചു എന്നെ ചതിക്കില്ലെന്ന് എന്റെ മനസ്സ് മന്ത്രിക്കാൻ തുടങ്ങി.
ആ വലിയ സ്ക്രീനിൽ അവളുടെ ഉറക്കം നോക്കി ഇരിക്കെ എപ്പോഴോ ഞാനും ഉറക്കത്തിലേക്ക് വീണു. മനസ്സിലെ ആ വലിയ ഭാരം ഒഴിഞ്ഞുപോയതുപോലെ ഒരു തോന്നൽ ആ നിമിഷം എനിക്കുണ്ടായിരുന്നു. സത്യങ്ങൾ കയ്പേറിയതാണെങ്കിലും, ഈ നിശബ്ദത എനിക്ക് നൽകിയത് വലിയൊരു സമാധാനമായിരുന്നു.
Waiting for the next…