” പെണ്ണിന്റെ ഒരു മൈൻ്റ് ഇവിടെ മനുഷ്യൻ മൂട്ടിൽ തീ പിടിച്ചിരിക്കുമ്പോഴാ… ”
ഞാൻ പിറുപിറുത്തു കൊണ്ട് വേഗം തന്നെ ദിവ്യയുടെ അടുത്തെത്തി… പക്ഷെ എന്നെ കണ്ടതും ആ മുഖം ഇരുണ്ട് കൂടുന്നത് ഞാൻ കണ്ടു…
” എടോ ഞാൻ… ”
ഒരു സ്റ്റാർട്ടിങ് ട്രബിൾ ഉള്ളത് കൊണ്ട് വാക്കുകൾ ഒന്നും കിട്ടുന്നില്ല…നന്ദുവും ശ്രദ്ധയും ഇത് സൂക്ഷ്മതയോടെ നോക്കുന്നുണ്ടായിരുന്നു….
” എടോ താൻ എന്താ ഇങ്ങനെ… ”
പറഞ്ഞ് തീരും മുന്നേ കോപം കൊണ്ട് ജ്വലിച്ച പോലുള്ള അവളുടെ മുഖം എൻ്റെ മുഖത്തിന് അഭിമുഖമായി വന്നു…
” എന്താ വേറെ വല്ലോരുടേം മുന്നിൽ വിഡ്ഢി വേഷം കെട്ടിക്കാനുണ്ടോ…?ഉണ്ടെങ്കിൽ പറ വന്നു തരാം… ”
വാക്കുകളുടെ ശബ്ദം ഉയരുന്നതിനോടൊപ്പം കണ്ണിലെ തീക്ഷ്ണത എന്നെ ഏറെ ആശങ്കപെടുത്തി…
” ദിവ്യാ താൻ വിചാരിക്കുമ്പോലല്ല… ”
ഞാൻ ന്യായികരിക്കാൻ ശ്രമിക്കുമ്പോഴും എന്താണ് സംഭവം എന്ന് കേൾക്കാൻ അവൾക്ക് തീരെ താല്പര്യം ഇല്ലായിരുന്നു…
” ഒന്നും പറയേണ്ട… കണ്മുന്നിൽ കണ്ടതിനും അപ്പുറം ന്യായികരണങ്ങൾക്ക് വില ഇല്ല…ഒരു പെണ്ണിന് പൊറുക്കാൻ പറ്റാത്തത് രണ്ടും കാര്യങ്ങളാണ്…ഒന്നവളുടെ മാനത്തിന് വിലയിടുന്നത്…രണ്ട് അന്യൻ്റെ തമാശകൾക്ക് മുന്നിൽ അവൾ കബളിപ്പിക്കപ്പെടുന്നത്….ഇതിലൊന്ന് എനിക്ക് ഇന്ന് സംഭവിച്ചു…അതിന് ന്യായികരണം എനിക്ക് എനി കേൾക്കണമില്ല…എന്നെ ശല്ല്യം ചെയ്യരുതെന്ന അപേക്ഷ ഒഴിച്ച്… ”
വാക്കുകൾ കൊണ്ട് മുറിവുകൾ നൽകി അവൾ കൈയ്യിലേക്ക് ഏതോ പേപ്പറ് കെട്ടുകൾ എടുത്തുകൊണ്ട് എന്നേയും കടന്ന് പോകാൻ ഒരുങ്ങി…പറയുന്നത് കേൾക്കാൻ പോലും നിൽക്കാതെ അവൾ ഇങ്ങനെ ദേഷ്യപെടുന്നത് എന്തിനാണ്…അതിനുമാത്രം ഞാൻ എന്ത് ചെയ്യ്തു…
” അത് പെങ്ങളെ ശരിക്കും നടന്നത്… ”
” ഏത് പെങ്ങള്…എന്ത് നടന്നെന്ന്… ”
എൻ്റെ അവസ്ഥ കണ്ട് ഇടപെടാൻ ശ്രമിച്ച നന്ദു ഒരു നിമിഷം അവളുടെ ഉറച്ച വാക്കുകൾക്ക് മുന്നിൽ ഷോക്കേറ്റത് പോലെ നിന്നു പോയി…
” അത് പിന്നെ ഒന്നൂല്ല്യ… റൂമിൽ ഒടുക്കത്തെ കൊതുകുകടി…അതോണ്ട് വല്ല കൊതുകു തിരിയോ ഗുഡ് നൈറ്റോ കിട്ടുമോന്ന് അറിയാനാ… ”
നന്ദു പെട്ടെന്ന് തന്നെ പ്ലേറ്റ് തിരിച്ചു….ഫ്യൂസ് പോയവൻ്റെ വായിൽ നിന്ന് പിന്നെ എന്ത് വരാനാ…പക്ഷെ അവളവനെ തുറിച്ച് നോക്കുക മാത്രമാണ് അതിന് ചെയ്യ്തത്…
” ഇ…ല്ല….ല്ലെ….എന്നാ പുതപ്പ് മൂടി ഉറങ്ങാം…പെ…ങ്ങള് ചെന്നാട്ടേ… ”
അവളുടെ നോട്ടം പന്തിയെല്ലെന്ന് കണ്ടപ്പൊ വിക്കി വിക്കി കൊണ്ട് പറഞ്ഞ് നന്ദു നൈസ് ആയിട്ട് വഴി മാറി കൊടുത്തു…അതോടെ ദിവ്യ ഒരിക്കൽ കൂടി എന്നെ രൂക്ഷമായി ഒന്ന് നോക്കിയ ശേഷം അവിടെ നിന്നും നടന്നകന്നു…
” എൻ്റെ പൊന്ന് മോനെ ഞാൻ അപ്പൊഴെ കൈ പൊക്കി കാണിച്ചതല്ലേ…ഇങ്ങോട്ട് ചെന്ന് കേറണ്ടാന്ന്… ”
ദിവ്യ പോയതും ശ്രദ്ധയുടെ വക ചോദ്യം എത്തിയപ്പോൾ ആയിരുന്നു പിന്നെ ഞെട്ടലിന് ഇച്ചിരി ശമനം വന്നത്…
” അത് ഇയാള് മൈൻ്റ് ആക്കിയതാണെന്ന് വിച്ചാരിച്ചതാ…നല്ല ചൂടിലാണല്ലോ കക്ഷി… ”
ഞാൻ അവൾ പോയ വഴിയെ ഒന്ന് കണ്ണ് പായിച്ച ശേഷം ശ്രദ്ധയോട് തിരക്കി…
” പിന്നെ കലിപ്പാണെന്നോ…കാര്യം ഒക്കെ എന്നോട് പറഞ്ഞു…നിന്നെ കൊന്ന് തിന്നാനുള്ള കലിയുണ്ട്… ”
” എടോ അവള് വിചാരിക്കും പോലെ ഒന്നുമല്ല കാര്യങ്ങൾ….”
ഞാൻ നടന്ന സംഭവങ്ങൾ മുഴുവനും ശ്രദ്ധയോട് പറഞ്ഞു കൊടുത്തു…
” ഓ അപ്പൊ തെറ്റ് ധാരണ ആണ് സംഭവം…പക്ഷെ അവളെ പറഞ്ഞിട്ട് കാര്യമില്ല… ആരായാലും അങ്ങനെയേ ചിന്തിക്കൂ… ”
ഞാൻ പറഞ്ഞത് കേട്ടതും ശ്രദ്ധയുടെ വക മറുപടികൾ എത്തി…
” പക്ഷെ കാര്യം അവളറിഞ്ഞാ ഒരു പക്ഷെ നിസ്സാരമായി വിട്ടുകളായാവുന്നതേ ഉള്ളൂ…പക്ഷെ എങ്ങനെ പറയും…തിളക്കുന്ന ലാവയുടെ അടുത്ത് തെർമോ മീറ്റർ എടുത്ത് പോകുന്ന അവസ്ഥയാ… ”
അവൾ വീണ്ടും വാക്കുകൾ കൊണ്ട് സന്ദർഭത്തെ വിവരിച്ചപ്പോൾ ആകെ ചിന്താകുഴപ്പത്തിലായി ഞാൻ…
” എന്തേലും ഒരു വഴി പറഞ്ഞ് താടോ… ”
ഞാൻ അവളെ ദയനീയ ഭാവത്തിൽ നോക്കി…
” വഴി ഉണ്ടാക്കാം… തൽകാലം അവളുടെ ചൂട് ഒന്ന് തണിയട്ടെ…തഞ്ചത്തിൽ നമ്മുക്ക് പറഞ്ഞു ശരിയാക്കാം… ”