Related Posts
പ്രിയപ്പെട്ടോരെ പറഞ്ഞതിലും ഒന്നു രണ്ട് ദിവസം കൂടി വൈകി… പേഴ്സണൽ പ്രശ്നം കൊണ്ടാണ്…പിന്നെ പതിവുപോലെ അവസാനം ഉള്ള കമൻറുകൾ ഒക്കെ കണ്ടിരുന്നു… അതുകൊണ്ട് റിപ്ലൈ അയക്കാതെ അടുത്ത പാർട്ട് വേഗം സെറ്റാക്കാൻ നിന്നു… പിന്നെ എല്ലാവർക്കും സുഖം ആണെന്ന് കരുതുന്നു… ഒരുപാട് സ്നേഹത്തോടെ നിങ്ങളുടെ സ്വന്തം കൊചുകുഞ്ഞ്…❤️
” ഹലോ സ്വപ്നം കാണുവാണോ സാറേ… ”
അമ്പലത്തിൽ നിന്നുള്ള മണിമുഴക്കത്തിൽ ഒരു നിമിഷം ലയിച്ചു പോയ ഞാൻ അവളുടെ ശബ്ദത്തിൽ ഒന്ന് ചെറുതായി ഞെട്ടി…
” ഏയ് ഞാൻ ചുമ്മാ… ”
പതറൽ മുഖത്ത് കാണിക്കാതെ ഞാൻ ന്യായികരണം നിരത്താൻ ശ്രമിച്ചു…
” മ്മ്….ഇങ്ങനെ പകൽ കിനാവ് കാണുന്നത് നല്ലതല്ല കേട്ടോ… ”
നെറ്റിയിൽ ചന്ദനത്തിന് പുറമേ ദേവിയുടെ ചുവന്ന കുറിയും കൂടെ തൊട്ട് തന്ന് പുറത്ത് നിന്നും ഒരിക്കൽ കൂടെ ഉള്ളിലേക്ക് നോക്കി കണ്ണുകൾ അടച്ച് പ്രാർത്ഥിക്കുന്ന അവളെ കണ്ടപ്പൊ വീണ്ടും പരിസരം മറന്ന് ഞാൻ നോക്കിപോയി…കാരണം അത്രയ്ക്കുണ്ടായിരുന്നു ആ മുഖത്തിൻ്റെ ഐശ്വര്യം….
” ഇങ്ങോട്ടല്ല… അങ്ങോട്ട് നോക്ക്…അവിടെയാണ് പ്രാർത്ഥന കേൾക്കേണ്ട ആൾ ഉള്ളത്… ”
എൻ്റെ നോട്ടം കണ്ടെന്നോണം തല ഒന്ന് ചെറുതായി ചെരിച്ച് അവൾ പുരികം ഉയർത്തി… അതോടെ ബോധം വന്ന ഞാൻ തൽക്ഷണം പുറത്ത് നിന്ന് ശ്രീകോവിലിന്റെ ഉള്ളിലേക്ക് ശ്രദ്ധ തിരിച്ചു…
” എൻ്റെ പ്രാർത്ഥന ഭഗവാൻ എന്താലും കേൾക്കും…ഇനി അതിന് ഒരു തീരുമാനം ഉണ്ടാകേണ്ടത് നീ ആടി മോളേ… “
അത് മനസ്സിൽ പറഞ്ഞ് ചിരിക്കുമ്പോൾ അറിയാതെ ഒരു കുളിരഭവപെടും പോലെ തോന്നി…
” എൻ്റെ പൊന്ന് മഹാദേവാ എൻ്റെ കൊച്ചാഗ്രഹം ഞാൻ പറഞ്ഞോട്ടെ….ഈ നടയിൽ വച്ച് തന്നെ ഭഗവാൻ്റേയും അമ്മ പാരാശക്തിയേയും സാക്ഷിയാക്കി…സർവ്വ അനുഗ്രഹങ്ങളോടെ അവളുടെ കഴുത്തിൽ ഒരു മിന്നുകെട്ടാൻ എനിക്ക് അവസരം തന്നൂടെ…ഈ വായാടിയെ പോന്നു പോലെ ഞാൻ സ്നേഹിച്ചോളം…കാത്തോളാം… എനിക്ക് തന്നൂടെ ഇതിനെ… ”
ഹൃദയത്തിൽ നിന്നും ഭഗവാനോട് ജീവിതത്തിലെ ഏറ്റവും വലിയ ഒരു ആഗ്രഹം തുറന്നു പറഞ്ഞപ്പോൾ എൻ്റെ കണ്ഠം ഇടറിയില്ല… വാക്കുകൾ പതറിയില്ല…കാരണം മനസ്സിൽ ഞാൻ ഇന്ന് ഓരോ നിമിഷവും ഇവൾക്കായി എന്തൊക്കെയോ ആയി മാറുകയാണ്…ഒരു പക്ഷെ ഇതാണോ ഭഗവാൻ പാർവതി ദേവിക്ക് നൽകിയ ആ പ്രണയം എന്ന തീവ്ര അനുഭൂതി…അറിയില്ല…
” ഹലോ…എന്താ ഇത്രയ്ക്ക് ഒരു പ്രാർത്ഥന നമ്മുക്ക് പോണ്ടേ… ”
എല്ലായ്പ്പോഴും ഉള്ളപോലെ അവളുടെ വിളിയിൽ വീണ്ടും സ്വബോധത്തിൽ വന്ന ഞാൻ അവളെ നോക്കി ഒരു പുഞ്ചിരി നൽകിയ ശേഷം ഒരിക്കൽ കൂടി എൻ്റെ ഭഗവാനെ വണങ്ങി തിരിഞ്ഞു നടന്നു…പുറകെ അവളും….
” എന്തായിരുന്നു ഇത്രയ്ക്ക് പ്രാർത്ഥിക്കാനുള്ളത്…? ”
തിരിഞ്ഞു നടക്കുമ്പോൾ ഞാൻ പ്രതീക്ഷിച്ച പോലെ അവളുടെ ചോദ്യം എന്നെ തേടി എത്തി…
” അതൊക്കെ ഞാനും ഭഗവാനും തമ്മിലുള്ള രഹസ്യം അത് ഇയാളെന്തിനാ അറിയുന്നത്…? ”
ഞാൻ അവളെ നോക്കി ഒരു ചിരിയോടെ മറുപടി നൽകിയത് പക്ഷെ പുള്ളിക്കാരിക്ക് പിടിച്ചില്ലാന്ന് തോന്നുന്നു…മുഖം കൊണ്ട് കോപ്രായത്താൽ ശുണ്ഠി കാട്ടി അവൾ നടന്നു കളഞ്ഞു…
” അതേ നമ്മുക്ക് ആ കുളകടവിൽ ഇത്തിരി നേരം ഇരുന്നാലോ…? ”
നടക്കും വഴി നല്ല മനോഹരമായ ക്ഷേത്രകുളം കണ്ട് ഞാൻ അവളെ നോക്കി ചോദിച്ചു….
” എനിക്കൊന്നും വയ്യ…അവിടെ മോത്തം അഴുക്കും അവശിഷ്ടങ്ങളും ആ… നവീകരണം നടക്കുന്നുണ്ട്… ”
അവളെന്റെ അഭിപ്രായത്തെ മുളയിലേ നുള്ളും പോലെ പറിച്ചു കളഞ്ഞു…പക്ഷെ പറഞ്ഞതിൽ കാര്യമുണ്ട് നവീകരണം നടക്കുന്നതിന്റെ ലക്ഷണം ഉണ്ട്…പക്ഷെ അവൾ പറഞ്ഞ പോലെ അത്രയ്ക്ക് അങ്ങ് അഴുക്കില്ല…എന്തോ എനിക്ക് അവിടം ഭംഗി ഉള്ളതായി തന്നെയാണ് തോന്നിയത്… അതുകൊണ്ട് എന്തായാലും ആ കുളക്കടവിൽ ഇച്ചിരി നേരം ഇരുന്നേ മടങ്ങുന്നുള്ളൂ എന്ന് ഞാൻ തീരുമാനിച്ചു….
” അതേ ഇയാള് വരുന്നില്ലെങ്കിൽ വരേണ്ട…ഞാൻ കുറച്ചു നേരം അവിടെ ഇരുന്നിട്ടേ വരുന്നുള്ളൂ…വണ്ടിയുടെ അടുത്ത് വെയിറ്റ് ചെയ്തോ… ”
ഞാൻ അവളെ നോക്കി നിസാരഭവത്തിൽ പറഞ്ഞ് കുളത്തിനടുത്തേക്ക് നടന്നു…അവൾ പുറകെ വരുമെന്ന് എനിക്ക് അറിയായിരുന്നു..അത് വേറെ കാര്യം…ഇതൊക്കെ കക്ഷിയുടെ ഒരു നമ്പറല്ലേ…
ഞാൻ വേഗത്തിൽ തന്നെ നടന്ന് ഇച്ചിരി താഴെ ആയിട്ടുള്ള പടവിലിരുന്നു…പക്ഷെ തൊട്ടടുത്ത നിമിഷം എന്തോ വലത്തേ കാലിൽ തറച്ച് കയറും പോലെ തോന്നി…ഞാൻ പെട്ടന്ന് തന്നെ എൻ്റെ കാല് ഉയർത്തി അടിവശം നോക്കിയതും തല കറങ്ങും പോലെ അനുഭവപ്പെട്ടു…ഒരു ആണി കാലിലേക്ക് തറച്ച് കയറിയിരിക്കുന്നു…അല്ലേലേ ഇത്തരം കാര്യം കണ്ടാ പിടി വിടുന്ന എനിക്ക് ഇത് ധാരാളമായിരുന്നു…ഞാൻ കെടന്ന് അമറാൻ തൊടങ്ങി…
” അമ്മേ…ഓടി വരണേ… ”
” എന്തോടോ പേടിപ്പിച്ചലോ…ഞാൻ കരുതി കുളത്തിൽ എത്തീന്ന്… ”
എൻ്റെ അമർച്ച കേട്ട് ഉള്ളിലേക്ക് കയറി വന്ന ദിവ്യ എന്നെ നോക്കി ചീറി…പക്ഷെ തൊട്ടടുത്ത നിമിഷം കാല് പിടിച്ചുയർത്തി നിൽക്കുന്ന എന്നെ കണ്ടവൾ ഓടി എൻ്റടുത്തേക്ക് വന്നു…
” അയ്യോ ഇതെന്ത് പറ്റി… ”
അവൾ വെപ്രാളത്തോടെ എൻ്റെ കാലെടുത്ത് നോക്കി…
” കണ്ണ് കണ്ടൂടെടി പോത്തെ…എൻ്റെ കാല്…അയ്യോ…എന്തേലും ചെയ്യെടി…. ”
” ഓ ഇതെങ്ങനെയാ കേറിയെ…സൂക്ഷിക്കണ്ടേ…. ”
കൽപ്പടവിലേക്കങ കയറി ഇരുന്ന ശേഷം ദിവ്യ എൻ്റെ കാലെടുത്ത് അവളുടെ മടിയിലേക്ക് വച്ചു…
” നിന്ന് ചോദിച്ചേമൽ ചോദ്യം ചോദിക്കാതെ എന്തേലും ചെയ്യടി…പിന്നെ എങ്ങനെ കേറിന്ന് ഞാൻ മനോരമിയിൽ വിളിച്ച് റൂട്ട് മാപ്പ് ഉണ്ടാക്കി കാണിക്കാം…അവൾടെ കിന്നാരം…അയ്യോ എൻ്റെ കാല്… ”
ഞാൻ അവളുടെ ചോദ്യം ചെയ്യൽ കേട്ട് അവളെ നോക്കി ചീറി…
” മിണ്ടാതിരുന്നോണം… അപ്പോഴേ ഞാൻ പറഞ്ഞതാ ഇങ്ങോട്ട് വരണ്ടാന്ന്…എന്നിട്ടിപ്പൊ വാചകം അടിക്കല്ലേ… ”
അതും പറഞ്ഞ് അവൾ ആ ആണി മൃദുലമായ അവളുടെ കൈവിരലുകളാൽ ഒന്ന് വലിച്ചപ്പോൾ ഇച്ചിരി സുഖം തോന്നി…എന്ന് എൻ്റെ പട്ടി പറയും… മനുഷ്യൻ്റെ നല്ല ജീവനങ്ങ് പോയി…
” നീ എന്താടി കാണിക്കുന്നെ…എൻ്റെ കാല്…വല്ല ഹോസ്പിറ്റലിലും എന്നെ എത്തിച്ച് അത് ഓപറേഷൻ ചെയ്യ്ത് എടുക്കെടീ… ”
ഞാൻ അത് പറയുമ്പോഴും അവൾ ശ്രദ്ധയോടെ എൻ്റെ കാലിൽ നിന്നും അതെടുത്ത് മാറ്റാൻ ശ്രമിക്കുവാർന്നു…
” ഒപ്പറേഷനോ മിണ്ടാതിരി ബുദ്ദുസ്സേ…ഇതിപ്പൊ ശരിയാക്കിത്തരാം… ഒരു ഉറുമ്പ് കടിക്കുന്ന വേദനയേ കാണൂ… ”
അവളെന്നെ നോക്കി ഒരു കള്ള ചിരി ചിരിച്ചപ്പോൾ വേദനയിലും ആശ്വാസം എന്നോണം ഞാനാ ചിരിയിൽ ലയിച്ചു പോയ സമയം അവളെന്റെ കാലിൽ നിന്നും ശക്തിയിൽ ആണി വലിച്ചൂരി…വേദനയിൽ പുളഞ്ഞ ഞാൻ അടുത്ത നിമിഷം കൈയിൽ കിട്ടിയ അവളുടെ ഷോള്ഡറിന് ഭാഗത്തായി ഒരമറൻ കടി വെച്ചുകൊടുത്തു…സത്യം പറഞ്ഞാൽ ആ വേദനയിൽ സംഭവിച്ചു പോയതാ…. മനപൂർവ്വം ഞാൻ അങ്ങനെ ചെയ്യോ…ഒരേ നിമിഷം ഞാനും അവളും അമ്മേന്ന് വിളിച്ചു കൂവി…
” എന്തോന്നാടി ഇത് പുല്ലേ…ഇതാണോ നിൻ്റെ ഉറുമ്പ് കടിക്കുന്ന വേദനാ….ഇത് ഉടുമ്പ് കടിച്ചതിനപ്പുറം ഉണ്ടല്ലോടി…. ”
