അവളെന്തോ പറയാൻ വരുന്നതിന് മുൻപേ എൻ്റെ വായിൽ നിന്നും ശബ്ദം ഉയർന്നു…
” അതിന്….താൻ എന്തിനാ എൻ്റെ കൈ കടിച്ച് പറിച്ചേ…നീറിട്ട് വയ്യ…വട്ടാണോ പൊട്ടക്കണ്ണാ… ”
എൻ്റെ കടി നല്ലരീതിയിൽ കിട്ടിട്ടുണ്ട് അതായിരിക്കണം എൻ്റെ ചീറലിന് മറുപടി അതേ വോളിയത്തിൽ തിരിച്ച് കിട്ടി…
” അത് എന്നെ വേദനിപ്പിക്കോമ്പൊ ആലോചിക്കണം…പിന്നെ മനപൂർവ്വം ഒന്നുമല്ല…ഇനിയിപ്പോ ആണെങ്കിൽ തന്നെ എന്താ ഒരു ആണിയോളം വരില്ല എൻ്റെ ഈ കുഞ്ഞി പല്ല്… ”
ഞാൻ അവൾക്കുള്ള മറുപടി നിസാരഭാവത്തിൽ കൊടുത്ത് എൻ്റെ കാലിലേക്ക് ശ്രദ്ധ കേന്ദ്രീകരിച്ചു… അപ്പോഴേക്കും മുറിവിൽ നിന്നും ചെറുതായി രക്തം വരാൻ തുടങ്ങി…
” എന്നെ കൊണ്ടൊന്നും പറയിക്കേണ്ടാ…ഒരോ വട്ട് കേസ്സ്…ഇങ്ങ് കൊണ്ടാ… ”
ഞാൻ പരിശോധിച്ച കാല് പെട്ടെന്ന് അവൾ വീണ്ടും കടന്ന് പിടിച്ചു…എന്നിട്ട് കൈയ്യിലുണ്ടായിരുന്ന ചെറിയ കർച്ചീഫ് കൊണ്ട് അവിടം ചെറുതായി കെട്ടാൻ തുടങ്ങി…
” ഡോ അടുത്തെങ്ങാനും ട്ടി ട്ടി അടിച്ചിരുന്നോ…? ”
കെട്ടുന്ന തിരക്കിനിടയിലും അവൾ കാര്യം തിരക്കി…
” ഇല്ല ഇന്നലെ രണ്ട് പെഗ്ഗടിച്ചായിരുന്നു…എന്ത്യേ…എടി പുല്ലേ നീ തന്നെ അല്ലേ കുറച്ചു ദിവസം മുന്നേ കുത്തികേറ്റിയത്… ”
ഞാൻ അവളുടെ മറവിയെ ആലോചിച്ച് പറഞ്ഞു…നമ്മുക്ക് അതങ്ങനെ മറക്കാൻ പറ്റുന്ന ഒന്നല്ലല്ലോ….
” ഓ മറന്ന് പോയി…എന്നാ പിന്നെ പ്രശ്നമില്ല ഒന്ന് ഡ്രസ്സ് ചെയ്യ്താ മതി…വാ അടുത്തൊരു ക്ലിനിക്കുണ്ട്… “
അവൾ എഴുന്നേറ്റ് പോകാം എന്നർത്ഥത്തിൽ എന്നെ നോക്കി ചോദിച്ചു…പക്ഷെ ഇച്ചിരി വേദന ഉള്ളത് കാരണം
ഞാൻ എഴുന്നേൽക്കാൻ പാട് പെട്ടു…അത് കണ്ടതും അവളെന്നെ ചെറുതായി സഹായിക്കാൻ എന്നോണം ഒന്ന് താങ്ങി…
” ഇനി ഇതിന് ടാക്സ് വാങ്ങുവോ…? ”
അവളുടെ തോളിലേക്ക് കൈ എടുത്തുവെക്കുമ്പോൾ ചിരിയോടെ ഞാൻ ചോദിച്ചു…
” ചിലപ്പൊ വാങ്ങീന്ന് വരും…മോൻ തൽക്കാലം മിണ്ടാതെ നടക്ക് കേട്ടോ… ”
ഒരു കുലുങ്ങി ചിരിയോടെ പറഞ്ഞുകൊണ്ടവളെന്നേയും താങ്ങി ബൈക്ക് ലക്ഷ്യമാക്കി നടന്നു…ആ സമയം ഞാൻ ഒന്നുകൂടെ തിരിഞ്ഞു നോക്കാൻ മറന്നില്ല… ആപത്ത് സമയത്ത് ഇതുപോലെ എന്നും എൻ്റെ കൂടെ ഇവളുണ്ടാകണേന്ന് ഭഗവാനോട് അപേക്ഷിക്കാൻ….
അങ്ങനെ ഞൊണ്ടി ഞൊണ്ടി അവസാനം ചെരുപ്പ് വച്ച സ്ഥലത്ത് എത്തി… ചെരുപ്പിട്ടപ്പൊ ആദ്യത്തെ അത്ര ബുദ്ധിമുട്ടില്ല…എന്നാലും ഞാൻ അവളേയും താങ്ങിയാണ് നടന്നത്…അങ്ങനെ ബൈക്കിനടുത്തേക്ക് എത്തിയതും അവളേയും കൊണ്ട് അവളുടെ നിർദേശപ്രകാരം ഞാൻ അടുത്തുള്ള ക്ലിനിക്കിൽ എത്തി…
” ഇവിടെ ഡോക്ടർ ഒക്കെ കാണുവോടി… ”
അവൾ കൊണ്ട് വന്ന ചെറിയോരു ക്ലിനിക്കിന് മുന്നിലെത്തിയപ്പോൾ സംശയരൂപേണ ഞാൻ ചോദിച്ചു…
” പിന്നേ ഇയാളെ ഈ ചെറിയ കാര്യത്തിന് ഞാൻ ആംബുലൻസ് വിളിച്ച് എയിംസിലേക്ക് കൊണ്ടാവാം…ഇങ്ങോട്ട് വാ… ”
അവളെന്റെ ചോദ്യം കേട്ട് എന്നേയും പിടിച്ച് വലിച്ച് ഉള്ളിലേക്ക് കയറി…അപ്പോളായിരുന്നു അതിനുള്ളിൽ ഒരു കിടിലൻ നഴ്സ് കൊച്ചിനെ ഞാൻ കാണുന്നത്… ഒറ്റയടിക്ക് നമ്മുടെ സിനിമ നടി ത്രിഷയുടെ ഒക്കെ ഒരു കട്ട്….
” അംബലം ചെറുതാണെങ്കിലും പ്രതിഷ്ഠ വലുതാണ് മോളെ… “
ആ സമയത്ത് അറിയാതെ എൻ്റെ വായിൽ നിന്നും ആ വാക്കുകൾ വന്നത് മാത്രമോർമ്മയുണ്ട് പിന്നെ ഞാൻ കാണുന്നത് എന്നെ ദഹിപ്പിക്കുന്ന കണ്ണുകളോടെ നോക്കുന്ന ദിവ്യയെ ആണ്…അതോടെ ഞാൻ വേഗം തലതാഴ്ത്തി… എന്നിട്ട് വേഗം ദിവ്യക്കൊപ്പം ഡോക്ടറുടെ ബോർഡ് എഴുതിയ റൂമിനടുത്തേക്ക് നടന്നു…അതികം തിരക്കൊന്നുമില്ലാത്തത് കൊണ്ട് വേഗം തന്നെ കയറി കാണാൻ പറ്റി…
” ഹലോ എന്ത് പറ്റി…പറയൂ… ”
ഡോക്ടർ ഒരു ചിരിയോടെ കാര്യം തിരക്കിയപ്പോൾ നടന്ന കാര്യം ഞാൻ പറയാൻ തുടങ്ങും മുൻപേ ദിവ്യ അയാൾക്ക് മുന്നിൽ വിളമ്പി…
” ഹോ എന്നിട്ട് കാലെവിടെ കാണിക്കൂ… ”
ഡോക്ടർ എന്നെ നോക്കി ചോദിച്ചതും ഞാൻ വേഗം ചെരുപ്പഴിച്ച് കാല് കാണിച്ചു കൊടുത്തു…
” സാർ ട്ടീ ട്ടീ ഇപ്പൊ അടുത്ത് അടിച്ചതാണ്… ”
” ഓ….അപ്പൊ ഇയാൾക്ക് ഇത് തന്നെയാണോ പണീ….കൊച്ചുകുട്ടികളെ പോലെ….കുറച്ച് ശ്രദ്ധിക്കണ്ടേടോ…. ”
പുള്ളിക്കാരൻ എന്നെ നൈസൈയിട്ട് ഒന്ന് ഊതിയപ്പോൾ ഞാൻ ആകെ ചൂളിപ്പോയി…അവളാണെങ്കിൽ ചിരിയും…അല്ലേലും ആണിയൊക്കെ അപ്പൊയിൻ്റ്മെൻ്റ് എടുത്തിട്ട് ആണോ കാലിൽ കയറുന്നത് എന്ന് ആ ഡോക്ടറോട് ചോദിക്കണമെന്നുണ്ട്…പക്ഷെ വേണ്ടാ വല്ല ഗുളികയും തന്ന് കിടത്തത്തിൽ ആക്കിയാലോ….
” മ്മ് എന്നാ പിന്നെ കുഴപ്പമില്ല പുറത്ത് നേഴ്സ് കാണും ഒന്ന് ക്ലീനാക്കി ഡ്രസ്സ് ചെയ്യ്താ മതി… ”
പുള്ളിക്കാരൻ തൊട്ടടുത്തുള്ള ഒരു പേപ്പറിൽ എന്തോ എഴുതി ദിവ്യയുടെ കൈയ്യിൽ കൊടുത്തു…അതോടെ ഒരു നന്ദി വാക്കും പറഞ്ഞ് ഞങ്ങൾ പുറത്തേക്കിറങ്ങി…
അപ്പോഴായിരുന്നു വീണ്ടും ആ നേഴ്സിനെ കാണുന്നത് ഇത്തവണ പക്ഷെ ആദ്യത്തെ പോലെ അല്ല ദിവ്യയുടെ മനസ്സറിയാൻ വേണ്ടി മാത്രം ഞാൻ ആ നേഴ്സിനെ തന്നെ നോക്കി നിന്നു… അപ്പോഴേക്കും ദിവ്യ ഡോക്ടർ തന്ന പേപ്പർ അവൾക്ക് നേരെ നീട്ടിയിരുന്നു…
” വരു ആ റൂമിൽ… ”
ആ നേഴ്സ് എന്നെയും നോക്കി ചിരിച്ചുകൊണ്ട് ഡ്രസിംഗ് റൂം ചൂണ്ടാകാണിച്ച് അവിടേക്ക് നടന്നു…അതോടെ ഞാനും പുറകെ വച്ച് പിടിച്ചു…
പിന്നെ അവൾ പറഞ്ഞത് പ്രകാരം ഞാൻ അവിടുള്ള ഒരു ബെഡ്ഡിൽ ഇരുന്നു…തുടർന്ന് കാല് വൃത്തിയാക്കി അവൾ മരുന്ന് വെക്കാനുള്ള പരിപാടിയിലേക്ക് കടന്നു…അപ്പോഴും ദിവ്യ വാതിലിനടുത്ത് തന്നെ നിന്ന് ഇതൊക്കെ വീക്ഷിക്കുന്നുണ്ടായിരുന്നു…
” അല്ല ഇയാളുടെ പേരെന്താ… ”
ഞാൻ ചുമ്മാ ആ നേഴ്സിനോട് കുശാലാന്വേഷണം ചോദിക്കും പോലെ തിരക്കി…
” മാളവിക… ”
അവൾ ചിരിയോടെ എനിക്ക് മറുപടി തന്നു…ഇതൊന്നും ദിവ്യയ്ക്ക് പിടിക്കുന്നില്ല എന്നെനിക്ക് തോന്നി…ചിലപ്പൊ തോന്നല് മാത്രം ആയിരിക്കും…കാരണം അത് നമ്മൾ ആഗ്രഹിക്കുന്നുണ്ടല്ലോ അതുകൊണ്ട്…
” ഓ….വീട് എവിടാ…വീട്ടിലാരൊക്കെയുണ്ട്… ”
ഞാൻ വീണ്ടും ഭാവ വ്യത്യാസം ഒന്നുമില്ലാതെ തിരക്കി…
” ഹാ എന്താ മാഷേ… സെൻസസ് എടുക്കൽ ആണോ മാഷിൻ്റെ പണി… ”
എന്റെ ചോദ്യങ്ങൾ കേട്ട് ഒരു കള്ള മുഖഭാവത്തോടെ അവളെന്നെ ഒന്ന് കളിയാക്കി…പക്ഷെ ആ മാഷ് വിളി എനിക്ക് ഇഷ്ട്ടപെട്ടു… നല്ല ഒരു നാടൻ വൈബ്… ” ഇവിടെ ഒരോരുത്തരുണ്ട് പൊട്ടക്കണ്ണൻ…പട്ടീ…തെണ്ടീ….ഇതൊക്കെയേ വായിൽ വരൂ… ഇങ്ങനെ പോയാൽ മിക്കവാറും തന്തക്ക് വിളി കൂടി കേൾക്കാം… ” ഞാൻ മനസ്സിലോർത്ത് ദിവ്യയെ ഒന്ന് പാളി നോക്കി… അത് കണ്ടതും അവൾ തല വെട്ടിച്ചു കളഞ്ഞു…
” ഹേയ് ഞാൻ ചുമ്മാ ഒരു കുശലം ചോദിച്ചതല്ലേ… ”
ഞാൻ വീണ്ടും മാളവികയിലേക്കായി ശ്രദ്ധ…
” ഓ അങ്ങനെ…വീട് ഇവിടെ അടുത്ത് തന്നെ… പിന്നെ വീട്ടിൽ അച്ഛനമ്മമാരും ഒരു അനിയനും…പോരെ… ”
