🌸പാരിജാതം – 1🌸 27അടിപൊളി  

ഞാൻ പല്ല് കടിച്ചു കൊണ്ട് മാമിയോട് പറഞ്ഞൂ..

” ജീവിക്കാൻ പേടിയുള്ളതൊക്ക് ചത്തൊടുങ്ങത് തന്ന നല്ലത്..,”

 

പാത്തുമ്മ മാമി വേവലാതിയോടെയും വെപ്രാലത്തോടെയും പറഞ്ഞു..

“എന്ത് പറയാനാ മോനെ, അവൻ്റെ കൂടെ ഉണ്ടായിരുന്ന കൂട്ടു കച്ചവടക്കാരൻ അവനെ പറ്റിച്ചത് ആണെന്നാ പറയുന്നത്, കെട്ടിക്കാറായ രണ്ടു പിള്ളേരാ അവന്, സ്വരൂ കൂട്ടി വെച്ചിരുന്ന സ്വർണ്ണവും പണ്ടവുമൊക്കെ പണയം വെച്ച് എന്തോ തുടങ്ങിയതാ… അവൻ്റെ പെണ്ണ് വിളിച്ചിട്ട് ഭയങ്കര കരച്ചില് മക്കളെ, അവിടെ വരെ പോവാൻ ഇറങ്ങിയപ്പോ കൈ ചിലവിനു ഉള്ള പൈസ പോലും എൻ്റെ കയ്യിൽ ഇല്ല, അതാ ഇങ്ങോട്ട് ഓടി വന്നത്…. ”

 

” നിങ്ങളിങ്ങോട്ട് കയറി ഇരിക്കീം, ഞാൻ ദാ വരുന്നു…”

എന്നും പറഞ്ഞു അകത്തു കയറി പേഴ്സിൽ നിന്ന് ഒരു ഒരു മൂവായിരം രൂപ എടുത്തു കൊണ്ട് വന്നു കൊടുത്തു..

 

അവരതും വാങ്ങി ഒരു കുഞ്ഞു പഴ്‌സിൽ തിരുകി വെച്ച് കൊണ്ട് എഴുന്നേറ്റു,,

” ഞാൻ പോട്ടെ മോനെ, ഇപ്പൊ പോയാലേ ഉച്ചക്കെങ്കിലും അവിടെ എത്താൻ പറ്റൂ..”

ഇതും പറഞ്ഞു തിടുക്കം കൂട്ടി എഴുന്നേറ്റു നടക്കുന്നത് കണ്ടപ്പോൾ എനിക്കെന്തോ ഒരു വിഷമം തോന്നി,

 

” അല്ലെങ്കിൽ അവിടെ നിക്കീന്നെ.. ഞാനും കൂടി വരാം.. കുടുംബക്കാരു ഒക്കെ കളഞ്ഞതല്ലേ അതുങ്ങളെ, നിങ്ങള് മാത്രം പോയിട്ട് അവരുടെ കൂടെ കരയാം എന്നല്ലാതെ എന്തോന്ന് ഉപയോഗം… ഞാനൊന്നു കുളിക്കട്ടെ ഇങ്ങോട്ട് കയറി ഇരിക്കേ, ഞാനൊന്നു കുളിക്കട്ടെ… ”

 

ഇത്രയും പറഞ്ഞ് ഞാൻ അകത്തോട്ടു കയറി, കസേരയിൽ അലക്ഷ്യമായി ഇട്ടിരുന്ന തോര്ത്തും എടുത്തു പുറത്തെ കുളിമുറിയിൽ കയറി,

ഷവറിൽ നിന്ന് തണുത്ത വെള്ളം തലയിൽ വീണ് ബലിഷ്ഠമായ ശരീരം നനച്ചു കുളിര് കോരിച്ചു ഒഴുകിയിറങ്ങി, പാത്തുമ്മ മാമി അടിച്ചു വാരുമ്പോഴും തറ തുടക്കുമ്പോഴുമൊക്കെ ഓരോ കാര്യങ്ങൽ ഇങ്ങനെ പറഞ്ഞു കൊണ്ടിരിക്കും, ഒരു ഉമ്മയുടെ വാത്സല്ല്യത്തോടെയുള്ള സംസാരം കേൾക്കുന്നത് സ്വതവേ ഇഷ്ടമുള്ള ഞാൻ പാത്തുമ്മ മാമിയുടെ നല്ലൊരു കേൾവിക്കാരനായി ഇരുന്നു കൊടുക്കാറുണ്ട്, ങ്ങനെയുള്ള സംസാരങ്ങളുടെ കൂട്ടത്തിൽ എന്നോ ഒരു ദിവസം ആര്യങ്കാവിലുള്ള ഈയൊരു ബന്ധുവിൻ്റെ കാര്യവും പറഞ്ഞിരുന്നു, ഏതോ പ്രമാണി കുടുംബത്തിലെ പെണ്ണിനെ പ്രേമിച്ച് ഒളിച്ചോടി പോയ ദരിദ്ര കുടുംബത്തിലെ അബൂബക്കർ ൻ്റെ കഥ..

കണ്ട് കിട്ടിയാൽ രണ്ടിനെയും കൊല്ലും എന്നും പറഞ്ഞു പെണ്ണിൻ്റെ കുടുംബക്കാരു അബൂബക്കറിനെ തേടി നാടാകെ കൊലവിളിച്ചു നടന്നു.. പിന്നെ എങ്ങനെയൊക്കെയോ അബൂബക്കറിൻ്റെ അകന്ന ബന്ധത്തിലുള്ള പാത്തുമ്മ മാമിയുടെ അടുത്ത് വരികയും മാമി ആര്യങ്കാവിൽ ഒരു വാടക വീടൊക്കെ ഒപ്പിച്ചു കൊടുത്തു അവര് അവിടെ താമസിച്ചു രണ്ടു പിള്ളേര് ഒക്കെ ആയിട്ട് സ്വസ്ഥമായി ജീവിക്കുന്നു എന്നൊക്കെ പറഞ്ഞിട്ടുണ്ട്..

ആരും ഇല്ലാത്തവരെ സഹായിക്കാൻ എന്നെപ്പോലെ ആരുമില്ലാത്തവരെങ്കിലും വേണ്ടേ.. അത് കൊണ്ടാണ് ഞാൻ കൂടി പാത്തുമ്മ മാമിക്കൊപ്പം പോകാമെന്ന് തീരുമാനിച്ചത്.. ഒന്നുമില്ലെങ്കിലും മാമിയേ കുറച്ചു നേരത്തെ എങ്കിലും അവിടെ എത്തിക്കാമല്ലോ..

 

കുളിച്ചു കയറി ഡ്രസ്സും മാറി ഇറങ്ങുമ്പോൾ പാത്തുമ്മ മാമി മിറ്റം അടിച്ചു വാരുകയായിരുന്നു..

” ഇതെന്തുവാ തള്ളേ… നിങ്ങക്കിപ്പോ തന്ന അടിച്ചു വാരിയെ പറ്റോളോ കയ്യും കഴുകി വന്നു വണ്ടിയിൽ കയറ്…”

ജീപ്പിൻ്റെ ബോണറ്റ് തുറന്നു റേഡിയറ്ററിലെ വെള്ളം നോക്കിക്കൊണ്ട് ഞാൻ പറഞ്ഞു…

 

” നീ കുളിച്ചിട്ട് വരുന്ന സമയത്തിന് അടിച്ചു വാരാമെന്നു വെച്ചതാ മക്കളെ ഞാൻ ദാ വരുന്നു..”

ചൂല് കൊണ്ട് പോയി വീടിൻ്റെ സൈഡിൽ ഇട്ടു പൈപ്പിൽ നിന്നും കയ്യും കഴുകി മാമി ഓടി ജീപ്പിൽ കയറി..

 

തൊണ്ണൂറു മോഡൽ ജീപ്പ് ആര്യങ്കാവ് ലക്ഷ്യമാക്കി കുതിച്ചു.. ഇവിടെ നിന്ന് കത്തിച്ചു വിട്ടാൽ നെടുമങ്ങാട് പാലോട് മടത്തറ കുളത്തൂപ്പുഴ തെന്മല വഴി നേരെ ആര്യങ്കാവ്… ഒരു ഒന്നൊന്നര മണിക്കൂർ ദൂരമുണ്ട്..