🌸പാരിജാതം – 1🌸 27അടിപൊളി  

എൻ്റെ ജീപ്പ് റോഡിൽ ഇറങ്ങിയാൽ ഏതൊരു വണ്ടി പ്രാന്തനും ഒന്ന് നോക്കും, പഴയ വീഞ്ഞിനെ പുതിയ കുപ്പിയിൽ ആക്കിയ പോലെ ഓൾഡ് മോഡൽ ജീപ്പിനെ അതിൻ്റെ പഴമ നഷ്ടപ്പെടാത്ത രീതിയിൽ ഭംഗിയായി മോഡിഫൈ ചെയ്തു സൂക്ഷിച്ചിരുന്നു ഞാൻ..

എൻ്റെ ഡ്രൈവിംഗ് പഠനവും, കൈ തെളിഞ്ഞതും ഒക്കെ ഈ വണ്ടിയിൽ തന്നെയാണ്,, തങ്കയ്യൻ മുതലാളി പോകാൻ നേരത്ത് ലോറിയുടെയും ജീപ്പിൻ്റെയും താക്കോൽ കയ്യിലേക്ക് വെച്ച് തന്നപ്പോൾ തന്നെ ഞാൻ മനസ്സിൽ എഴുതിയിട്ടതാണ് ഇത് രണ്ടും ഒരിക്കലും ഞാൻ കൈ വിട്ടു കളയില്ല എന്ന്…

 

കിലോമീറ്ററുകൾ പിന്നിടുമ്പോഴും പാത്തുമ്മ മാമി അബൂബക്കറിൻ്റെ കുട്ടിക്കാലവും കല്യാണവും ജീവിതവുമൊക്കെ വീണ്ടും വീണ്ടും പറയുന്നുണ്ടായിരുന്നു…

എല്ലാം മൂളി കേട്ട് കൊണ്ട് ഞാൻ ഡ്രൈവിങ്ങിൽ തന്നെ ശ്രദ്ധ കൊടുത്തു.. ഇന്നലെ രാത്രിയിലും ഒന്നും കഴിക്കാതെ കിടന്നത് കൊണ്ടും രാവിലെ എഴുന്നേറ്റിട്ട് പച്ചവെള്ളം പോലും കുടിക്കത്തത് കൊണ്ടും നല്ല വിശപ്പുമുണ്ട്..

ആര്യങ്കാവ് എത്താറായപ്പോൾ പാത്തുമ്മ മാമി മറ്റൊരു വഴി കാണിച്ചു തന്നു, പിന്നെ അങ്ങോട്ട് മാമി പറയുന്ന വഴിയെ ജീപ്പ് കുതിച്ചു പാഞ്ഞു.. മെയിൻ റോഡിൽ നിന്നും ഗ്രാമപ്രദ്ദേശത്തിലേക്കുള്ള ദൃശ്യങ്ങൾ വ്യക്തമായി തുടങ്ങി.. ഇടതു സൈഡിൽ കാടും വലതു വശം വീടുകളും..

 

” അവിടെ ചേര്ത്ത് നിർത്തിക്കോ മോനെ ആ കാണുന്നതാ വീട്..”

മാമി ചൂണ്ടി കാണിച്ച വീട്ടിലേക്ക് നോക്കി കൊണ്ട് ഞാൻ ജീപ്പ് സൈഡ് ആക്കി..

റോഡ് സൈഡിൽ നിന്നും കുറച്ചു ദൂരെ മാറി ഒരു കുഞ്ഞ് വീട്, തേപ്പ് പണിയൊന്നും കഴിഞ്ഞിട്ടില്ല,, അവിടെയും ഇവിടെയുമോക്കെ കുറച്ചു പെണ്ണുങ്ങൾ കൂടി നിന്ന് ദുഃഖ കൈ പൂണ്ട് കാര്യം പറഞ്ഞു നിൽക്കുന്നു.. വേഷവിധാനം കണ്ടിട്ട് അയൽക്കാർ തന്നെന്നു ഉറപ്പിക്കാം..

കുറച്ചു അപ്പുറത്തായി ഒരു ഇന്നോവ കാർ കിടക്കുന്നു അതിൽ ചാരി കുറച്ചു ആണുങ്ങളും നിൽക്കുന്നുണ്ട്..

പരിചയമില്ലാത്ത ജീപ്പ് കണ്ടിട്ട് ആണെന്ന് തോന്നുന്നു എല്ലാവരും ഇങ്ങോട്ട് തന്നെ ശ്രദ്ധിക്കുന്നുണ്ട്..

പാത്തുമ്മ മാമി ജീപ്പിൽ നിന്ന് ഇറങ്ങുമ്പോൾ തന്നെ കണ്ണീരോക്കെ ഉരുണ്ട് കൂടി വീണു തുടങ്ങിയിരുന്നു.. ഞാനും മാമിയുടെ പിന്നാലെ വീട് ലക്ഷ്യമാക്കി നടന്നു.. ഒരു ചെറിയ ഇടവഴിയാണ്.. റബ്ബർ തോട്ടത്തിൻ്റെ നടുക്കാണ് വീട്..

മാമി വീട്ടിലേക്ക് കയറിയതും രണ്ടു മൂന്നു പെണ്ണുങ്ങളുടെ അലമുറയിട്ടുള്ള കരച്ചില് കേട്ട് തുടങ്ങി.. ഞാൻ പുറത്ത് തന്നെ നിന്നു..

തോട്ടത്തിൻ്റെ ഇടയിലെ കല്ല് കെട്ടിൽ ഇരുന്നു ബീഡി വലിക്കുന്ന ഒരു അപ്പൂപ്പൻ്റെ അടുത്തേക്ക് ഞാൻ ചെന്നു..

വിദൂരതയിൽ കണ്ണും നട്ടിരുന്നു ബീഡി പുകയ്ക്കുന്ന അപ്പൂപ്പൻ എന്നെ ശ്രദ്ധിക്കുന്നത് പോലുമില്ല.. ഒരു തുടക്കാമെന്നോണം ഞാനൊന്നു ചുമച്ചു.. മുഖത്തേക്ക് ഒന്ന് രൂക്ഷമായി നോക്കിയിട്ട് വീണ്ടും അയ്യാൾ വേറെ എങ്ങോട്ടോ നോക്കിയിരുപ്പായി..

 

” എപ്പോഴായിരുന്നു സംഭവം .”

മൗനം ഭേദിച്ച് കൊണ്ട് ഞാൻ സംസാരിച്ചു തുടങ്ങി…

 

” നിങ്ങളാരാ…”

പരുക്കൻ സ്വരത്തിൽ മറു ചോദ്യം…

 

” ഞാൻ ഇവിടത്തെ ഒരു ബന്ധുവിനെയും കൊണ്ട് വന്നതാ.. ബോഡി കൊണ്ട് വരാറായോ..”

 

” കൊണ്ട് വന്നിട്ട് എന്തിനാ… ഇവിടെ കിടന്നു അഴുകി നാറത്തെ ഉള്ളൂ.. പള്ളിയിൽ അടക്കാൻ സമ്മതിക്കില്ലെന്ന് പറഞ്ഞു നിക്കുവല്ലേ എല്ലാം കൂടി..

ഇവിടെങ്ങാനും കുഴിച്ചിടാമെന്നു കരുതിയാൽ വാടക വീടല്ലേ.. ഒരു ആണ് തരിയെങ്കിലും ഇല്ലാതെ പോയല്ലോ ദൈവമേ അവന്… ”

 

ശരിക്കും പ്രശ്നം ഗുരുതരമാണെന്ന് അപ്പൂപ്പൻ്റെ വാക്കുകളിൽ നിന്ന് തന്നെ വ്യക്തമായ സ്ഥിതിക്ക് ആര്യങ്കാവ് സ്റ്റേഷനിലും എൻ്റെ പേരിൽ ഒരു പോലീസ് കേസ് ഉറപ്പായി..

 

” അപ്പൂപ്പാ ഞാൻ ഇവിടെ പുതിയ ആളാ, പ്രശ്നം ഒന്ന് വിവരിച്ച് പറഞ്ഞാ അങ്ങേർക്ക് ഇല്ലാതെ പോയ ആൺതരിയുടെ കടമ ഞാൻ വെടിപ്പായി ചെയ്തു തരാം..”

 

എൻ്റെ വാക്കുകളുടെ ദൃഢതയും, ഉറച്ച ശബ്ദവും അങ്ങേരുടെ കണ്ണുകളിൽ ഒരു തിളക്കം തീർത്തു, എന്നിലൊരു പ്രതീക്ഷ വെച്ച് കൊണ്ട് പുള്ളിക്കാരൻ കാര്യങ്ങള് വിവരിച്ചു തന്നു..