🌸പാരിജാതം – 1🌸 27അടിപൊളി  

ജാസറിന് നേരെ തിരിഞ്ഞ രണ്ടാമത്തെ തടിയൻ്റെ ചെവി പൊത്തി കിട്ടിയ അടി കൊണ്ട് അവിടെ തന്ന ഇരുന്നു പോയി..

അന്ധാളിച്ചു നിന്നുപോയ മൂന്നാമനെ കഴുത്തിന് കുത്തിപ്പിടിച്ച് അടുത്തുള്ള റബ്ബർ മരത്തിൽ ചേര്ത്ത് പിടിച്ചു മൂക്ക് ലക്ഷ്യമാക്കി ജാസറിന്റെ ഉരുക്ക് മുഷ്ടി പാഞ്ഞു.. തുടരെ തുടരെയുള്ള ഇടിയിൽ മൂക്കും വായും പൊളിഞ്ഞു ജാസറിൻ്റെ മുഖത്തേക്കും രക്തം ചിതറി.. എന്നിട്ടും നിർത്താതേയുള്ള ഇടിയിൽ അവൻ്റെ ബോധം നഷ്ടപ്പെട്ടിട്ടും ജാസിർ നിർത്തിയില്ല.. ഇത് കണ്ട് നിന്ന നാലാമൻ ഭയന്ന് വിറച്ച് കൊണ്ട് ഓടാൻ പോലും കഴിയാതെ വിറങ്ങലിച്ചു നിന്നു.. എല്ലാവർക്കും മനസ്സിലായി കഴിഞ്ഞു വന്നിറങ്ങിയത് നിസ്സാരക്കാരനല്ല എന്ന്.. തറയിൽ അടി കൊണ്ട് കിടന്ന രണ്ടു പേരും ഭയന്ന് പിറകിലേക്ക് നിരങ്ങി മാറി..

ജാസറിൻ്റെ കോപം മുഴുവനായും അവനിലേക്ക് പെയ്തിറങ്ങി.. മുഖം തിരിച്ചു അറിയാൻ കഴിയാത്ത തരത്തിൽ തകർന്നു പോയി കഴിഞ്ഞിരിക്കുന്നു.. ചത്ത് കാണുമെന്ന് കരുതി കഴുത്തിലെ പിടി വിട്ടപ്പോൾ താഴേക്ക് അയ്യാൾ റബ്ബർ മരത്തിൽ ചാരി നിരങ്ങി താഴേക്ക് വീണു..

നാലാമൻ്റെ മുഖം വിളറി വെളുത്തിരുന്നു.. ശരിക്കും ഇങ്ങനൊരു ക്രൂരമായ മർദ്ദനം അകത്തു നിന്ന് കണ്ട പാത്തുമ്മ മാമി പോലും പ്രതീക്ഷിച്ചിരുന്നില്ല..

 

” ആ കിണറ്റിൽ നിന്നും ഒരു തൊട്ടി വെള്ളം ഇങ്ങു കോരിക്കെ..”

നാലാമൻ്റെ മുഖത്തേക്ക് നോക്കി ജാസർ പറഞ്ഞു..

കടുവയെ കണ്ട ആട്ടിൻ കുട്ടിയെ പോലെ കിടു കിട വിറച്ചത് അല്ലാതെ അവന് അനങ്ങാൻ പോലും കഴിഞ്ഞില്ല..

 

” നിന്നോടാ പറഞ്ഞത്, ഒരു തൊട്ടി വെള്ളം ഇങ്ങു കോരാൻ..”

ജാസിർ ശബ്ദം ഉയർത്തിയപ്പോൾ ഒരു ഞെട്ടലോടെ അവൻ ഓടിപ്പോയി സൈഡിലെ കിണറ്റിലേക്ക് തൊട്ടിയിറങ്ങി വെള്ളം വലിച്ചു കയറ്റി..

 

” കയ്യിലേക്ക് ഒഴിക്ക്,,”

ജാസറിന്റെ ആജ്ഞ അനുസരിക്കുന്ന അടിമയെ പോലെ കോരത് മാപ്പിളയുടെ ഗുണ്ട വെള്ളം കുറേശ്ശ ആയി ജാസർൻ്റെ കയ്യിലേക്ക് ഒഴിച്ച് കൊടുത്തു..

കൈയ്യിൽ പറ്റിയ ചോര കഴുകി കളഞ്ഞ് മുഖത്തേക്കും വെള്ളം ഒഴിച്ച് കഴുകി ജാസിർ കൈ കുടഞ്ഞു വെള്ളം കളഞ്ഞ് കൊണ്ട് പറഞ്ഞു..

 

” ഈ കിടക്കുന്നവൻ എങ്ങനെ ചത്തു എന്ന് ആര് ചോദിച്ചാലും പന്നിക്ക് വെച്ച പടക്കം എടുത്തു കടിച്ചു ആത്മഹത്യ ചെയ്തു എന്നല്ലേ നീ പറയൂ…”

 

വെള്ളം കോരിയവൻ വിറച്ച് വിറച്ച് മറുപടി കൊടുത്തു..

 

“അങ്ങനെ പറയാം….”

 

” ഞാൻ നേരത്തെ പറഞ്ഞത് നീ പോയി കോരതിനോട് പറയാൻ മറക്കരുത് .. ഇനി ഒരുത്തനെ കൂടെ കൊന്നാലേ ഇവിടെ കയറി മേയാൻ പറ്റൂ എന്ന്… അത് മറക്കുവോ… “

 

“ഇല്ല മറക്കില്ല…”

ഗുണ്ടയുടെ നിഷ്ക്കളങ്കമായ ഭയന്ന് വിറച്ച മറുപടി കേട്ട് നേരത്തെ കാര്യങ്ങള് വിവരിച്ചു കൊടുത്ത അപ്പൂപ്പൻ പൊട്ടിച്ചിരിച്ചു…

 

” നീ ചിലപ്പോൾ മറന്നാലോ… മറക്കാതിരിക്കാൻ ഇതിരിക്കട്ടെ… “

 

ജാസിർ ഗുണ്ടയുടെ ഇടതു കൈ പിടിച്ചു ചൂണ്ട് വിരൽ പിന്നിലേക്ക് മലർത്തി,,,

ടക്ക് എന്നൊരു ശബ്ദത്തോടെ വിരൽ ഒടിഞ്ഞു.. അയ്യാൾ അലറി വിളിച്ചു കരഞ്ഞു…

 

” ജീവനുള്ള മൂന്ന് പേരും കേൾക്കാനാ പറയുന്നത്,, ഇനി നിൻ്റെയൊക്കെ മുഖം ഞാൻ കാണേണ്ടി വന്നാൽ…. പിന്നെ നിൻ്റെയൊക്കെ മുഖം ഒരുത്തനും കാണില്ല,,,”

ജാസർൻ്റെ ശബ്ദം മലമടക്കുകളിൽ പ്രതിഫലിച്ചു കേട്ടു.. മൂന്ന് ഗുണ്ടകളും കൂടി ഞരങ്ങിയും നിരങ്ങിയും മുഖം പൊളിഞ്ഞു കിടക്കുന്ന നാലാമനെ വലിച്ചു തൂക്കിയെടുത്ത് പോകുന്നത് അയൽവാസികളും അവിടെ അവിടെയായി കൂടിയ നാട്ടുകാരും കണ്ടു…

പിന്നെയെല്ലാം വളരെ പെട്ടന്നായിരുന്നു.. പോസ്റ്റ് മോർട്ടം കഴിഞ്ഞ ബോഡി വീട്ടിൽ കൊണ്ട് വന്നു, റസിയയും മക്കളും അബൂബക്കറിൻ്റെ ചേതനയറ്റ ശരീരം കെട്ടിപ്പിടിച്ചു പൊട്ടിക്കരഞ്ഞു.. ളുഹ്ർ ബാങ്ക് കേട്ട് കഴിഞ്ഞപ്പോൾ ബോഡിയുമായി ജാസിറും കുറച്ചു നാട്ടുകാരും പള്ളിയിൽ എത്തി, ആരും ഒരു എതിർപ്പും പറയാതെ ഖബർ അടക്കി,, എല്ലാത്തിനും ജാസർ നേതൃത്വം വഹിച്ചു..