പിന്നെ വർഷങ്ങൾ കഴിഞ്ഞപ്പോൾ അദ്ദേഹം പുതിയ ചെറുപ്പക്കാരി ബോസിനോടൊപ്പമായി. ബന്ധമൊഴിഞ്ഞു. ഈ വീട് ഞങ്ങൾക്കു കിട്ടി. കുട്ടികളുടെ പഠനത്തിനുപോലും ചില്ലിക്കാശു തന്നില്ല . അദ്ദേഹം പോയിട്ട് അഞ്ചു കൊല്ലമായി. എൻ്റെ ഏട്ടൻ സഹകരണ ബാങ്കിൽ തരപ്പെടുത്തിയ ഓഫീസ് അറ്റൻ്റിൻ്റെ പണിയെടുത്താണ് ഞാനെൻ്റെ മക്കളെ വളർത്തണത്.
ഗൗരി തേങ്ങിയപ്പോൾ രാഹുലവളെ അടക്കിപ്പിടിച്ചു. അമ്മേ! ഞാനില്ലേ! യമുനേച്ചിയില്ലേ! ഏട്ടനും കാണും. ഞാൻ പറയാം… നമ്മളൊരു കുടുംബമല്ലേ!
ഗൗരി പൊട്ടിക്കരഞ്ഞപ്പോൾ രാഹുലും യമുനയും അവളെ കെട്ടിപ്പിടിച്ചു.
കുട്ടികളെവിടെ? യമുനയാരാഞ്ഞു.
രണ്ടും സ്ക്കൂളിലെന്തോ കലാ പരിപാടീടെ റിഹേഴ്സലിനു പോയതാ. വരണ്ട സമയം കഴിഞ്ഞു. നിങ്ങൾ വരൂ..
രാഹുൽ വരാന്തയിലെ അരമതിലിലും യമുനയും ഗൗരിയും സോഫയിലുമിരുന്നു. ഗൗരിയിട്ട ചായയും കുടിച്ച് രാഹുലും കുഞ്ഞമ്മയും വിശേഷങ്ങൾ കൈ മാറി. ഒരു ക്ലാർക്കിൻ്റെ വേക്കൻസിയുണ്ട്. എനിക്കു തരാനാണ് ബോർഡിൻ്റെ തീരുമാനം…. ഞങ്ങൾക്ക് അതൊരാശ്വാസമാവും. ഗൗരി നെടുവീർപ്പിട്ടു.
രാഹുൽ ഒരു തീരുമാനത്തിലെത്തി. അവൻ അമിത്തിനെ വാട്ട്സാപ്പിൽ വിളിച്ചു.
അമിത്ത്. ഞാൻ സ്പീക്കറിലിടുവാണേ. ഇപ്പഴൊരാള് സംസാരിക്കും. ആരാണെന്ന് പറയണം. അവൻ ഗൗരിയെ നോക്കി. വേണ്ട! അവളാംഗ്യം കാണിച്ചു. യമുനയുടെ കൈത്തലം തോളിലമർന്നപ്പോൾ അവളൊന്നയഞ്ഞു… അമിത്..അമിത്! അവൾ തേങ്ങിപ്പോയി. ഒരു നിമിഷം! ആരുമൊന്നും മിണ്ടിയില്ല. ആ തുറന്ന വരാന്തയിൽ മൗനം തുളുമ്പി… ഗൗരിക്കുഞ്ഞമ്മയാണോ? അമിത്തിൻ്റെ ശങ്ക കലർന്ന ചോദ്യം. ആണെടാ! ഗൗരി വിങ്ങിപ്പൊട്ടി… യമുന മെല്ലെയെണീറ്റു നടന്നു. എണീക്കാൻ പോയ രാഹുലിൻ്റെ ചുമലിൽ കയ്യമർത്തി അവിടെയിരുത്തി…
അവൾ കുറച്ചു നേരം മുറ്റത്തുലാത്തി. മനസ്സു ശാന്തമായിരുന്നു… ഒപ്പം ഇത്തിരി സന്തോഷം നുരഞ്ഞിരുന്നു.. രാഹുൽ! അവനൊരു കുടുംബമുണ്ടിപ്പോൾ! അപ്പോ നീയോടീ? നിനക്കെന്താണവിടെയൊരു സ്ഥാനം! മുടിഞ്ഞ മനസ്സാക്ഷി! നീ പോടീ! എൻ്റെ ജീവിതത്തില് ഇത്തിരി നേരം അവനുണ്ടായിരുന്നല്ലോ! എനിക്കതുമതി. അസൂയപ്പിശാശേ! മനസ്സാക്ഷിയെ അവൾ ചീത്തപറഞ്ഞോടിച്ചു..
അപ്പോഴാണ് ഗേറ്റു തുറന്ന് രണ്ടു സുന്ദരിപ്പെങ്കുട്ടികൾ അകത്തേക്കു കടന്നത്. അവർ മുറ്റത്തു പാർക്കു ചെയ്തിരുന്ന കാറിനേയും യമുനയേയും മാറിമാറി നോക്കി. യമുന അവരെ നോക്കി മന്ദഹസിച്ചു. അവരും നാണം കലർന്ന പുഞ്ചിരികൾ സമ്മാനിച്ചു. യമുന മൂത്ത കുട്ടിയുടെ തോളത്തു കൈ വെച്ചു. അഞ്ജനേ! ദേ അങ്ങോട്ടു നോക്ക്യേ… നിൻ്റെ ഇളയ ഏട്ടനാണത്. രാഹുൽ.
നിൻ്റമ്മയും രാഹുലും നിങ്ങടെ മൂത്ത ചേട്ടനുമായി സംസാരിക്കുവാണ്…ഫോണിൽ! അവൾ പറഞ്ഞു തീരും മുന്നേ ഇളയ പെണ്ണ് പ്രിയ മുന്നോട്ടോടി… അവൾ തിണ്ണയിലിരുന്ന രാഹുലിനെ കെട്ടിപ്പുണർന്ന് അവൻ്റെ നെഞ്ചിൽ മുഖമമർത്തി… കുട്ടേട്ടൻ! അവൾ മന്ത്രിച്ചു… ആ കണ്ണുകൾ നിറഞ്ഞൊഴുകി… അവൻ്റെ ഷർട്ടു നനഞ്ഞുകുതിർന്നു… അവൻ്റെ കണ്ണുകളും നനഞ്ഞു…
അമിത്! പ്രിയമോളോടു സംസാരിക്ക്. രാഹുൽ വീഡിയോ കോളിൽ ഫോണിൻ്റെ ക്യാമറ അവൾക്കു നേരേ തിരിച്ചു… വല്ല്യേട്ടാ… അവൾ വിതുമ്പി. അമിത് കണ്ണുകൾ തുടച്ചു… അപ്പോഴാണ് രണ്ടു കൈകൾ രാഹുലിനെ പിന്നിൽ നിന്നും ചുറ്റിവരിഞ്ഞത്. നല്ല ചുള്ളനാണുട്ടോ എൻ്റെ കുട്ടേട്ടൻ! അഞ്ജന അവൻ്റെ കഴുത്തിലും കവിളുകളിലുമുമ്മകൾ വർഷിച്ചു…
തിരികെ ഡ്രൈവു ചെയ്യുമ്പോഴും യമുനയും രാഹുലും ഒന്നും മിണ്ടിയില്ല. എന്നാലിപ്പോൾ സന്തോഷത്തിൻ്റെ… കൂടിച്ചേരലുകളുടെ… നിർവൃതി തുടിക്കുന്ന മൗനമായിരുന്നു. യമുനയുടെ വിരലുകൾ അവൻ്റെ മുടിയിഴകളിലും കവിളത്തും പടർന്നു…
അവസാന സെമസ്റ്റർ കഴിഞ്ഞ് റിസൽറ്റു വന്നപ്പോൾ അവന് യൂണിവേഴ്സിറ്റിയിൽ രണ്ടാം റാങ്ക്! ഗൗരിയും മക്കളോടുമൊത്ത് രാഹുലും യമുനയും ദിയയും കിരണും അതാഘോഷിച്ചു. യമുനയുടെ നിർബ്ബന്ധവും ലീലാവതിട്ടീച്ചറിൻ്റെ ഗൈഡൻസും കാരണം അവൻ ജെഎൻയൂവിൽ ഡോക്റ്ററേറ്റിനു ചേർന്നു…