” എന്നിട്ടത് ഇപ്പോഴാണോ പറയുന്നത് ….?”
എസ്. ഐ ദേഷ്യപ്പെട്ടു …
“വാക്കാലുള്ള ഭീഷണിയല്ലേ സർ … അത് ദേഷ്യം വന്നപ്പോൾ പറഞ്ഞതാകുമെന്ന് കരുതി … അല്ലെങ്കിലും അതിനൊക്കെ എങ്ങനെയാ പരാതി തരുക..?”
എസ്. ഐ അയാളെ ഇരുത്തി നോക്കി …
“നിങ്ങളെന്താ ചെയ്യുന്നത് …?”
“അദ്ധ്യാപകനായിരുന്നു … ”
ആ സമയത്തു തന്നെ അയാളുടെ മുഖത്ത് ഒരു ബഹുമാനം പ്രകടമായത് വിനയചന്ദ്രൻ ശ്രദ്ധിച്ചു.
” അവരുടെ മോനും കൂടെയുണ്ടെന്നല്ലേ പറഞ്ഞത് ….?”
“ഉണ്ടാവേണ്ടതാണ് … ”
” നിങ്ങൾ പേടിക്കണ്ട … വല്ല വിവരവും കിട്ടിയാൽ ഇങ്ങോട്ട് വിളിച്ചു പറഞ്ഞേക്കണം …”
“ശരി സാർ … ”
” മറ്റേയാളുടെ നമ്പർ കയ്യിലുണ്ടോ …?”
“ആരുടെ …?”
“ആ സ്ത്രീയുടെ ഭർത്താവിന്റെ …..?”
“ഇല്ല സാർ….”
“നിങ്ങൾ തമ്മിൽ ടച്ചൊന്നുമില്ലേ …?”
“ഇല്ല സാർ… , അമ്മാവന്റെ മരണ ശേഷമാണ് അഭിരാമി തന്നെ വിളിച്ചു തുടങ്ങിയത് … ”
” അയാളെന്താ ചെയ്യുന്നേ…?”
” ടൗണിൽ തന്നെ യൂസ്ഡ് വെഹിക്കിളിന്റെ ഒരു ഷോറൂമുണ്ട് … ”
” മതി … ഞാൻ കണ്ടു പിടിച്ചോളാം…”
റൈറ്ററെ പരാതി ഏല്പിച്ച്, അതിന്റെ ഒരു കോപ്പിയും വാങ്ങിയാണ് വിനയചന്ദ്രൻ ഇറങ്ങിയത് …
അപ്പോഴേക്കും ബാർ തുറന്നിരുന്നു …
രണ്ടു പെഗ് അടുപ്പിച്ച് ” നിൽപ്പനടി ” ച്ചിട്ട് അയാൾ ബാറിലെ കസേരയിലേക്കിരുന്നു ..
വാതിൽക്കലേക്ക് ശ്രദ്ധിച്ചാണ് വിനയചന്ദ്രൻ ഇരുന്നത് … അയാളാരെയോ പ്രതീക്ഷിക്കുന്നതു പോലെ തോന്നി …
അര മണിക്കൂർ കഴിഞ്ഞപ്പോൾ കാവിക്കൈലിയും കള്ളി ഷർട്ടും ധരിച്ച് ഒരു ചെറുപ്പക്കാരൻ കയറി വന്നു …
“മാഷ് തുടങ്ങിയില്ലേ ….?”
വിരലുയർത്തി രണ്ട് എന്ന് വിനയചന്ദ്രൻ ആംഗ്യം കാണിച്ചു …
” എന്നാൽ ഞാനൊന്നു വിട്ടിട്ടു വരാം … ”
ചെറുപ്പക്കാരൻ കൗണ്ടറിനടുത്തേക്ക് നീങ്ങി …
അവൻ തിരികെ വരുന്നതും പ്രതീക്ഷിച്ച് വിനയചന്ദ്രനിരുന്നു …
ചെറുപ്പക്കാരൻ ഒന്നടിച്ചിട്ട് വിനയചന്ദ്രന്റെയടുത്തേക്ക് വന്നു …
“സനോജേ ….”
” പറ മാഷേ …” ചിറി തുടച്ചിട്ട് ചെറുപ്പക്കാരൻ വിനയചന്ദ്രന്റെയടുത്തുള്ള കസേരയിലിരുന്നു …
” എഴുന്നൂറു രൂപയും എണ്ണക്കാശും … നമ്മുടെ ഒരു ചെക്കനെ ഞാൻ ഏർപ്പാടാക്കിയിട്ടുണ്ട് … ”
” വിശ്വസ്തനാണോ …?”
“അല്ലാത്തവനെ ഞാനീ പണി ഏൽപ്പിക്കുമോ ..?”
” നീ തന്നെ അവനെ ഡീൽ ചെയ്താൽ മതി … എന്നെ അവൻ അറിയണ്ട ..”
“അത്രയേയുള്ളൂ … ”
” നീ എന്താ പയ്യനോട് പറഞ്ഞത് …?”
” വണ്ടിക്കേസാണെന്നാ പറഞ്ഞത് … ”
” അതങ്ങനെ തന്നെ ഇരിക്കട്ടെ … ”
” രാവിലെ മുതൽ രാത്രി എട്ടൊമ്പത് മണി വരെ അവൻ നോക്കിക്കോളും … അതു കഴിഞ്ഞുള്ള സമയം….?”
“അത്രയും സമയം മതി … ”
വിനയചന്ദ്രൻ പറഞ്ഞു …
” ഒന്നു കൂടി വിട്ടാലോ മാഷേ ….?”
” നമുക്ക് ഒരെണ്ണം വാങ്ങി പോകാം … കുറച്ചു കാര്യങ്ങളുണ്ട് … ”
വിനയചന്ദ്രൻ എഴുന്നേറ്റു .
# # #
ഓഫീസിലിരിക്കുമ്പോഴാണ് രാജീവിന് കാൾ വന്നത്..
എസ്. ഐ ആയിരുന്നു ലൈനിൽ ..
“രാജീവല്ലേ …?”
“അതെ…”
” ഞാൻ എസ്.ഐ സുനിലാണ് … “
ഒരു നടുക്കം രാജീവിലുണ്ടായി …
“നിങ്ങൾക്കെതിരെ ഒരു പരാതി കിട്ടിയിട്ടുണ്ടല്ലോ…”
” പരാതിയോ …?”
എസ് ഐ അയാളോട് കാര്യം പറഞ്ഞു …
രാജീവ് ഇരുന്ന ഇരുപ്പിൽ വിയർത്തു …
“നിങ്ങൾ സ്റ്റേഷനിലേക്ക് ഒന്ന് വന്നേ മതിയാകൂ ….”
” വരാം സർ ….”
എസ്. ഐ ഫോൺ കട്ടാക്കിയത് രാജീവറിഞ്ഞു ..
അഭിരാമി മിസ്സിംഗ് …..!
അവൾ മരിക്കുന്നത് തന്റെ ജോലി കുറയ്ക്കുമെന്ന് അറിയാമെങ്കിലും അയാളെ ഒരു നടുക്കം ഗ്രസിച്ചു കൊണ്ടിരുന്നു …
ഇപ്പോൾ അവൾക്ക് എന്തു സംഭവിച്ചാലും അതിനുത്തരവാദി താൻ തന്നെയാണെന്ന സത്യം അയാളെ മഥിച്ചു കൊണ്ടിരുന്നു …
വിനയചന്ദ്രനാകാം അതിനു പിന്നിലെന്ന് രാജീവിന് തോന്നി…..
പക്ഷേ പൊലീസ് കംപ്ലയിന്റ് വന്ന സ്ഥിതിക്ക് വിനയചന്ദ്രന് അത്ര ബുദ്ധിയൊന്നും കാണാനിടയില്ലെന്നും അയാൾ കണക്കു കൂട്ടി …
എവിടെയോ എന്തോ ഒന്ന് താൻ പ്രതീക്ഷിക്കാത്തത് സംഭവിച്ചു എന്ന് മാത്രം രാജീവ് അറിഞ്ഞു …
# # #
വട്ടവടയ്ക്കു മുകളിൽ വീണ്ടും മഞ്ഞു വീണു തുടങ്ങി …
നാലു മണി കഴിഞ്ഞപ്പോൾ മുതൽ കോടമഞ്ഞ് കയറി അടുത്തുള്ള ആളെ പോലും കാണാൻ കഴിയാത്ത അവസ്ഥയായിരുന്നു …