എന്നെ ഒരുപാടു ചിന്തിപ്പിച്ച കാര്യമാണ് അവൾ പറഞ്ഞത് .ശരിയാണ് ഇക്ക സർജറി കഴിഞ്ഞു ജീവിതത്തിലേക്ക് തിരിച്ചു വരുന്നു എന്ന് കേട്ടപ്പോൾ അതനുഭവിച്ചപ്പോൾ ലഭിച്ച അത്രയും സന്തോഷം ജീവിതത്തിൽ അത് വരെ ഞാൻ അനുഭവിച്ചിട്ടില്ല .വലിയ വീട് വച്ചപ്പോൾ കിട്ടാത്ത വസ്തുക്കൾ വാങ്ങിയപ്പോൾ കിട്ടാത്ത പറഞ്ഞറിയിക്കാൻ കഴിയാത്ത മനസുഖം ആത്മസംതൃപ്തി എല്ലാം ലഭിച്ചത് ഇതിൽ നിന്നുമാണ് .ജീവിതത്തിലെ ലക്ഷ്യം ജീവിതത്തതിന്റെ അർഥം എല്ലാം ഞാൻ മനസ്സിലാക്കുകയായിരുന്നു .ഒരുകയ്യുതാങ്ങു ആഗ്രഹിക്കുന്ന നിരവധിപേർ നമുക്ക് ചുറ്റും ഉണ്ടാവും .എന്തെങ്കിലും ചെയ്യാൻ കഴിഞ്ഞാൽ അതൊരു വലിയ കാര്യമായിരിക്കും ഒരിക്കൽ ഇക്കയുടെ വലിയ മനസ്സുകൊണ്ടാണ് ഞാൻ പട്ടിണിയിൽ നിന്നും സൗഭാഗ്യത്തിന്റെ നിലയിലേക്ക് ഉയർത്തപ്പെട്ടത് .പണവും സൗഭാഗ്യങ്ങളും എന്നിൽ വന്നുചേർന്നപ്പോൾ ഞാൻ എന്നെ മറന്നു വന്ന വഴികൾ മറന്നു .ഞാനും സഹായത്തിന്റെ ചുവടുപിടിച്ചാണ് വളർന്നതെന്ന സത്യം മറന്നു .മറ്റുള്ളവരെ സഹായിക്കണം എന്ന ചിന്ത മാത്രം എന്നിൽ വളർന്നില്ല .എന്തുണ്ടായിട്ടെന്താ ജീവിതത്തിൽ ഏറ്റവും വലുത് വ്യക്തിത്വമാണ് .അവനവന്റെ വ്യക്തിത്വം .സമ്പന്നർ എന്നും സമ്പന്നരാണ് ദരിദ്രർ എന്നും ദരിദ്രരും .തന്റേതായ വ്യക്തിത്വം കൊണ്ട് മോൾ സമ്പന്നയും അതില്ലാത്ത ഞാൻ അവൾക്കുമുന്നിൽ ദരിദ്രനും.
മോളെ ഞാനൊരു കാര്യം പറയട്ടെ എന്റെ ഒരു ആഗ്രഹമാണ് .ഒരിക്കൽ നമ്മുടെ നാട്ടിൽ ഇക്ക പണം വാരിയെറിഞ്ഞു പ്രശംസ പിടിച്ചുപറ്റി .കൂടെനിൽക്കാൻ നാട് മുഴുവൻ ഉണ്ടായിരുന്നു .വെറുതെ ലഭിക്കുന്ന ഇക്കയുടെ പണം മോഹിച്ചാണ് മിക്കവാറും ആളുകൾ ഇക്കയുടെ സില്ബന്ധികൾ ആയതു തന്നെ .ഇക്ക തകർന്നപ്പോൾ ആരും ഉണ്ടായില്ല .കൂടെ നിന്ന് ആശ്വസിപ്പിക്കാൻ പോലും ആരും ഇല്ലായിരുന്നു .പണം കൊണ്ട് ഇക്ക നേടിയ സ്ഥാനമാനങ്ങൾ സ്നേഹം പ്രശംസ എല്ലാം പണം ഇല്ലാതായതോടുകൂടി നഷ്ടമായി അന്ന് പ്രസംശിച്ചവർ പലരും പിന്നീട് പരിഹസിച്ചു .ഇക്കയുടെ ആഗ്രഹമായിരുന്നു നാട്ടിൽ അറിയപ്പെടുന്ന ആളുകൾ മതിക്കുന്ന വ്യക്തിയാകണം എന്നത് .
നേടി എന്ന് ഇക്ക പറയുന്ന മതിപ്പ് താല്കാലികമായിരുന്നു .വിലക്കുവാങ്ങിയ ബഹുമാനം .അതുപോര ആ നാട് ഇക്കയെ ബഹുമാനിക്കണം സ്നേഹിക്കണം ആദരിക്കണം .ഒരിക്കൽ ആ വലിയ വീട്ടിൽ എന്നും നിറയെ ആളുകൾ ഉണ്ടായിരുന്നു ,ഭക്ഷണത്തിനും സഹായം ചോദിച്ചും രാത്രിപോലും പകലാക്കി തോന്നിച്ചിരുന്ന കാലം .ആ കാലം ഇനിയും ഉണ്ടാകണം പണം കൊടുത്തു നേടിയല്ല സ്നേഹം കൊടുത്തു നേടണം മോൾ പറഞ്ഞപോലെ സമൂഹത്തിൽ ഭക്ഷണം ലഭിക്കാതെയും മരുന്ന് വാങ്ങാൻ പണമില്ലാതെയും കല്യാണം നടത്താൻ പണമില്ലാതെയും ദുരിതം അനുഭവിക്കുന്ന നിരവധി ജീവിതങ്ങൾ ഉണ്ടാകും .മക്കൾ വലിച്ചെറിഞ്ഞവർ കടത്തിണ്ണകളിൽ അന്തിയുറങ്ങേണ്ടി വരുന്നവർ അങ്ങനെ നിരവധി .അവർക്കൊരാശ്രയം അത്താണി അതാവണം ഇനി ആ വീട് ആർക്കും എപ്പോഴും കയറിവന്നു സഹായം ചോദിക്കാൻ കഴിയുന്ന സഹായിക്കുമെന്ന് ഉറപ്പുള്ള സ്ഥലം .പണത്തിനു വേണ്ടി പണിക്കുപോകാതെ മറ്റുള്ളവനെ തുരന്നു തിന്നുന്നവർക്ക് അവിടെ സ്ഥാനം ഉണ്ടാവില്ല അർഹമായവർക്ക് ആശ്രയം അനിവാര്യമായവർക്ക് മാത്രം സഹായം ചെയുന്ന വീട് .ആ വീട്ടിൽ കാരണവരായി ഇക്ക ഉണ്ടാവണം വെച്ച് വിളമ്പാൻ ഇത്ത ഉണ്ടാവണം .അവരെ നാടുമുഴുവൻ ബഹുമാനിക്കണം സ്നേഹിക്കണം .നേരായി സമ്പാദിച്ചത് മാത്രമേ എന്റെ കയ്യിലുള്ളു .സത്യമുള്ള പണം മാത്രം എന്റെ വിയർപ്പു പറ്റിയ പണം .നമുക്ക് സുഖമായി ജീവിക്കാൻ ഉള്ളതും അതിനപ്പുറവും എനിക്കുണ്ട് മോൾ പറഞ്ഞപോലെ
അത്യാവശ്യത്തിന് മാത്രമേ പണം വേണ്ടതുള്ളൂ ധൂർത്തു കാണിക്കാൻ ഉള്ളതല്ല .ആവശ്യമായ പണം ഞാൻ നൽകാം ഇക്കയും ഇത്തയും കൂടി എല്ലാം നടത്തിയാൽ മതി .പിന്നെ എല്ലാം നിയന്ധ്രിക്കാനും നോക്കാനും പരിചരിക്കാനും എന്റെ മോളും ..
ഇക്ക നിങ്ങൾ ഒരുപാടു വലിയവനാണ് .ഇന്നത്തെകാലത്തു അധികമാർക്കും ഇല്ലാത്ത മനസ്സിന്റെ ഉടമയാണ് ഇക്ക
ഉപ്പച്ചിയെകൊണ്ട് ഞാൻ സമ്മതിപ്പിക്കാം .ഞാൻ പറഞ്ഞാൽ എന്റെ ഉപ്പച്ചി സമ്മതിക്കും .എല്ലാം ശരിയായി ആരോഗ്യം വീണ്ടെടുത്ത് ഉപ്പ അങ്ങോട്ട് താമസം ആരംഭിക്കണം പഴയ കുഞ്ഞപ്പയായി .പുതിയൊരു മനുഷ്യനായി സ്നേഹം കൊണ്ട് ആദരിക്കുന്ന നാട്ടുകാർ മുഴുവൻ ബഹുമാനിക്കുന്ന ഉപ്പയെ എനിക്ക് കാണണം .അതിലും സന്തോഷം തരുന്ന മറ്റൊരു കാഴ്ചയും എനിക്കി ലോകത്തിൽ കാണാനില്ല .ഇക്ക ഞാൻ നിങ്ങളെ എത്രത്തോളം സ്നേഹിക്കുന്നു എന്ന് വാക്കുകളാൽ പറഞ്ഞറിയിക്കാൻ എനിക്കാവില്ല .അത്രയും ഞാൻ നിങ്ങളെ സ്നേഹിക്കുന്നു ബഹുമാനിക്കുന്നു .എനിക്കെത്രയും പെട്ടന്ന് ഇതെല്ലം ഉപ്പച്ചിയോടു പറയണം .സമ്മതിപ്പിക്കണം .ഹൃദയം വല്ലാതെ തുടിച്ചു പൊങ്ങുന്നു .ഒരുപാടു നാളുകൾക്കു ശേഷം വല്ലാത്തൊരു സംതൃപ്തി ഉള്ള മനസ്സുമായാണ് ഞാനിപ്പോൾ ജീവിക്കുന്നത് എല്ലാത്തിനും നന്ദിയുണ്ട് ഇക്ക ..പറഞ്ഞറിയിക്കാൻ പറ്റാത്തത്രയും നന്ദി .
എന്താണ് മോളെ ഇത് .നന്ദി പറയേണ്ടത് ഞാനാണ് എന്നെ ഒരു മനുഷ്യനാക്കിയതിന് .വ്യക്തിത്വം എന്താണെന്ന് മനസ്സിലാക്കി തന്നതിന് എന്റെ സ്നേഹം സ്വീകരിച്ചതിന് .ഇനിയുള്ള ജീവിതത്തിൽ എനിക്കൊപ്പം എന്റെ കൂട്ടായി ഉണ്ടാവുന്നതിന് എല്ലാത്തിനും ഞാനാണ് നന്ദി പറയേണ്ടത് .
അങ്ങോട്ടും ഇങ്ങോട്ടും നന്ദി സ്വീകരിച്ചു ഇക്ക …ഇക്കയുടെ നന്ദിയല്ല സ്നേഹം മാത്രം മതി
എനിക്കും മോളെ ..
ഡോക്ടർ നിർദേശിച്ചതനുസരിച്ചു കുറച്ചു നാൾ ഇക്ക ആശുപത്രിയിൽ തങ്ങി സർജറി കഴിഞ്ഞതിന്റെ ക്ഷീണവും തലവേദനയും കുറച്ചു നാൾ ഉണ്ടാവുമെന്ന് ഡോക്ടർ പറഞ്ഞിരുന്നു .മൂന്നാല് ദിവസങ്ങൾ കൊണ്ട് തലവേദന പൂർണമായി മാറി ക്ഷീണം ഉണ്ടായിരുന്നു പതിയെ പതിയെ മാറുമെന്ന് ഡോക്ടർ അറിയിച്ചു .കഴിക്കേണ്ട ഭക്ഷണത്തെ കുറിച്ചും എല്ലാം വിശദമാക്കി പറഞ്ഞു തന്നു .ചെക്കപ്പുകൾ എല്ലാം നടത്തി വിശദമായി പരിശോധിച്ച് ഡോക്ടർ ഡിസ്ചാർജ് ചെയ്യാമെന്ന് അറിയിച്ചു .നെടുങ്കണ്ടത്തേക്ക് ഇനി തിരിച്ചുപോന്നില്ല എന്നുതന്നെ തീരുമാനിച്ചു അവിടുത്തെ വീടും ഒഴിഞ്ഞു .ആശുപത്രിക്കടുത് ഒരു വീട് ഞങ്ങൾ വാടകക്കെടുത്തിരുന്നു എന്തെങ്കിലും ബുദ്ധിമുട്ട് തോന്നിയാൽ എത്രയും പെട്ടന്ന് ആശുപത്രിയിൽ എത്താനുള്ള സൗകര്യത്തിന് വേണ്ടി ആ വീട് ഒഴിഞ്ഞില്ല നെടുംകണ്ടത്തെ വീട്ടിലെ സാധനങ്ങൾ എല്ലാം വെല്ലൂരുള്ള വാടക വീട്ടിലേക്ക് കൊണ്ടുവന്നു ഇക്ക ആശുപത്രി വിട്ടു വീട്ടിലേക്കു താമസമാക്കി .
ഞാൻ നാട്ടിൽ വന്നിട്ട് 2 മാസം കഴിഞ്ഞിരുന്നു അത്യാവശ്യമായി എനിക്ക് തിരിച്ചു പോകേണ്ടി വന്നു .20 ദിവസം എനിക്ക് നാട്ടിൽ നിന്നും വിട്ടു നിൽക്കേണ്ടി വരും .ഞാൻ പറഞ്ഞ കാര്യം ഇക്ക സമ്മതിച്ചിരുന്നു നാട്ടിലേക്കു ആ വീട്ടിലേക്കു പൂർണ ആരോഗ്യവാനായ ഇക്കയായിരിക്കണം എന്നെനിക്ക് നിർബന്ധമായിരുന്നു ഇക്കയും അത് സമ്മതിച്ചു .ഇക്കയുടെ അകൗണ്ടിൽ പണം നിക്ഷേപിച്ചു കാർഡ് മോൾക്ക് നൽകി അവരുടെ ചിലവിനും മരുന്നിനും എല്ലാത്തിനുമായി ആവശ്യത്തിന് പണം ഞാൻ അകൗണ്ടിലിട്ടു ഞാൻ തിരികെ നാട്ടിലേക്കു പൊന്നു .മോളുടെ മുഖത്തെ ദുഃഖം എനിക്ക് വല്ലാത്തൊരു നൊമ്പരമേകി.ഇക്ക എന്നെ കെട്ടിപ്പുണർന്നു കണ്ണുനീർ ഒളിപ്പിക്കാൻ മോൾ വല്ലാതെ കഷ്ടപെടുന്നുണ്ടായിരുന്നു അതികം വിഷമിപ്പിക്കാൻ ഞാൻ നിന്നില്ല .തിരികെ വീട്ടിലെത്തി ഉമ്മയോട് എല്ലാ കാര്യങ്ങളും പറഞ്ഞു ഇക്കയെ കാണാൻ ഉമ്മയും വല്ലാതെ കൊതിച്ചിരുന്നു .മോളോടുള്ള എന്റെ ഇഷ്ടവും മോൾക്കെന്നോടുള്ള സ്നേഹവും ഞാൻ ഉമ്മയുമായി പങ്കുവച്ചു എന്റെ ഇഷ്ടങ്ങൾ എന്തായാലും ഉമ്മക്കും സമ്മതമായിരുന്നു മോളെ ഉമ്മ കണ്ടിട്ടില്ല ചെറുതായിരിക്കുമ്പോൾ കണ്ടതാണെന്ന് തോന്നുന്നു .അവളുടെ ഫോട്ടോ ഞാൻ ഉമ്മയെ കാണിച്ചു എന്നെപോലെ ഉമ്മക്കും അവളെ വല്ലാതെ ഇഷ്ടമായി .എത്രയും പെട്ടന്ന് കല്യാണം നടത്തണം എന്നാണ് ഉമ്മയുടെ ആഗ്രഹം .എന്റെ പെങ്ങന്മാരെയും ഞാൻ അറിയിച്ചു സൽമതയോടു കാര്യങ്ങൾ എല്ലാം പറഞ്ഞു ആസിയ മോളാണെന്നു ഇത്താത്തക്ക് വിശ്വസിക്കാൻ കഴിഞ്ഞില്ല മറ്റാരോടും ഇത് പറയരുതെന്ന് ഞാൻ ഇത്താത്തയോട് പറഞ്ഞിരുന്നു .എല്ലാവര്ക്കും ഈ നിക്കാഹിന് സമ്മതമായിരുന്നു അല്ലെങ്കിലും എതിർക്കാൻ കാരണമൊന്നുമില്ലല്ലോ സാമ്പത്തികമായി തകർന്നെങ്കിലും ഇക്ക അവർക്കെല്ലാം സമ്മതനാണ് .രണ്ടു ദിവസങ്ങൾക്കു ശേഷം ഞാൻ തിരികെ പോയി ബിസിനസ് സംബന്ധമായ ചില കാര്യങ്ങൾ ചെയ്യാനുണ്ടായിരുന്നു
എല്ലാ ദിവസവും ഞാൻ ഇക്കയെ വിളിച്ചിരുന്നു മോളുമായി സംസാരിക്കുമ്പോൾ അവളെ വല്ലാതെ മിസ് ചെയ്യുന്നതായി എനിക്ക് തോന്നി .അല്ലെങ്കിലും അകന്നിരിക്കുമ്പോളാണല്ലോ സ്നേഹത്തിന്റെ ആഴം മനസ്സിലാകുന്നത് .അത്രമേൽ ഞാൻ അവളെ സ്നേഹിക്കുന്നെന്നു ഞാൻ തിരിച്ചറിയുകയായിരുന്നു .
