ഇവളെങ്ങാനും അമ്മയോട് വിളിച്ചു പറഞ്ഞാൽ പിന്നേ തീർന്നു.വീട്ടിൽ പോലും കയറ്റൂല… ഞാൻ മനസ്സിലോർത്തു
എനിക്ക് ഒരാൾ മിണ്ടാതെ ഇരുന്നാൽ ഭ്രാന്ത് പിടിക്കുന്ന അവസ്ഥ ആദ്യമായി ഉണ്ടാവുന്നത് എന്റെ ലച്ചു മിണ്ടാതിരുന്നപ്പോൾ ആണ്. രണ്ട് മൂന്ന് വർഷങ്ങൾ മുന്നേ ആണത്. ഡിഗ്രി ഒന്നാം വർഷത്തിന് പഠിക്കുന്ന സമയം. ഒരു ദിവസം കോളേജ് ബാത്‌റൂമിൽ മൂത്രമൊഴിച്ചു കഴിഞ്ഞവർ കഴിയാത്തവരെ വെയിറ്റ് ചെയ്തു ഓരോന്ന് പറഞ്ഞു നിൽക്കുന്ന സമയത്താണ് ക്ലാസ്സിലെ രാഹുൽ ഒരു കിങ് സിഗരറ്റ് എന്റെ നേരെ നീട്ടുന്നത്.
“എനിക്ക് വേണ്ടാ., ഞാൻ വലിക്കൂല “
“ഇജ്ജ് വലിച്ചാജ്ജ് എല്ലാരും ചത്തു കഴിഞ്ഞ മണ്ണിലേക്ക് തന്നെ ആണ് “. അവൻ എന്നെ നിർബന്ധിച്ചു.
“ന്നാലും ഇപ്പൊ വേണ്ടാ.ന്നാ ഇജ്ജ് വലിച്ചോ “
ഞാൻ സിഗരറ്റ് അവനു നേരെ നീട്ടി.
“പോടാ എന്റെ ചുണ്ടത്തു ഒന്ന് ഇല്ലേ. ഇജ്ജത് ആർക്കാന്ന് വെച്ച കൊടുത്തോ. ” അല്ലെങ്കി ഇജ്ജെന്നെ വലിച്ചോ !.
ഞാൻ ഒന്ന് രണ്ട് പേർക്ക് നേരെ ആ സിഗരറ്റ് നീട്ടി. അവരാരും വാങ്ങിയില്ല. ഇനി വൈകുന്നേരം രാഹുലിന് തന്നെ കൊടുക്കാം എന്ന് വിചാരിച്ചു ഞാൻ അത് പാന്റിന്റെ പോക്കറ്റിൽ തിരുകി.നല്ല ഓർമ ശക്തി ഉള്ളോണ്ട് ഞാൻ അത് വൃത്തിയായി മറന്നു
അന്ന് വൈകുന്നേരം വീട്ടിലെത്തി പാന്റും ഷർട്ടും അഴിച്ചിട്ടതും അമ്മ അത് അലക്കാൻ കൊണ്ടു പോയതും എനിക്ക് ഓർമണ്ട്. പോയപ്പോ എന്നെ കൊഞ്ചിച്ചു പോയ അമ്മ അലക്കി വന്നപ്പോൾ ഭദ്രകാളിയെപ്പോലെ എന്നെ നോക്കി ദഹിപ്പിക്കുന്നു. എന്നാൽ ഒരക്ഷരം മിണ്ടുന്നുമില്ല. ഞാൻ വളരെയേറെ ബുദ്ധിമുട്ടാതെ കാരണം ഇതാണെന്ന് മനസ്സിലാക്കി. കാലു പിടിച്ചു കരഞ്ഞു പറഞ്ഞിട്ടും രണ്ട് ദിവസം കഴിഞ്ഞാണ് അമ്മ എന്നോട് മിണ്ടിയത്. എന്നോട് മിണ്ടിയില്ലെന്ന് മാത്രം അല്ല ഭക്ഷണവും കഴിക്കാതെ നിരാഹാരം കിടന്ന് കളഞ്ഞു എന്റെ ലച്ചു, ആ രണ്ട് ദിവസം !
പിന്നേ രാഹുലിനെക്കൊണ്ട് അമ്മയെ വിളിപ്പിച്ചു കാര്യം പറഞ്ഞിട്ടാണ് എന്നോടൊന്നു മിണ്ടിയത്. അന്ന് അനുഭവിച്ച വേദന ഞാൻ പിന്നേ അനുഭവിക്കുന്നത്‌ പിന്നേ ഇപ്പോൾ ആണ്. അമ്മു എന്നോട് മിണ്ടാതായതിൽ. കുറച്ചു നേരം കൂടെ അങ്ങനെ പാതി ബോധത്തിൽ ഞാൻ കിടന്നു.സമയത്തെ കുറിച്ചൊന്നും യാതൊരു ബോധവും ഇല്ലാത്ത സമയം ആണെങ്കിലും ഏകദേശം ഒരു ഒമ്പത് മണി ആയിരിക്കണം. അമ്മു എന്റെ അരികിൽ വന്നു. അത് തന്നെ അവളുടെ കൊലുസിന്റെ ശബ്ദം കേട്ട് ഞാൻ ഊഹിച്ചതാണ്
‘ചോറ് എടുത്ത് വെച്ചിട്ട്ണ്ട് ‘..
“ആ ഞാൻ കഴിച്ചോളാം.. നിങ്ങള് കഴിച്ചോ..
ഞാൻ എങ്ങനെയോ പറഞ്ഞൊപ്പിച്ചു.
അവൾ ഒന്നും മിണ്ടാതെ അവിടുന്ന് പോയി. അകത്തു നിന്ന് കണ്ണന് കഴിക്കാൻ ആയില്ലേന്ന് അച്ഛമ്മ ചോദിച്ചപ്പോൾ തലവേദനയാണ് പിന്നേ കഴിച്ചോളും എന്ന് അവൾ പറയുന്നത് അർദ്ധ ബോധവസ്ഥയിൽ അവൾ പറയുന്നത് എനിക്ക് കേൾക്കാമായിരുന്നു.
കുറച്ചു കഴിഞ്ഞു ഉറക്കത്തിൽ ആരോ എന്നെ ഷർട്ടിൽ പിടിച്ചു വലിക്കുന്നത്‌ പോലെ തോന്നി ഞാൻ കണ്ണ് തുറന്നു. ഉറക്കത്തിൽ അല്ല ഒറിജിനൽ ആണ്. അമ്മു തിണ്ടിൻമേൽ കിടന്നിരുന്ന എന്നെ കോളറിന് പിടിച്ചു വലിച്ചു കൊണ്ടു പോവുകയാണ്. ഞാൻ ആണെകിൽ ആടി കുഴഞ്ഞു തല അങ്ങോട്ടും ഇങ്ങോട്ടും വെട്ടിച്ചു അവളുടെ പിന്നാലെ പോവുന്നു.
“എന്നെ വിട് കഴുത്ത് വേദനിക്കുന്നു “.. അത് പറയുമ്പോഴേക്കും അവൾ എന്നെയും കൊണ്ട് മുറ്റത്തെത്തിയിരുന്നു.
അവൾ എന്നെ തിരിഞ്ഞു പോലും നോക്കുന്നില്ല. അവൾ എന്നെയും വലിച്ചു കുളിമുറിയിലേക്ക് കയറി. കുളിമുറിയിൽ അലക്കാനിട്ടിരിക്കുന്ന കല്ലിൽ പിടിച്ചിരുത്തി. വലിയ ടാങ്കിൽ നിറച്ചു വെച്ചിരിക്കുന്ന വെള്ളം എടുത്ത് എന്റെ തലവഴി ഒഴിക്കാൻ തുടങ്ങി. ഞാൻ പൂച്ചകുട്ടിയെ പോലെ ഇരുന്നു കൊടുത്തു. പത്തു ബക്കറ്റോളം വെള്ളം കോരി എന്റെ തലയിൽ ഒഴിച്ചു. വീണ്ടും വെള്ളം ഒഴിക്കാൻ തുനിഞ്ഞപ്പോൾ ഞാൻ കയ്യുയർത്തി തടഞ്ഞു
“മതി ഇനി ജലദോഷം പിടിക്കും”
.ഞാൻ പതിയെ പറഞ്ഞപ്പോൾ ബക്കറ്റ് ശക്തിയിൽ നിലത്ത് വീഴുന്ന ശബ്ദം ഞാൻ കേട്ടു. എന്നോടുള്ള ദേഷ്യം അങ്ങനെ തീർക്കുന്നതാവാം. നല്ല തണുത്ത വെള്ളം വീണതോടെ എന്റെ കെട്ട് ഏകദേശം ഇറങ്ങിയിരുന്നു. ഇപ്പൊ കണ്ണൊക്കെ ക്ലിയർ ആയി. നെറ്റിയിൽ ഒരു ചെറിയ പെരുപ്പ് ബാക്കി ഉണ്ട് എന്നെ ഉള്ളൂ. ഞാൻ എണീക്കാനായി തുനിഞ്ഞതും അവൾ അവളുടെ തോർത്ത്‌ എടുത്ത് എന്റെ തല തുടക്കാൻ ആരംഭിച്ചു. ഇടയ്ക്കിടെ അവൾ മൂക്കുവലിക്കുന്ന ശബ്ദം കേൾക്കായിരുന്നു.സ്വബോധം ഏറെക്കുറെ തിരിച്ചു കിട്ടിയ ഞാൻ കയ്യുയർത്തി അവളുടെ കയ്യിൽ തൊട്ടതും ശക്തിയിൽ എന്റെ കൈ തട്ടി മാറ്റി അവൾ ജോലി തുടർന്നു.ഇനിയും അവളെ ഉപദ്രവിക്കേണ്ട എന്ന് കരുതി ഞാൻ അവിടെ ഇരുന്നു കൊടുത്തു. തല തുവർത്തിയ ശേഷം അവൾ എന്റെ ഷർട്ടിന്റെ ബട്ടണുകൾ അഴിക്കാൻ ആരംഭിച്ചു. പിന്നേ ഷർട്ട്‌ അഴിച്ചെടുത്തു നിലത്തെക്കിട്ടു. പിന്നേ കുനിഞ്ഞു എന്റെ പാന്റിൽ പിടിച്ചു വലിച്ചതും ഞാൻ ഊര പൊക്കി അവൾക്ക് പണി എളുപ്പമാക്കി കൊടുത്തു. അവളുടെ മുഖത്തു യാതൊരു വ്യത്യാസവും ഇല്ല. കരഞ്ഞു കലങ്ങിയ കണ്ണുകളും വീർത്ത മുഖവും വെച്ചാണ് അവൾ ഇത്രയൊക്കെ ചെയ്യുന്നത്. അറിയാതെ പോലും അവൾ എന്നെ ഒന്ന് നോക്കിയ പോലും ഇല്ല. ഞാൻ ഇപ്പോൾ വെറും ബോക്‌സർ മാത്രം ധരിച്ചാണ് നിൽക്കുന്നത്. ഞാൻ തോർത്ത്‌ എടുത്ത് അതിന് മേലെ ഉടുത്തു ബോക്‌സർ അഴിച്ചു അലക്കി വെള്ളത്തിൽ മുക്കി പിഴിഞ്ഞു. കയ്യിൽപിടിച്ചു. വീണ്ടും ആ കല്ലിൽ വന്നിരുന്നു. അവൾ അതെല്ലാം യാതൊരു ഭാവ വ്യത്യാസവും ഇല്ലാതെ നോക്കി കൊണ്ട് നിന്നു. പിന്നേ എന്റെ കയ്യെടുത്തു അവളുടെ തോളിലൂടെ ഇട്ട് എന്നെ പൊക്കി. ഒറ്റക്ക് നടക്കാൻ കഴിയുമായിരുന്നെങ്കിലും ഞാൻ അനുസരണയോടെ അവളുടെ തോളിലേക്ക് തല വെച്ച് നടത്തം തുടങ്ങി. അവൾ ഒരു കൈ എന്റെ അരയിലൂടെ ചുറ്റി പിടിച്ചിട്ടുണ്ട്. അവളുടെ മുടിയിഴകൾ പാറി എന്റെ മുഖത്തു വീണു. അവൾ അതൊന്നും ശ്രദ്ധിക്കാതെ എന്നെയും കൊണ്ട് നടക്കുകയാണ്.
സോറി…
നടത്തിനിടെ ഞാൻ അവളുടെ കാതിൽ പറഞ്ഞു. ഒരു പ്രതികരണവും ഇല്ല. റൂമിൽ എത്തി ഞാൻ ഡ്രസ്സ്‌ മാറി പുറത്തിറങ്ങിയതും അവൾ ചോറും കറിയും എല്ലാം വിളമ്പി വെച്ചിരുന്നു.
ഞാൻ ചോറുണ്ട് കഴിയുന്നത്‌ വരെ അവൾ അവിടെ നിന്നു.ചോറുണ്ട് കഴിഞ്ഞു പാത്രം കഴുകുന്ന സമയത്ത് ഞാൻ അവൾക്ക് കാവൽ നിന്നു
പാത്രങ്ങൾ കഴുകി എടുത്ത് വെച്ച് കൈത്തലം തുണിയിൽ തുടച്ചു അവൾ റൂമിലേക്ക് നടന്നു ഞാൻ പിന്നാലെ അവളെ അനുഗമിച്ചു. ഇപ്പോൾ കെട്ടൊക്കെ ഏകദേശം വിട്ടിട്ടുണ്ട്. റൂമിലെത്തി അവൾ ബെഡ് ഷീറ്റ് തട്ടി വിരിക്കാൻ തുടങ്ങുമ്പോൾ ഞാൻ അവളുടെ അടുത്ത് ചേർന്ന് നിന്ന് പതിയെ കാതിൽ വിളിച്ചു.
അമ്മൂ…
