ദിവ്യാനുരാഗം – 8

” ഞെട്ടുവൊന്നും വേണ്ട..ഞാൻ കണ്ടായിരുന്നു… അത് തൻ്റെ ആരാ…?? ”

മിസ്സ് ചിരിയോടെ തന്നെ തിരക്കി…പക്ഷെ എനിക്ക് മറുപടി ഒന്നും വായിൽ വരുന്നുണ്ടായിരുന്നില്ല…അത് പിന്നെ അങ്ങനാണല്ലോ ആവിശ്യമുള്ളപ്പൊ ഒരു മൈരും വരില്ലല്ലോ…

” അത് പിന്നെ മിസ്സേ…ഫ്രണ്ട്… ”

ഞാൻ വാക്കുകൾ കിട്ടാതെ മിസ്സിനെ നോക്കി വിക്കി…കൂടെ എൻ്റെ ഓഞ്ഞ മോന്തയും….

” മതി മതി…നിന്നുരുകണ്ട…ഞാൻ കണ്ടുപിടിച്ചോളാം…മോൻ വിട്ടോ… ”

പുള്ളിക്കാരി എൻ്റെ അവസ്ഥ കണ്ട് ചിരിച്ചുകൊണ്ട് പറഞ്ഞു… അതോടെ ഞാൻ സ്ഥലം വിട്ടു…

പക്ഷെ അപ്പോഴും ഞാൻ മനസ്സിൽ ആലോചിച്ച ഒരു കാര്യമുണ്ടായിരുന്നു…മിസ്സിന്റെ ആ ഡയലോഗ് ” ഞാൻ കണ്ടുപിടിച്ചോളാം ” എന്ന്… എന്തിനായിരിക്കും പുള്ളിക്കാരി അത് പറഞ്ഞത്….? ഓടി ചെന്ന് നന്ദുവിനോട് കാര്യം പറഞ്ഞപ്പോൾ അവനും ഒന്നും പിടികിട്ടിയില്ല… അതോടെ വല്ലാത്ത ഒരു ആശയകുഴപ്പത്തിലായി… പിന്നെ അത് തന്നെ ആലോചിച്ചാൽ വട്ടാകും എന്ന് തോന്നിയപ്പോൾ പിന്നീട് വിട്ടുകളഞ്ഞു…അങ്ങനെ കോളേജ് സാധാരണഗതിയിൽ ചിലവഴിച്ച ശേഷം വൈകിട്ട് വീട്ടിലേക്ക് തിരിച്ചു…..

വീട്ടിലെത്തിയപ്പോൾ ഉമ്മറത്ത് അമ്മയും അമ്മായിയും ഉണ്ടായിരുന്നു… പുള്ളിക്കാരി അമ്മയുടെ ചേട്ടൻ്റെ ഭാര്യയാണ് തൊട്ടപ്പുറം തന്നെയാണ് താമസം…അമ്മാവൻ ഗൾഫിലാണ്….

” ഹലോ മാഡം എന്തുണ്ട്… ”

ഞാൻ ഉമ്മറത്തിരുന്ന അമ്മായിയോട് കുശലം പറയാൻ എന്നോണം ചോദിച്ചു…

” വെറെന്ത് നിന്നേയും കാത്തിരുന്നത് തന്നെ… ഒരു കാര്യമുണ്ട്… “
അവരെന്നെ തൊട്ടടുത്തിരുത്തി മറുപടി പറഞ്ഞു… അതിന് ഞാൻ എന്താണെന്ന് പുരികം ഉയർത്തി….

” ഡാ സൂര്യയ്ക്ക് ഒരു ആലോചന…നാളെ ഒന്ന് പെണ്ണ് കാണാൻ പോകണം…ആ ചെക്കൻ അമ്പിനും വില്ലിനും അടുക്കുന്നില്ല…അവനിപ്പൊ കല്ല്യാണം വേണ്ടാന്നാ പറയുന്നേ…നീ ഒന്ന് സമ്മതിപ്പിക്കടാ മോനേ… ”

അമ്മായി അവരുടെ മകൻ്റെ കാര്യമാണ് പറയുന്നത്…എൻ്റെ കസിൻ ചേട്ടൻ സൂര്യജിത്തിനെ പറ്റി… പുള്ളിക്കാരൻ ഒരു പാവം എൻജിനീയറാണ്… ജീവിതം ഇങ്ങനെ അടിച്ചു പൊളിക്കുന്ന മൊതല്…നല്ല കട്ട കമ്പനി ആണ് ഞങ്ങൾ…അതാ എന്നോട് പുള്ളിക്കാരി ഇടപെടാൻ പറയുന്നത്…

” ഇത്രേ ഉള്ളൂ നിങ്ങടെ ബിൽഡപ്പ് കണ്ടപ്പോൾ ഞാൻ വലിയ ആനക്കാര്യം ആണെന്ന് കരുതി…ഇത് ഞാൻ ഏറ്റു… ”

ഞാൻ അവരുടെ ആവശ്യം നിസ്സാരം എന്ന രീതിയിൽ തുറന്നു കാട്ടി…

“നീ ഏറ്റോ….അത് മതി….അപ്പൊ നമ്മുക്ക് നാളെ പോകാല്ലേ…നീ പറഞ്ഞാ അവൻ വന്ന് കാണും…അതികം ദൂരമൊന്നുമില്ല ഇവിടടുത്ത് തന്നാ…പെണ്ണ് കോളേജ് ലക്ക്ച്ചററാ… ”

” മ്മ്….കൊള്ളാം…ഒരു ടീച്ചറ് കുടുംബത്തിന് നല്ലതാ…എന്താലും നാളെ പോകാൻ ഉള്ള സെറ്റപ്പ് റെഡി ആക്കിക്കോ ബാക്കി ഞാൻ ഏറ്റു… ”

പുള്ളിക്കാരിക്ക് ഒരിക്കൽ കൂടി ഒരുറപ്പ് നൽകി അമ്മയുടെ തലയ്ക്ക് ചുമ്മാ ഒരു കൊട്ടും വച്ച് കൊടുത്ത് ഞാൻ മുറിയിലേക്കോടി…

കുറച്ചു നേരം ചുമ്മാ ഒന്ന് മയങ്ങിയ ശേഷം ഹോസ്പിറ്റലിലേക്ക് പോകാനുള്ള സമയമായപ്പോൾ പതിവുപോലെ ഫ്രഷായി താഴേക്കിറങ്ങി…

” അച്ഛൻ വന്നില്ലേ ഡോക്ടറേ… ”

ഞാൻ ഡൈനിംഗ് ടേബിളിൽ വച്ച ചായ ഊതി കുടിക്കുമ്പോൾ ഹാളിലിരുന്ന് ടീവി കണ്ട് കൊണ്ടിരിക്കുന്ന അമ്മയോട് ചോദിച്ചു…

” ഇല്ല ഇപ്പൊ വരും…വൈകൂന്ന് പറഞ്ഞായിരുന്നു… ”

പുള്ളിക്കാരി ഏതോ ഹിന്ദി സീരീയലിൽ നിന്നുള്ള ശ്രദ്ധമാറ്റാതെ തന്നെ എനിക്ക് മറുപടി തന്നു…

” അപ്പൊ പുള്ളിക്കാരന് പണ്ടത്തെപ്പോലെ താങ്കളോട് സ്നേഹം ഇല്ലല്ലേ… നേരത്തെയും കാലത്തേയും ഒന്നും വീട്ടിൽ കേറാതായി… ”

ഞാൻ അമ്മയെ ഒന്നിളക്കാൻ തീരുമാനിച്ചു…ജസ്റ്റ് ഫോർ എ രസം….

” ഡാ വേണ്ടാട്ടോ… മര്യാദയ്ക്ക് കഴിച്ചിട്ട് വേഗം സ്ഥലം വിട്ടോ… ”

പ്രിയതമന് ഇഷ്ട്ടമല്ലാന്ന് പറഞ്ഞത് പുള്ളിക്കാരിക്ക് ഇഷ്ട്ടപെട്ടുകാണില്ല… അതുകൊണ്ട് ടീവിയിൽ നിന്നും കണ്ണെടുക്കാതെ തന്നെ എന്നോട് കനത്തിൽ പറഞ്ഞു… അപ്പോഴേക്കും ഞാൻ കഴിച്ച് കഴിഞ്ഞ് ഹാളിലേക്ക് എത്തിയിരുന്നു…

” എന്നാ ഞാൻ പോവ്വാ…നന്ദുവിനേയും നാളെ കൂട്ടാം പെണ്ണുകാണലിന് ഒപ്പം വരാൻ… ”

ഞാൻ അമ്മയോട് യാത്രപറഞ്ഞ് മുറ്റത്തിറങ്ങി വണ്ടി എടുക്കുമ്പോഴേക്കും അച്ഛൻ എത്തിയിരുന്നു…പുള്ളിക്കാരനും ഒരു സലാം നൽകിയ ശേഷം വണ്ടി നേരെ
ഹോസ്പിറ്റലിലേക്ക് വിട്ടു…നന്ദു അവിടെ എത്താം എന്ന് പറഞ്ഞിട്ടുണ്ടായിരുന്നു… അതോണ്ട് അവനെ പിക്ക് ചെയ്യേണ്ട…

ഹോസ്പിറ്റലെത്തി വണ്ടിയും പാർക്ക് ചെയ്യ്തു ലിഫ്റ്റിലേക്ക് കയറാൻ നോക്കുമ്പോൾ അവിടെ ശ്രദ്ധയെ കണ്ടു…

” ഹാ ഇതാര്…തന്നെ കണ്ടൊരു താങ്ക്സ് പറയാൻ ആലോചിക്കുമ്പൊ മുന്നിൽ ആള് പ്രത്യക്ഷപ്പെട്ടല്ലോ… ”

ലിഫ്റ്റിന് അടുത്തേക്കെത്തിയ എന്നെ കണ്ട് ശ്രദ്ധ ചിരിച്ചുകൊണ്ടു പറഞ്ഞു

” എന്തിന്… ”

ഞാൻ കാര്യം മനസ്സിലാക്കാതെ അവളെ നോക്കി പുരികം ഉയർത്തി…

” എൻ്റെ കുഞ്ചുവെ ഇത്ര ഹാപ്പി ആക്കി തന്നതിന്…നടന്നതൊക്കെ രാവിലെ അവള് വിളിച്ചപ്പൊ പറഞ്ഞു… ”

അവളെനിക്ക് കാര്യം വിശദീകരിച്ചു…പക്ഷെ എനിക്ക് മനസ്സിലായിട്ടില്ല അത് വേറെ കാര്യം…

” സോറി ആരാ ഈ കുഞ്ചു…ദിവ്യയാണോ..? ”

ഞാൻ എൻ്റെ അടുത്ത സംശയം പുറത്തേക്ക് നീട്ടി…

” ആ അവളു തന്നെ…കുഞ്ചുന്ന് അതിനെ വീട്ടില് വിളിക്കുന്ന പേരാ… പെട്ടെന്ന് നാവിലതാ വന്നത്… ”

” ഓ അങ്ങനെ അത് പറ ഞാനും കരുതി ഇതേത് കുഞ്ചൂന്ന്… പിന്നെ തൻ്റെ കുഞ്ചുൻ്റെ കാര്യം ഒന്നും പറയണ്ട… ബാക്കിയുള്ളവനെ കോളേജ് മൊത്തം നാറ്റിച്ചു… ”

ഞാൻ ഒന്ന് പുഞ്ചിരിച്ച ശേഷം രാവിലെ കോളേജിൽ വച്ച് നടന്നത് അവളോട് പറഞ്ഞു കൊടുത്തു…അതോടെ അവള് കെടന്ന് ചിരിക്കാൻ തുടങ്ങി…

” അയ്യേ ഈ പെണ്ണ്…മോൻ അപ്പൊ കോളേജ് മൊത്തം നാറിക്കാണുമല്ലോ… ”

ലിഫ്റ്റിറങ്ങുമ്പോൾ അവൾ ചിരിയടക്കാതെ തന്നെ എന്നോട് ചോദിച്ചു…

” പറയാനുണ്ടോ…ടീച്ചർമാര് വരെ കണ്ടു…എന്നാ കരച്ചലായിരുന്നു കെട്ടിപിടിച്ച്…ഞാൻ തരിച്ചു നിന്നു പോയി… ”

ഞാൻ അവളുടെ ചോദ്യത്തിന് രാവിലത്തെ എൻ്റെ അവസ്ഥയെ പറ്റി പറഞ്ഞു കൊടുത്തു…

” മ്മ്…എന്നെ വിളിച്ച് ഒരുപാട് കരഞ്ഞു രാവിലെ..
ചോദിച്ചപ്പൊ സന്തോഷം കൊണ്ടാണ് എന്നൊക്കെ പറഞ്ഞ് നടന്നതൊക്കെ പറഞ്ഞിരുന്നു…പക്ഷെ ഇത് പറഞ്ഞില്ല കള്ളി… ”

” അവള് പറയത്തില്ല… മനുഷ്യനെ നാറ്റിച്ചിട്ട് എവിടെ പോയി ഇന്ന് വന്നില്ലേ… ”

നടന്നു നടന്നു സംസാരിച്ച് നേഴ്സിംഗ് കണ്സൾട്ടൻസ്സിക്ക് മുന്നിലെത്തിയിട്ടും അവളെ കാണാതായപ്പോൾ ഞാൻ ശ്രദ്ധയോട് ചോദിച്ചു…
” വന്നിട്ടുണ്ട്…ആള് ഫുൾ ഹാപ്പിയാ…ചാടി നടന്ന് വർക്ക് ചെയ്യുവാ… ”

അവളെന്നെ നോക്കി ചിരിച്ചുകൊണ്ട് മറുപടി നൽകി…

” മ്മ് എന്നാ ശരി തൻ്റെ വർക്ക് നടക്കട്ടെ….. ”

ഞാൻ ചിരിച്ചുകൊണ്ട് യാത്ര പറഞ്ഞു…പിന്നെ മുറിയിലെത്തിയതും അതുവിൻ്റെ വക കളിയാക്കൽ അൺസഹിക്കബിൾ…ബാക്കി മൂന്നും നടന്നതൊക്കെ പറഞ്ഞ് കൊടുത്ത് എല്ലാം കൂടി കളിയാക്കി കളിയാക്കി ഒരു പരുവം ആക്കി…പക്ഷെ എന്തോ ആ കളിയാക്കലിന് ഒരു സുഖം ഉള്ളപോലെ എനിക്ക് തോന്നി…

Leave a Reply

Your email address will not be published. Required fields are marked *