വീട്ടിലെത്തിയ ആര്യൻ ശാലിനി ആ പുസ്തകം വായിച്ചാൽ താൻ ഇനി എങ്ങനെ അവളുടെ മുഖത്ത് നോക്കും എന്ന് വിചാരിച്ച് വിഷമിച്ചു. ഒടുവിൽ വായിക്കുന്നെങ്കിൽ അങ്ങോട്ട് വായിക്കട്ടെ തനിക്കെന്താ അതിന് എന്ന് മനസ്സിനെ പറഞ്ഞു പഠിപ്പിച്ചിട്ട് ആര്യൻ ആഹാരം തയ്യാറാക്കാൻ തുടങ്ങി.
പിറ്റേ ദിവസം ആര്യൻ കുളി കഴിഞ്ഞ് വരുമ്പോ ശാലിനിയുടെ വീട്ടിൽ മനപ്പൂർവം തന്നെ കയറിയില്ല. അവൾ ആ പുസ്തകം വായിച്ച് കാണുമോ തന്നെ കുറിച്ച് എന്ത് വിചാരിച്ച് കാണും എന്നൊക്കെ വീണ്ടും മനസ്സിൽ തികട്ടി വന്നത് തന്നെ കാരണം.
രാവിലെ എട്ടേമുക്കാലോടെ തന്നെ ആര്യൻ ലിയയേം കൂട്ടി ഓഫീസിലെത്തി. അന്നത്തെ ജോലികൾ എല്ലാം തീർത്ത് പതിവ് പോലെ തന്നെ അവർ കഥ പറച്ചിലുകൾ ആരംഭിച്ചു. പക്ഷേ അതിനിടയിലും അവൻ്റെ മനസ്സ് ഇടയ്ക്കെപ്പോഴൊക്കെയോ ആ പുസ്തകത്തിൽ തന്നെ ഉടക്കിയിരുന്നു.
അന്ന് ഓഫീസിൽ നിന്നും വീട്ടിലെത്തിയ ആര്യൻ വീടിന് പുറത്തേക്കൊന്നും ഇറങ്ങിയതേ ഇല്ല. ആഹാരം കഴിക്കാൻ വേണ്ടി മുറിക്ക് പുറത്തേക്കിറങ്ങിയതല്ലാതെ ബാക്കി സമയം മുഴുവൻ അവൻ മുറിയിൽ തന്നെ ചിലവഴിച്ചു.
അടുത്ത ദിവസവും അവൻ കുളത്തിൽ നിന്നും ശാലിനിയുടെ വീട്ടിൽ കയറാതെ നേരെ തന്നെ വീട്ടിലേക്ക് പോയി. പക്ഷേ ഇന്നലെത്തെക്കാളും അവൻ്റെ മനസ്സ് ശാന്തമായിരുന്നു. എന്തായാലും അശ്ലീല ചുവയുള്ള സംഭാഷണങ്ങൾ കാണുമ്പോൾ തന്നെ എന്തുകൊണ്ടാണ് ഞാൻ ആ പുസ്തകം ചേച്ചി വായിക്കാതിരിക്കാൻ വേണ്ടി ശ്രമിച്ചതെന്ന് ശാലിനിക്ക് മനസ്സിലാകുമെന്നും അപ്പോഴേക്കും അവൾ അതടച്ച് വെച്ചോളും എന്നും ആര്യൻ മനസ്സിൽ കരുതി ആശ്വസിച്ചു. അങ്ങനെയാണെങ്കിൽ അതിനുള്ളിൽ കൂടുതൽ ഒന്നുമില്ല എന്ന് പറഞ്ഞ് തനിക്ക് പിടിച്ച് നിൽക്കാം എന്ന് കൂടി അവൻ മനസ്സിൽ കണക്കുകൂട്ടി.
*************
ഉച്ചക്ക് ഊണ് കഴിക്കാൻ പോയിട്ട് തിരികെ വന്ന ആര്യൻ മോളിയുടെ ബ്ലൗസ് വാങ്ങിയിട്ട് വരാം എന്ന് ലിയയോട് പറഞ്ഞിട്ട് സുഹറയുടെ വീട്ടിലേക്ക് പോയി.
“ഇത്താ…സുഹറിത്താ…” ആര്യൻ സുഹറയെ വീടിന് പുറത്ത് നിന്നുകൊണ്ട് വിളിച്ചു.
“ആര്യൻ ആണോ…?” സുഹറ അകത്ത് നിന്നും വിളിച്ച് ചോദിച്ചു.
“അതേ ഇത്താ…”
“ഇങ്ങു കയറി പോരെ ആര്യാ…”
ആര്യൻ വീടിന് അകത്തേക്ക് കയറി. ശബ്ദം കേട്ടത് അടുക്കള ഭാഗത്ത് നിന്നും ആയിരിക്കുമെന്ന് ഊഹിച്ചുകൊണ്ട് ആര്യൻ അടുക്കള ലക്ഷ്യമാക്കി നടന്നു. ഊഹിച്ചതു പോലെ തന്നെ സുഹറ അടുക്കളയിൽ ഉണ്ടായിരുന്നു. പാതകത്തിൽ ഇരുന്ന് ഊണ് കഴിച്ചുകൊണ്ടിരുന്ന സുഹറയെ നോക്കി ആര്യൻ ഒന്ന് ചിരിച്ചു.
“ഇത്താ എന്ന് വിളിച്ചപ്പോൾ തന്നെ ആര്യൻ ആയിരിക്കുമെന്ന് ഊഹിച്ചു…”
“അത് ആര്യൻ അല്ലേ എന്ന് ചോദിച്ചപ്പോൾ തന്നെ മനസ്സിലായി ഹഹ…ബ്ലൗസ് റെഡി ആയോ ഇത്താ…?”
“ആയി ആര്യാ…ഞാൻ എടുത്ത് തരാം വാ…”
“ഏയ് കുഴപ്പമില്ല…ഇത്ത കഴിക്ക്…അത് കഴിഞ്ഞ് മതി…എനിക്ക് ധൃതി ഒന്നുമില്ല…”
“ആര്യൻ കഴിച്ചോ…?”
“കഴിച്ചു ഇത്താ…കഴിച്ച് കഴിഞ്ഞുള്ള വരവാ…”
“ആഹാ…”
“ഇത്ത എന്താ കഴിക്കാൻ താമസിച്ചത്?”
“താമസിച്ചൊന്നുമില്ല ആര്യാ…ഞാൻ ഈ സമയത്തൊക്കെയാ കഴിക്കാറ്…നേരത്തെ ആണെങ്കിലേ ഉള്ളൂ ഇത് ഹഹ…”
“ആഹാ അത് ശരി…”
“ആര്യൻ്റെ ഡ്യൂട്ടി കഴിഞ്ഞല്ലേ…?”
“ഹാ ഇത്ത കഴിഞ്ഞു…”
“എങ്കിൽ പിന്നെ ഇവിടെ വന്ന് തുണി വാങ്ങിക്കൊണ്ട് അങ്ങ് പോയാൽ പോരായിരുന്നോ എന്തിനാ വീണ്ടും വന്നത്…”
“ഡ്യൂട്ടി കഴിഞ്ഞാലും ഞാൻ നാല് മണി വരെ ഓഫീസിൽ ഇരിക്കും ഇത്താ ഓഫീസ് പൂട്ടിയിട്ടെ പോകൂ…”
“അയ്യോ അതെന്തിനാ…?”
“അത് മാഡം ഒറ്റയ്ക്ക് അല്ലേ അവിടെ പിന്നെ എനിക്ക് പോയിട്ട് പ്രത്യേകിച്ച് പണി ഒന്നും ഇല്ലാത്തതുകൊണ്ട് ഞാനും ഇരിക്കും…കുറച്ച് പണിയും പഠിക്കാം…”
“അത് ശരി…ഇത്രയും ആത്മാർഥതയുള്ള ഒരു പോസ്റ്റ്മാൻ ഇവിടെ ഇതിന് മുന്നേ വന്നിട്ടുണ്ടോ എന്ന് സംശയമാണ് ഹഹഹ…”