“ഇല്ല ചോദിച്ചോളൂ” ഇടയ്ക്ക് ഫോണിൽ കുത്തിക്കൊണ്ട് ഇത് വരെ സംസാരിച്ചിരുന്ന അവൾ അത് മാറ്റി വെച്ചിട്ട് എന്റെ കണ്ണിലേക്ക് നോക്കി.
നീ ഇങ്ങനെ നോക്കല്ലേ പെണ്ണേ, എനിക്ക് സഹിക്കാൻ പറ്റുന്നില്ല, ഇവൾ എന്നെ ഒരു ബാലൻ.കെ.നായരാക്കും. ലാലേട്ടന്റെ ആറാം തമ്പുരാനിലെ ഡയലോഗ് പറയാനാണ് തോന്നിയത്. ഞാൻ എന്റെയുള്ളിൽ ചങ്ങലക്കിട്ടു കിടത്തിരിക്കുന്ന മറ്റൊരു ജഗന്നാഥനുണ്ട്. മുറിവേറ്റ മൃഗം, അതിനെ പുറത്തെടുക്കാതെടി പെണ്ണെ. ഞാനും അവളുടെ കണ്ണുകളിലേയ്ക്ക് തന്നെ നോക്കികൊണ്ട് ചോദിച്ചു.
“നിന്റെ ഒറിജിൻ എവിടെയാ? നീ ഈ രാജ്യക്കാരിയല്ല എന്ന് മനസ്സിലായി. എത്ര നാളായി ഇവിടെ വന്നിട്ട്?”
“ആഹ്… ഞാൻ ബേസിക്കലി ഇസ്രായേലിൽ നിന്നാണ്.” എന്റെ കണക്കു കൂട്ടലുകൾ തെറ്റിയില്ല, ഇവൾ ഒരു ജൂതപ്പെൺകൊടി തന്നെ…
“ഓക്കേ”
“ഇവിടെ വന്നിട്ട് ഏകദേശം 10 വർഷത്തോളമായി.”
“ഓഹ് ശെരിക്കും? ഞാൻ ഗസ്സ്‌ ചെയ്തു നീ ഇസ്രായേലിൽ നിന്നായിരിക്കുമെന്നു, പിന്നെ ഞാനും വന്നിട്ട് 10 വർഷത്തോളമായി. ഞാൻ ബേസിക്കലി ഇന്ത്യയിൽ നിന്നാണ്.”
“അതെങ്ങനെ ഗസ്സ്‌ ചെയ്തു ഞാൻ അവിടുന്നാന്ന്?” അവൾ കുസൃതി നിറഞ്ഞ കണ്ണുകളോടെ എന്നെ നോക്കി ചോദിച്ചു.
“നിങ്ങൾക്കേ ഇത്രയ്ക്ക് കളർ ഉണ്ടാവൂ”
“ഹഹഹ…” മണികിലുക്കം പോലെ അവളുടെ ചിരി ആ ലിഫ്റ്റിനുള്ളിൽ അലയടിച്ചു.
“എത്ര വയസ്സായി എന്ന് പറയുന്നത് കൊണ്ട് ബുദ്ധിമുട്ടുണ്ടോ?” ഞാൻ അവളുടെ കണ്ണുകളിൽ തന്നെ നോക്കിക്കൊണ്ട് ചോദിച്ചു
“എനിക്ക് 26, നിങ്ങൾക്കോ?”
“എനിക്ക് 33” കരണ്ട് കട്ട് വരാൻ ഒരു സാധ്യതയുമില്ലാത്ത ഒരു രാജ്യമാണ് എന്നാലും ഞാൻ മനസ്സിൽ കൊതിച്ചു ഒരു കരണ്ട് കട്ട് വന്നിരുന്നെങ്കിൽ എന്ന്. അതും ആത്മാർത്ഥമായി തന്നെ. പക്ഷെ ഒന്നും സംഭവിച്ചില്ല. ലിഫ്റ്റ് മുകളിലേയ്ക്ക് കയറിക്കൊണ്ടേ ഇരുന്നു.
“തന്നെ കൂടുതൽ പരിചയപ്പെട്ടാൽ കൊള്ളാമെന്നുന്നുണ്ട്, വിരോധമില്ലെങ്കിൽ ഇന്നത്തെ ലഞ്ച് ഒരുമിച്ചാക്കിയാലോ?” ചുമ്മാ ചോദിച്ചതാ. പോയാൽ ഒരു വാക്ക്, കിട്ടിയാൽ ഞങ്ങളുടെ ബിൽഡിങ്ങിലെ ഏറ്റവും സുന്ദരിയായ ചരക്കിന്റെ കൂടെ ഒരു ലഞ്ച്.
“എനിക്ക് എന്റെ അജണ്ട നോക്കണം, ഇന്നെന്തെങ്കിലും മീറ്റിംഗ് ഉണ്ടോ എന്നറിയില്ല. ഞാൻ നിനക്ക് മെസ്സേജ് അയക്കാം.” അവൾ പറഞ്ഞു.
“ശരി, മറക്കരുത്, ഒരു ഇസ്രായേലികുട്ടിയുടെ ഫ്രണ്ട്ഷിപ് കൂടിയേ എനിക്ക് ഇനി ആകാനുള്ളൂ.” ചുമ്മാ ഒരു നമ്പറിട്ടു.
“ഹിഹിഹി… ഇല്ല മറക്കില്ല. പക്ഷെ സൂക്ഷിക്കണം ഞങ്ങൾ അപകടകാരികളാണ്…” വീണ്ടും മുത്തുകൾ പൊഴിച്ച് കൊണ്ട് അവൾ ചിരിച്ചു.
“ഞങ്ങളുടെ നാട്ടിൽ ഒരു പഴംചൊല്ലുണ്ട്, പാമ്പിനോട് കളിക്കുമ്പോ മിനിമം മൂർഖനോട് കളിക്കണമെന്ന്.” ചിരിച്ചു കൊണ്ട് തന്നെ അവൾക്ക് മറുപടി കൊടുത്തു.
ലിഫ്റ്റ് 12മത്തെ നിലയില എത്തി, എനിക്കാണെങ്കിൽ പോവാനും മനസ്സ് വരുന്നില്ല, പക്ഷെ ഇപ്പം ഇറങ്ങിയില്ലെങ്കിൽ ഞാൻ വെറുമൊരു ഉണ്ണാക്കനാണെന്ന് അവൾക്ക് തോന്നിയാലോ? അത് കൊണ്ട് മാന്യമായി “ഓക്കേ ദെൻ, നമ്മുക്ക് ഉടൻ തന്നെ കേൾക്കാം, കാണാം. ബൈ” എന്നും പറഞ്ഞു കൊണ്ട് ലിഫ്റ്റിൽ നിന്നും ഇറങ്ങി. അവളും എന്റെ പിറകെ ഇറങ്ങി. എനിക്ക് ഇടത്തേയ്ക്കും അവൾക്ക് വലത്തേയ്ക്കും ആണ് പോവണ്ടിയത്. ഞാൻ ഒന്നുകൂടി തിരിഞ്ഞു അവളെ നോക്കി. ആ ഇളം നീല കണ്ണുകൾ ഹോ… അപാരം. അവളും എന്നെ നോക്കി, ഞങ്ങളുടെ കണ്ണുകൾ തമ്മിൽ സന്ദേശങ്ങൾ കൈ മാറിയോ? ആ… ആർക്കറിയാം. ഞങ്ങൾ എതിർ ദിശയിലേക്ക് നടന്നു. ഓഫീസിലെ എന്റെ സെക്ഷനിലേയ്ക്ക് ചെന്നപ്പോ അവിടെ ഫുൾ ഇരുട്ട്. ഈ സമയത്ത് അല്ലെങ്കിലും ഞാൻ മാത്രമേ കാണാറുള്ളു. നേരെ ചെന്ന് എന്റെ ഡെസ്കിൽ ബാഗ് വെച്ച് കമ്പ്യൂട്ടർ ഓൺ ആക്കി.
ഞങ്ങളുടെ ബിൽഡിങ്ങിന്റെ ഒരു പ്രത്യേകത എന്താണെന്ന് വെച്ചാൽ, ഫുൾ ഗ്ലാസ് ആണ്. അതായത് പ്രാക്ടിക്കലി ഭിത്തി എന്ന് പറയുന്ന സംഭവം ഇല്ല. എല്ലാം ഗ്ലാസ്. ഇവിടെ നിന്ന് നോക്കിയാൽ അങ്ങ് അപ്പുറത്തു നിൽക്കുന്നവരെ വരെ കാണാം. ഞാൻ പതിയെ സീറ്റിൽ ഇരുന്നു എതിർ ദിശയിലേക്ക് നോക്കി. അവിടെ മിഷേൽ അവളുടെ ഡെസ്കിൽ ഇരിക്കുന്നത് കണ്ടു.
പെട്ടന്നാണ് ഞങ്ങളുടെ കമ്പനിയുടെ ഇന്റെര്ണല് മെസ്സഞ്ചറിൽ മിഷേലിന്റെ ഒരു മെസ്സേജ് വന്നത്. ആക്രാന്തത്തോടെ ആ മെസ്സേജിൽ ക്ലിക്ക് ചെയ്തു.
“ഹായ് ജിത്തു, എനിക്ക് ഇന്ന് ലഞ്ച് ടൈം ഫ്രീ ആണ്. നമുക്ക് ലഞ്ച് എവിടെയാ പോകേണ്ടിയത്?”
എന്റെ മനസ്സിൽ ഒരായിരം ലഡ്ഡു പൊട്ടി. പെട്ടന്ന് തന്നെ ഞാൻ അവൾക്ക് മെസ്സേജ് അയച്ചു.
“നീ അതിനെക്കുറിച്ചു ഓർത്തു ബേജാറാവണ്ട, കൃത്യം 12 മാണി ആവുമ്പോ ലിഫ്റ്റിന്റെ അരികിൽ വരിക, ബാക്കി ഞാൻ നോക്കിക്കോളാം”
“ഓക്കേ, എന്നാൽ നമുക്ക് 12 മണിക്ക് കാണാം” തിരിച്ചവളുടെ മെസ്സേജ് വന്നു.
എവിടെ പോവും? എവിടെ കൊണ്ട് പോയാൽ ഇവളെ ഒന്ന് ഇമ്പ്രെസ്സ് ചെയ്യാൻ പറ്റും? നമ്മൾ കുറച്ചു ഡിഫറെൻറ് ആയി ചിന്തിക്കണം, കാരണം ഇവളെ മുന്തിയ സ്ഥലത്തു ലഞ്ചിന്‌ പലരും കൊണ്ട് പോയിട്ടുണ്ടാവും. അങ്ങനെ കൊണ്ട് പോയത് കൊണ്ട് അവളെ ഇമ്പ്രെസ്സ് ചെയ്യാം എന്ന് എനിക്ക് തോന്നുന്നില്ല. ഏതായാലും ഒരു ഐഡിയ തെളിഞ്ഞു വരുന്നുണ്ട്. പെട്ടന്ന് തന്നെ നെറ്റിൽ കയറി ഗൂഗിൾ എടുത്തു. ഈ ഒരാഴ്ച്ച ഒരു ഫുഡ് ഫെസ്റ്റിവൽ നടക്കുന്നതായി ആരോ പറഞ്ഞത് ഓർക്കുന്നു. സംഭവം ഇവിടെ അടുത്താണ് താനും. ഗൂഗിൾ ഫുഡ് ഫെസ്റ്റിവൽ നിയർ ബൈ എന്ന് അടിച്ചു കൊടുത്തു ഗൂഗിളേട്ടനെ തപ്പാൻ വിട്ടു. സംഭവം 2 സെക്കൻഡിൽ ചേട്ടൻ തപ്പിയെടുത്തു ഫുൾ വിവരങ്ങളും. അല്ലേലും ഈ ഗൂഗിളേട്ടനെ സമ്മതിക്കണം, എന്താ കണക്ഷൻസ്, എത്ര പെട്ടന്നാ സംഭവം തപ്പിയെടുത്തു തന്നത്… അപ്പം അത് തന്നെ. 12 മണിയാവാൻ ഞാൻ കാത്തിരുന്നു.
ഓഫീസിലെ തിരക്കുകൾ കാരണം 12 മണിയായത് പെട്ടന്നായിരുന്നു. 11:55 ആയപ്പോ ഞാൻ പതിയെ ലിഫ്റ്റിന്റെ അരികിൽ ചെന്ന്. നീയിന്ന് ക്യാന്റീനിൽ വരുന്നില്ലേ എന്ന് കൂടെയുള്ളവർ ചോദിച്ചപ്പോ നൈസ് ആയിട്ട് ഇല്ല ഞാൻ ഇന്ന് പുറത്തൂന്നാ കഴിക്കുന്നേ എന്നും പറഞ്ഞൊഴിഞ്ഞു. അല്ലെങ്കിലും അവര് ഞാൻ ഇല്ലാതെ ഭക്ഷണത്തിന് പോവില്ലന്നെ. ഒരു രണ്ടു മിനിറ്റ് കഴിഞ്ഞു കാണില്ല എന്റെ സ്വപ്നദേവത അതാ എതിർ വശത്തു നിന്നും വരുന്നു. ഞാൻ മെല്ലെ കൈ പകുതി ഉയർത്തി ചെറിയൊരു റ്റാറ്റാ പോലെ വീശി. അവളും തിരിച്ചു കൈ വീശി. അവൾ അടുത്തെത്തിയപ്പോ ഞാൻ ലിഫ്റ്റിൽ കുത്തി.
“എല്ലാം എടുത്തല്ലോ? നമ്മുക്ക് പോവാം?” ഞാൻ അവളോട് ചോദിച്ചു.
“എന്താ എടുക്കേണ്ടത്?” അവൾ അത്ഭുതഭാവത്തിൽ ചോദിച്ചു.
“നല്ല മൂഡ്, മുത്ത് പൊഴിയുന്നത് പോലുള്ള നിന്റെ ചിരി, പിന്നെ ഇഷ്ടം പോലെ കഴിക്കാനുള്ള ഒരു വയറും.” ചിരിച്ചു കൊണ്ട് അവളോട് പറഞ്ഞു.
