Related Posts
ഇനി അങ്ങോട്ട് കുറച്ചു ക്യാമ്പസ് കാര്യങ്ങൾ ആണ്… അതിനിടക്ക് പ്രണയം കയറി വരാം എന്നെ ഉള്ളൂ… ഇടക്കെവിടെയോ വെച്ച് നഷ്ടപ്പെട്ടു പോയ പഴയ കോളേജ് ലൈഫ് ഒരിത്തിരി സമയത്തേക്കെങ്കിലും നിങ്ങൾക്ക് ഓർമ വന്നെങ്കിൽ…അത്രേ എനിക്ക് വേണ്ടൂ…
” ടാ.. എണീക്ക്. നമ്മളെത്തി “, അച്ഛന്റെ ശബ്ദം കേട്ടാണ് ഉറക്കത്തിൽ നിന്നും ഞെട്ടി ഉണർന്നത്. എന്തോ സ്വപ്നം കാണുകയായിരുന്നു. എന്താണെന്നു ഓർമ കിട്ടുന്നില്ല. ഞാൻ പതിയെ മുകളിൽ തല തട്ടാതെ ബർത്തിൽ എണീറ്റിരുന്നു. ട്രെയിൻ ഏതോ സ്റ്റേഷനിൽ എത്തിയിട്ടുണ്ട്. ഞാൻ പതിയെ തലക്ക് വെച്ച ബാഗിന്റെ മുൻപിലെ അറ തുറന്നു എൻ്റെ കണ്ണട പുറത്തെടുത്തു. സ്കൂളിൽ പഠിക്കുന്ന കാലം മുതലേ ഇതെന്റെ കൂടെ ഉണ്ട്. അതുകൊണ്ട് തന്നെ ചെറുപ്പത്തിൽ ജീവനായി കൊണ്ട് നടന്ന ഫുട്ബോൾ എനിക്ക് സ്കൂളിൽ എത്തിയപ്പോൾ ഉപേക്ഷിക്കേണ്ടി വന്നു. പിന്നെ പതിയെ പതിയെ കളിക്കാൻ വയ്യാത്ത കളിയോട് അകലാൻ തുടങ്ങി. അങ്ങനെ ഇപ്പോൾ ഫുട്ബോൾ കാണലും നിന്നു.
മിഡിൽ ബെർത്തിൽ നിന്നും താഴേക്ക് ചാടി ഇറങ്ങി. അച്ഛൻ ട്രോളി ഒക്കെ എടുത്ത് വെച്ചിട്ടുണ്ട്. ഫോണിൽ ആരോടോ സംസാരിക്കുകയാണ്. എന്നോട് ട്രോളി എടുക്കാൻ ആംഗ്യം കാണിച്ചു കൊണ്ട് അച്ഛൻ ഒരു ബാഗ് എടുത്ത് മുൻപിൽ നടന്നു.
റെയിൽവേ സ്റ്റേഷന്റെ പുറത്തു അച്ഛന്റെ സുഹൃത്ത് കാത്തുനിന്നിരുന്നു. അമ്പത് വയസ്സോളം പ്രായം തോന്നിക്കുന്ന ഒരാൾ.. അയാൾ ചിരിയോടെ അച്ഛന്റെ അടുത്തേക്ക് നടന്നു വന്നു, സല്യൂട്ട് ചെയ്യുന്ന പോലെ കാണിച്ചു. എന്നിട്ടാ ബാഗ് വാങ്ങിക്കൊണ്ട് കാറിനടുത്തേക്ക് നടന്നു – ഒരു വെള്ള i 20 .
ഞാൻ പുറകിൽ കയറി ഇരുന്നു. ആദ്യമായാണ് ഞാൻ തിരുവനന്തപുരം വരുന്നത്. തലസ്ഥാന നഗരി, അനന്തപുരി.. ഇനിയുള്ള രണ്ടു വർഷങ്ങൾ ഞാൻ ഇവിടെ ആണ്. KSRTC ബസ് ടെർമിനലിന്റെ മുന്നിലുള്ള റൌണ്ട് എബൌട്ട് നെ ചുറ്റി കാർ മുന്നോട്ട് ഓടി.റോഡിൽ കുറച്ചൊക്കെ തിരക്കുണ്ട്. ബസും, ഓട്ടോയും, കാറും ഒക്കെ ആയി. വണ്ടി ഓടിക്കൊണ്ടിരുന്നു….
ഒരു രണ്ടു നില വീടിനു മുന്നിലാണ് കാറ് വന്നു നിന്നത്. ഗേറ്റ് തുറന്നു കൊണ്ട് ചുരിദാർ ഇട്ട ഒരു സ്ത്രീ നിൽക്കുന്നു. നല്ല ആഢ്യത്വം ഉള്ള മുഖം. കഴുത്തിൽ കട്ടിയുള്ള ഒരു സ്വർണ ചെയിൻ. നല്ല ഉയരവും പാകത്തിന് തടിയും. എൻ്റെ അമ്മയെ പോലെ തന്നെ തോന്നുന്നു.
കാറിൽ നിന്നും പുറത്തിറങ്ങിയപ്പോഴേക്കും ആന്റി അടുത്തേക്ക് വന്നു. എന്റെ ചുരുളൻ മുടിയിൽ തലോടിക്കൊണ്ട്,
” വലിയ കുട്ടി ആയല്ലോ.. ദേ ഇത്ര ഉള്ളപ്പോ കണ്ടതാ. ഞങ്ങളെ ഓർമ ഉണ്ടോ?? ” എന്ന് ചോദിച്ചു.
ഇല്ല.. എനിക്ക് യാതൊരു പരിചയവും തോന്നുന്നില്ല. പക്ഷെ എന്തോ ഒരു അടുപ്പം തോന്നുന്നു.
ഞാൻ ഒന്നും മിണ്ടാതെ ചിരിച്ചു കൊണ്ട് തല ആട്ടി.
“അതിനു അവരൊക്കെ ഓർമ വെക്കുന്നതിന്റെ മുന്നേ നമ്മൾ അവിടുന്ന് പോന്നില്ലേ?? എങ്ങനെ ഓർമ കാണാനാ… ” അങ്കിൾ എൻ്റെ രക്ഷക്കെത്തി.
എല്ലാവരും വീടിനകത്തേക്ക് കേറി. എല്ലാ സൗകര്യങ്ങളും ഉള്ള ഒരടിപൊളി വീട്. താഴെ രണ്ടു റൂം- അതിൽ ഒരെണ്ണം ഓഫീസ് റൂം ആണ്. മുകളിൽ മൂന്നു റൂം.
” മോന്റെ റൂം മുകളിലാ… ” ആന്റി എന്റെ കൂടെ വന്നുകൊണ്ട് പറഞ്ഞു.
റൂം കൊള്ളാം.. വലിയൊരു റൂം, ബാത്ത് അറ്റാച്ചഡ്. റൂമിന്റെ നടുക്ക് വലിയൊരു ഡബിൾ കോട്ട്. സൈഡിൽ ആയി സ്വിച്ച് ബോർഡിൻറെ അടുത്ത് മരം കൊണ്ടുള്ള ഒരു മേശയും കസേരയും. മേശപ്പുറത്തു എന്തൊക്കെയോ മെഡിക്കൽ ബുക്‌സ് ഇരിക്കുന്നു. റൂമിന്റെ ഒരു സൈഡ് നിറച്ചു കബോഡ്… ഒരു സൈഡിലെ ജനലിനടുത്തായി പുറത്തേക്ക് ബാല്കണിയിലേക്ക് ഒരു വാതിൽ. നല്ല തണുപ്പ് ഉള്ള ഒരു റൂം. എനിക്കിഷ്ടപ്പെട്ടു.
അല്ല, ഇഷ്ടപ്പെട്ടിട്ട് കാര്യം ഇല്ല. കോളേജിലേക്ക് 8 -10 കിലോമീറ്റർ ഉണ്ടെന്നു തോന്നുന്നു. ഏതായാലും കോളേജ് ഹോസ്റ്റൽ കിട്ടുമോ എന്ന് നോക്കണം. വീട്ടിൽ ആണെങ്കിൽ ഒരു ഫ്രീഡം കിട്ടില്ല.
“മോൻ വേണേൽ കുറച്ചു നേരം കിടന്നോ.. ഒരു ഒൻപത് മണി ഒക്കെ ആവുമ്പോ ഇറങ്ങിയാ മതി ”
ഞാൻ തലയാട്ടി.
ഇവിടെ ആരൊക്കെ ഉണ്ടെന്നാവോ… ആ… ഏതായാലും കുറച്ചു കിടക്കാം.
കുളിച്ചു റെഡി ആയി താഴെ ചെന്നപ്പോഴേക്കും അച്ഛനും അങ്കിളും കഴിച്ചു തുടങ്ങിയിരുന്നു. ഞാനും അവരോടൊപ്പം ഇരുന്നു. അങ്കിൾ ഇന്ന് തിരിച്ചു ഗൾഫിലേക്ക് പോവുമെന്ന് പറയുന്നത് കേട്ടു. അവർക്ക് രണ്ടു പെണ്മക്കൾ ആണ്. ഒരാൾ എംബിബിസ് കഴിഞ്ഞു ഹൌസ് സർജൻസി കഴിയാറായി, ഇവിടെ മെഡിക്കൽ കോളേജിൽ തന്നെ. രണ്ടാമത്തെ ആൾ എഞ്ചിനീയറിംഗ് ആണ്, എന്റെ കോളേജിൽ. പറഞ്ഞു തീർന്നപ്പോഴേക്കും ഇളയ ആൾ എത്തി.
അയ്യോ.. ആരും നോക്കി നിക്കും. ഭയങ്കര എലഗന്റ് ആയിട്ടുള്ള ലുക്ക്. വെളുത്ത നിറം. അന്യായ സ്ട്രെക്ച്ചർ. ഡ്രസിങ് സെൻസ് ഒരു രക്ഷയും ഇല്ല. ഓറഞ്ച് കളർ അബ്സ്ട്രാക്ട് പ്രിൻറിംഗ് ഉള്ള ഒരു ടോപ്പും, വെള്ള ലെഗിങ്‌സും ആണ്. ഷാൾ ഇല്ല. കയ്യിലോ കഴുത്തിലോ ഒന്നുമില്ല. ആകെ ഉള്ളത് ഒരു ഫാസ്റ്റ് ട്രാക്കിന്റെ വീതിയുള്ള സ്ട്രാപ്പ് ഉള്ള ഒരു വാച്ച്. നല്ല ഓമനത്തം ഉള്ള മുഖം ആണ്, കറുത്ത ചതുര ഫ്രെയിം ഉള്ള കണ്ണട. മുഖത്തൊന്നും ഒരു പാടോ മുഖക്കുരുവോ ഒന്നും ഇല്ല. മുടി കഴുത്തിന് കുറച്ചു താഴെ വെച്ച് കട്ട് ചെയ്തതാണ്‌, അത് പോണി ടെയിൽ കെട്ടിയിരിക്കുന്നു. ഞാൻ ആ മുഖത്തേക്ക് തന്നെ നോക്കി ഇരുന്നു.
” ഇതെന്റെ രണ്ടാമത്തെ മോൾ – ശ്രീലക്ഷ്മി. ശ്രീ എന്ന് വിളിക്കും ഇവിടെ. ഭയങ്കര നേതാവാണ് കോളേജിൽ. ” അങ്കിൾ പറഞ്ഞു.
അവൾ ഒന്നും പറയാതെ ഒന്ന് പുഞ്ചിരിച്ചു കൊണ്ട് ഫുഡ് കഴിക്കാൻ തുടങ്ങി.
ആന്റി കൊല്ലത്തു ഒരു കോളേജിൽ ആണ് പഠിപ്പിക്കുന്നത്. അങ്കിൾ രാജി വെച്ചതിനു ശേഷം ഇവിടെ ഒരു വീട് വാങ്ങി ഇങ്ങോട്ട് ഷിഫ്റ്റ് ചെയ്തു. അങ്കിൾ പണ്ട് അച്ഛന്റെ കൂടെ എസ്‌.ഐ. ആയി ഉണ്ടായിരുന്നതാണ്. രണ്ടു സസ്‌പെൻഷൻ ഒക്കെ കിട്ടിയപ്പോ പുള്ളി ജോലി രാജി വെച്ച് ഗൾഫിൽ അളിയന്റെ കൂടെ ബിസിനസ്സ് ഒക്കെ ആയി കൂടി. ഇന്ന് തിരിച്ചു ഗൾഫിലേക്ക് പോവുമെന്ന് നേരത്തെ പറഞ്ഞത് അതുകൊണ്ടാണ്.
” മോളെ… നീയിന്നു കാർ എടുത്തോ.. അഡ്മിഷൻ ആയത് കൊണ്ട് പെട്ടെന്ന് തീരും, എന്നിട്ട് ഇവർ അതും കൊണ്ട് ഇങ്ങോട്ട് പോന്നോട്ടെ.. എന്നെ ഉച്ചക്ക് എയർപോർട്ടിൽ ഇവർ ആക്കിക്കോളും. ” അങ്കിൾ പറഞ്ഞു.
അവൾ തലയാട്ടി…അവൾ അധികം സംസാരിക്കാറില്ലെന്നു തോന്നുന്നു.
ഫുഡ് എല്ലാം കഴിച്ചു ഞങ്ങൾ ഇറങ്ങി. അവൾ നല്ല സൂപ്പർ ആയി വണ്ടി ഓടിക്കുന്നുണ്ട്. സിറ്റിയിൽ വളർന്നതിന്റെ ഗുണം ആണ്. കാറിൽ വെച്ച് അച്ഛൻ ചോദിച്ചതിനൊക്കെ അവൾ എന്തൊക്കെയോ മറുപടി പറയുന്നുണ്ട്.
കോളേജ് കോംപൗണ്ടിന് വെളിയിൽ കാർ പാർക്ക് ചെയ്തു. വിദ്യാർത്ഥികളുടെ വാഹനങ്ങൾ ക്യാമ്പസ്സിനകത്തേക്ക് കയറ്റാൻ പാടില്ല. വലിയൊരു ക്യാമ്പസ് ആണ്. ഭീമാകാരമായ ഒരു ഗേറ്റ്. 2 സെക്യൂരിറ്റിക്കാർ രണ്ടു ഭാഗത്തായി നിൽക്കുന്നു.ഗേറ്റിൽ നിന്നും കുറച്ചു ദൂരമുണ്ട് മെയിൻ ബിൽഡിങ്ങിലേക്ക്…ചുറ്റും ഇഷ്ടം പോലെ മരങ്ങൾ. മെയിൻ ബിൽഡിങ്ങിന്റെ ഒരു വശത്തായി പാർക്ക് പോലെ ആളുകൾക്ക് ഇരിക്കാനൊക്കെ സൗകര്യം ഉള്ള ഒരു സ്ഥലം. മറ്റു ഡിപ്പാർട്മെന്റുകൾ ഒക്കെ ക്യാമ്പസ്സിന്റെ അവിടെയും ഇവിടെയും ഒക്കെ ആയിട്ടാണ്. അഡ്മിഷൻ ഇവിടെ ആണ്.
