പാവം, ഇന്നലെ അത്രയും ദൂരം യാത്ര ചെയ്തുവന്ന്, ഇന്ന് മുഴുവൻ കഷ്ടപ്പെട്ട് നല്ല ക്ഷീണം കാണും.
എനിക്ക് നല്ല കഴപ്പ് ഉണ്ടായിരുന്നെങ്കിലും അവളെ ഉണർത്താൻ മനസ്സ് വന്നില്ല.
ഞാൻ പുതപ്പ് എടുത്ത് അവളെ പുതപ്പിച്ചു. എന്നിട്ട് ലൈറ്റ് അണച്ചിട്ട് പതിയെ വന്ന് അവളുടെ കൂടെ കയറി കിടന്നു. താമസിക്കാതെ ഞാനും ഉറങ്ങിപ്പോയി.
രാത്രിയിൽ എപ്പോഴോ ഞാൻ ഉണർന്ന് നോക്കുമ്പോൾ അവൾ അടുത്തില്ല.
സമയം നോക്കിയപ്പോൾ രണ്ട് മണി.
ഞാൻ എഴുനേറ്റ് ബെഡ്റൂമിന് വെളിയിൽ ഇറങ്ങി നോക്കി.
പുറത്തുനിന്നുള്ള അരണ്ട വെളിച്ചത്തിൽ ഞാൻ അവളെ കണ്ടു. പൂവ് വെച്ചിരിക്കുന്ന ബോട്ടിൽ കയ്യിൽ പിടിച്ച് അതും മണത്തുകൊണ്ട് നിക്കുവാണ്.
നിമ്മി നീ എന്നാടുക്കുവാ? ഞാൻ ചോദിച്ചു
അവൾ പെട്ടെന്ന് ഞെട്ടി, കയ്യിൽ പിടിച്ചിരുന്ന ബോട്ടിൽ താഴെ വെച്ചു.
നീ എണീച്ചോ?
ഞാൻ ഇന്നലെ കിടന്നപ്പോൾ തന്നെ ഉറങ്ങിപ്പോയി.
നീയെന്താ എന്നെ വിളിച്ച് എണീപ്പിക്കാഞ്ഞേ? അവൾ ലൈറ്റ് ഇട്ടുകൊണ്ട് പറഞ്ഞു.
നിനക്ക് നല്ല ക്ഷീണം കാണും ഉറങ്ങട്ടെ എന്ന് വിചാരിച്ചു.
ഞാനിപ്പോൾ എണീറ്റതേ ഉള്ളൂ, നോക്കിയപ്പോ നീ നല്ല ഉറക്കം. അന്നേരം കുറച്ച് വെള്ളം കുടിക്കാൻ വന്നതാ.
പൂവിട്ട് വച്ചേക്കുന്ന വെള്ളമാന്നോ നീ കുടിക്കുന്നെ?
അല്ല, ഇതെനിക്ക് ഒത്തിരി ഇഷ്ടപ്പെട്ടു, കാണുമ്പോ ഒക്കെ എടുത്ത് മണക്കാൻ തോന്നും, അതാ.
എനിക്ക് സംശയമായിരുന്നു നിനക്ക് അത് ഇഷ്ടപ്പെടുമോ എന്ന്.
അതിലെന്താ സംശയിക്കാൻ?
പൂവ്, ചോക്ലേറ്റ്, ഐസ്ക്രീം. ഇതൊക്കെ ശരിക്ക് ഇഷ്ടപ്പെടും.
ഭാവിയിൽ സംശയം ഉണ്ടാവാതിരിക്കാൻ പറഞ്ഞതാ.
അവൾ ഒരു കള്ളച്ചിരി ചിരിച്ചുകൊണ്ട് പറഞ്ഞു.
മം, ആയിക്കോട്ടെ…
ഞാൻ തലയാട്ടി
നീ പുറത്തോട്ട് നോക്കിയോ? ഇപ്പൊ നല്ല ക്ലിയർ ആയി, എല്ലാം കാണാമെടാ.
മം, പക്ഷേ ഇപ്പോ ബാൽക്കണിയിൽ ഇറങ്ങാൻ പോലും പറ്റത്തില്ല, ഭയങ്കര തണുപ്പായിരിക്കും.
വാ എന്നാലും നമുക്കൊന്ന് നോക്കാം. അവൾ പറഞ്ഞു.
ഞാൻ മനസ്സില്ലാ മനസ്സോടെ അവളുടെ കൂടെ ചെന്നു.
ബാൽക്കണിയിൽ ഇറങ്ങിയപ്പോ തന്നെ നല്ല തണുപ്, നിലത്ത് ചവിട്ടാൻ പോലും പറ്റുന്നില്ല.
പക്ഷേ അന്തരീക്ഷം നല്ല ക്ലിയർ ആയി, അങ്ങ് ദൂരെ വരെ കാണാം.
എന്നാ തണുപ്പാടാ ഇത്, അവൾ എന്റെ കയ്യിൽ പിടിച്ചു കൊണ്ട് പറഞ്ഞു.
ഞങ്ങൾ രണ്ടും, ഒരു മിനിറ്റിനുള്ളിൽ തിരിച്ച് അകത്ത് കയറി.
സമാധാനമായോ? ഞാൻ അവളോട് ചോദിച്ചു.
ഇല്ല ആയില്ല,
അങ്ങനെയങ്ങ് വിട്ടുകൊടുക്കാൻ പറ്റത്തില്ലല്ലോ.
നമ്മൾ അന്ന് മേടിച്ച എയർ നിറയ്ക്കുന്ന മെത്ത എന്തിയെ?
നീയല്ലേ അൺപാക്ക് ചെയ്തത്? ഞാനത് ബെഡ്ഷീറ്റിന്റെ കൂടെ വെച്ചിട്ടുണ്ടായിരുന്നു.
ആ, ഒക്കെ മനസ്സിലായി എവിടാ ഇരിക്കുന്നെന്ന്.
നീ എന്നാടുക്കാന് പോവാ നിമ്മി? അതിന്റെ എയർ പമ്പ് ഒന്നും ഓൺ ചെയ്യാൻ പറ്റത്തില്ല ഈ സമയത്ത്, ഭയങ്കര ശബ്ദമായിരിക്കും.
നമുക്ക് നോക്കാം, ശബ്ദമാണേൽ നിർത്തിക്കോളാം പോരെ?
അവൾ പറഞ്ഞിട്ട് അത് തപ്പിയെടുക്കാൻ പോയി.
പറഞ്ഞിട്ട് കാര്യമില്ല എന്ന് അറിയാവുന്നതുകൊണ്ടും, വേറെ വഴിയില്ലാത്തതുകൊണ്ടും. ഞാൻ അവളുടെ പുറകെ പോയി.
അവളത് തപ്പിയെടുത്ത് പമ്പ് കണക്ട് ചെയ്ത് ഓൺ ആക്കി.
വിചാരിച്ച അത്ര ശബ്ദമില്ലെങ്കിലും, കുറച്ച് ശബ്ദമുണ്ടായിരുന്നു.
നീയെ, ഒന്ന് പുറത്തിറങ്ങി നോക്കിക്കേ. അങ്ങോട്ട് ഒത്തിരി സൗണ്ട് കേൾക്കാമോ എന്ന്.
അവൾ പറഞ്ഞു.
ഞാൻ പുറത്തിറങ്ങി കതക് ചാരി നോക്കി.
വലിയ ശബ്ദം പുറത്തോട്ട് കേൾക്കുന്നില്ല.
ഞാൻ തിരിച്ച് അകത്ത് കയറി കതകടച്ച് അത് അവളോട് പറഞ്ഞു.
നീ വാ, കുറച്ചു സാധനങ്ങൾ എടുക്കാൻ ഉണ്ട്.
അവൾ പറഞ്ഞിട്ട് ബെഡ്റൂമിലേക്ക് നടന്നു.
ഞാൻ അവളുടെ പുറകെ ബെഡ്റൂമിൽ കയറി. അവൾ രണ്ട് ബ്ലാങ്കറ്റും, കമ്പിളിയും എടുത്ത് എന്നെ പിടിപ്പിച്ചു. എന്നിട്ട് അവിടെ ഇരുന്ന യോഗ മാറ്റ് എടുത്ത് പുറത്തിറങ്ങി.
ഇത് എന്നാത്തിനാ? ഞാൻ യോഗ മാറ്റ് നോക്കി അവളോട് ചോദിച്ചു.
അതൊക്കെയുണ്ട് പറയാം നീ വാ.