ആ നായകുട്ടിക്ക് കല്ല്യാണി ഇട്ട പേരാണ് ലുസി…കുറച്ചു ദിവസങ്ങൾ കൊണ്ട് തന്നെ ലുസി എല്ലാവരോടുമായി കൂട്ടായി…
ഞാൻ കല്ല്യാണിയുമായി കൂടുതൽ അടുക്കാൻ തുടങ്ങി.. പക്ഷേ കാര്യമായി ഒന്നും തന്നെ നടന്നില്ല കാരണം അതിനുള്ള ഒരു മനസികാവസ്ഥയിൽ ആയിരുന്നില്ല ഞാൻ…
കല്ല്യാണിയോടുള്ള എന്റെ പെരുമാറ്റം മാറിയത് എല്ലാവരും ശ്രദ്ധിച്ചു…. ആ കാര്യത്തിൽ എല്ലാവരും ഹാപ്പിയാണ്..
പക്ഷേ സഹിക്കാൻ പറ്റാത്തത്… ചേച്ചിമാരുടെ കളിയാക്കൽ ആണ്…
പ്രത്യേകിച്ച് പാറു… 😤
‘ഓഹ് എന്തൊക്കെയായിരുന്നു… ഇവളെ ചത്താലും കെട്ടില്ല എന്ന് പറഞ്ഞു നടന്നവനാ.. ഇപ്പോൾ കിടക്കുന്നടക്കം അവളുടെ മടിയിൽ ആണ്…’
അങ്ങനെ ഓരോന്ന് പറഞ്ഞു കളിയാക്കൽ ഓക്കേ തുടങ്ങി… എനിക്ക് അതൊക്കെ കേൾക്കുമ്പോൾ ഒരു ചളിപ്പ് ഓക്കേ തോന്നുമെങ്കിലും… പതിയേ പതിയേ അതൊക്കെ മാറി വരാൻ തുടങ്ങി…കല്ല്യാണി പിന്നേ ആദ്യം മുതലേ കൂൾ ആണ്.. അവൾക്ക് അങ്ങനെ നാണോം മാനോ ഇല്ലാത്തോണ്ട് കുഴപ്പമില്ല…
പക്ഷേ എന്തൊക്കെയായാലും മനസ്സിൽ സന്തോഷത്തിനേക്കാൾ കൂടുതൽ പേടിതന്നെയാണ്…
ഓരോ ദിവസം കഴിയുമ്പോഴും ആ പേടി എന്തെന്നില്ലാത്ത കൂടി കൂടി വരാൻ തുടങ്ങി..
എന്നിരുന്നാലും വലിയ കുഴപ്പങ്ങൾ ഒന്നും ഇല്ലാതെ പോയികൊണ്ടിരിക്കുമ്പോൾ ആണ് ക്ഷേത്രത്തിൽ വച്ച് ഞങ്ങൾക്ക് എല്ലാവർക്കുമായി എന്തോ സ്പെഷ്യൽ പൂജ ഓക്കേ ഉണ്ടെന്നും… എല്ലാവരോടും നിർബന്ധമായും വരണമെന്നും എ ആ കള്ള താടി മാണിക്യൻ പറഞ്ഞത്….
എനിക്ക് വലിയ താൽപ്പര്യമൊന്നും തോന്നിയില്ലെങ്കിലും ബാക്കി ഉള്ളവർ അങ്ങനെയല്ലല്ലോ…
അങ്ങോട്ട് പോകുന്നതിന്റെ തിരക്കിലാണ് ഇപ്പോൾ എല്ലാവരും…
നടന്ന് തന്നെയാണ് പോകേണ്ടത്…
എല്ലാവരെയും കാണാൻ പ്രേത്യേക ഭംഗി തോന്നി…കല്ല്യാണിയുടെ കാര്യം പിന്നേ പറയേണ്ടല്ലോ…
ക്ഷേത്രത്തിലെക്കുള്ള… ആ കാട്ടിലെ വഴിയിലൂടെ ഞങ്ങൾ നടക്കാൻ തുടങ്ങി…..അന്നത്തെ സംഭവത്തിനുശേഷം ആ വഴിയൊക്കെ നല്ല വൃത്തിയാക്കി കമ്പിവേലികൊണ്ട് കെട്ടി വച്ചിട്ടുണ്ട്..
ഞങ്ങൾ എന്ന് വച്ചാൽ ഞാനും കല്ല്യാണിയും ദേവുചേച്ചിയും, നന്ദു ചേച്ചിയും പിന്നേ അരുണും..
ഈയിടെയായി ദേവൂചേച്ചിയെ കാണുമ്പോൾ അരുണിന് ഇളക്കം കൂടുതൽ ആണ്… 😤ചേച്ചിയും അരുണിനോട് ഇപ്പോൾ നല്ല കമ്പനിയാണ്..
പിന്നെ നന്ദുചേച്ചിയെ തിരിച്ചു കൊണ്ടുവന്ന ആൾ അല്ലേ ഒന്നും ചോദിക്കാൻ ഒന്നും പോയില്ല..
ബാക്കി ഉള്ളവർ എല്ലാവരും ആദ്യമേ പോയി…നേരം അൽപ്പം ഇരുട്ടി തുടങ്ങിയിരുന്നു…
കളിയും ചിരിയും തമാശയും ഒക്കെയായി ഓരോന്ന് പറഞ്ഞു കാട്ടിലൂടെ നടക്കുന്നതിനിടയിൽ നന്ദു ചേച്ചി ഒരു സ്ഥലമെത്തിയപ്പോൾ പൊടുന്നനെ നിന്നു …
ഞങ്ങൾ ചേച്ചിയെ നോക്കുമ്പോൾ ചേച്ചി ഒരു ദിശയിലേക്കായി നോക്കികൊണ്ടിരിക്കുകയാണ്…
അവിടേ കുറച്ച് ദൂരത്തേക്ക് നോക്കിയപ്പോൾ ഞാൻ കാണുന്നത് ആ ആളാണക്കമില്ലാത്ത വീടാണ്… ഞാൻ സ്വപ്നം കണ്ട വീട്.. ചേച്ചിയേ ബോധമില്ലാതെ കിട്ടിയ വീട്….
അങ്ങോട്ട് നോക്കിയപ്പോൾ തന്നെ ദേഹമാസകലം ഒരു കുളിരു കോരി…
വല്ലാത്ത ഒരു നിശബ്ദത അനുഭവിക്കാൻ കഴിഞ്ഞു….
ആ ചെറിയ വീട് കാണുമ്പോൾ തന്നെയറിയാം… ഒരുപാട് വർഷമായി ആ വീട് ഇവിടേ സ്ഥിതി ചെയ്യുന്നുഎന്ന്.. എന്നിട്ട്പോലും അത്രയും വർഷത്തിന്റെ പഴക്കം ആ വീട്ടിൽ കാണുന്നില്ല…..
ചേച്ചി ആ കാഴ്ച്ചയിൽ മുഴുകി നിൽക്കുകയാണ്…
“നന്ദു… ”
ദേവുചേച്ചി തട്ടിവിളിച്ചപ്പോളാണ് ചേച്ചി പരിസര ബോധം വീണ്ടെടുത്തത്…
“എന്താ അങ്ങോട്ട്… നോക്കുന്നേ..”
ദേവുചേച്ചി നന്ദുചേച്ചിയോടായി തിരക്കി…
“ഏയ് ഒന്നുല്ല ചേച്ചി… ഞാൻ വെറുതെ.. ”
അതും പറഞ്ഞു നന്ദു ചേച്ചി വീണ്ടും നടക്കാൻ തുനിഞ്ഞതും ദേവുചേച്ചി നന്ദു ചേച്ചിയുടെ കയ്യിലായി കയറി പിടിച്ചു…
ദേവൂചേച്ചിയെ കണ്ടാൽ അറിയാം ചേച്ചി രണ്ടും കല്പിച്ചാണ് എന്ന്…