“ഏയ്! ഇല്ല ചേച്ചി. അത് മറന്നേക്ക്. ഞാൻ പറഞ്ഞു വന്നപ്പോൾ അങ്ങനെ എന്തൊക്കെയോ പറഞ്ഞു പോയി. എന്നെ ഉള്ളൂ. എന്റെ മനസ്സിൽ ഒന്നും ഇല്ല.” ഞാൻ പറഞ്ഞു.
“ഏയ്! അല്ല. എന്റെ മോനെ ഈ ചേച്ചിക്ക് നന്നായി അറിയാം. അന്ന് മുതൽ അല്ലേ മോൻ ചേച്ചിയോടും പിണങ്ങി നടന്നത്. അമ്മ പോകുന്നതിനു മുൻപ് എത്ര വട്ടം എന്റെ മോനോട് പറഞ്ഞതാ ഒരു വിവാഹം കഴിക്കാൻ. അമ്മ ഒരുപാട് ആഗ്രഹിച്ചതും ആണ് എന്റെ മോന്റെ വിവാഹം. എന്റെ മോൻ വിശ്വസിക്കുമോ എന്ന് അറിയില്ല എന്നാലും അച്ഛനും അത് ആഗ്രഹിച്ചിരുന്നു.. എന്നിട്ടും നീ സമ്മതിച്ചില്ലല്ലോ.. അതുകൊണ്ടല്ലേ ഇന്നും നീ വിവാഹം കഴിക്കാതെ നടക്കുന്നത്. എന്റെ മോന് ഇപ്പോൾ എത്ര വയസ്സയെന്നാ….! ചേച്ചി നാട്ടിൽ വരട്ടെ!. ചേച്ചി നാട്ടിൽ വന്നിട്ട് ചില തീരുമാനങ്ങൾ എടുക്കുന്നുണ്ട്. മോൻ അതിന് സമ്മതിച്ചാൽ മാത്രം മതി.”
അതും പറഞ്ഞു ചേച്ചി ഫോൺ വെച്ചു.
ഞാൻ അവിടെ തന്നെ ഇരുന്നു. അപ്പോഴാണ് ആതു ഓടി എന്റെ അടുത്തേക്ക് വന്നത്. എന്റെ അടുത്ത് എത്തിയ ഉടനെ അവളുടെ കൈയിൽ ഇരുന്ന പ്രസാദത്തിൽ നിന്നും കുറച്ചു ചന്ദനം എടുത്ത് എന്റെ നെറ്റിയിൽ തൊട്ടിട്ടു പറഞ്ഞു.
“കിച്ചു ഏട്ടൻ തൊഴാൻ വന്നില്ലെങ്കിലും കിച്ചു ഏട്ടന് വേണ്ടി ഞാൻ പ്രാർത്ഥിച്ചു. അതുകൊണ്ട് ഇത്തിരി പ്രസാദം ഇവിടെ നെറ്റിയിൽ ഇരുന്നോട്ടെ. മായിച്ചു കളയല്ലേ..”
ഞാൻ അവളെ നോക്കി ചിരിച്ചു. എന്നിട്ട് ചോദിച്ചു.
” പ്രാർത്ഥിച്ചു കഴിഞ്ഞോ..? എന്നിട്ട് അവരൊക്കെ എവിടെ..? തിരിച്ചു പോകാറായില്ലേ..?”
“കിച്ചു ഏട്ടന് പോകാൻ തിരക്കായോ..? കിച്ചു ഏട്ടന് വിശക്കുന്നുണ്ടാകും അല്ലേ..? ഇവിടെ പായസം കഴിപ്പിച്ചിട്ടുണ്ട്. അവർ അത് വാങ്ങാൻ നിൽക്കുകയാ. അത് കിട്ടിയ ഉടനെ പോകാം കിച്ചു ഏട്ടാ.” ആതു പറഞ്ഞു.
ഞാൻ ചിരിച്ചു കൊണ്ട് പോക്കറ്റിൽ നിന്നും ഒരു അഞ്ഞൂറ് രൂപ കൂടെ എടുത്തിട്ട് അവളുടെ കൈയിൽ കൊടുക്കാൻ നോക്കികൊണ്ട് പറഞ്ഞു.
“ഇന്നാ ഇത് വെച്ചോ. എന്നിട്ട് എന്താ വേണ്ടത് എന്ന് വെച്ചാൽ കഴിപ്പിച്ചോ.”
എന്നാൽ അത് വാങ്ങാൻ കൂട്ടാക്കാതെ ആതു. പറഞ്ഞു.
“വേണ്ട കിച്ചു ഏട്ടാ. അമ്മയുടെ കൈയിൽ ഉണ്ടായിരുന്നു. എങ്കിലും അമ്മയെകൊണ്ട് കൊടുക്കാൻ അമ്മി സമ്മതിച്ചില്ല. അമ്മി പറഞ്ഞു കിച്ചു ഏട്ടൻ പൈസ തന്നിട്ടുണ്ട് . എന്ത് വേണമെങ്കിലും കഴിപ്പിച്ചോളാൻ പറഞ്ഞിട്ടെന്ന്. പിന്നെ എനിക്ക് ഇപ്പോൾ എന്തിനാ കിച്ചു ഏട്ടാ പൈസ തരുന്നത്.”.
അപ്പോൾ എനിക്ക് എന്റെ ഫരിയെ കുറച്ചു അഭിമാനം തോന്നി. അവളെ കെട്ടിപിടിച്ചു ഉമ്മ വെക്കാൻ തോന്നി.
“ഞാൻ വേഗം വരാം കിച്ചു ഏട്ടാ..” അങ്ങനെ പറഞ്ഞിട്ട് ആതു തിരിച്ചു നടക്കാൻ തുടങ്ങിയപ്പോൾ ഞാൻ അവളെ വിളിച്ചു.
“മോളെ ആതു. ‘ പിറന്നാൾ ആശംസകൾ മോളെ. എന്റെ ആതുമോൾക്ക് ഇനിയും ഇനിയും ഒരുപാട് പിറന്നാൾ ആഘോഷിക്കാൻ ഉള്ള ഭാഗ്യം ഉണ്ടാവട്ടെ.”
ഞാൻ പറഞ്ഞത് കേട്ട് ആതുവിന്റെ കണ്ണ് നിറഞ്ഞു. എന്നിട്ട് അവൾ പറഞ്ഞു.
“താങ്ക്സ് കിച്ചു ഏട്ടാ. എനിക്ക് ഒരുപാട് സന്തോഷം ആയി. എനിക്ക് ഇതിലും വലിയൊരു സമ്മാനം ഇനി കിട്ടാൻ ഇല്ല. ഇതിന് പകരം ആയി കിച്ചു ഏട്ടന്റെ കവിളിൽ ഞാൻ ഒരു ഉമ്മ തന്നേനെ. പക്ഷെ ഇവിടെ ആയിപോയി.”
അങ്ങനെ പറഞ്ഞു ചിരിച്ച ശേഷം അവൾ വീണ്ടും പറഞ്ഞു.
“ഇപ്പോൾ എന്റെ വല്യമ്മയും ഇവിടെ വേണമായിരുന്നു. വല്യമ്മയും ഒരുപാട് സന്തോഷിച്ചേനെ. ഇനി എന്റെ എല്ലാ പിറന്നാളിനും കിച്ചു ഏട്ടൻ എന്റെ കൂടെ ഉണ്ടാവണം. കിച്ചു ഏട്ടൻ വരില്ലേ ഇനി എന്നും. എന്റെ പിറന്നാളിന്. .”.
” വരും. ” ഞാൻ പറഞ്ഞു. അത് കേട്ട് സന്തോഷത്തോടെ ആതു അമ്പലത്തിന്റെ അകത്തേക്ക് ഓടി.
ഞാൻ എന്റെ പഴയൊരു പിറന്നാൾ ഓർത്തു. ഒരു കുട്ടിക്കാലം.
“ഇന്ദൂ. നാളെയാണ് എന്റെ പിറന്നാൾ. ഇന്ദു എനിക്ക് എന്ത് പിറന്നാൾ സമ്മാനം ആണ് തരുന്നേ..?” ഞാൻ ഇന്ദുവിനോട് ചോദിച്ചു.