”കണ്ണ് തുറന്നോ…”
അവൾ പതുക്കെ കണ്ണുകൾ തുറന്ന് കൈയിലിരിക്കുന്ന ആ കവറിലേക്ക് നോക്കി. സംശയത്തോടെ അവൾ അത് തുറന്നു. അതിനകത്തെ സാധനം കണ്ടതും അവൾ ശരിക്കും ഞെട്ടിപ്പോയി. ആ വലിയ കണ്ണുകൾ അത്ഭുതം കൊണ്ട് വിടർന്നു.
വളരെ മനോഹരമായൊരു പുതിയ സ്മാർട്ട് ഫോൺ! ഇന്ദ്രനീലം തറവാട്ടിൽ സ്വന്തമായി ഒരു ഫോൺ പോലുമില്ലാതെ നടന്നിരുന്നവളാണ്. ലാൻഡ്ലൈനിൽ മാത്രം സംസാരിച്ച് ശീലമുള്ളവൾ. ആ ഫോൺ പെട്ടിയിൽ നിന്നും പുറത്തെടുക്കുമ്പോൾ അവളുടെ വിരലുകൾ നേരിയ തോതിൽ വിറയ്ക്കുന്നുണ്ടായിരുന്നു.
അത്ഭുതം പെട്ടെന്ന് ചെറിയൊരു പരിഭവത്തിന് വഴിമാറി. അവൾ എന്നെ നോക്കി ചോദിച്ചു.
”എന്തിനാ ആദീ എനിക്കിപ്പൊ ഫോൺ ഒക്കെ? ഇതിനൊക്കെ ഇപ്പൊ നല്ല പൈസ ആയിട്ടുണ്ടാവില്ലേ…”
അവളുടെ ആ നിഷ്കളങ്കമായ ചോദ്യം കേട്ട് എനിക്ക് ചിരിവന്നു.
ഞാൻ അവളുടെ അരികിലേക്ക് ചേർന്നിരുന്ന്, ആ ഫോൺ പിടിച്ചിരിക്കുന്ന കൈകളിൽ എന്റെ കൈകൾ ചേർത്തുവെച്ചു. എന്നിട്ട് വളരെ സ്നേഹത്തോടെ അവളുടെ കണ്ണുകളിലേക്ക് നോക്കി പറഞ്ഞു.
”എന്റെ പെണ്ണിനെ എനിക്ക് ഓഫീസിലിരിക്കുമ്പോ ഇടക്ക് വിളിക്കണ്ടേടി?
എപ്പോഴും അമ്മയുടെ ഫോണിലേക്ക് വിളിക്കാൻ പറ്റുമോ… അതുകൊണ്ടാ എന്റെ പെണ്ണിനുവേണ്ടി ഞാൻ ഇത് വാങ്ങിയത്…”
എന്റെ ആ വാക്കുകൾ കേട്ടതും അവളുടെ കണ്ണുകൾ നിറഞ്ഞു. ഒരിക്കലും പ്രതീക്ഷിക്കാത്തൊരു സമ്മാനം കിട്ടിയതിന്റെ സന്തോഷം ആ മുഖത്തുണ്ടായിരുന്നു. സ്വന്തമായി ഒരു ഫോൺ കിട്ടിയതിനേക്കാൾ, അവൾക്കുവേണ്ടി ഞാൻ കാണിച്ച ആ കരുതൽ അവളുടെ ഹൃദയത്തെ വല്ലാതെ സ്പർശിച്ചിരുന്നു.
”ഇനി ഞാൻ എവിടെപ്പോയാലും നിന്റെയീ ശബ്ദം എന്റെ കൂടെത്തന്നെ ഉണ്ടാവണം…”
ഞാൻ അവളുടെ നെറുകയിൽ സ്നേഹത്തോടെ തലോടി.
മറുപടി പറയാൻ വാക്കുകൾ കിട്ടാതെ, കയ്യിലിരുന്ന ആ ഫോൺ കട്ടിലിലേക്ക് വെച്ചിട്ട് അവൾ പെട്ടെന്ന് എന്റെ കഴുത്തിലൂടെ കൈകളിട്ട് എന്നെ ഇറുകെ കെട്ടിപ്പിടിച്ചു. അവളുടെ ആ കെട്ടിപ്പിടുത്തത്തിൽ ഈ ലോകത്തെ മുഴുവൻ സ്നേഹവുമുണ്ടായിരുന്നു.
കെട്ടിപ്പിടുത്തത്തിന്റെ ആ വലിയ ചൂടിൽ നിന്നും പതുക്കെ അടർന്നുമാറി അവൾ ആ ഫോണിലേക്ക് തന്നെ വീണ്ടും നോക്കി. വലിയൊരു അത്ഭുതലോകം മുന്നിൽ കിട്ടിയ ചെറിയൊരു കുട്ടിയെപ്പോലെയായിരുന്നു അവളപ്പോൾ. ഇന്ദ്രനീലത്തിലെ ആ വലിയ തറവാട്ടിൽ മൊബൈൽ ഫോണുകൾക്ക് വലിയ സ്ഥാനമൊന്നും ഉണ്ടായിരുന്നില്ലല്ലോ. ലാൻഡ്ലൈനിലെ കറുത്ത റിസീവറിലൂടെ മാത്രം ലോകത്തെ കേട്ടവൾക്ക്, ഈ പുതിയ സ്മാർട്ട് ഫോൺ വലിയൊരു വിസ്മയമായിരുന്നു.
ഞാൻ കട്ടിലിൽ കിടന്ന ആ ഫോൺ എടുത്ത് പതുക്കെ ഓൺ ചെയ്തു. സ്ക്രീനിൽ വെളിച്ചം തെളിഞ്ഞതും അവൾ
ഒരു കൗതുകത്തോടെ എന്റെ അടുത്തേക്ക് ഒന്നുകൂടി നീങ്ങിയിരുന്നു. അവളുടെ ഈറൻമുടിയുടെ തുമ്പിൽ നിന്നും ചെറിയൊരു തണുപ്പ് എന്റെ തോളിലേക്ക് പടരുന്നുണ്ടായിരുന്നു.
”ഇങ്ങോട്ട് നോക്ക് എന്റെ പൊട്ടിപ്പെണ്ണേ… ഞാൻ ഇതിൽ നിനക്ക് അത്യാവശ്യം വേണ്ട നമ്പറുകൾ ഒക്കെ സേവ് ചെയ്തു വെക്കാം,”
ഞാൻ സ്ക്രീനിലേക്ക് നോക്കിക്കൊണ്ട് പറഞ്ഞു.
അവൾ വളരെ ശ്രദ്ധയോടെ ഞാൻ ചെയ്യുന്നത് നോക്കിയിരുന്നു. ഞാൻ ആദ്യം തന്നെ കോൺടാക്ട്സ് എടുത്ത് എന്റെ നമ്പർ ടൈപ്പ് ചെയ്തു. എന്നിട്ട് പേരിന്റെ സ്ഥാനത്ത് ‘Aadhi’ എന്നെഴുതി കൂടെ ഒരു ചുവന്ന ഹാർട്ട് സിംബൽ കൂടി വെച്ചു. അത് കണ്ട് അവൾ എന്റെ തോളിൽ പതുക്കെ ഒന്ന് നുള്ളി.
”ദേ മനുഷ്യാ… ഇതെന്തിനാ ഈ ഹാർട്ട് ഒക്കെ വെക്കണേ? വെറുതെ ആദി എന്ന് മതിയല്ലോ… വീട്ടില് അമ്മയോ വേറെ ആരെങ്കിലുമോക്കെ കണ്ടാൽ കളിയാക്കും ട്ടോ,”
നാണം കൊണ്ട് ചുവന്ന മുഖത്തോടെ അവൾ പറഞ്ഞു.
”അമ്മയൊന്നും കളിയാക്കില്ല. എന്റെ പെണ്ണിന്റെ ഫോണിൽ എന്റെ നമ്പർ ഇങ്ങനെ തന്നെ കിടക്കണം,”
ഞാൻ കുസൃതിയോടെ അവളുടെ കവിളിൽ പതുക്കെ തട്ടി. പിന്നെ ഞാൻ അമ്മയുടെയും അനഘ ചേച്ചിയുടെയും നമ്പറുകൾ കൂടി അതിൽ സേവ് ചെയ്തു.
”ദേ, ഇപ്പൊ നിനക്ക് ആവശ്യമുള്ള മൂന്നുപേരുടെ നമ്പറുകൾ ഇതിലുണ്ട്. ബാക്കിയുള്ളതൊക്കെ ഞാൻ പതിയെ സേവ് ചെയ്തു തരാം.”