“ആര്യന് കുഴപ്പം ഒന്നും ഇല്ലെങ്കിൽ അങ്ങനെ ആവട്ടെ. ഇതിന് മുന്നേ ആര്യൻ എവിടെ ആയിരുന്നു?”
“ഇതെൻ്റെ ആദ്യത്തെ പോസ്റ്റിംഗ് ആണ് മാഡം.”
“ആഹാ അതേയോ…ആര്യന് എത്ര വയസ്സുണ്ട് അപ്പോ?”
“എനിക്ക് ഇരുപത്തിയഞ്ച് മാഡം.”
“അത് ശരി. ആര്യൻ്റെ ആ ഒരു പക്വത കണ്ടപ്പോ ഞാൻ കരുതി ഒന്ന് രണ്ട് വർഷം ജോലി ഒക്കെ ചെയ്ത് ഒരു ഇരുപത്തിയേഴ് വയസ്സ് ഒക്കെ ഉള്ള ഒരു ആൾ ആയിരിക്കുമെന്ന്.”
“അയ്യോ ഹഹഹ.”
“ഏയ് നല്ല രീതിയിലാണ് പറഞ്ഞത് കേട്ടോ പ്രായം ഒരുപാട് ഉണ്ടെന്ന് തോന്നും എന്നല്ല ഉദ്ദേശിച്ചത്.”
“ഹാ അത് മനസ്സിലായി മാഡം…മാഡത്തിൻ്റെ വീട്…?”
“ടൗണിന് അടുത്താ ഇവിടുന്ന് ഒരു മണിക്കൂർ യാത്ര ഉണ്ട് ബസ്സിന്.”
“ആണല്ലേ…ഫാമിലി ഒക്കെ.”
“വീട്ടിൽ അമ്മയും അച്ഛനും മോനും ഉണ്ട്.”
“അപ്പോ മാഡത്തിൻ്റെ ഹസ്ബൻ്റ് ഗൾഫിലോ മറ്റോ ആണോ?”
“ഹസ്ബൻ്റ് രണ്ട് വർഷം മുൻപ് മരിച്ചു.”
“അയ്യോ…സോറി മാഡം…ശ്ശേ…ഞാൻ അറിയാതെ…”
“ഏയ് അത് സാരമില്ല ആര്യാ…ഇപ്പോ ഇതൊന്നും അങ്ങനെ വലിയ കാര്യം ആക്കാറില്ല. പോയവർ പോയി നമ്മൾക്ക് ഇനി അവർക്ക് വേണ്ടി ജീവിക്കാൻ അല്ലേ പറ്റൂ.”
“അതേ മാഡം.” അത് പറയുമ്പോൾ ആര്യൻ്റെ കണ്ണുകളിലും ഒരു സങ്കടം നിഴലടിച്ച് കിടക്കുന്നത് ലിയ കണ്ടു.
“ആര്യൻ്റെ വീട്ടിൽ ആരൊക്കെ ഉണ്ട്?”
“അമ്മ മാത്രം.”
“ആഹാ എങ്കിൽ അമ്മയെ കൂടി ഇങ്ങു കൊണ്ടുവരാമായിരുന്നില്ലേ?”
“അമ്മ വരില്ല…എനിക്ക് പോലും വീട്ടിൽ നിന്നും മാറി നിൽക്കുന്നത് ഇഷ്ട്ടം അല്ലായിരുന്നു പിന്നെ മറ്റ് വഴികൾ ഇല്ലാഞ്ഞതുകൊണ്ട് ഇങ്ങു പോരേണ്ടി വന്നതാ. അതൊക്കെ ഒരു വലിയ കഥയാ…”
“ആഹാ അത് ശരി. കഥയൊക്കെ ഒരു ദിവസം പറ നമ്മൾക്ക് എന്തായാലും ഇഷ്ട്ടം പോലെ സമയം ഉണ്ട് ഇവിടെ ഹഹ.”
“ഹാ മാഡം പറയാം…മാഡത്തിൻ്റെ മോൻ എത്രാം ക്ലാസ്സിൽ ആണ്?”
“മോൻ ഇപ്പോ എട്ടാം ക്ലാസ്സിൽ.”
“മാഡത്തിന് അപ്പോ എത്ര വയസ്സുണ്ട്?”
“എന്തേ മോൻ കോളജിലോ മറ്റോ പഠിക്കാൻ ഉള്ള പ്രായം കാണുമെന്ന് വിചാരിച്ചോ എന്നെ കണ്ടിട്ട്?”
“ഏയ് ഇല്ലില്ലാ…ഹഹഹ.”
“എനിക്ക് മുപ്പത്തിനാല് വയസ്സ്.”
“അത്രേ ഉള്ളൂലെ…”
“അത് പോരെ ഹഹ…”
“ചോദിച്ചന്നേ ഉള്ളൂ മാഡം.”
“ഏയ് ഞാൻ വെറുതെ പറഞ്ഞതാ ആര്യാ…എന്നാ പിന്നെ നമ്മൾക്ക് ജോലിയിലേക്ക് കടന്നാലോ…”
“ഹാ മാഡം ലെറ്റർ ബോക്സിൻ്റെ താക്കോൽ തന്നാൽ ഞാൻ അത് തുറന്ന് കത്തുകൾ ഉണ്ടോന്ന് നോക്കാം.”
“ഹാ ഇതാ ആര്യാ താക്കോൽ.”
ആര്യൻ തപാൽ പെട്ടി തുറന്ന് അതിൽ നിന്നും കത്തുകൾ എടുത്ത ശേഷം അതടച്ച് കത്തുകളുമായി അകത്തേക്ക് പോയി ഓരോന്നും സോർട്ട് ചെയ്യാൻ തുടങ്ങി. അത് ചെയ്യുമ്പോഴേക്കും മെയിൽ വണ്ടി വന്നു എന്ന് ലിയ വിളിച്ച് പറഞ്ഞു. ആര്യൻ മെയിൽ ബാഗ് എടുത്ത് അകത്ത് കൊണ്ട് മേശയിൽ വെച്ചു. ലിയ ചെന്ന് അതിൻ്റെ സീൽ അഴിച്ച ശേഷം ബാഗിന് അകത്തേക്ക് നോക്കി “ഹാ പതിവ് പോലെ തന്നെ ഒരുപാടൊന്നും ഇല്ല” എന്ന് പറഞ്ഞുകൊണ്ട് ഓരോന്നും സോർട്ട് ചെയ്തോളാൻ ആര്യനോട് പറഞ്ഞ ശേഷം തിരിച്ച് പോയി.
ആര്യൻ അതെല്ലാം മേശപ്പുറത്ത് കുടഞ്ഞിട്ട ശേഷം ഓരോന്നും സോർട്ട് ചെയ്യാൻ തുടങ്ങി. അധിക സമയം എടുക്കാതെ തന്നെ എല്ലാം കഴിഞ്ഞു. ഒരു പതിനേഴ് കത്തുകളും ഒരു പാർസലും രണ്ട് മണി ഓർഡറുകളും ആണ് ഉണ്ടായിരുന്നത്.
ആര്യൻ അതെല്ലാം എടുത്തുകൊണ്ട് ലിയയുടെ അടുത്തേക്ക് ചെന്നു.
“പതിനേഴ് കത്തുണ്ട്…ആദ്യത്തെ ദിവസം ആയതുകൊണ്ട് വീടുകൾ കണ്ടുപിടിച്ച് വരുമ്പോഴേക്കും സമയം പിടിക്കുമായിരിക്കും.”
“ഇത് കഴിഞ്ഞ മൂന്ന് ദിവസത്തെ കൂടെ ആയതുകൊണ്ടാണ് അല്ലെങ്കിൽ വെറും അഞ്ചോ ആറോ എണ്ണമ്മേ കാണുള്ളായിരുന്നു.”
“പിന്നെ ഒരു പാർസൽ ഉണ്ട് അത് മാത്രം എവിടേക്ക് ഉള്ളതാണെന്ന് അറിയാം. മോളി തോമസ്, തോമസ് വില്ല, മന്ദാരക്കടവ് P.O.”