“ഗേൾഫ്രണ്ട് ഒന്നുമല്ല… ഫ്രണ്ട്… ഗേൾ… അത്ര തന്നെ..”, റോഷൻ സാധാരണ മട്ടിൽ മറുപടി പറഞ്ഞു….
എന്നിട്ട് ഒത്തോ..?’ എന്ന ഭാവത്തിൽ അവളുടെ മുഖം ഒന്ന് നോക്കി. എന്നാൽ അവനത് പറയും മുന്നേ തന്നെ, കള്ളനെ പിടിച്ച മട്ടിലായിരുന്നു ശരണ്യയുടെ മുഖഭാവം.
ശരണ്യ : “ ഓവറായി നല്ലവനായി അഭിനയിക്കല്ലേ മോനെ… ഫ്രണ്ടും ഗേളും തമ്മില്ലുള്ള കഥകളിയൊക്കെ ഞാൻ പുറത്ത് നിന്ന് കണ്ടു..”
പറഞ്ഞതും അവന്റെ മുഖത്ത് സെക്കന്റ് നേരത്തേക്ക് ഒരു ചമ്മൽ കടന്നു വന്നത് കണ്ണാടിയിലൂടെ ശരണ്യ കണ്ടു. സത്യത്തിൽ അവൾ അത് പറഞ്ഞപ്പോൾ റോഷന് പ്രത്യേകിച്ച് ഭയമൊന്നും തോന്നിയില്ല… മറിച്ച് അവളുടെ അടുത്ത് ഇനി കൂടുതൽ കള്ളം പറയേണ്ടല്ലോ എന്ന ആശ്വാസമായിരുന്നു.
“എന്നാ പിന്നെ ഇനി കൂടുതൽ വിശദീകരണവും വേണ്ടല്ലോ… അല്ലേ…?”, റോഷൻ പാതി മുഖം തിരിച്ച്, കളിയായി ചോദിച്ചു.
“വേണ്ട… വേണ്ട…. മോൻ വണ്ടിയോടിക്ക്…”, അവൾ വീണ്ടും കളിയായി അവന്റെ മുതുകിൽ കൊട്ടിക്കൊണ്ട്, തുടർന്നു, “കോഴി എന്നും കോഴി തന്നെയല്ലേ…!”
ശരണ്യയുടെ ആ പറച്ചിലിന് അവനും ചിരിച്ചുകൊടുത്തു…. അവന്റെ ചിരി കണ്ടു അവളുടെ മുഖത്തും ഒരു പുഞ്ചിരി തെളിഞ്ഞു വന്നു….
അവൻ പാർക്കിംഗിലേക്ക് തിരിയുന്നിടത്ത് അവളെ ഇറക്കി. ഇരുവരും ബൈ’ പറയും മട്ടിൽ തലയനക്കി.
“ഡാ…”, നടന്ന് നീങ്ങും മുൻപായി, ബുള്ളറ്റ് ഒതുക്കാൻ നീങ്ങിയ റോഷനെ, അവൾ വീണ്ടും വിളിച്ചു. റോഷൻ ബുള്ളറ്റ് നിർത്തി, കാര്യമാരായും മട്ടിൽ തിരിഞ്ഞു.
“നീ എന്റെ നമ്പർ അച്ചുവിന് കൊടുത്തില്ലല്ലോ….?”, ഒരു കള്ളച്ചിരിയോടെ അവൾ ചോദിച്ചു.
“ഇല്ല…. എന്താ കൊടുക്കണമായിരുന്നോ…?”, റോഷനും അതേക്കൂട്ട് ഒരു ചിരി ചിരിച്ച്, മറുചോദ്യം ഉന്നയിച്ചു.
“വേണ്ടാ…”, ചിരിക്കൊപ്പം ശരണ്യ ഒന്ന് ഒരു കണ്ണടച്ചു കാട്ടി.
റോഷനും അവളെ നോക്കി ചിരിച്ചു. ഇരുവരും യാത്ര പറഞ്ഞ് നീങ്ങി.
*** *** *** *** ***
വാർഡിൽ എത്തിയതും, നിക്സന്റെ കഥയിൽ സംഭവിച്ച പുതിയ സംഭവവികാസങ്ങൾ റോഷൻ അച്ചുവിനോടും വിമലിനോടുമായി പങ്ക് വച്ചു.
“റോഷാ… നീ കുറച്ച് കൂടിയ കളിയാണ് കളിക്കാൻ പോകുന്നേ…?”, മുഴുവനും കേട്ടു കഴിഞ്ഞപ്പോൾ, വിമൽ തന്റെ ആശങ്ക രേഖപ്പെടുത്തി.
“അറിയാടാ… എന്തായാലും എല്ലാ കളിക്കും ഒരു അന്ത്യം വേണ്ടേ…?”, എന്തോ തീരുമാനിച്ചുറപ്പിച്ച ഭാവത്തിൽ റോഷൻ മറുപടി പറഞ്ഞു.
“നിനക്കറിയാവുന്ന പഴയ നിക്സൻ അല്ല അവൻ… അതോർമ്മ വേണം.”, വിമലിനെ പിന്തുണച്ചുകൊണ്ടു, അച്ചുവും കൂട്ടിച്ചേർത്തു.
റോഷൻ ഉറച്ച ദൃഷ്ടിയോടെ ഇരുവരെയും ഒന്ന് നോക്കി. അവർ പറഞ്ഞതിന്റെ പുറത്ത്, നിക്സനെക്കുറിച്ച് ചെറിയൊരു ഭയം ഉള്ളിൽ കയറിക്കൂടിയെങ്കിലും, അതിലുപരി നിക്സനോടുള്ള കലി ആ നോട്ടത്തിൽ പുറത്തേക്ക് പ്രതിഫലിച്ച് കണ്ടു.
അവന്റെ ആ നോട്ടം കണ്ടതും, വിമലും അച്ചുവും ഉത്കണ്ഠയോടെ പരസ്പരം കണ്ണുകൾ തിരിച്ചു. തീരുമാനം എടുത്ത് കഴിഞ്ഞാൽ പിന്നെ റോഷൻ ആരു പറഞ്ഞാലും കേൾക്കില്ലെന്ന് അവർക്ക് നല്ലപോലെ അറിയാം… ആ ബോധ്യം ഉള്ളതോണ്ട് തന്നെ, അവർ പിന്നെ കൂടുതലൊന്നും പറയാനും നിന്നില്ല.
“ഇവന്റെ ഡിസ്ചാർജ്ജ് നാളത്തേക്ക് മാറ്റി…”, ഒരു നിമിഷത്തെ ഇടവേളയെടുത്ത ശേഷം, വിഷയം മാറ്റാനെന്നോണം വിമൽ പറഞ്ഞു.
റോഷൻ : “അതെന്തു പറ്റി…?”
വിമൽ : “ടെസ്റ്റ് റിസൾട്ടിൽ എന്തോ വേരിയേഷൻ ഉണ്ടെന്ന്… 1 ഡേ കൂടി ഒബ്സർവേഷൻ ഇരുന്നിട്ട്, ഒന്നൂടി ചെക്ക് ചെയ്തിട്ട് പോവാന്നാ പറഞ്ഞേ…”
“അപ്പൊ അളിയന്റെ ആറാട്ട് വട്ടത്തിൽ മൂഞ്ചി എന്ന് സാരം…”, കേട്ടതും, അച്ചുവിനൊട്ടൊരു കൊട്ട് കൊടുക്കും വിധം റോഷൻ പറഞ്ഞു.
“ശവത്തിൽ കുത്താതെടാ…!”, ഗതികേട് നിറഞ്ഞ സ്വരത്തിൽ, തമാശപ്പറയും പോലെ അച്ചുവും തിരിച്ചുപറഞ്ഞു.
മൂവരും ചിരിച്ചു. കുറച്ചു സമയം കഴിഞ്ഞപ്പോൾ, രേഷ്മ ചേച്ചി റോഷനെ ഫോൺ വിളിച്ചു. അച്ചുവിന്റെ കാര്യങ്ങൾ തിരക്കുന്നതിനൊപ്പം, എടുത്ത് ചാടരുതെന്ന്’ ചേച്ചി ഒരിക്കൽ കൂടി റോഷനെ താക്കീത് ചെയ്തു. ചേച്ചി പറഞ്ഞതിനൊക്കെയും പഴയ ട്യൂഷൻ കുട്ടിയെ കണക്ക് അവൻ മൂളിക്കൊടുത്തു. ഒടുവിൽ ഫോണിലൂടെ ഒരു ചക്കര ഉമ്മയും നൽകിയാണ് ചേച്ചി കോൾ അവസാനിപ്പിച്ചത്… അരികിൽ വിമലും അച്ചുവും ഉള്ളതിനാൽ, വാങ്ങിയ ഉമ്മ പാവം’ റോഷന് തിരിച്ചു കൊടുക്കാനും കഴിഞ്ഞില്ല.
അച്ചുവിനെ റോഷനെ ഏൽപ്പിച്ച്, വൈകുന്നേരമായപ്പോൾ വിമലും വീട്ടിലേക്ക് തിരിച്ചു… അച്ചുവിന് ഒറ്റക്ക് കൂട്ടിരുന്നു മടുത്ത റോഷൻ, സന്ധ്യ കഴിഞ്ഞപ്പോൾ അതിനകത്ത് തന്നെ ഒന്ന് നടക്കാനിറങ്ങി. ആ സമയം ബാലാജിയുടെ കോൾ അവനെ തേടിയെത്തി…
ബാലാജി : “ആ റോഷൻ തമ്പി…”
“ആ അണ്ണാ… ഞാൻ ഒന്നൂടെ അങ്ങോട്ട് വിളിക്കാൻ ഇരിക്കായിരുന്നു”, എടുത്തപ്പാടെ റോഷൻ മറുപടി പറഞ്ഞു.
ബാലാജി : “നാൻ ഒരു മീറ്റിങ്ങിൽ ആയിരുന്നു… അതാ കിട്ടാഞ്ഞേ…”
റോഷൻ : “പറ ബാലു അണ്ണ… എന്തായി കാര്യങ്ങൾ…?”
ബാലാജി : “നീ പറഞ്ഞ ആളെപ്പറ്റി ഞാൻ പസ്സങ്കളോട് അന്വേഷിച്ചു. കരുതും പോലെ ചില്ലറ പുള്ളി ഒന്നുമല്ല അവൻ… പിള്ളേര് കൊടകില് വച്ച് നടന്ന ഒരു പഴയ സംഭവം എന്നോട് പറഞ്ഞു…”
ഒന്നാമത് നിക്സനെക്കുറിച്ച് ആൾക്ക് ആൾ വീതം തള്ളുന്നുണ്ട്. അതിന്റെ കൂടെ ദാ ഇപ്പോൾ ബാലു അണ്ണനും കൂടി ഒരു തള്ള് കഥ പറയാൻ ഒരുങ്ങുന്നു’, അലവലാതി പറഞ്ഞു.
ബാലാജിയുടെ കഥ കേൾക്കാനായി റോഷൻ ജിജ്ഞാസയോടെ കാതോർത്തു. തുടരവെ, കേട്ട കഥയുടെ ബാധിപ്പ് അയാളുടെ ശബ്ദത്തിലും പ്രതിഫലിച്ച് കേട്ടു.
ബാലാജി : “സാവടിക്ക വന്ത 11 പേരെ, ഒരു പീച്ചാംക്കത്തിക്കൊണ്ട് അവൻ ഒത്ത ആളാ അരിഞ്ഞ് വീഴ്ത്തിയ കഥ… അന്ന് മുതൽ കൊടകിൽ അവനൊരു വട്ടപ്പേര് വീണു; അയ്ദ കട്ടി’… മുട്ടാൻ പോയിട്ട് അവൻ കിട്ടൈ അടുക്കുന്ന കാര്യം യോസിക്കാൻ പോലും എതിരാളികൾ മടിക്കും… അവലൗ കൂടിയ ഇനമാ…”
[അയ്ദ കട്ടി : കൊടകിലെ ആളുകൾ കൃഷിക്കും യുദ്ധാവിശത്തിനുമായി ഉപയോഗിച്ച് പോരുന്ന ഒരു പാരമ്പരാഗത ആയുധം]
ഇതാണ് കഥയെങ്കിൽ വട്ടപ്പേര് അയുധ കട്ടി’ എന്നായിരിക്കില്ല, ജോൺ വിക്ക് എന്നാവും…’, ബാലാജി സീരിയസ്സായി പറയുന്നതിനിടയിലും അലവലാതി, സ്ഥിരം കൊണച്ച തമാശ വിളമ്പി… ബാലാജി തുടർന്നു…
ബാലാജി : “ആനാ… നീ പറഞ്ഞതിൽ ഒരു കാര്യം മാത്രം തപ്പ്, റോഷാ…”
അതെതാണെന്നറിയാൻ റോഷനും ആകാംഷ കാട്ടി… ബാലാജി ആ രഹസ്യം വെളിപ്പെടുത്തിയതും അവൻ ശ്രീലക്ഷ്മിയുടെ ഇപ്പോഴത്തെ അവസ്ഥയും നിക്‌സനിൽ നിന്നും അവളെ അകറ്റി നിർത്തേണ്ട ആവശ്യകതയും അയാളോടായി അവതരിപ്പിച്ചു. ബാലാജി എല്ലാം ശ്രദ്ധയോടെ കേട്ട ശേഷം, ആലോചനയോടെ മറുപടി പറഞ്ഞു.
ബാലാജി : “അന്ത പൊണ്ണ് LLB അല്ലേ പഠിച്ചത്… ആങ്ങനെയാണെങ്കിൽ ഞാനെന്റെ അഡ്വക്കേറ്റുമായി ഒന്ന് സംസാരിച്ചിട്ട് തിരിച്ച് വിളിക്കാം… അവന്റെ ജൂനിയർ ആയിട്ടോ മറ്റോ അവളെ നിർത്താൻ കഴിഞ്ഞാൽ മറ്റ് ലീഗൽ ഫോർമാലിറ്റി കാര്യങ്ങൾക്കും അവന്റെ ഒരു സഹായം ഉണ്ടാകുമല്ലോ…!”
