💫Evil on earth✨ – 3 Likeഅടിപൊളി  

വല്ലാത്ത ഒരു ആത്മവിശ്വാസത്തോടെ ഞാൻ പറഞ്ഞു…ഇവനിതെന്ത് തേങ്ങയാ പറയുന്നേ എന്ന ഭാവത്തിൽ അവളെന്നെ നോക്കുന്നുണ്ട്….പക്ഷെ എനിക്ക് ഉറപ്പ് ആയിരുന്നു….ഞാൻ അങ്ങോട്ട് പോയ ദൂരം വച്ചു നോക്കുമ്പോ എന്റെ വീട്ടിലേക്കാണ് ദൂരകുറവ്…പോരാഞ്ഞിട്ട് സ്റ്റേഷനിൽ നിന്നാണെന് കൂടി പറഞ്ഞാൽ മുറ്റത്ത് കിടക്കുന്ന മിനി മോൾ നിലം തൊടാതെ പറന്നെത്തുമിവിടെ..പിന്നെ ചെറിയച്ഛന്റെ പിടിപാടൊക്കെ വച്ചു പുട്ടു പോലെ ഞാനും ഇവളും ഇറങ്ങിപ്പോരും..അതായിരുന്നു എന്റെ കണക്ക് കൂട്ടലുകൾ…

പക്ഷെ കണക്കിൽ പണ്ടേ മോശമായ എനിക്ക് അവിടെയൊരു തിരിച്ചടി ഉണ്ടായിരുന്നു…അവരോട് ഞാൻ ഇവളാരാണെന്ന് പറയും..പാതിരാത്രി എന്തിന്റെ പേരിലാ ഇവളെ ഇറക്കിക്കൊണ്ടുവെന്ന് ചോദിച്ചാൽ…പ്രശ്നമാണ്…..ആലോചിക്ക് ജോ…എന്തെങ്കിലും ഒരു വഴി കണ്ടുപിടി

ഒടുക്കം ഞാൻ പോലീസുകാർ ഇടംകോലിട്ട് നശിപ്പിച്ച എന്റെ ആദ്യത്തെ പ്രൊപോസൽ സീൻ ഇവിടുന്ന് നടത്തികളയമെന്ന് കരുതി..വേറെ വഴിയില്ല…അവരുവന്ന് ചോദിക്കുമ്പോ ഞാൻ ചായ കുടിക്കാനാണെന്നും ഇവൾ ഒളിച്ചോടാനാണെന്നും പറഞ്ഞാൽ അടി സ്പോട്ടിൽ കിട്ടും…ദേഹം വേദനപ്പിച്ചുകൊണ്ടുള്ള ഒരു പരിപാടിയും വേണ്ട ജോ..തുറന്ന് പറ അവളോട്

സകല ദൈവങ്ങളെയും മനസ്സിൽ ധ്യാനിച്ചു ഞാൻ ആദിയെ നോക്കി…അവളിപ്പോഴും ആലോചനയിൽ തന്നെ ആണ്…അപ്പോളാണ് ഞാൻ ശ്രദിച്ചേ നേരത്തെ ഞാൻ പിടിച്ചയാ കൈ അതുപോലെ തന്നെ എന്റെ വിരലുകൾക്കിടയിൽ വിശ്രമിക്കുകയാണ്…സത്യം തുറന്നു പറഞ്ഞിട്ടും അവൾക്കെന്നോട് ദേഷ്യമൊന്നുമില്ലെന്ന് ഉള്ളതിന്റെ തെളിവല്ലേ ഇത്…

“ആദി..”

പതിഞ്ഞ സ്വരത്തിൽ ഞാൻ വിളിച്ചു..

എന്താ എന്നുള്ള ഭാവത്തിൽ അവളെന്നെ നോക്കി…ശ്വാസമൊന്നു വലിച്ചെടുത്ത ശേഷം ഞാൻ അവളോടെൻറെ മനസു തുറന്നു

“നേരുപറഞ്ഞാൽ തന്നെ അവിടുന്ന് ഇറക്കി കൊണ്ടു വരുമ്പോ എന്റെ മനസ്സിൽ എവിടെ പോകണമെന്ന് പോലും അറിയില്ലായിരുന്നു…പക്ഷെ എല്ലാം ഇവിടെ എത്തി നിക്കുമ്പോ….എനിക്ക് തോന്നുവാ എല്ലാം ഒരു നിമിത്തം ആണെന്ന്…നിന്നെയാ മതിലിനു മുകളിൽ വച്ചു കണ്ടപ്പോഴേ എനിക്ക് ഒരിഷ്ടം തോന്നിയതാ…പക്ഷെ നീ തന്നയാ അടി ഉണ്ടല്ലോ….ആദ്യമായിട്ടാ എന്നെ തല്ലിയ ഒരാളെ ഞാൻ വെറുതെ വിടുന്നെ…കൊറേ ഞാൻ ആലോചിച്ചു നിന്നെ തല്ലാൻ പറ്റാത്തത് എന്തുകൊണ്ടാണെന്ന്…ഇപ്പോളാ അതിനുള്ള ഉത്തരം കിട്ടിയത്…really…i’m fall in you…എനിക്ക് തന്നെ ഇഷ്ടപ്പെട്ടു….സഹതാപത്തിന്റെ പുറത്തോ വിളിച്ചിറക്കികൊണ്ടുവന്നതിന്റെ പേരിലോ അല്ല…ശെരിക്കും ഇഷ്ടം തോന്നിയിട്ടാ…നിന്നെ ഞാൻ കെട്ടിക്കോട്ടെ..“

മുഴുനീള പ്രസംഗത്തിനൊടുവിൽ ഞാൻ എന്റെ ഉള്ളിലെ ഇഷ്ടം അവളോട് തുറന്നു പറഞ്ഞു…എല്ലാം കേട്ടിരുന്ന അവളുടെ കണ്ണുകൾ പതിവിലുമതികം നിറഞ്ഞൊഴുകുന്നത് കണ്ടപ്പോളെ എനിക്ക് തോന്നി ഒരുതവണ എങ്കിലും അവൾ കേൾക്കാനാഗ്രഹിച്ച വാക്കുകളാണതെന്ന്

m

എന്റെയൂഹം ശെരിവക്കാനെന്നവണ്ണം എന്റെ കൈക്ക് മുകളിലുള്ള അവളുടെ പിടി അല്പം മുറുകി

”അതെ കഴിഞ്ഞെങ്കിൽ അങ്ങോട്ട് വാ..S.I സാറ് വിളിക്കുന്നുണ്ട്..അവിടെ ചെന്നിട്ട് തീരുമാനിക്കാം കെട്ടണോ അഴിക്കണോന്ന്.,“

”നശിപ്പിച്ചു..!

നിങ്ങളിത് കേൾക്കണം…ജീവിതത്തിൽ ആദ്യമായി പ്രണയം തോന്നിയ ഒരു പെണ്ണിനോട് സകലമാന ദൈവങ്ങളെയും കൂട്ട് പിടിച്ചു എന്റെയുള്ളിലെ ഇഷ്ടം തുറന്ന് പറഞ്ഞപ്പോ…അതും പോലീസ് പിടിച്ചു സ്റ്റേഷനിൽ കൊണ്ടുവന്നിട്ട്….അത്രക്ക് ധൈര്യം സംഭരിച്ചു ഒരു കാര്യം ചെയ്തു കഴിഞ്ഞപ്പോ ഞാൻ കേൾക്കേണ്ടി വന്ന വർത്തമാനമാ ഇത്…ച്ചേ…ഇതിലും ബേധം ഇവളെന്റെ കരണകുറ്റി നോക്കിയൊന്നു തന്നിട്ട് എനിക്ക് നിന്നെ ഇഷ്ടമല്ലടാ പട്ടീ എന്ന് പറയുന്നത് ആയിരുന്നു…

എന്റെ കന്നി പ്രൊപോസലിൽ കൈയിട്ടു വാരിയ പോലീസുകാരനെ ഞാനൊന്ന് നോക്കി

പന്ന കെളവൻ…റിട്ടയർഡ് ആയി വീട്ടിലിരുന്ന പെൻഷൻ വാങ്ങണ്ട സാധനമാണ്…ബിരിയാണി ചെമ്പ് കമഴ്ത്തിയത് പോലുള്ള വയറും ചൊറിഞ്ഞുകൊണ്ട് എന്നെ നോക്കി ചിരിച്ചു നിൽക്കുന്നു

അങ്ങനെ വിട്ടാൽ പറ്റില്ലല്ലോ..ഞാൻ അല്പം ധൈര്യത്തോടെ ആദിയുടെ ഒരു കൈ പിടിച്ചുകൊണ്ടു എണീറ്റു..എന്റെ പിറകെ അവളും എണീറ്റു…എന്നിട്ടും ഞാനാ കൈ വിട്ടില്ല..അയാളെയൊന്നു പുച്ഛത്തോടെ നോക്കി അവളെയും കൂട്ടി S I യുടെ ഓഫീസിലേക്ക് അല്പം സ്ലോമോഷനിൽ നടക്കാനായി തുനിഞ്ഞപ്പോളേക്കും ആ തെണ്ടിയെന്റെ പെട്ടിയിൽ അവസാനത്തെ ആണിയും അടിച്ചു