അവൻ അവളുടെ കാതുകളിലേക്ക് അടുത്തു വന്ന് പതിഞ്ഞ സ്വരത്തിൽ പറഞ്ഞു, “പക്ഷേ ഓർമ്മയുണ്ടല്ലോ, ഇന്ന് എനിക്ക് കുറെ ബിസിനസ്സ് മീറ്റിംഗ്സ് ഉണ്ട്. നീ കൂടെ ഉള്ളത് എനിക്ക് നല്ലതാണ്.
അവന്റെ വാക്കുകൾ ഒരു അഭിനന്ദനത്തേക്കാൾ ഉപരി, തന്നെ ഒരു പ്രദർശന വസ്തുവായി മാറ്റിയതുപോലെ ചിത്രയ്ക്ക് തോന്നി. എങ്കിലും, അവന്റെ സ്പർശനം അവളെ തളർത്തുന്നുണ്ടായിരുന്നു
ചിത്ര പാറുവിനെ അതുലിന് പരിചയപ്പെടുത്തി.അവൾ വളരെ അധികം ആവേശത്തോടെ അതുലിനെയും കൂട്ടുകാരെയും പരിചയപ്പെട്ടു. അതുൽ അവളെ ഒന്ന് നോക്കി ചിരിച്ചുവെന്ന് വരുത്തി, എല്ലാവരെയും കൂട്ടി തങ്ങൾക്കായി റിസർവ് ചെയ്തിരുന്ന വിഐപി ടേബിളിലേക്ക് നീങ്ങി.
“നിങ്ങൾക്ക് ഇഷ്ടമുള്ളത് ഓർഡർ ചെയ്തോ, പേയ്മെന്റിനെക്കുറിച്ച് ആലോചിക്കേണ്ട,” വെയ്റ്ററെ വിളിച്ച് ഓർഡർ നൽകാൻ നിർദ്ദേശിച്ച ശേഷം അതുൽ പറഞ്ഞു. പക്ഷേ, അവളോടൊപ്പം ഇരുന്ന് സമയം ചെലവഴിക്കുന്നതിന് പകരം, പാർട്ടിയുടെ തിരക്കുകളിലേക്ക് അവൻ വേഗത്തിൽ ലയിച്ചു ചേർന്നു.
ചിത്ര അവിടെ വെറുതെ ഇരുന്നു. പാറുവിന്റെ ഒരു സുഹൃത്ത് വന്ന് മദ്യം ഓഫർ ചെയ്തെങ്കിലും അവൾ സ്നേഹപൂർവ്വം നിരസിച്ചു. അവൾക്ക് കുടിക്കുന്ന ശീലമില്ലായിരുന്നു. എന്നാൽ പാറു അവരുടെ കൂടെ പോകാൻ തിരുമാനിച്ചു. അവളുടെ കണ്ണുകൾ പബ്ബിലെ ആൾക്കൂട്ടത്തിനിടയിൽ അതുലിനെ തിരഞ്ഞുകൊണ്ടിരുന്നു. അവിടെ കണ്ട കാഴ്ച അവളുടെ നെഞ്ചിൽ ഒരു ഭാരം നിറച്ചു—മോഡലുകളും സുന്ദരികളായ പെൺകുട്ടികളും അതുലിനെ പൊതിഞ്ഞു നിൽക്കുന്നു. അവൻ അവരുടെ ഇടയിൽ അങ്ങേയറ്റം സന്തോഷവാനായി കാണപ്പെട്ടു. ഇടയ്ക്ക് തന്നെ ഒന്ന് നോക്കുക പോലും ചെയ്യാത്ത അവന്റെ നിസ്സംഗത അവളിൽ സങ്കടം പടർത്തി. പാറു എവിടെപ്പോയെന്ന് നോക്കിയെങ്കിലും ആ ആൾക്കൂട്ടത്തിൽ അവളെ കാണാനില്ലായിരുന്നു.
ഇതെല്ലാം ദൂരെ നിന്ന് ശ്രദ്ധിക്കുകയായിരുന്നു ഫവാസ്. അവൾ ഒറ്റയ്ക്കിരിക്കുന്നത് കണ്ടപ്പോൾ അവളിലേക്ക് അടുക്കാൻ കിട്ടിയ ആ അവസരം അവൻ പാഴാക്കിയില്ല. അവൻ സാവധാനം അവളുടെ അടുത്തേക്ക് വന്ന് ഇരുന്നു.
“ഹേയ് ചിത്ര… എന്താ ഇങ്ങനെ ഒറ്റയ്ക്കിരിക്കുന്നത്?” അവൻ സൗമ്യമായി ചോദിച്ചു.
അവർ സംസാരിക്കാൻ തുടങ്ങി. സംസാരത്തിനിടയിൽ ചിത്ര വേൾഡ് ടൂറിനെക്കുറിച്ച് സൂചിപ്പിച്ചു. “നിങ്ങൾ എല്ലാവരും വേൾഡ് ടൂർ പോകുകയാണല്ലോ… പോയി അടിച്ചു പൊളിക്ക്” അവൾ പറഞ്ഞു.
“ഇല്ല ചിത്ര, ഞാൻ ഈ ടൂറിന് പോകുന്നില്ല,” ഫവാസിന്റെ സ്വരത്തിൽ ഒരുതരം ഗൗരവം നിഴലിച്ചു.
ചിത്ര അമ്പരപ്പോടെ അവനെ നോക്കി. “അതെന്താ? ഇത്രയും വലിയൊരു അവസരം വേണ്ടെന്ന് വെക്കുകയാണോ?”
“എന്റെ ഉമ്മയ്ക്ക് സുഖമില്ല ചിത്ര. ഉമ്മയെ ഈ അവസ്ഥയിൽ വീട്ടിൽ ഒറ്റയ്ക്കാക്കി എനിക്ക് ഇത്രയും ദൂരം യാത്ര ചെയ്യാൻ കഴിയില്ല. കരിയർ പ്രധാനമാണ്, പക്ഷേ എനിക്ക് ഉമ്മയാണ് അതിലും വലുത്,” ഫവാസ് പറഞ്ഞു.
ആ വാക്കുകൾ ചിത്രയുടെ ഉള്ളിൽ എവിടെയോ സ്പർശിച്ചു. പ്രശസ്തിക്കും ലോകം ചുറ്റാനുമുള്ള ആവേശത്തിൽ തന്നെയും തന്റെ വികാരങ്ങളെയും മറന്നു പോകുന്ന അതുലിന്റെ മുന്നിൽ, കുടുംബത്തിന് വേണ്ടി ഇത്രയും വലിയൊരു ഭാഗ്യം വേണ്ടെന്ന് വെക്കുന്ന ഫവാസിനോട് അവൾക്ക് ബഹുമാനം തോന്നി. അവൻ അത്രയ്ക്ക് സ്വാർത്ഥനല്ലെന്ന് അവൾക്ക് തോന്നി.
ഫവാസ് മദ്യം വാഗ്ദാനം ചെയ്തെങ്കിലും അവൾ വീണ്ടും ഒഴിഞ്ഞുമാറി. “സാരമില്ല, ഞാൻ വരാം,” എന്ന് പറഞ്ഞ് അവൻ എഴുന്നേറ്റു പോയി. അല്പസമയത്തിന് ശേഷം മനോഹരമായി ഗാർണിഷ് ചെയ്ത ഒരു ഡ്രിങ്കുമായി അവൻ തിരിച്ചെത്തി.
“ഇത് നോൺ-ആൽക്കഹോളിക് ആണ്. പ്യുവർ ഫ്രൂട്ട് മിക്സ്. നീ ഇതൊന്ന് ട്രൈ ചെയ്യ്,” അവൻ നിർബന്ധിച്ചു.
ആദ്യത്തെ സിപ്പിൽ തന്നെ അവൾക്ക് അത് നന്നായി ഇഷ്ടപ്പെട്ടു. ഗ്ലാസിലെ ആ പാനീയം നുണയുമ്പോൾ അവൾക്ക് വല്ലാത്തൊരു ആശ്വാസം തോന്നി. പതുക്കെ പതുക്കെ അവൾ ഫവാസിനോട് കൂടുതൽ സംസാരിക്കാൻ തുടങ്ങി. ആൾക്കൂട്ടത്തിനിടയിൽ തന്നെ അവഗണിക്കുന്ന കാമുകനേക്കാൾ, തന്റെ അരികിലിരുന്ന് തന്നെ കേൾക്കുന്ന ഫവാസുമായി സംസാരിക്കുന്നത് അവൾക്ക് കൂടുതൽ കംഫർട്ടബിൾ ആയി തോന്നിത്തുടങ്ങി.