ആ സംഭാഷണത്തിനിടയിലാണ് ചിത്രയുടെ ഫോൺ ശബ്ദിച്ചത്. സ്ക്രീനിൽ ‘ഗോകുൽ’എന്ന പേര് കണ്ടതും അവളുടെ മുഖത്തെ ആത്മവിശ്വാസം കെട്ടുപോയി. ഒരുതരം പേടിയും കുറ്റബോധവും അവളുടെ കണ്ണുകളിൽ മിന്നിമറഞ്ഞു. ഫവാസ് അത് ശ്രദ്ധിക്കുന്നുണ്ടായിരുന്നു. അവൾ പെട്ടെന്ന് ഫോൺ സൈലന്റ് ആക്കി ബാഗിലേക്ക് മാറ്റി വെച്ചു.
“എന്താ ചിത്ര? വീട്ടിൽ നിന്നാണോ?” ഫവാസ് ഒന്നും അറിയാത്ത ഭാവത്തിൽ ചോദിച്ചു.
“അതെ… പിന്നെ വിളിക്കാം,” അവൾ സംസാരം മാറ്റാൻ ശ്രമിച്ചു.
പെട്ടെന്ന് പബ്ബിലെ ലൈറ്റുകൾ കറങ്ങാൻ തുടങ്ങി, മ്യൂസിക്കിന്റെ താളം മാറി. ഒരു തീവ്രമായ ഡിജെ വൈബിലേക്ക് പബ്ബ് മാറി മറിഞ്ഞു. എല്ലാവരും ഡാൻസ് ഫ്ലോറിലേക്ക് നീങ്ങുകയാണ്. അതുൽ അപ്പോഴും ദൂരെ മാറി ടൂർ മാനേജർമാരുമായി ഗൗരവമായ ചർച്ചയിലായിരുന്നു. അവൻ ചിത്രയെ അങ്ങോട്ട് ശ്രദ്ധിക്കുന്നു പോലുമില്ല.
ഫവാസ് എഴുന്നേറ്റ് അവളുടെ മുന്നിൽ നിന്നു. “ചിത്ര… ഇങ്ങനെ വെറുതെ ഇരുന്നാൽ ബോറടിക്കില്ലേ? വാ, നമുക്ക് കുറച്ചു നേരം ഡാൻസ് ചെയ്യാം. അതുൽ ഇപ്പോൾ വരുമെന്ന് തോന്നുന്നില്ല, അവൻ ആ ടൂർ മാനേജർമാരുടെ കൂടെ ബിസിയാണ്.”
“അയ്യോ… വേണ്ട ഫവാസ്. എനിക്ക് ഡാൻസ് അത്ര വശമില്ല,” അവൾ മടിച്ചു പറഞ്ഞു.
പക്ഷേ ഫവാസ് പിന്മാറാൻ തയ്യാറായിരുന്നില്ല. അവൻ വളരെ മാന്യമായി, ഒരു രാജകുമാരനെപ്പോലെ തന്റെ കൈകൾ അവൾക്ക് നേരെ നീട്ടി. “ജസ്റ്റ് മൂവ് വിത്ത് ദി മ്യൂസിക്, ചിത്ര. പ്ലീസ്…” അവന്റെ ശബ്ദത്തിലെ ആ വശ്യതയും വിനയവും അവൾക്ക് തള്ളിക്കളയാനായില്ല.
ചിത്രയുടെ മുഖത്ത് ഒരു ചെറിയ നാണം വിരിഞ്ഞു. അവൾ സാവധാനം തന്റെ കൈ അവന്റെ കൈവെള്ളയിൽ വെച്ചു. അവന്റെ കയ്യിൽ തന്റെ കൈകൾ വളരെ ചെറുതായി അവൾക്കു തോന്നി. ഫവാസ് അവളെ ഡാൻസ് ഫ്ലോറിലേക്ക് നയിച്ചു. അവിടെ നിറയെ ആളുകൾ താളത്തിനൊത്ത് ചുവടുവെക്കുകയായിരുന്നു.
ജനക്കൂട്ടത്തിനിടയിലൂടെ അവൾ നോക്കിയപ്പോൾ പാറു ഒരു അപരിചിതനായ ചെറുപ്പക്കാരനോടൊപ്പം ആവേശത്തോടെ ഡാൻസ് ചെയ്യുന്നത് കണ്ടു. അവർ പരസ്പരം നോക്കി കൈവീശി. “എല്ലാം ഓക്കെയാണ്, നീ എൻജോയ് ചെയ്യ്” എന്നൊരു സിഗ്നൽ പാറു അവൾക്ക് നൽകി.
ഫവാസിനൊപ്പം ഡാൻസ് ഫ്ലോറിലേക്ക് നീങ്ങുമ്പോൾ ചിത്രയുടെ ഉള്ളിൽ ചെറിയൊരു പരിഭ്രമമുണ്ടായിരുന്നു. ആദ്യമൊക്കെ താളം കണ്ടെത്താൻ അവൾ അല്പം പ്രയാസപ്പെട്ടെങ്കിലും, ഫവാസിന്റെ ചുവടുകൾക്കൊപ്പം അവൾ പതുക്കെ ആടി തുടങ്ങി. സംഗീതത്തിന്റെ തീവ്രത അവളുടെ ഉള്ളിലെ സങ്കടങ്ങളെ താൽക്കാലികമായി മായ്ച്ചുകളഞ്ഞു. അല്പസമയത്തിനകം പാറുവും അവർക്കൊപ്പം ചേർന്നു. അവർ മൂന്നുപേരും ചേർന്ന് കുറച്ച് പാട്ടുകൾക്ക് ആവേശത്തോടെ ചുവടുവെച്ചു. ആ നേർത്ത മെഷ് ടോപ്പിനുള്ളിൽ ചിത്രയുടെ ഓരോ ചലനങ്ങളും കൂടുതൽ ആകർഷകമായി തോന്നിപ്പിച്ചു.
കുറെ നേരത്തിന് ശേഷം, ദൂരെ നിന്ന് അതുൽ ഡാൻസ് ഫ്ലോറിലേക്ക് വരുന്നത് ചിത്ര കണ്ടു. പക്ഷേ അവൻ ഒറ്റയ്ക്കായിരുന്നില്ല. കൂടെ ടൂർ മാനേജർമാരും ഒരു കൂട്ടം മോഡലുകളും ഉണ്ടായിരുന്നു. അവരെല്ലാവരും ചേർന്ന് ആഘോഷപൂർവ്വം ആടിത്തിമിർക്കുകയാണ്. അതുലിനെ ചുറ്റിപ്പറ്റി നിൽക്കുന്ന പെൺകുട്ടികൾ അവനോട് വല്ലാതെ ഒട്ടിനിന്ന് നൃത്തം ചെയ്യുന്നത് കണ്ടപ്പോൾ ചിത്രയുടെ ഉള്ളിൽ പഴയ ആ ഭാരം തിരിച്ചുവന്നു.
പെട്ടെന്ന്, പബ്ബിലെ ലൈറ്റുകൾ മങ്ങുകയും മ്യൂസിക്കിന്റെ വേഗത കുറയുകയും ചെയ്തു. ഫാസ്റ്റ് നമ്പറുകളിൽ നിന്ന് സംഗീതം വളരെ സാവധാനത്തിലുള്ള ഒരു റോമാന്റിക് വൈബിലേക്ക് വഴിമാറി. ആ അന്തരീക്ഷം പെട്ടെന്ന് പ്രണയാതുരവും നിഗൂഢവുമായി മാറി. ഫവാസ് ചിത്രയുടെ അല്പം കൂടി അടുത്തേക്ക് നീങ്ങി നിന്നു. നൃത്തം ചെയ്യുന്നവരുടെയെല്ലാം ചലനങ്ങൾ മന്ദഗതിയിലായി, ശരീരങ്ങൾ തമ്മിലുള്ള അകലം കുറഞ്ഞു തുടങ്ങി. ചിത്രയുടെ കണ്ണുകൾ ഇപ്പോഴും അതുലിലായിരുന്നു, പക്ഷേ അവൻ ആ മങ്ങിയ വെളിച്ചത്തിൽ മറ്റേതോ സുന്ദരിയുടെ തോളിന്മേൽ കൈ വെച്ച് പ്രണയാതുരമായി ചുവടുവെക്കുകയായിരുന്നു.