അവൾ അറിയരുത്.. അറിഞ്ഞാൽ പിന്നെ നാളെ കോളജ് മൊത്ത പാട്ടാവും …എന്ന് ആലോചിച്ചു കൊണ്ട് അവൾ വേഗം നടന്നു.
പടിപ്പുരയ്ക്കൽ അല്പം മാറി ഒതുക്കി നിർത്തിയിരിക്കുന്ന അർജുന്റെ കാറും അതിനരികെ നിൽക്കുന്ന അവന്റെ രൂപവും അവൾ പെട്ടെന്ന് തന്നെ ശ്രദ്ധിച്ചു. അവളുടെ ഹൃദയമിടിപ്പ് വേഗത്തിലായി. കാറിന്റെ അരികിലേക്ക് ചെല്ലുമ്പോഴേക്കും അർജുൻ ഒരു കള്ളച്ചിരിയോടെ കാർ വാതിൽ തുറന്നു കൊടുത്തു.
അവൻ നല്ല ഉന്മേഷത്തിലായിരുന്നു. “ഇന്ന് നല്ല ചൂടല്ലേ ഗായൂ, നമുക്ക് വഴിയിൽ നിന്ന് ഒരു ഐസ്ക്രീം കഴിച്ചിട്ട് പോയാലോ?” അവൻ ചോദിച്ചു. ഗായത്രിക്ക് ആദ്യം ഒന്ന് മടി തോന്നിയെങ്കിലും അവന്റെ ആഗ്രഹം തള്ളിക്കളയാൻ അവൾക്ക് തോന്നിയില്ല.
നഗരത്തിലെ ഒരു തിരക്കേറിയ കഫേയ്ക്ക് മുന്നിൽ അർജുൻ കാർ നിർത്തി. അവർ ഉള്ളിൽ കയറി ഓരോ ഐസ്ക്രീം ഓർഡർ ചെയ്തു. തണുത്ത ഐസ്ക്രീം നുണയുന്നതിനിടയിൽ അർജുൻ അവളുടെ പഴയ തമാശകൾ ഓർമ്മിപ്പിച്ചു ചിരിപ്പിക്കുന്നുണ്ടായിരുന്നു. ഏറെ നാളുകൾക്ക് ശേഷമാണ് താൻ ഇത്രയധികം സന്തോഷിക്കുന്നതെന്ന് ഗായത്രി തിരിച്ചറിഞ്ഞു.
എന്നാൽ, അവർ ഇതൊന്നും അറിയാതെ പുറത്തുകൂടി കിച്ചു തന്റെ ബൈക്കിൽ കടന്നുപോകുന്നുണ്ടായിരുന്നു. ഓഫീസിലെ തിരക്കിനിടയിൽ വല്ലാത്ത തലവേദന തോന്നിയതുകൊണ്ട് നേരത്തെ ഇറങ്ങിയതായിരുന്നു അവൻ. ഐസ്ക്രീം പാർലറിന് മുന്നിലെ ഗ്ലാസ് ഡോറിലൂടെ അവൻ ആ കാഴ്ച കണ്ടു.
അർജുനും ഗായത്രിയും നേർക്കുനേർ ഇരുന്ന് ചിരിച്ചു സംസാരിക്കുന്നു. അർജുൻ എന്തോ പറയുമ്പോൾ ഗായത്രി കൈകൊട്ടി ചിരിക്കുന്നുണ്ട്. സ്വന്തം വീട്ടിൽ വെച്ച് തന്നോട് മിണ്ടാത്തവൾ, താൻ ചെല്ലുമ്പോൾ മുഖം വീർപ്പിച്ചു നിൽക്കുന്നവൾ, അന്യനായ അർജുന്റെ കൂടെയിരുന്ന് ആസ്വദിച്ചു ചിരിക്കുന്നത് കണ്ടപ്പോൾ കിച്ചുവിന്റെ ഉള്ളിൽ ഒരു തീക്കനൽ വീണതുപോലെ തോന്നി.
അവൻ ബൈക്ക് അല്പം മാറ്റി നിർത്തി അവരെ നിരീക്ഷിച്ചു. ഐസ്ക്രീം കഴിച്ചു കഴിഞ്ഞ് അവർ പുറത്തേക്ക് ഇറങ്ങി. അർജുൻ വളരെ സ്വാഭാവികമായി അവളുടെ തോളിൽ ഒന്ന് തട്ടി ചിരിച്ചു കൊണ്ട് കാറിന്റെ ഡോർ തുറന്നു കൊടുത്തു. ഗായത്രി വളരെ സന്തോഷവതിയായാണ് കാറിൽ കയറിയത്.
കിച്ചുവിന്റെ മനസ്സ് വല്ലാതെ പിടഞ്ഞു… അർജുനും ഗായത്രിയും തമ്മിലുള്ള അമിതമായ അടുപ്പവും ഒത്തൊരുമയും കിച്ചുവിന് ഉൾക്കൊള്ളാൻ കഴിയുന്നുണ്ടായിരുന്നില്ല. അവനിൽ വല്ലാത്തൊരു അപകർഷതാബോധവും അതോടൊപ്പം സംശയങ്ങളും പടർന്നുതുടങ്ങി. ഗായത്രി തന്നിൽ നിന്നും എന്തൊക്കെയോ മറച്ചുപിടിക്കുന്നുണ്ടോ, അവളുടെ പല പെരുമാറ്റങ്ങളിലും തന്നിൽ നിന്നും അകന്നുപോകുന്ന ഒരു അസ്വാഭാവികതയില്ലേ എന്ന തോന്നൽ അവന്റെ ഉള്ളിൽ നീറിപ്പുകഞ്ഞു.
അന്ന് രാത്രി, കുറച്ച് വൈകി ആണവൻ എത്തിയത്.. വൈകുന്നേരം കണ്ട കാഴ്ച അവനെ വല്ലാതെ തളർത്തിയിരുന്നു, ഉള്ളൊന്ന് തണുക്കാൻ വേണ്ടി കുറച്ച് മദ്യപിക്കുകയും ചെയ്തു.. കയറി വന്നപ്പോൾ സ്വീകരണമുറിയിൽ അർജുനും ഗായത്രിയും ഒരുമിച്ച് ഇരുന്ന് സംസാരിക്കുകയും ചിരിക്കുകയും ചെയ്യുകയായിരുന്നു. യാതൊരു സങ്കോചവുമില്ലാതെ അവർ പരസ്പരം പങ്കുവെക്കുന്ന ആ സന്തോഷവും തമാശകളും കിച്ചുവിന്റെ നെഞ്ചിൽ തീ കോരിയിട്ടതുപോലെ തോന്നിപ്പിച്ചു. പെട്ടെന്ന് കിച്ചു അവിടേക്ക് വരുന്നത് കണ്ടതും ഗായത്രിയുടെ മുഖത്ത് പെട്ടെന്നൊരു പരുങ്ങൽ പടർന്നു. അവൾ തിടുക്കത്തിൽ എഴുന്നേറ്റ് അർജുന്റെ ബാഗെടുത്ത് “ഞാൻ മുറിയിൽ വെക്കാം” എന്ന് പറഞ്ഞ് അവനോടൊപ്പം അവളുടെ ബെഡ്റൂമിലേക്ക് നടന്നു.
ഗായത്രി ചായ എടുക്കാൻ വേണ്ടി അടുക്കളയിലേക്ക് പോയ ആ ചെറിയ ഇടവേളയിൽ, അർജുൻ മുറിയിലെ അലമാരയുടെ അരികിലേക്ക് ചെന്നു. അവൻ അതിന്റെ വാതിൽ തുറന്ന് നോക്കിയപ്പോൾ, അവിടെ ഒരു ചെറിയ ബോക്സിനുള്ളിൽ പുതിയ ചില കോസ്മെറ്റിക് ഐറ്റങ്ങളും
മേക്കപ്പ് സാധനങ്ങളും ഇരിക്കുന്നത് കണ്ടു. ഇന്ന് വൈകുന്നേരം പുറത്തുപോയപ്പോൾ വാങ്ങിയതാണെന്ന് അതിലെ കവർ കണ്ടാൽ വ്യക്തമായിരുന്നു.