എന്നെ കണ്ടതും അമ്മ എന്തോ ചോദിക്കാൻ വന്നു.
“ഞാൻ… ഞാൻ കിരണിന്റെ വീട് വരെ ഒന്ന് പോവാ…”
മറുപടിക്ക് കാത്തുനിൽക്കാതെ ഞാൻ ചെരുപ്പിട്ട് വേഗത്തിൽ ഇറങ്ങി നടന്നു. നടക്കുമ്പോഴും എന്റെ കൈ അറിയാതെ കഴുത്തിലെ ആ പാടിൽ തടവുന്നുണ്ടായിരുന്നു.
ഞാൻ കിരണിന്റെ വീടിന്റെ ഗേറ്റ് തുറന്ന് മുറ്റത്തേക്ക് കയറി. എന്നെ കണ്ടതും ഉമ്മറത്തിരുന്ന കിരൺ എഴുന്നേറ്റു. എന്റെ മുഖത്തെ വെപ്രാളവും നടത്തത്തിലെ വേഗതയും കണ്ടപ്പോൾ തന്നെ അവന് കാര്യം പിടികിട്ടി.
“എന്താടാ… മുഖത്തൊരു പന്തികേട്? വാ… നമുക്ക് മുകളിലേക്ക് പോകാം.”
അവൻ എന്നെയും കൂട്ടി ടെറസിലേക്ക് നടന്നു.
രാത്രി എട്ടു മണി കഴിഞ്ഞിരിക്കുന്നു. ചുറ്റും കൂരിരുട്ട്. ദൂരെ കൊച്ചി നഗരത്തിലെ ലൈറ്റുകൾ മിന്നിത്തുടങ്ങിയിട്ടുണ്ട്. രാത്രിയിലെ തണുത്ത കാറ്റ് വീശുന്നുണ്ടെങ്കിലും എന്റെ ഉള്ളിലെ ചൂട് മാറിയിരുന്നില്ല. ഞങ്ങൾ ടെറസിന്റെ കൈവരിയിൽ ചാരി നിന്നു.
ഞാൻ ഒട്ടും സമയം കളയാതെ കാര്യത്തിലേക്ക് കടന്നു. ഇന്നലെ അവൻ പോയത് മുതൽ ഇന്ന് ഞാൻ ഇങ്ങോട്ട് വന്നത് വരെയുള്ള എല്ലാ കാര്യങ്ങളും ഒരൊറ്റ ശ്വാസത്തിൽ പറഞ്ഞു തീർത്തു.
എല്ലാം കേട്ടുകഴിഞ്ഞ് കിരൺ എന്നെ നോക്കി ചിരിച്ചു വെറും ചിരിയല്ല നല്ല അസ്സൽ പൊട്ടിച്ചിരി…
“എന്താടാ ചിരിക്കുന്നേ? ഞാൻ ഇവിടെ നിന്ന് വിയർക്കുമ്പോഴാണോ നിന്റെ കോപ്പിലെ ചിരി?”
എനിക്ക് ദേഷ്യം വന്നു.
“അല്ലടാ… നിന്റെ കാര്യം ആലോചിച്ചപ്പോൾ ചിരി വന്നതാ. നീ എന്തൊരു സാഡിസ്റ്റ് (Sadist) ആണടാ?”
അവൻ ചോദിച്ചു.
“സാഡിസ്റ്റോ? ഞാനോ? എടാ, ഞാൻ ഇവിടെ ഇരയാടാ… ഇര! നീ എന്താ ഉദ്ദേശിച്ചത്?”
ഞാൻ അന്തംവിട്ടു.
അവൻ ചിരി നിർത്തി, ഗൗരവത്തിൽ എന്റെ തോളിൽ കൈവെച്ചു.
“അതൊക്കെ അവിടെ നിൽക്കട്ടെ. നീ എന്റെ ചോദ്യത്തിന് മറുപടി പറ. നിനക്ക് അവളെ ഇഷ്ടമാണോ?”
ആ ചോദ്യം കേട്ടതും ഞാൻ ഒന്ന് പരുങ്ങി. ഇരുട്ടായതുകൊണ്ട് എന്റെ മുഖം ചുവന്നത് അവൻ കണ്ടില്ല.
“അത്… കാണാൻ കൊള്ളാം. നല്ല ഭംഗിയാ… പിന്നെ നല്ല പഠിപ്പ്…, പെരുമാറ്റം അതിനെക്കുറിച്ച് വലിയ ധാരണയില്ല പക്ഷേ സ്വൽപ്പം ജാഡയൊക്കെ ഉള്ള കൂട്ടത്തിലാ..”
ഞാൻ ഒരു ഒഴുക്കൻ മട്ടിൽ, താല്പര്യമില്ലാത്ത പോലെ പറഞ്ഞു.
“എടാ പൊട്ടാ, വളച്ചുകെട്ടാതെ പറ. നിനക്ക് അനു ചൈതന്യയെ ഇഷ്ടമാണോ അല്ലയോ?”
ഞാൻ ഒരു നിമിഷം ആലോചിച്ചു.അവൾക്കുറിച്ച് ആലോചിക്കുംതോറും എവിടെനിന്നോ വരുന്ന കുളിർക്കാറ്റേന്നെ തഴുകി മറയുന്നു..
“മ്മ്… ഇഷ്ടമാണ്.”
ഞാൻ പതിയെ സമ്മതിച്ചു.
“എന്നാപ്പിന്നെ നിനക്ക് അവളെ അങ്ങ് കെട്ടിക്കൂടാ? അമ്മ പറഞ്ഞത് അവൾക്കും നിന്നെ ഇഷ്ടപ്പെട്ടു എന്നല്ലേ? പിന്നെന്താടാ നിനക്ക് പ്രശ്നം?”
ഞാൻ ദീർഘശ്വാസം വിട്ടു..
“എടാ കിരാ… അത് ശരിയാവില്ലടാ. എവിടെ കിടക്കുന്ന അവൾ, എവിടെ കിടക്കുന്ന ഞാൻ? അവൾ കോടീശ്വരിയാണ്.പിന്നേ എന്നെക്കുറിച്ച് നിനക്ക് അറിയാവുന്നതല്ലേ…നാളെ അവളുടെ കാശിന്റെ പേരിൽ നാട്ടുകാരും വീട്ടുകാരും എന്നെ കളിയാക്കും. ഒരു അലങ്കാര വസ്തുവായി ഇരിക്കേണ്ടി വരും…അത്രയും വലിയ ബന്ധങ്ങളൊന്നും നമുക്ക് പറ്റില്ല.”
എന്റെ മറുപടി കേട്ടതും കിരൺ വീണ്ടും ചിരിച്ചു…
“ഇതുകൊണ്ടാണ് ഞാൻ പറഞ്ഞത്, നീ ഒരു സാഡിസ്റ്റ് ആണെന്ന്.”
“എന്ത്?”
“അതെടാ. സ്വന്തം സന്തോഷം സ്വയം നശിപ്പിക്കുന്ന സാഡിസ്റ്റ്! നീ ഒന്ന് ആലോചിച്ചു നോക്കിയേ… അവൾക്ക് നിന്നെ പണ്ടേ അറിയാം. നിന്റെ ഈ, തൊഴിലില്ലായ്മയും, നിന്റെ ഈ കൂതറ സ്വഭാവവും എല്ലാം അറിഞ്ഞുകൊണ്ട് തന്നെയാണ് അവൾ നിന്നെ സ്നേഹിച്ചത്. അല്ലാതെ നിന്റെ പോക്കറ്റിലെ ഗാന്ധിപ്പടം കണ്ടിട്ടല്ല.”
അവൻ ടെറസിലൂടെ ഒന്ന് നടന്നു, എന്നിട്ട് എന്റെ മുന്നിൽ വന്ന് നിന്നു. അവന്റെ വാക്കുകൾക്ക് നല്ല മൂർച്ചയുണ്ടായിരുന്നു.
1k like ini eppo avana . Plz am waiting for next part