ലൈറ്റിംഗ് ആണെങ്കിൽ റിമോട്ട് വെച്ച് മൂഡിനനുസരിച്ച് കളർ മാറ്റാൻ പറ്റുന്ന വാം ലൈറ്റുകൾ.
എന്റെ പെണ്ണ് ഇതിനേക്കാളൊക്കെ വലിയ സൗകര്യത്തിൽ ജീവിച്ചു വളർന്നവളല്ലേ… അപ്പൊ അവൾക്ക് വേണ്ടി ഇത്രയെങ്കിലും ഞാൻ ചെയ്യണ്ടേ! ഇതൊന്നും പോരാതെയാണ് റൂം മുഴുവൻ റോസാപ്പൂവും മുല്ലപ്പൂവും വെച്ച് അലങ്കരിച്ചിരിക്കുന്നത്.
പക്ഷേ, എന്റെ പെണ്ണിന് വേണ്ടി ഈ റൂം ഈ ലെവലിൽ സെറ്റാക്കി എടുക്കാൻ വന്ന ആ വലിയ ചിലവിനെക്കുറിച്ച് മനസ്സിൽ ഓർത്തപ്പോൾ ഞാൻ അറിയാതെ ഒരു ദീർഘശ്വാസം വിട്ടുപോയി. നെഞ്ചൊന്ന് കാളി.
അടുത്ത നിമിഷം ഞാൻ തന്നെ അതിനെക്കുറിച്ച് ചിന്തിച്ചു… എന്തിനാടാ നീയിങ്ങനെ കിടന്ന് ദീർഘശ്വാസം വിടുന്നത്? ഇതിനൊക്കെ ചിലവാക്കിയ കാശ് നിന്റേതാണോ? അല്ലല്ലോ! ചേച്ചിയുടെയും ഏട്ടന്റെയും പിന്നേ അമ്മയുടെയും അച്ഛന്റെയുമൊക്കെയല്ലേ ഇതിൽ കിടക്കുന്നത്! നിന്റെ പോക്കറ്റിൽ നിന്നൊന്നും ഒരു രൂപ പോലും പോയില്ലല്ലോ!
അത് ഓർത്തപ്പോൾ എനിക്ക് വീണ്ടും സമാധാനമായി…
ആഹ്… ഇനിയിപ്പോ ഭാവിയിൽ എങ്ങനെയെങ്കിലും വളർന്ന് വലിയൊരു കോടീശ്വരനായിട്ട് വേണം അവർക്കൊക്കെ വേണ്ടി എന്തെങ്കിലും തിരിച്ചു ചെയ്യാൻ! അതുവരെ അവർ എനിക്ക് വേണ്ടി ഇങ്ങനെ ചിലവാക്കിക്കോട്ടെ… എന്നൊരു വിചിത്രമായ ന്യായീകരണവും നൽകി ഞാൻ എന്റെ തങ്കക്കുടം റൂം ചുറ്റിനടന്നു കാണുന്നത് കൺകുളിർക്കെ നോക്കിയിരുന്നു….
“എന്തായാലും ഇന്നത്തെ ഡ്രസ്സും ചടങ്ങുകളും കാരണം നീ ആകെ ക്ഷീണിച്ചില്ലേ… നമുക്ക് കിടന്നാലോ?”
റൂമിലെ ഓരോ സാധനങ്ങളും കൗതുകത്തോടെ നോക്കി നിൽക്കുന്ന അവളെ കണ്ടപ്പോൾ ഞാൻ പതിയെ നാണത്താൽ ചോദിച്ചു…
എന്റെ ചോദ്യം കേട്ട് അവൾ എന്നെ നോക്കി പതുക്കെ ഒന്ന് തലയാട്ടി. അത് കണ്ടതും വല്ലാത്തൊരു ആവേശത്തോടെ ഞാൻ വേഗം പോയി സ്വിച്ച് ബോർഡിലെ മെയിൻ ലൈറ്റുകൾ മുഴുവൻ ഓഫ് ചെയ്തു….
റൂമിൽ ഇപ്പോൾ ആ വലിയ സ്ലൈഡിങ് ഗ്ലാസ്സ് ജനലിലൂടെ അരിച്ചിറങ്ങുന്ന പൂർണ്ണചന്ദ്രന്റെ നിലാവെളിച്ചം മാത്രമേയുള്ളൂ. ലൈറ്റ് ഓഫായ ആ നിമിഷം, സിനിമകളിലും നോവലുകളിലും മാത്രം കണ്ടിട്ടുള്ള, കിരണും മറ്റും പറഞ്ഞു തന്നിട്ടുള്ള ആദ്യരാത്രിയിലെ ആ കുത്സിതപ്രവർത്തികളും റൊമാൻസുമൊക്കെ എന്റെ മനസ്സിലൂടെ ഒരു മിന്നൽ പോലെ കടന്നുപോയി.
ഇന്ന് എന്റെ ജീവിതത്തിലെ ഏറ്റവും മനോഹരമായ രാത്രിയാണ്… ഇത്രയും കാലം ഞാൻ കൊതിച്ച എന്റെ പെണ്ണ് എന്റെ സ്വന്തം റൂമിൽ, എനിക്ക് മാത്രം സ്വന്തമായി!
നിലാവിന്റെ ആ നേർത്ത വെളിച്ചത്തിൽ ഞാൻ അവളെ നോക്കി. അവൾ അപ്പോഴും ബെഡിനരികിലായി എങ്ങോട്ടോ നോക്കി നിൽക്കുകയായിരുന്നു. എന്നെ കാത്തു നിൽക്കുകയാവും എന്റെ പെണ്ണ്! ആ ചിന്ത വന്നതും എന്റെ ഹൃദയമിടിപ്പ് വീണ്ടും താളം തെറ്റി.
ഞാൻ പതുക്കെ, ഒട്ടും ശബ്ദമുണ്ടാക്കാതെ അവളുടെ പിന്നിലേക്ക് നടന്നു ചെന്നു. മുല്ലപ്പൂവിന്റെയും അവളുടെ ആ പ്രത്യേക സുഗന്ധവും എന്നെ വല്ലാതെ മത്തുപിടിപ്പിച്ചു തുടങ്ങിയിരുന്നു. എന്റെ ശ്വാസം അവളുടെ കഴുത്തിൽ തട്ടുന്നത്ര അടുത്തേക്ക് ഞാൻ നിന്നു. ശേഷം പതിയെ എന്റെ വലതുകൈ മുന്നോട്ടെടുത്തു.
ആ വെള്ള സെറ്റ് സാരിയുടെ ഞൊറികൾക്കിടയിലൂടെ, മറവില്ലാതെ കിടന്നിരുന്ന അവളുടെ ആ വെളുത്ത അണിവയറിലേക്ക് ഞാൻ എന്റെ വിരലുകൾ കൊണ്ടുപോയി. അവിടെ പതിയെ സ്പർശിച്ചതും അവളൊന്ന് ഞെട്ടിയതുപോലെ എനിക്ക് തോന്നി. ആ ഇളം തണുപ്പിലും അവളുടെ ശരീരത്തിന് വല്ലാത്തൊരു ചൂടുണ്ടായിരുന്നു. എന്റെ കൈകൾ അവളുടെ ആ മൃദുവായ അണിവയറിലൂടെ പതുക്കെ തലോടിയപ്പോൾ, എന്റെ സ്പർശനത്തിൽ അവളൊന്ന് നാണിച്ചു കുളിരുമെന്ന് ഞാൻ കരുതി.
ഞാൻ അവളെ ഒന്നുകൂടി എന്റെ നെഞ്ചിലേക്ക് ചേർത്തുപിടിച്ച്, ആ കാർമുകിൽ മുടി വകഞ്ഞുമാറ്റി ഞാൻ അവളുടെ കാതോരം ചേർന്ന് ആ മൃദുവായ കവിളിൽ പതിയെ, എന്നാൽ നല്ല ആഴത്തിലൊരു ചുംബനം നൽകി.