ദിവസവും ബസ് റൂട്ടിൽ നല്ല തിരക്ക് കാണണമെന്ന് ദൈവത്തിനോട് പ്രാർത്ഥിച്ചായിരുന്നു ഹരി എന്നും വീട്ടിൽ നിന്നും ഇറങ്ങിയിരുന്നത്.
തിരക്കുണ്ടെങ്കിൽ സ്റ്റുഡന്റസ് നിക്കേണ്ടി വരുന്നത് കൊണ്ടും, ചിലപ്പോൾ അഞ്ജുവിന്റെ തൊട്ടരികിൽ നിക്കാൻ കഴിയുന്നതിനു വേണ്ടിയും, അങ്ങിനെ പറ്റിയില്ലെങ്കിൽ, തിരക്കിനിടയിൽ അഞ്ജുവിനെ ഇടം കണ്ണിട്ട് നോക്കാനും വേണ്ടി ആയിരുന്നു അത്.
ദിവസങ്ങൾ മാസങ്ങൾ ആയെങ്കിലും, മുകളിൽ പറഞ്ഞതല്ലാതെ ഹരി അങ്ങോട്ട് പോയി മുട്ടാനോ, സംസാരിക്കാനോ ശ്രമിച്ചില്ല എന്നതാണ് സത്യം. ആകെ കൂട്ടുകാരി ആ കുട്ടിയെ വിളിക്കുന്നത് കേട്ട് ഹരി പേര് മനസ്സിലാക്കി ” അഞ്ചു’ എന്നുള്ളത്.
പ്ലസ് വൺ, പ്ലസ് ടു സമയങ്ങളിൽ, കാണാൻ സുന്ദരൻ ആയിരുന്നിട്ട് കൂടെ, നന്നായി പഠിക്കാൻ ആയിരുന്നു ഹരി ശ്രമിച്ചത്. വീട്ടിലെ ഒറ്റ പെടലിൽ നിന്നും രക്ഷപെടാനും, നന്നായി പഠിച്ചു, ജോലി വാങ്ങി ആ വീട്ടിൽ നിന്നും എന്നെന്നേക്കുമായി ഇറങ്ങുന്നതിനും വേണ്ടി ആയിരുന്നു അത് എന്ന് പറയാം.
അതുകൊണ്ട് തന്നെ ആ സമയങ്ങളിൽ ഹരിയുടെ മനസ്സിൽ ഒരു പ്രണയവും മുട്ടിട്ടില്ല എന്ന് പറയാം. അല്ലെങ്കിൽ ശ്രമിച്ചില്ല എന്ന് തന്നെ പറയാം.
അങ്ങിനെ ഒരു ദിവസം യാത്രക്കാർ കൊണ്ട് തിങ്ങി നിറഞ്ഞ ബസ്സ് യാത്രയിൽ, തന്റെ തൊട്ട് മുന്നിൽ ആയി നിന്നിരുന്ന അഞ്ചു അൽപം തല ചെരിച്ചു കൊണ്ട് മൊഴിഞ്ഞത് ഹരി കേട്ടു : എന്താ ഉദ്ദേശം,,, കുറെ ആയല്ലോ പിന്നാലെ…..
പെട്ടെന്നുള്ള അഞ്ജുവിന്റെ ചോദ്യം കേട്ട് ഹരി ശരിക്കും ഞെട്ടി. ഹരി വാക്കുകൾ കിട്ടാതെ ബസ്സിൽ പതറി നിന്നു.
തിരക്കിനിടയിൽ കൂടുതൽ ചോദ്യങ്ങൾ ഒന്നും അഞ്ചുവിൽ നിന്നും ഉണ്ടായില്ല എന്നുള്ളതാണ് ഹരിക്ക് ആശ്വാസം ആയി തോന്നിയത്.
ബസ്സ് ഇറങ്ങി കോളേജിലേക്ക് ഓടാനുള്ള പ്ലാനിൽ ആയിരുന്നു ഹരി.
പക്ഷെ അതിന് മുൻപേ, അഞ്ജുവിന്റെ കൂട്ടുകാരി ഹരിയെ തടഞ്ഞു പറഞ്ഞു : ഉച്ചക്ക് ഒന്നരക്ക് xxx കട യുടെ അടുത്ത് വരാൻ പറഞ്ഞിട്ടുണ്ട് അഞ്ചു.
ഇത്രയും പറഞ്ഞു കൊണ്ട് അവൾ കുറച്ചു മുന്നിലായി നിന്നിരുന്ന അഞ്ജുവിന്റെ അടുത്തേക്ക് നടന്നു.
ഹരിക്ക് ഇരുന്ന് ഇരിപ്പുറച്ചില്ല അന്ന് കോളേജിൽ. അഞ്ജുവിന്റെ കൂട്ടുകാരി പറഞ്ഞ സ്ഥലത്തേക്ക് പോണമോ വേണ്ടയോ, ഒറ്റക്ക് പോണോ, ആരെയെങ്കിലും കൂടെ കൂട്ടണോ എന്നൊക്കെ ഉള്ള ചോദ്യങ്ങൾ മനസ്സിൽ ഉരുണ്ടു കളിക്കുകയായിരുന്നു ഹരിയുടെ.
വിറച്ചു വിറച്ചാണെങ്കിലും ഹരി ഉച്ചക്ക് ഒറ്റക്ക് തന്നെ അഞ്ചു പറഞ്ഞ കടയുടെ അടുത്തേക്ക് നടന്ന് എത്തി.
ഇനി അടി കൊള്ളാൻ ആണെങ്കിൽ, വേറെ ഒരാൾക്ക് കൂടെ കൊള്ളിക്കണ്ടല്ലോ എന്ന് വിചാരിച്ചു കൊണ്ട് കൂടെ ആരെയും കൂട്ടിയില്ല ഹരി.
പുതിയ, മുഴുവനായി പണി തീരാത്ത ബിൽഡിങ്ങിൽ ഉള്ള കടയുടെ അടുത്ത് അഞ്ചു വരുന്ന വരെ ഹരി അങ്ങോട്ടും ഇങ്ങോട്ടും നോക്കിയും നടന്നും മനസ്സിൽ അതിവേഗത്തിൽ അടിച്ചുകൊണ്ടിരുന്ന ഹൃദയ വേഗതയും, അനുഭവിച്ചു കൊണ്ടിരുന്ന ടെൻഷനും കുറക്കാൻ ശ്രമിച്ചെങ്കിലും നടന്നില്ല.
അഞ്ജുവും കൂടെ കൂട്ടുകാരിയും നടന്നു വരുന്നത് കണ്ട് ഹരിയുടെ ടെൻഷനും ഹൃദയമിടിപ്പും ഇരട്ടിയായി എന്ന് പറയാം.
ഹരി അവരെ നോക്കി തരിച്ചു നിന്നപ്പോൾ കൂട്ടുകാരി ഹരിയെ നോക്കി ചിരിച്ച ശേഷം കടയുടെ ഉള്ളിലേക്ക് നോക്കി അവിടെ ഉള്ള ചേച്ചിയോട് പറഞ്ഞു : ചേച്ചി… മൂന്ന് ലൈം…
അഞ്ചു അൽപം കൂടെ മുന്നോട്ട് നടന്ന് മാറി അടഞ്ഞു ഷട്ടർ ഇട്ട ഒരു കടയുടെ മുന്നിൽ ചെന്ന് നിന്ന് ഹരിയെ നോക്കി.
ഹരി പതിയെ പതിയെ തല താഴ്ത്തി അഞ്ജുവിന്റെ നേരെ നടന്നടത്തു.
കൈകൾ കെട്ടി തന്റെ മുഖത്ത് തന്നെ നോക്കി, കണ്ണുകൾ ചിമ്മാതെ നിന്നിരുന്ന അഞ്ജുവിനെ കണ്ട് പറയാൻ മനസ്സിൽ പല തവണ ഓർത്ത് വച്ചതെല്ലാം ഹരി മറന്നു പോയി..
ഹരി വിക്കി പറഞ്ഞു : ഞാൻ… അത്…
അഞ്ചു ഗൗരവത്തോടെ : നമ്മൾ ആരാണ്,,, എന്താ ഉദ്ദേശം. ഒന്ന് രണ്ടു മാസത്തിനു മേലെ ആയല്ലോ ഇത്..
ഹരി : അത്, ഞാൻ.. എന്തോ..
ഹരി എത്ര ശ്രമിച്ചും ഒന്നും പറയാൻ പറ്റിയില്ല..