ജസ്റ്റ് മിസ്സ്….ഒന്നും കണ്ടിട്ടില്ല…
“ഈ ചക്ക സീസൺ ഇതുവരെ കഴിഞ്ഞില്ലേ….കുറെ ആയല്ലോ…”
“ആഹ വറുത്തുവച്ച ടിൻ മിനിട്ടുവച്ചു കാലിയാക്കണ നീ തന്നെ ഇത് പറയണം….പോയി എടുത്തിട്ട് വാട…ഇക്കൊല്ലത്തെ ലാസ്റ്റ് ചക്കയാ…നമ്മടെ പ്ലാവേലെയൊക്കെ എന്നെ തീർന്നതാ…”
“മ്മ്മ്…”
“ഇന്നലെയൊരു തുമ്മലും കൂനിപിടിച്ചിരിപ്പും ഒക്കെ ആയിരുന്നു പനിച്ചോ ആവോ….”
പറഞ്ഞുംകൊണ്ട് വാതിൽ തുറന്നപ്പോ അമ്മു എണീറ്റില്ലെന്ന് കണ്ട് മായ അതു ചാരിതന്നെ വച്ചു പോയി…
ഹരി ചക്കയെടുത്തു കൊണ്ടുവന്നു പുഴുങ്ങാൻ മൂപ്പുള്ളത് തുന്നിച്ചുനോക്കി കോടാലിക്ക് നാലായി പിളർന്നു വച്ചു…
ലളിതമ്മക്കുള്ളതും അങ്ങനെ തന്നെ മുറിച്ചു വച്ചു…
കോടാലി ചാരിവെച്ചു പിറകുവശത്തുകൂടെ തന്നെ അകത്തുകയറുമ്പോൾ അമ്മു അടുക്കളയിൽ ഉണ്ട്..
“ ഇതൊന്നു നോക്കിയേട….എന്ത് പ്രാണിയോ ചെള്ളോ ആണെന്നറിഞ്ഞുകൂടാ മോൾടെ കഴുത്തിന്റെ ഒരു വശം മൊത്തോം ചുവന്നു കിടക്കുവാ…
ഇനിവല്ല അലർജിയോ മറ്റോ ആയിരിക്കുവോ .” പറഞ്ഞുകൊണ്ട് പച്ചമഞ്ഞളും തുളസിയിലയും കൂട്ടി അരച്ചത് അവളുടെ കഴുത്തിലേക്ക് തേക്കുന്നുണ്ട് മായ….
ഹരി ഞെട്ടി നോക്കുമ്പോൾ തലതാഴ്ത്തി നിൽക്കുവാണ് അമ്മു…
ചോര തുടുത്തു നിൽക്കുന്ന കവിൾ…
“മ്മ്മ്….” അലസമായൊന്നു മൂളിക്കൊണ്ടവൻ വേഗത്തിൽ ഹാളിലേക്ക് നടന്നു….
അമ്മു ആ പോക്കൊന്ന് പാളി നോക്കി…
“എന്റീശ്വരാ….” തിണ്ണയിലെ കസേരയിലേക്കിരുന്നവൻ നെറ്റിയിൽ അടിച്ചു….
തിന്നു വച്ചേക്കുവാണോ ഞാൻ അതിനെ….കഴുത്തു കിടക്കുന്നത് കണ്ടാ മതി….ഇനിയെങ്ങനെ അവളുടെ മുഖത്ത് നോക്കും….അമ്മയ്ക്കൊന്നും മനസിലായിട്ടില്ല പക്ഷെ വേറാര് കണ്ടാലും അത് എന്താണെന്ന് മനസിലാകും….
മീശയും കടിച്ചുമുറിച്ചു ഓരോന്നാലോചിച്ചിരിക്കെ ഫോൺ ബെല്ലടിച്ചു…
അവൻ അറ്റൻഡ് ചെയ്തിട്ട് ബൈക്കും എടുത്തിറങ്ങി…
കണ്ടത്തിൽ പണിക്കാരൊക്കെ എത്തിയിട്ടുണ്ട്…
നെൽക്കതിരുകൾ ചായ്ഞ്ഞു കിടക്കുന്നു…
ഇടത്തോടിനോടും പുഴയോടും ചേർന്ന ഭാഗങ്ങളിൽ വെള്ളം കുത്തിയൊലിച്ചു കൃഷി കുറച്ച് നശിച്ചു പോയിട്ടുണ്ട്…അതൊഴിച്ചാൽ അത്ര വലിയ നാശ നഷ്ടം ഒന്നും ഉണ്ടായിട്ടില്ല…
പണിക്കാർക്ക് വേണ്ട നിർദേശവും കൊടുത്ത് തേങ്ങയിടുന്ന മൂപ്പരെ കണ്ട് വെയില് തെളിഞ്ഞാൽ തേങ്ങയിട്ടേക്കാനും പറഞ്ഞു അവൻ തിരിച്ചുപോന്നു…
വരുന്ന വഴിക്ക് അൽപനേരം മാറിനിന്ന ചിന്തകൾ തന്നെ തലയിലേക്ക് പിന്നെയും കടന്നുകയറി…
വീട്ടിൽ ഇരുന്നാൽ ശെരിയാകില്ല ക്ലബ്ബിൽ എങ്ങാനും പോകാം എന്നുവെച്ചു ഡ്രസ്സ് മാറിയുടുക്കാൻ വീട്ടിലേക്ക് തിരിച്ചു…
വീടിന്റെ പിന്നിൽ നിന്നും ഉച്ചത്തിൽ സംസാരം കേൾക്കാം….
പടുതയുടെ അടിയിൽ കൂടിയിരുന്നു ചക്കവെട്ടാണ്…
ചിന്നു കോളേജിൽ പോയി..അമ്മുവിനെ പിന്നെ പനിയും കൂടെ കഴുത്തിലെ പാട് കണ്ട പേടിയും കാരണം മായ വിട്ടില്ല….
പുട്ടെടുത്തു പ്ലേറ്റിലേക്ക് കടലക്കറി ഒഴിക്കുന്നതിനിടയിൽ അവൻ ജനാലയിലൂടെ നോക്കി…
ലളിതമ്മേടേം അമ്മേടേം നടുക്ക് കുരണ്ടിപലകയിട്ട് ഇരിക്കുന്നുണ്ട് അമ്മു…
“ചവിണിയേത ചുളയെതന്ന് അറിഞ്ഞൂടാത്ത മൊതലാ എന്തിന് കേറിയിരിക്കുന്നെ ആണോ….”
അമ്മുപെട്ടെന്ന് പലകയിൽ നിന്നും എണീറ്റു വയറും പൊത്തിപിടിച്ചു അല്പം കുനിഞ്ഞു നിക്കുന്നു…
ഹരിയുടെ പിരികം ചുളിഞ്ഞു…
“ഞാനപ്പളെ പറഞ്ഞതാ പെണ്ണിനോട് ഉള്ള പച്ചച്ചക്കയെല്ലാം തിന്നണ്ടാ വയറ്റിൽ പിടികൂലാന്ന്…ഇനീപ്പോ ചെന്നിച്ചിരി ഉപ്പുക്കല്ലെടുത്തു തിന്ന് അപ്പൊ മാറിക്കോളും….” ലളിതമ്മ അവളെ പറഞ്ഞുവിട്ടു…
അവൾ വരുന്നത് കണ്ടതും ഒരു കുസൃതി തോന്നി അവൻ സ്ലാബിന് മുകളിലേക്ക് കയറി ഇരുന്നു കഴിക്കാൻ തുടങ്ങി…
അവനെ അവിടെ പ്രതീക്ഷിക്കാത്ത അമ്മു ഒന്ന് ഞെട്ടിയിട്ടുണ്ട്….
വർക്ക് ഏരിയ യിൽ നിന്നു പരുങ്ങിക്കളിക്കുന്നവളെ ഹരി ഒളികണ്ണിട്ട് നോക്കി…
“അമ്മേ….ഉപ്പെവിടെയാ….”
“ആ അലമാരടെ മോളിലത്തെ കള്ളീൽ ഉണ്ട്…എന്റെ കയ്യിൽ അരക്കാ…അല്ലേൽ കേറിവരാരുന്ന്….”
അരക്കും ചവിണിം പറ്റിപ്പിടിച്ച കൈകൊണ്ട് അവൾ ഉപ്പുപാത്രത്തിന്റെ അടപ്പ് തുറക്കാൻ നോക്കുന്നത് കണ്ട് ഹരി അതുവാങ്ങി തുറന്ന് ഉപ്പുകല്ലെടുത്തു കയ്യിൽ വച്ചു കൊടുത്തു…
Story idunath nirthiyo? Waiting aan storykk daily post cheythoode
Heyy enna post cheya?