സാറയെ ഞാൻ കാണുന്നത് പിന്നീട് ഏഴ് ദിവസം കഴിഞ്ഞാണ് സാവധാനം അവളെ കാര്യങ്ങൾ പറഞ്ഞ് ഞാൻ ബോധ്യപ്പെടുത്തി. പക്ഷേ അവൾക്ക് മമ്മിയെ കാണണമെന്ന് വാശി കൂടി കൂടി വന്നു. ഒടുവിൽ എനിക്ക് സോഫിയയോടും അന്നയോടും കാര്യങ്ങൾ തുറന്നു പറയേണ്ടി വന്നു.
ഒടുവിൽ രഹസ്യമായി ഞങ്ങൾ ഇവിടെ സാറയെ എത്തിച്ചു. “
” തോമസിന്റെ ഭാഗത്തു നിന്നും പ്രശ്നങ്ങൾ ഉണ്ടായില്ലെ?”
” ഉം…. സാറയുടെ സംസ്ക്കാരത്തിന് വന്നിരുന്നു അദ്ദേഹം.അന്നെന്നെ മാറ്റി നിർത്തി അദ്ദേഹം പറഞ്ഞത് അന്നയുടെ മരണത്തെ വിളിച്ചു വരുത്തരുതെന്നാണ്. പിന്നീട് എനിക്ക് ഭയമായി. സോഫിയ ജോലി രാജിവെച്ചത് തന്നെ ഭയന്നിട്ടാ”
” ഇപ്പോഴിതെല്ലാം തുറന്നു പറഞ്ഞതിനു പിന്നിലുള്ള ലക്ഷ്യമെന്താണ് സാർ.”
“തോമസ് ഐസക് കൊല്ലപ്പെട്ടു. എനിക്കെന്റെ മകളെ സമൂഹത്തിനു മുന്നിൽ എത്തിക്കണം. മരണപ്പെട്ടവളായല്ല ജീവിച്ചിരിക്കുന്നവളായി.വേദയ്ക്കതിനു കഴിയും”
“ഡാഡി Acp യുടെ കാർ …..”
സ്ക്രീനിൽ ACP യുടെ കാർ ഗേറ്റിനു ഫ്രണ്ടിൽ തന്നെയുണ്ട് തുടർന്ന് സോഫിയ പോയി ഗേറ്റു തുറക്കുന്നതും കാറകത്ത് കടന്നതും കണ്ടു.
സാറ നൈനാൻ കോശിയുടെ മുഖത്ത് നോക്കി.നൈനാൻ മുറിയിൽ നിന്നിറങ്ങി മുറി പുറത്തു നിന്നും ലോക്ക് ചെയ്തിറങ്ങിപ്പോയി.
എന്റെ ഫോൺ ശബ്ദിച്ചു
അരവിയായിരുന്നു.
” വേദ Acp രേണുകാ മേനോൻ നിന്നെ അന്വേഷിച്ച് വന്നിരുന്നു.”.
“എന്തിന്?”
“കുര്യച്ചനും മരണപ്പെട്ടു.
തോമസ് ഐസക്കിനെ കൊല ചെയ്തത് നീയാണെന്ന് കുര്യച്ചന്റെ മരണ മൊഴി. “
“ങ്ങേ….?! ഞാനോ? “
” നിന്റെ കൂടെ ഉണ്ടായിരുന്നെന്നു പറയപ്പെടുന്ന ആൻസി എന്ന യുവതി അര മണിക്കൂർ മുന്നേ അറസ്റ്റ് ചെയ്യപ്പെട്ടു. മാറി നിൽക്കുന്നതാണ് സേഫ്. നീയിപ്പോ എവിടെയാ? “
ആരോ സ്റ്റെപ്പുകൾ കയറി വരുന്ന ശബ്ദം ഞാൻ സാറയെ നോക്കി തിരിച്ചറിയാനാവാത്ത ഒരു ഭാവം മാത്രം.
ചതിക്കപ്പെടുകയാണെന്ന തിരിച്ചറിവു തന്നെയാവാം ഫോൺ സ്വിച്ചോഫാക്കാൻ എന്നെ പ്രേരിപ്പിച്ചത്.കാലടി ശബ്ദം വാതിലിനടുത്തെത്തി. കീ രണ്ടുവട്ടം തിരിഞ്ഞു.
ആക്രമിക്കാൻ തയ്യാറായി ഞാൻ നിന്നു.
വാതിൽക്കലോളമെത്തിയ കാലടി ശബ്ദം നിന്നു. ഹാൻഡിൽ തിരിയുന്നു…… നെഞ്ചിടിപ്പു കൂടി സാറയുടെ മുഖത്ത് ഭാവവ്യത്യാസമൊന്നുമില്ല. രണ്ട് മിനിട്ടിനു ശേഷം കാലടി ശബ്ദം അകന്നുപോയി. എങ്കിലും ഞങ്ങൾ പരസ്പരം ശബ്ദിച്ചില്ല. കുറച്ചു നേരം കഴിഞ്ഞതിനു ശേഷം രേണുകയുടെ കാർ ഗേറ്റു കടന്നു പോയി. ശേഷം ഞാൻ എഴുന്നേറ്റു.
“സാറ അടുത്ത അഴിച്ചുപണിയിൽ നീയും ഉണ്ട്. “
” അതിനു വേണ്ടിയാണിപ്പോൾ മേഡത്തിനോട് കാര്യം അവതരിപ്പിച്ചത്.തോമസ് ഐസക്കിനു പിന്നിൽ ആരൊക്കെയോ ഉണ്ട് ഡാഡിക്ക് ഇപ്പഴും ഭീഷണിയുണ്ട്. സർവ്വീസിൽ നിന്നു പോലും ഒന്നു രണ്ടു വട്ടം രാജിവെക്കാനിരുന്നതാ. മമ്മിയും രാജിവെച്ചതിനു പിന്നാലെ ഡാഡി കൂടി ജോലി കളഞ്ഞാൽ ജീവിതം ബുദ്ധിമുട്ടാകുമെന്ന് തോന്നിയിട്ടാ വേണ്ടെന്നു വെച്ചത്.”
“എന്തെങ്കിലും ആവശ്യമുണ്ടെങ്കിൽ വിളിക്കണം .”
വാതിൽ തുറന്ന് നൈനാൻ കോശി മുറിയിലേക്ക് കയറി.മുഖം മ്ലാനമായിരുന്നു.
“വേദ ചെറിയൊരു പ്രശ്നമുണ്ട് “
“എന്താ സാർ? “
“തനിക്കെതിരെ കളിക്കുന്നയാൾ ശക്തനാണ്. തോമസ് ഐസക്കിന്റെ മരണത്തിനു പിന്നിൽ നീയാണെന്ന് ഒരു നാൻസി മൊഴി കൊടുത്തിരിക്കുന്നതിന്റെ ഫലമായി നിനക്കെതിരെ തോമസിന്റെ മകൻ കേസ് കൊടുത്തിട്ടുണ്ട്. “
“ഞാനറിഞ്ഞിരുന്നു അരവിന്ദ് വിളിച്ചു തൊട്ടു മുൻപേ. അപ്പോ മുറിക്കു പുറത്താരോ വന്നിരുന്നതിനാൽ ഫോൺ സ്വിച്ച്ഡോഫാക്കി ഞാൻ “
“മുറിക്ക് പുറത്താര് വരാൻ?”
നൈനാന്റെ ശബ്ദത്തിൽ എന്തോ ഭയം.
“ഡാഡിയല്ലായിരുന്നോ വന്നത്??”
സാറ ഇടയ്ക്കു കയറി ചോദിച്ചു.
“ഇല്ല ഞാനും മേഡവും സോഫിയയും താഴെ സംസാരിച്ചിരിക്കുകയായിരുന്നു.”
” അന്ന?”
” ഇല്ല ആരും വന്നില്ല.”
ഞാനും സാറയും പരസ്പരം നോക്കി. ആ മുഖത്ത് ഭയത്തിന്റെ കുഞ്ഞലകൾ.
ആരോ വന്നു എന്നെനിക്കും ഉറപ്പായിരുന്നു.
സാറയോട് യാത്ര പറഞ്ഞു ഞാനിറങ്ങി താഴെ എത്തി. എനിക്കൊപ്പം നൈനാൻസാറും വന്നു.
ഫോൺ ഓൺ ചെയ്തതും അലോഷിയുടെ മെസ്സേജ് വന്നു.
“എത്രയും പെട്ടന്ന് അവിടെ നിന്നിറങ്ങുക “
മുഖത്ത് ഭാവമാറ്റം വരുത്താതെ ഞാൻ നൈനാനോട് ചോദിച്ചു..
“സാറ ജീവിച്ചിരിക്കുന്നത് അറിയുന്നത് ആരൊക്കെ?”
” ഞാൻ, സോഫി, അന്ന, ശിവ ശെൽവം പിന്നെ താനും….. എന്താടോ?”
”ഒന്നുമില്ല. എവിടെയോ ഒരു പിഴവ് പറ്റിയോന്നൊരു സംശയം….. Acp മാഡം വന്നത്?”
“തന്റെ കാര്യം പറയാൻ കൂടിയാണ്”
” കൂടെയാരാ ഉണ്ടായത്?”
“കാർ ഡ്രൈവറുണ്ടായിരുന്നെന്നു തോന്നുന്നു…. എന്തു പറ്റി വേദാ? നിങ്ങൾ തമ്മിലെന്തെന്തിലും പ്രശ്നമുണ്ടോ?”
ചെറിയൊരു പുഞ്ചിരി നൽകി തുടർന്നു.
” പ്രശ്നമൊന്നുമില്ലാതിരിക്കട്ടെ. സർ നാൻസിയെ അറസ്റ്റ് ചെയ്തു എന്നല്ലെ പറഞ്ഞത്?”
“അതെ… അത് Acp തന്നെയ അറസ്റ്റ് നടത്തിയത്.”
” കോടതിയിൽ ഹാജരാക്കണമെങ്കിൽ തിങ്കളാഴ്ച വരെ കാത്തിരിക്കണം അല്ലേ?”
“അതെ. എന്താ വേദാ?”
“ഹേയ് ഒന്നുമില്ല.ഇനിയും തെളിയാതെ കിടക്കുന്ന സീനയുടെ കൊലപാതക സമയത്ത് കൂടെയുണ്ടായിരുന്ന സ്ത്രീയാണ് ആൻസി എന്ന സ്ത്രീ.അവരിപ്പോൾ പോലീസ് കസ്റ്റഡിയിലാണ്. ACP അറസ്റ്റ് ചെയ്തൊരാളെ ക്വസ്റ്റ്യൻ ചെയ്യാനുള്ള അനുമതി സാറിനു കിട്ടുമെങ്കിൽ വിനിയോഗിക്കുക. പ്രതിസ്ഥാനത്ത് നമ്മൾ ചൂണ്ടിക്കാണിച്ച കുര്യച്ചൻ ഇതിൽ വെറും ബിനാമി മാത്രമാണ് എന്നെന്റെ മനസ്സ് പറയുന്നു.”
“വേദയ്ക്കിതെങ്ങനെ അറിയാം?”
“സർ പറ്റുമെങ്കിൽ അന്വേഷിക്കുക. സീതയുടെ ബോഡി കിട്ടിയ സെമിത്തേരിയിലെ കുഴിയിൽ നിന്നും ഒരു കാൽപാദത്തിന്റെ പാതിയും കിട്ടിയിരുന്നു. സാർ ഓർക്കുന്നുണ്ടോ?”
“ഉവ്വ് “
“അതൊരു സ്ത്രീയുടെ തന്നെ കാൽപാദമാണെന്ന് ഫോറെൻ സിക് വിഭാഗം ശരി വെച്ചിരുന്നു. നാൻസിയ്ക്ക് ഒരു കാൽപാദം പാതിയെ ഉള്ളൂ. മാത്രമല്ല മരണപ്പെട്ട സജീവിന്റെ നിയമാനുസൃതമായ ഭാര്യ അവരാണ്.”
നൈനാൻ വാ പൊളിച്ചിരിക്കയാണ്.
“വേദ താൻ ഇതെല്ലാം കണ്ടു പിടിച്ചത് ആവിശ്വസനീയം തന്നെ.”
“സർ ഇതെല്ലാം അർജ്ജുന്റെ കേസുമായി ബന്ധപ്പെട്ടിരിക്കുന്നു. ACP നേരിട്ട് നടത്തിയ അറസ്റ്റായതിനാൽ സാറിനിതിൽ കൈകടത്താൻ പറ്റുമോ. “
” അതോർത്ത് വിഷമിക്കണ്ട. ACp യുടെ പുതിയ ടീമിൽ ഞാനുണ്ട്.”
” good ! നമുക്ക് വേണ്ടതും അതാണ്. സർ നടത്തുന്നത് ഒരു റിസ്ക്കേറിയ കാര്യമാണ്.നാൻസിയെ ചോദ്യം ചെയ്യുന്ന സമയത്ത് വിശ്വസ്ഥരായവർ മാത്രമേ ഉണ്ടാകാവൂ. മാത്രമല്ല ആരുമറിയാതെ ഈ രംഗങ്ങളുടെ വീഡിയോ എടുക്കണം. ശത്രുപക്ഷം വളരെ സ്ട്രോംഗാണ്.”
ഫോണിൽ വീണ്ടും മെസ്സേജ്
‘പ്രശാന്ത് സിഐ യുടെ വീടിനടുത്തുണ്ട്.ഇറങ്ങുമ്പോൾ മിസ്ഡ് കോൾ കൊടുക്കുക ‘
നൈനാൻ തുടർന്നു.
