എനിയ്ക്കുള്ള ബ്ലാക്ക്ഷർട്ടും ലൈറ്റ്ബ്ലൂ ജീൻസുമപ്പോൾ ബെഡ്ഡിനു പുറത്തുണ്ട്…
“”…എന്തോപറ്റി..?? മഞ്ഞ ഷർട്ടൊന്നുങ്കിട്ടീലേ..??”””_ കളറുമാറിക്കിട്ടിയ സന്തോഷമടക്കാനാവാതെ ഞാൻ ചോദിച്ചു…
“”…കിട്ടുവൊക്കെ ചെയ്തു… ബാഗേലൊണ്ട്… പക്ഷേങ്കിലിടണ്ട…. ഇട്ടേച്ചുംചെന്നാലാ നാറി കുട്ടൂസിനെയിരുത്തി പൊറുപ്പിയ്ക്കൂല…!!”””
ഒരേകളറ്… അതും മഞ്ഞേമിട്ട് ശ്രീയുടെ മുന്നേചെന്നാൽ ആ നിമിഷമവൻ ശിവഗിരീക്കൊണ്ടോയി ഭജനയിരുത്തും…
“”…മതി ചിന്തിച്ചുനിന്നേ… പെട്ടെന്നൊരുങ്ങ്…!!”””_ പറഞ്ഞുകൊണ്ടവൾ ബെഡിലിരുന്നതും ഞാൻ വേഗത്തിൽ ഡ്രെസ്സുമാറി…
പിന്നെയവളേങ്കൂട്ടി പുറത്തിറങ്ങുമ്പോൾ ഫ്ലാറ്റിലെയെന്റെ കുറേ ചങ്കു ചേച്ചിമാരൊക്കെ വന്നു…
അവരോടൊക്കെ യാത്ര പറയുമ്പോൾ ആശേച്ചി അവരുടെ ഫ്ലാറ്റിൽനിന്നുമെന്നെ നോക്കുന്നുണ്ടാർന്നു…
“”…മ്മ്മ്മ്.! ഇതൊന്നുമത്ര നല്ലതല്ല… എനിയ്ക്കത്രേ പറയാനൊള്ളൂ..!!”””_ ആശേച്ചീടെ നോട്ടംകണ്ടിട്ടവൾ മെല്ലെപറഞ്ഞു…
ഞാനതിനു മറുപടിയായി ഒന്നുചിരിച്ചു…
താഴെയെത്തി കൈയിലുണ്ടാർന്ന രണ്ടു ട്രോളീബാഗും ഡിക്കിയിലേയ്ക്കു വെയ്ക്കുമ്പോൾ മീനാക്ഷി കീയുമായി ഡ്രൈവിങ് സീറ്റിലേയ്ക്കു കേറി…
“”…വണ്ടി ഞാനെടുക്കാട്ടോ..!!”””
“”…സന്തോഷം..!!”””_ പറഞ്ഞുകൊണ്ട് കൂടെ കേറിയതും അവൾടടുത്ത ഡയലോഗു വന്നു…
“”….കൂടുതല് സന്തോഷിയ്ക്കൊന്നുമ്മേണ്ട…. ആദ്യത്തെ അമ്പത് കിലോമീറ്ററു ഞാനോടിയ്ക്കും… പിന്നെ നീയോടിയ്ക്കണം… പാവല്ലേന്നു കരുതീട്ടാ… ഏറ്റല്ലോ..?? പറ്റിയ്ക്കല്ലും..!!”””
“”…ആാാഹ്… നോക്കാം..!!”””_ ഞാനെങ്ങും തൊടാത്തമാതിരി പറഞ്ഞപ്പോൾ അവളൊരീണത്തിൽ തലകുലുക്കി…
ഇല്ലേൽ കാണിച്ചുതരാമെന്ന ഭാവമായിരുന്നു മുഖത്ത്…
“”…മിന്നൂസ് വീട്ടിവിളിച്ചുപറഞ്ഞോ… ഇന്നുവരുവാന്ന്…??”””_ വണ്ടി കുറച്ചുനീങ്ങിയപ്പോൾ ഞാൻചോദിച്ചു…
“”…മ്മ്മ്.! പറഞ്ഞായ്രുന്നു… എന്തേ സർപ്രൈസുകൊടുക്കാനെന്തേലും പ്ലാനുണ്ടായ്രുന്നോ..??”””
“”…ഉവ്വ.! അതുമെന്റെ വീട്ടില്.! വിളിച്ചുപറഞ്ഞേച്ചു ചെന്നാത്തന്നെ കേറ്റോന്നൊറപ്പില്ല… അപ്പഴാ സർപ്രൈസ്… പിന്നെ നീയുള്ള ധൈര്യത്തിക്കൂടെ വരുന്നതല്ലേ… അല്ല… നീ നിന്റെ വീട്ടില് പറഞ്ഞായ്രുന്നോ..??”””
“”…മ്മ്മ്..!!”””
“”…ഉവ്വ.! നീയങ്ങു മലത്തി.! കള്ളമ്പറയുവാണേ ഞാനിപ്പൊ വിളിച്ചുചോയ്ക്കും…!!”””_ ഞാൻ ഫോൺ കയ്യിലെടുത്തുകൊണ്ടു പറഞ്ഞതും അവളില്ലെന്നു തലകുലുക്കി…
“”…ശ്ശേ.! അതെന്താടീ..?? നെനക്കു വിളിച്ചു പറഞ്ഞൂടായ്രുന്നോ…?? ഒന്നൂല്ലേലും നിന്റച്ഛനുമമ്മേമല്ലേ…?? അവരുവിളിച്ചാ ഫോണോ എടുക്കൂല… അപ്പൊന്നു പോയ് കാണുവെങ്കിലുമ്മേണ്ടേ..??”””
“”…സിദ്ധൂ…. നീയൊന്നു നിർത്തുന്നുണ്ടോ…?? എനിയ്ക്കീ ടോപ്പിക്കിനി സംസാരിയ്ക്കാൻ താല്പര്യമില്ല..!!”””_ ഒറ്റയടിയ്ക്കു മൂഡുമാറി കട്ടകലിപ്പിൽ പറഞ്ഞവൾ ഡ്രൈവിങിൽ കോൺസെൻട്രേറ്റു ചെയ്തപ്പോളെന്റെ വാക്കുകളും മുട്ടിപ്പോയി…
അല്ലേലുമെനിയ്ക്കുമവൾടെ വീട്ടിപ്പോവാനത്ര ഉത്സാഹമുള്ളോണ്ടൊന്നുവല്ല… പിന്നെന്നെ കരുതിയവൾ ലീവെടുത്ത് എന്നേംകൂട്ടിയെന്റെ വീട്ടിലേയ്ക്കു പോകുമ്പോൾ അവൾക്കുമതേയിഷ്ടമുണ്ടോന്നു ചോദിയ്ക്കേണ്ടതെന്റെ കടമയാണല്ലോ…
അതുകൊണ്ടു ചോദിച്ചതാ…
അല്ലേലന്നവരു പറഞ്ഞവെച്ചാണേ ചത്താക്കൂടി ഞാങ്കേറില്ലായ്രുന്നു…
…എനിയ്ക്കതല്ല… ഇപ്പോളെന്റെ കടമയെക്കുറിച്ചും മീനാക്ഷിയെക്കുറിച്ചുമൊക്കെ ചിന്തിയ്ക്കുന്നതേ പറ്റി കേൾക്കുമ്പോ നിങ്ങൾക്കു സത്യത്തിൽ ചിരിവരുന്നില്ലേ..??
കീരിയും പാമ്പുമ്പോലെ കടിപിടികൂടിയ വെളിവില്ലാത്ത രണ്ടെണ്ണമെങ്ങനെയാ സ്വന്തം കടമകളെക്കുറിച്ചൊക്കെ ചിന്തിയ്ക്കാൻ തുടങ്ങിയതെന്നാലോചിയ്ക്കുമ്പോൾ നിങ്ങളെയൊക്കെപ്പോലെ തന്നെ എനിയ്ക്കുമതിശയമാ…
ചിലപ്പോളൊരുപക്ഷേ…. അതായിരിയ്ക്കും ജീവിതം….!
നമ്മളു കരുതുമ്പോലൊക്കെ നടന്നാപ്പിന്നെന്താ ആ ജീവിതത്തിലൊരു സുഖം..??
നിങ്ങൾക്കറിയോ… സത്യത്തിലന്നു പോത്തീസിലുവെച്ചു മീനാക്ഷി പറഞ്ഞതുംകേട്ടു താറുമാറായി തിരിച്ചുവരുമ്പോൾ എങ്ങനെങ്കിലുമീ ഊരാക്കുടുക്കിൽനിന്നും രക്ഷപ്പെടണമെന്നേ എനിയ്ക്കുണ്ടാർന്നുള്ളൂ…