“”…ഇറങ്ങടാ… ഇനീം
എന്താലോചിച്ചോണ്ടിരിയ്ക്കുവാ..??”””_ വണ്ടി പോർച്ചിലേയ്ക്കുകയറ്റി സീറ്റ്ബെൽറ്റഴിയ്ക്കുന്നതിനിടയിൽ മീനാക്ഷിയെന്റെ തോളിനിട്ടൊരു കുത്ത്…
അതിന്,
“”…ങ്ഹൂം.! അന്നിവടന്ന് ഇറങ്ങിപ്പോയതൊക്കെ ചുമ്മാതൊന്നാലോചിച്ചതാ… എന്തൊക്കെയായ്രുന്നൂ ബഹളം..??”””_ മറുപടിപറയുമ്പോൾ ഒരാക്കിയ ചിരിയെന്റെ ചുണ്ടുകളെ തേടിയെത്തി…
പിന്നത് സ്വാഭാവികമാണല്ലോ…
“”…എല്ലാം നടക്കോടാ… അല്ലേ നടത്തും… ഈ മീനാക്ഷിയ്ക്കേ വാക്കൊന്നേയുള്ളൂ..!!”””_ ഹാൻഡ്ബാഗും കയ്യിലെടുത്ത് സാരിയൊതുക്കി പിടിച്ചുകൊണ്ട് ഡോറു തുറക്കുമ്പോൾത്തന്നെ പുള്ളിക്കാരിയൊന്നു ചൊടിച്ചു…
ഉടനെ,
“”…എന്നാലും ഏതാണാവോ ആ ഒരുവാക്ക്..??”””_ എന്നും ചൊറിഞ്ഞുകൊണ്ട് ഞാനവളെ കള്ളനോട്ടം നോക്കിയതും,
“”…അകത്തേയ്ക്കു കേറിവാ… പറഞ്ഞുതരാം..!!”””_ ന്നായ്രുന്നൂ കക്ഷിയുടെ മറുപടി…
ശേഷം ഡോറുമടച്ചവൾ വീടിന്റെ മുന്നിലേയ്ക്കു നടന്നപ്പോൾ ഞാനും പുറത്തേയ്ക്കിറങ്ങി…
സമയം സന്ധ്യയായതിനാൽ വീടും പറമ്പുമൊന്നും വ്യക്തമായി കാണാൻ കഴിഞ്ഞിരുന്നില്ല…
പക്ഷെ ഓണത്തെ മുൻനിർത്തി മൊത്തത്തിലൊന്നു തെളിച്ചിട്ടുണ്ട്…
പ്ലാവിന്റെയൊരു കയ്യേലാണേൽ ഊഞ്ഞാലുമിട്ടിട്ടുണ്ട്…
…ഇവടാരാ ഊഞ്ഞാലാടാനും മാത്രമുളേള..??
…ഇനിയെന്റെ തന്തക്കാർന്നോർക്കുവേണ്ടി കെട്ടീതാവോ..??
…ഏയ്.! പുള്ളിയ്ക്കൂഞ്ഞാലാടാനല്ലല്ലോ ആട്ടാനല്ലേ താല്പര്യം.!
സ്വയംപറഞ്ഞുകൊണ്ട് ഞാൻ ഡിക്കിയ്ക്കടുത്തേയ്ക്കു ചെന്നു…
…ബാഗെല്ലാം വണ്ടിയ്ക്കകത്താ… എടുക്കണ്ടേ..??
…അല്ലേ വേണ്ട… ആദ്യം ഞാനകത്തുകേറി പറ്റട്ടേ… ശേഷം ബാഗിനെക്കേറ്റാം.!
ഞാനങ്ങനൊരു തീരുമാനത്തിലേയ്ക്കെത്തുമ്പോഴേയ്ക്കും മീനാക്ഷി
സിറ്റ്ഔട്ടിലേയ്ക്കു കേറിയിരുന്നു…
അങ്ങനവൾടെ പിന്നാലെ ചെല്ലുമ്പോഴാണ് സിറ്റ്ഔട്ടിന്റെ മൂലയിലിരുന്നു കളിയ്ക്കുന്ന വാവക്കുട്ടിയെ ഞാൻ കാണുന്നത്…
കുളിപ്പിച്ച് കണ്ണൊക്കെയെഴുതി ഒരു കുട്ടിഫ്രോക്കൊക്കെ ഇടീപ്പിച്ച് കൊണ്ടിരുത്തിയേക്കുവാ ചുന്ദരിക്കുട്ടിയെ…
കണ്ണുതട്ടാതിരിയ്ക്കാൻ കവിളിലൊരു കറുത്തകുത്തുമുണ്ട്…
ഞാനവളെത്തന്നെ കുറച്ചുനേരം നോക്കിനിന്നു…
അമ്മയും ശ്രീയുമൊക്കെ പലപ്പോഴായി അയച്ചുതന്നിട്ടുള്ള ഫോട്ടോസല്ലാതെ കുഞ്ഞാവയെ നേരിട്ടുകാണുന്നിതാദ്യാ…
അതുകൊണ്ടുതന്നെ ക്ഷണത്തിൽ എന്റെക്സൈറ്റ്മെന്റ് പീക്ക് ലെവലിലെത്തി…
“”…അച്ചോടീ… ഇതാരാവിടെ ഒറ്റയ്ക്കിരുന്നു കച്ചുന്നേ..?? മാമന്റെ ചക്കരവാവയോ..??”””_ കുഞ്ഞിനെക്കണ്ടതും മീനാക്ഷിയേയും മറികടന്ന് ഞാൻ സിറ്റ്ഔട്ടിലേയ്ക്കു ചാടിക്കേറി…
“”…ഇങ്ങുവാടീ മോളൂസേ… മാമൻ ചോയ്ക്കട്ടേ..!!”””_ പറഞ്ഞുകൊണ്ട് കുഞ്ഞിനെ ഞാൻ വാരിയെടുത്തതും പരിചയമില്ലാത്തൊരാൾ എടുത്തതിന്റെ അങ്കലാപ്പിൽ പെണ്ണൊറ്റ കാറിച്ചയായ്രുന്നൂ…
“”…അച്ചോടാ… വാവ കരയണ്ട… വാവേടെ മാമനല്ലേടുത്തേ..!!”””_ പറഞ്ഞുകൊണ്ട് ഞാനവളെ നെഞ്ചിലേയ്ക്കു ചേർത്തതും അതോടെ പെണ്ണിന്റെകാറിച്ച ഉച്ഛത്തിലായി…
“”…അയ്യോ.! മോള് കരയണ്ട.! മോൾടെ മാമന്തന്നാ ഇത്..!!”””_ കുഞ്ഞിന്റെകരച്ചിലും എന്റവസ്ഥയുംകണ്ട് മീനാക്ഷിയുമങ്ങോട്ടേയ്ക്കെത്തി…
കൂട്ടത്തിൽ ഹാൻഡ്ബാഗിൽനിന്നും രണ്ടു ചോക്ലേറ്റെടുത്ത് കുഞ്ഞിന്റെകയ്യിൽ പിടിപ്പിയ്ക്കേം ചെയ്തു…
എന്നാലതിനൊന്നും പെണ്ണിനെ മയപ്പെടുത്താനായില്ല…
ചോക്ലേറ്റൊക്കെ നിന്റെ തന്തയ്ക്കു കൊണ്ടോയി കൊടുക്കടീന്നമട്ടിൽ വലിച്ചെറിഞ്ഞിട്ട് പെണ്ണ്പിന്നേം കീറലുതുടങ്ങി…
“”…ഇതെന്താടീ ഇങ്ങനൊരുവിളി..?? ഇതിനി മനുഷ്യക്കുഞ്ഞല്ലേ..??”””_ കയ്യിലിരുന്ന കുഞ്ഞിനെ തിരിച്ചുംമറിച്ചുമൊക്കെ നോക്കിയിട്ട് ഞാൻ മീനാക്ഷിയുടെനേരേ തിരിഞ്ഞു…
“”…നിന്റെ ചേച്ചി പെറ്റതല്ലേ… അപ്പൊ ഇത്രയൊക്കെ പ്രതീക്ഷിച്ചാമതി..!!”””_ കുഞ്ഞിന്റെ കൈപിടിച്ച് കൊഞ്ചിയ്ക്കാൻ ശ്രെമിയ്ക്കുന്നതിനിടയിൽ അതുംപറഞ്ഞുകൊണ്ട് അവളെന്നെ പാളിനോക്കി ചിരിയമർത്തി…
പെട്ടെന്നാണ് പിന്നിൽനിന്നൊരലറിച്ച കേൾക്കുന്നത്…
“”…ഡാ..!!”””