” ഷാമോനെ മൊബൈല് നമ്പര് താ …ഞാനൊന്ന് ആലോചിച്ചിട്ട് പറയാം ‘ വാതില്ക്കല് എത്തിയ ഷാമോന് തിരിഞ്ഞു നിന്ന് അവളോട് നമ്പര് പറഞ്ഞു ,
” സാറെ …എനിക്കെത്രയും പെട്ടന്ന് വേണം ..എന്നിട്ട് വേണം കുറച്ചു തുക കൂടി സങ്കടിപ്പിക്കാന് , അതും ഈ ഇരുപതിനുള്ളില് ”
താര ചിരിച്ചു …ആ ചിരി ഷാമോന്റെ മനസില് കുളിര്മഴയാണ് പെയ്യിച്ചത്
”””””””””””””””””””””””””””””””””””””””””””””””
അന്നും ഷാനു അജയുടെ ക്ലാസ്സിനു മുന്നിലൂടെ രണ്ടു മൂന്നു പ്രാവശ്യം നടന്നിട്ടും അവനെ കണ്ടില്ല .. അവള് പാലമരച്ചുവട്ടിലും പോയി നോക്കി
” എടി …ആരെ കാണാനാടി ഇങ്ങോട്ട് വരുന്നേ …. മേലാല് ഈ ഭാഗത്ത് കണ്ടു പോകരുത് ” മഹേഷ് അവളെ കണ്ടതും പാല മരച്ചുവട്ടിലെ സിമന്റ് ബെഞ്ചില് കയറി ആക്രോശിച്ചു .
ഷാനുവിന് ആകെ സങ്കടമായി …കവിളുകള് ചുവന്ന് തുടുത്തു, ഇപ്പൊ പൊട്ടുമെന്ന രീതിയിലായി .. സുറുമയെഴുതിയ കണ്ണുകളില് കണ്ണീര് തുളുമ്പി
” ചേട്ടാ …എനിക്ക് അജയുടെ നമ്പര് ഒന്ന് തരാമോ ?” അവള് അടുത്ത് വന്നു ചോദിച്ചപ്പോള് മഹേഷ് അമ്പരന്നു . അവളുടെ വിങ്ങിപോട്ടാറായ മുഖം കണ്ടപ്പോള് അവനും വല്ലാതായി
” ഷഹാനക്ക് മൊബൈല് ഉണ്ടോ ?” ഷാനു ഇല്ലന്ന് ചുമല് കൂച്ചി . മഹേഷ് അവന്റെ മൊബൈല് എടുത്തു അജയിനെ വിളിച്ചു ,അപ്പുറത്ത് ബെല് അടിക്കുന്നത് കേട്ട് മഹേഷ് അവള്ക്ക് കൊടുത്തു
ഷാനു അല്പം മാറി നിന്നു
‘ എന്താടാ മഹി ?”
‘ ഞാന് …ഞാന് ഷഹാനയാ” മന്ത്രിക്കുന്ന പോലെ അവള് പറഞ്ഞു
” ആര് ? ആരാന്നാ പറഞ്ഞെ ?’
” ഞാന് ..ഞാന് ഷാനുവാ” അപ്പുറത്ത് അല്പ നേരത്തെ നിശബ്ധത
‘ എന്താ കോളേജില് വരാത്തെ? ‘ ഷാനു വിങ്ങി വിങ്ങി ചോദിച്ചു
” ഞാന് എന്തിനാ വരണേ ? ഞാനിനി വരണില്ല ‘ ഒരു നിമിഷ നേരത്തേക്ക് മിണ്ടാതിരുന്ന അജയ് പറഞ്ഞു . അത് കേട്ടതും ഷാനുവിന്റെ കണ്ണുനീര് പുറത്തേക്ക് ചാടി
‘ വരണം ….ഞാന് വെക്കുവാ ” ഷാനു മൊബൈല് അവിടെ വെച്ചിട്ട് മഹേഷിന്റെ നേരെ നൊക്കിയിട്ട ഷാള് കൊണ്ട് വായും പൊത്തി ക്ലാസ്സിലേക്കോടി …
ഉച്ചക്ക് ഇന്റര് വെല്ലിനു ഷാനുവും ദേവികയും ക്ലാസില് ഇരിക്കുവായിരുന്നു . അപ്പൊള് മഹേഷും രണ്ട് കൂട്ടുകാരും കൂടി അവിടേക്ക് കയറി വന്നു . ഷാനു അവരെ കണ്ടതും ഷാള് കൊണ്ട് തല ഒന്ന് കൂടി മറച്ചു
” അവന് നാളെ വരൂന്ന് പറഞ്ഞു ‘ ഷാനുവിന്റെ മുഖത്തു പൂത്തിരി കത്തി “…തന്നോടൊന്നു കൂടി വിളിക്കാമോന്നു …നമ്പര് തരാം ”
മഹേഷ് നമ്പര് എഴുതാനായി കടലാസ്സ് തിരഞ്ഞപ്പോള് ഷാനു തടഞ്ഞു
” ഞാന് നോക്കിയാരുന്നു മഹേഷേട്ടാ …94XXXXXX12 അല്ലെ “
” അമ്പടി ….നീയാള് കൊള്ളാല്ലോ …ഹമം … ഇവടെ കൂടെയല്ലേ സഹവാസം …ഒത്തിരി കൂട്ട് കൂടണ്ട കേട്ടോ ” ദേവികയെ നോക്കി അവന് പറഞ്ഞപ്പോള് …ദേവിക അവന്റെ കയ്യില് നുള്ളി ..
” നീ ഒലിപ്പിച്ചോണ്ട് …വീട്ടിലേക്ക് വാടാ ചേട്ടാ …”
‘ അയ്യോടി മോളെ …ഞാന് ചുമ്മാ പറഞ്ഞതല്ലേ …. പിണങ്ങല്ലേ” അവന് ദേവികയുടെ കവിളില് തലോടി ..ആവളാ കൈ തട്ടി മാറ്റി മുഖം വീര്പ്പിച്ചു …….. ദേവികയുടെ മുറ ചെറുക്കന് ആണ് മഹേഷ്
”””””””””””””””””””””””””””””””””””””””””””””””””””””””””
ജമീല രാവിലെ റാവുത്തരുടെ വീട്ടിലെത്തിയപ്പോള് അയാളവിടെ ഇല്ലായിരുന്നു . അവള്ക്കാകെ നിരാശ തോന്നി . ഉച്ചക്കത്തെക്കുള്ള ചോറ് അടുപ്പത്ത് ഇട്ടിട്ടവള് തലേന്നത്തെ പഴങ്കഞ്ഞി എടുത്തു കഴിച്ചു . ചോറും കറിയും റെഡിയാക്കി കഴിഞ്ഞപ്പോള് സമയം പത്തര . അവള് അടിച്ചു വാരാന് വേണ്ടി ഹാളിലേക്ക് കയറിയപ്പോള് വാതില് തുറന്നു റാവുത്തര് കയറി വന്നു . അയാളെ കണ്ടു ജമീലയുടെ മുഖം വിടര്ന്നു
” ജമീലാ …കാപ്പി എടുത്തോ ?’
” ഞാനൊന്നും ഉണ്ടാക്കിയില്ലണ്ണാ”
‘ ങേ ? അതെന്നാ ?” റാവുത്തരുടെ കണ്ണുകള് ജമീലയെ ഉഴിഞ്ഞു. അവള്ക്ക് മനസിലാവാത്ത രീതിയില് ഇടക്കിടക്കാണ് അയാള് നോക്കി കൊണ്ടിരുന്നത് . അയാളുടെ പരവേശവും കോങ്കണ്ണ് പോലെയുള്ള നോട്ടവും ജമീല ഉള്ചിരിയോടെ കാണുന്നുണ്ടായിരുന്നു