ദാസൻ നടത്തത്തിന്റെ വേഗത കൂട്ടി…പീലി കുടിച്ച കള്ളിന്റെ രസത്തിൽ പതിയെയാണ് നടക്കുന്നത്…എന്നാൽ അയാളുടെ കാലടികൾ അത്രയധികം ശക്തിയുള്ളതാണെന്ന് അവന് തോന്നി…
തന്നെയാരോ പിന്തുടരുന്നെയുണ്ടെന്ന് മനസിലായതും പീലി നടത്തത്തിന്റെ വേഗത വീണ്ടും കുറച്ചും…. വേഗത്തിൽ നടന്നടുക്കുന്ന ദാസനും പീലിയും തമ്മിലുള്ള ദൂരം കുറഞ്ഞു വന്നതും അയാൾ അവനെതിരെ തിരിഞ്ഞു നിന്നു…
“”ഹ്മ്മ്…എന്ത് വേണം….?
നെഞ്ചിൽ കൈ കെട്ടി നിന്നുകൊണ്ട് പീലി ചോദിച്ചു….. ദാസനേക്കാൾ വലുപ്പം അയാൾക്ക് ഉണ്ടായിരുന്നു…. എന്നാൽ മുഖത്തു യാധൊരുവിധ പരുങ്ങളും പ്രകടിപ്പിക്കാതെ ദാസൻ അയാളെ നോക്കിയൊന്ന് പുഞ്ചിരിച്ചു…
“”പീലിച്ചേട്ടാ…ഞാൻ ദാസൻ…ഹരിദാസൻ…പട്ടണത്തിൽ നിന്നാ…”
അവനൊരു നിറഞ്ഞ ചിരിയോടെ സ്വയം പരിചയപ്പെടുത്തി…പട്ടണത്തിൽ നിന്നാണെന്ന് അറിഞ്ഞതും പീലിയുടെ പിരികം ഒരല്പം സംശയത്തോടെ വളഞ്ഞു..
“”ഞാൻ സിനിമക്ക് വേണ്ടി കഥ എഴുതാൻ വേണ്ടി ഇവിടേക്ക് വന്നതാ…. പേര് കേട്ട കുടുംബമാ…സുഹൃത്തുക്കൾ വെളിയിൽ സിനിമാപ്രവർത്തകരാ…അവർക്കൊരു കഥക്ക് വേണ്ടി ആണ് ഇവിടെ വന്നത്…”
പീലിയുടെ കണ്ണുകളിലെ സംശയം കണ്ടവൻ വിശദമായി തന്നെ തന്റെ വരവിന്റെ ഉദ്ദേശം പറഞ്ഞു….
“അതിന് ഞാനെന്തു വേണം…? ഈ സിനിമയൊന്നും ഞാൻ കാണാറില്ല…”
വളരെ സൗമ്യമായി പറഞ്ഞു കൊണ്ട് പീലി തിരിഞ്ഞു നടക്കാൻ തുടക്കാൻ തുടങ്ങി…
“അഹ് അതല്ല പീലിച്ചേട്ടാ…എനിക്കൊരു ആശയം തോന്നി…നിങ്ങളെപ്പോലെ ഒരാളെ കേന്ദ്രകഥാപാത്രമാക്കിയൊരു കഥയെഴുതാൻ….”
അവന്റെ തുറന്നുള്ള പറച്ചിൽ കേട്ട് ഇരുട്ടിലേക്ക് നോക്കി നടന്നിരുന്ന പീലിയുടെ ചുണ്ടിലൊരു പുച്ഛച്ചിരി വിടർന്നു…
“പീലിച്ചേട്ടനെക്കുറിച്ഛ് കൂടുതൽ അറിഞ്ഞാൽ എനിക്ക് കഥയെഴുതാനൊരു സഹായമായേമേ..”
പീലിക്കൊപ്പം നടന്നെത്താൻ പെടാപാട് പെട്ടുകൊണ്ട് ദാസൻ പറഞ്ഞു…
“എന്നെക്കുറിച്ചറിയാൻ ഈ നാട്ടുകാരോ ചോദിച്ചാൽ മതിയെടാ…അവർക്കറിയാം പീലി ആരാണെന്ന്…!
നരവീണ മീശയൊന്ന് പിരിച്ചുകൊണ്ട് പീലി പറഞ്ഞു
“അത് ഞാൻ അന്വേഷിച്ചു…. ഒരു നീളൻ കത്തികൊണ്ട് കവലയിൽ വന്നിറങ്ങിയ പീലിയെ മാത്രമേ അവർക്ക് അറിയൂ.. പക്ഷെ ഒരു കഥയെഴുതുമ്പോ അത് മാത്രം പോരാ പീലിച്ചേട്ടാ…. എല്ലാത്തിനും ഒരു തുടക്കം കാണില്ലേ…?
പീലിയുടെ മുമ്പിലേക്ക് ചാടി നിന്നുകൊണ്ട് ദാസൻ പറഞ്ഞു…ഇടക്കിടെ തോളിൽ നിന്നൂർന്ന് വീഴാൻ പോയ തുണിസഞ്ചി യവൻ മുകളിലേക്ക് കയറ്റി ഇടുന്നുണ്ടായിരുന്നു….
പൊതുവേയൊരു പരക്കൻ സ്വഭാവക്കാരനായ പീലി കുടിച്ച കള്ളിന്റെ രസത്തിലാണോ അതോ ഇവനങ്ങനെ പെട്ടെന്ന് ഒഴിഞ്ഞു പോകുന്ന ലക്ഷണം കാണാത്തത് കൊണ്ടാണോ എന്തോ മുൻപിൽ നിക്കുന്ന ദാസനെയൊന്ന് അടിമുടി നോക്കി…
പയ്യനാണ്.. യൗവനത്തിലേക്ക് കയറിയ ഒതുങ്ങിയ വെളുത്ത ശരീരം…കോലാൻ മുടിയും കട്ടിയില്ലാത്ത മീശയും താടിയും… പട്ടണത്തിൽ നിന്ന് വരുന്നതിന്റെ ലക്ഷണമായ അലക്കി മിനുക്കിയ നല്ല ഷർട്ടും പാന്റും.. കാലിൽ ഷൂസുമുണ്ട്…
“നിനക്കെന്താ അറിയേണ്ടത്…?
അതേ പരുക്കൻ സ്വരത്തിൽ തന്നെ പീലി ചോദിച്ചു… പെട്ടെന്ന് തന്നെ ദാസൻ തന്റെ തുണി സഞ്ചിയിൽ നിന്നും ഒരു മഷി പേനയും പേപ്പറും എടുത്തു കയ്യിൽ പിടിച്ചു…
“”പീലിച്ചേട്ടാ എനിക്കാദ്യം നിങ്ങളെയൊന്നു പഠിക്കേണ്ടിയിരിക്കുന്നു…ആ നടപ്പും സംസാരവും ഒരു ദിവസം ചെയ്യുന്ന കാര്യങ്ങളും…. പിന്നെ സമയം പോലെ നിങ്ങളെന്നോട് പറഞ്ഞാൽ മതി ഇതിന്റെയൊക്കെ തുടക്കം എവിടെ നിന്നാണെന്ന്…”
അവന്റെയാ സംസാരം പീലിക്ക് ഇഷ്ടമായി…തടഞ്ഞു നിർത്തി ജീവിതകഥ ചോദിക്കുന്നതിന് പകരം ഇങ്ങനെയൊരു നീക്കം അയാൾ പ്രതീക്ഷിച്ചിരുന്നില്ല…പ്രായത്തിനൊത്ത പക്വത ദാസനുള്ളതായി പീലിക്ക് മനസിലായി….
“”ഹ്മ്മ്…നടക്ക്…എന്റേയീ ജീവിതം കൊണ്ട് നിനക്കൊരു ഗുണമുണ്ടാവുകയാണെങ്കിൽ അങ്ങനെ ആവട്ടെ…. “”