ഉയർന്നിരുന്ന അവളുടെ പുരികങ്ങൾ താഴേക്ക് ഇറങ്ങി അവളുടെ സ്വാഭാവിക സൗന്ദര്യത്തിനു മാറ്റ് കൂട്ടി. കൂർപ്പിച്ചു വച്ച ചുണ്ടുകൾ ഉൾവലിഞ്ഞു നനവൂറുന്ന അധര പാളികൾക്കിടയിൽ നേർത്ത ഒരു ഇടനാഴി തീർത്തു… പാൽ നിറമാർന്ന അവളുടെ കിന്നരി പല്ലുകൾ വെളിവായതിൽ തന്നെ മനോഹരമായ ഒരു പുഞ്ചിരി വിടർന്നു..
പിണക്കം നടിച്ചിരുന്ന തന്റെ മുഖത്തെ പുഞ്ചിരി മറച്ചു പിടിക്കാൻ അവൾ ഇടം കൈ തലം ഉപയോഗിച്ച് മുഖത്തിന്റെ പാതി മറച്ചു പിടിച്ചു. ഇടം കണ്ണിൽ വീണ്ടും ഹിരണിനെ ഒന്ന് പാളി നോക്കി…
പാതി മറഞ്ഞ തന്റെ മുഖത്തിന്റെ വശ്യമായ സൗന്ദര്യത്തിൽ ഹിരൺ മതി മറന്നു നിൽക്കുന്ന കാഴ്ച്ചയാണ് അനീറ്റയ്ക്ക് കാണാൻ കഴിഞ്ഞത്..
മുത്തു പൊഴിയും പോലെ ചിരിച്ചു കൊണ്ടവൾ രണ്ടു കയ്യാലും മുഖം മറച്ചു പിടിച്ചു. ആദ്യരാത്രിയിലെ ഒരു നവവധുവിന്റെ നാണമായിരുന്നു അവളിൽ പ്രതിധ്വനിച്ചത്…
വീണ്ടും അവൾ കള്ള ഗൗരവത്തിന്റെ മൂടുപടം എടുത്തണിഞ്ഞു….
അപ്പോഴും ഹിരൺ സ്വത സിദ്ധമായ പുഞ്ചിരിയിൽ അങ്ങനെയേ അവളെ നോക്കി നിന്നു……
എവിടെയാ……
കള്ള ഗൗരവം വെടിഞ്ഞു അവൾ കാതരായായി കൊഞ്ചി…
ഹോസ്റ്റലിൽ…….
ഞാൻ വിളിച്ചിട്ട് എന്താ എടുക്കാഞ്ഞേ…..വല്ലതും കഴിച്ചായിരുന്നോ…..
ആം കഴിച്ചു…..കഴിച്ചോണ്ടിരുന്നപ്പോളാ വിളിച്ചത്.. അടുത്ത് ബൈജു അണ്ണൻ ഉണ്ടായിരുന്നു….
അയ്യോ… ഞാൻ വിളിക്കുന്നത് കണ്ടോ….
ആം കണ്ടു…
അയ്യേ… എന്നിട്ട് എന്തേലും ചോദിച്ചോ.. ഞാൻ ഈ സമയത്തു എന്തിനാ വിളിക്കുന്നത് എന്നൊക്കെ….
ആം പിന്നെ പുള്ളി ചോദിച്ചു.. പുള്ളിക്ക് മനസിലായി നമ്മൾ തമ്മിൽ പ്രണയം ആണെന്ന്…..
അനീറ്റയെ കളിപ്പിക്കാൻ വേണ്ടി അങ്ങനെ പറഞ്ഞു പോയി എങ്കിലും അത് പറയുമ്പോൾ അവന്റെയും കേൾക്കുമ്പോൾ അവളുടെയും ഉള്ളിൽ ഒരു തണുത്ത കാറ്റ് വീശി…
തന്നെ കളിയാക്കിയതാണെന്നു മനസ്സിലായ അനീറ്റ വീണ്ടും ചുണ്ട് കൂർപ്പിച്ചു….
പൊട്ടിച്ചിരിച്ചു കൊണ്ട് ഹിരൺ തുടർന്നു…
പിന്നെ കഴിഞ്ഞ 5 കൊല്ലം എല്ലാവരുടെയും മുന്നിൽ പ്രണയ വിരോധി ആയി നടന്നിട്ട് ഞാൻ ഇപ്പൊ അങ്ങ് സമ്മതിക്കാനും വിളിക്കുന്ന ആളെ കാണിച്ചു കൊടുക്കാനും പോകുവല്ലേ… ഇങ്ങനെ ഒരു മണുങ്ങൂസ്….
അവന്റെ സംസാരത്തിൽ നാണത്തിൽ പൊതിഞ്ഞ ഒരു ചിരി അവളും ചിരിച്ചു…
എന്നാ ഉറങ്ങിക്കോ രാവിലെ കാണാം….
എനിക്ക് ഉറക്കം വരുന്നില്ല ഹിരൺ…
പക്ഷെ എനിക്ക് നന്നായിട്ടു ഉറക്കം വരുന്നുണ്ട് മോളെ…
ശോ… വയ്ക്കണ്ടന്നെ പിന്നെ ഉറങ്ങാം…
ഓക്കേ എനിക്ക് പ്രശനം ഒന്നുവില്ല… നാളെ ഉച്ച ആവാതെ ഞാൻ എഴുന്നേൽക്കില്ല അങ്ങനാണേൽ സംസാരിച്ചോണ്ടിരിക്കാം…
അത് പറ്റില്ല എനിക്ക് രാവിലെ തന്നെ കാണണം… ഇല്ലേ ഞാൻ ഹോസ്റ്റലിലേക്ക് വരും.. പറഞ്ഞേക്കാം…
വന്നോ വന്നാലും ഗസ്റ്റ് റൂം വരെ അല്ലെ വരാൻ പറ്റു. അകത്തേക്ക് പ്രവേശനം ഇല്ലല്ലോ…
താൻ ഗസ്റ്റ് റൂമിൽ ആണെന്നുള്ള കാര്യം മറച്ചു വച്ചുകൊണ്ട് തന്നെ അവൻ അനീറ്റയെ മറ്റൊരു തരത്തിൽ വിശ്വസിപ്പിച്ചു…
ഞാൻ അവിടെ കിടന്നു ഒച്ചയുണ്ടാക്കി ബഹളം വച്ചു എല്ലാരേം എണീപ്പിക്കും…
നിനക്ക് പ്രാന്ത പെണ്ണെ…
അതിനവൾ വീണ്ടും ചിരിച്ചു.. മുത്തു പൊഴിയും പോലെ..
എന്നാ ഉറങ്ങിക്കോ… രാവിലെ വിളിക്കാം….
ഓക്കേ ഗുഡ് നൈറ്റ്…..
ഗുഡ് നൈറ്റ്…..
അനീറ്റയുടെ കാൾ കട്ട് ആയതും ഹിരൺ കട്ടിലിൽ മലർന്നു കിടന്നു ഓർമ്മകളെ അയവിറക്കാൻ തുടങ്ങി.. ഒട്ടും മാറ്റമില്ലാതെ അനീറ്റയും….
ഉറക്കം വരുന്നു എന്ന് പറഞ്ഞു എങ്കിലും ഹിരണിനും അനീറ്റയ്ക്കും ഉറക്കമില്ലാത്ത ഒരു രാത്രി ആയിരുന്നു അത്…
തിരിഞ്ഞും മറിഞ്ഞും ഒക്കെ കിടന്നു ഹിരൺ ഒരു 3 മണിക്കൂർ കഷ്ടിച്ച് ഉറങ്ങി…
എന്നാൽ നിദ്ര ദേവി അനീറ്റയോട് മുഖം തിരിച്ചു…
നാളത്തെ പുലരിയെ വരവേൽക്കാൻ ആ ഉറക്കമില്ലായ്മ പോലും അവൾക്കു ആനന്ദം ആയിരുന്നു…
3 മണിയോട് അടുത്ത സമയം തന്നെ അവൾ കിടക്ക വിട്ടു എണീറ്റു… പ്രഭാത കർമങ്ങളും കുളിയും കഴിച്ചു അവൾ ഹിരണിനു വേണ്ടി അണിഞ്ഞൊരുങ്ങി.. ജീവിതത്തിൽ മറ്റാർക്കും വേണ്ടി ഒരുങ്ങാത്ത അത്ര സുന്ദരിയായി അവൾ ഹിരണിന്റെ അടുത്തെത്താനായി സെക്കന്റുകൾ മിനിട്ടുകളായി എണ്ണി കാത്തിരുന്നു….