“മ്….ഹ്….” ഞാൻ ചിരിച്ചതേ ഉള്ളു. അവന് പണ്ടേ ഭയങ്കര പക്വത നിറച്ച സംസാരമാണ്. എന്ന് വച്ചാൽ ഞാൻ വല്യ ആളാണെ മട്ട്.
“സുഖാണോ നിനക്ക് . നീ ഇപ്പൊ പെണ്ണിനേം കൂട്ടി തിരുവനന്തപുരത്താണെന്ന് കേട്ടു. ആ വീട്ടിൽ അമ്മായിം അമ്മാവനും ഒറ്റയ്ക്കല്ലേടാ … അത് ഓർത്തോ നീയ് …. പെണ്ണ് ഭർത്താവിന്റെ വീട്ടിലല്ലേ നിക്കേണ്ടത് ….”
കണ്ടില്ലേ… ഇതാണ് ഇവന്റെ സ്വഭാവം. എന്നെ ചൊറിയാൻ കിട്ടുന്ന അവസരമൊന്നും പാഴാക്കില്ല.
“ഏഹ് അതറിഞ്ഞില്ലേ നീ ഞാൻ അവിടെ ഒരു വീടങ്ങ് വാങ്ങി. ഇപ്പൊ അവിടാ സ്ഥിര താമസം അതാ ഗീതൂനെ അങ്ങ് വിളിച്ചത് . ദർത്താവിന്റെ വീട്ടിലല്ലേ ഭാര്യ കഴിയേണ്ടത്. ” ഞാനവനെ എരി കേറ്റാൻ ചുമ്മാ തട്ടി വിട്ടു. അവന് സംശയം ആയെങ്കിലും സംഗതി ഏറ്റു.😂😂 ഞാൻ തലസ്ഥാനത്ത് പുരയിടം വാങ്ങിയോ എന്ന ഭയവും കൂടി ആയി പാവത്തിന്. ഈ ചൊറി ഉണ്ടെന്നെ ഉള്ളു. ആള് ശുദ്ധമണ്ടനാ …..
**************
എല്ലാരും ഒരുമിച്ചുളെളാരു ഊണ് കഴിഞ്ഞാണ് മുറിയിൽ ഗീതുവിനെ ഒന്ന് ഫ്രീയായി കിട്ടിയത് …. ശരിക്കും പറഞ്ഞാൽ ഇവിടെ വന്നിറങ്ങി ദേ ഇത് വരെ ഞാൻ ഏറ്റവും മിസ്സ് ചെയ്തത് ഗീതൂനെയാ….
“എല്ലാവരെയും ഒരുമിച്ച് കാണുന്നതിപ്പഴാ ….. ….” ഈട്ടിയിൽ തീർത്ത അലമാരയിലെ കണ്ണാടി നോക്കി തിങ്ങി നീണ്ട കാർക്കൂന്തൽ ചീകി ഗീതു പറഞ്ഞു.
കട്ടിലിൽ കിടന്ന ഞാൻ അവള് പറഞ്ഞതിന് വല്ല്യ ചെവി കൊടുത്തില്ല.
” ആവണി എല്ലാരെ പറ്റിയും എന്നോട് പറഞ്ഞു. മറ്റുള്ളവരുമായിട്ട് വല്യ കമ്പനി എനിക്കില്ലല്ലോ .. അരവിന്ദേട്ടനേം ആവണീനേം അല്ലെ അറിയൂ എനിക്ക് . ”
“ആഹ്……”
“ആ യു എസ് അമ്മായീടെ മോൾ എന്ത് ഭംഗിയാല്ലേ കാണാൻ. ഒരാനച്ചന്തമുണ്ട് ….”
“ആര് ഭാമയോ…. ”
“ഭാമ അല്ല മനുഷ്യാ, മറ്റേ കുട്ടി, ദുർഗ്ഗ …. പേര് പോലെ തന്നെ…..”
“അവരെന്താ ഗോവിന്ദേട്ടാ യു എസിലേക്ക് പോയത് …..”
“ലക്ഷ്മി അമ്മായിടെ ഭർത്താവ് മാധവന്മാമ അവിടെ ജോലി ചെയ്യുന്നോണ്ട്….”
“ആവണി പറഞ്ഞത് ഇവിടെന്തൊക്കെയോ പ്രശ്ന്ണ്ടായിട്ടാണ് അവര് പെട്ടെന്ന് പോയത്ന്നാണ്….”
“എന്ത് പ്രശ്നം …..”
“ആ…. എനിക്കെങ്ങനറിയാം … ആ പെണ്ണ് അതൊന്നും പറഞ്ഞില്ല. ”
“മ്…. ഹം….”
“അവളെന്താ ഇത് വരെ കല്യാണം കഴിക്കാത്തത്. ഏട്ടന്റെ പ്രായം ഒണ്ടോ….. ?”
“എന്റെ ഒരു വയസ്സിനിളയതാ… പക്ഷെ നമ്മളൊരുമിച്ചാ പഠിച്ചത്….”
“അപ്പൊ എന്റെ പ്രായം കാണുവല്ലേ ഗോവിന്ദേട്ടാ ……”
“ആ ഏതാണ്ട് …..”
“എന്നിട്ടെന്താ കല്യാണം കഴിക്കാത്തത് ?”
“അമേരിക്കായിൽ അല്ലേ താമസം അതിന്റെ പരിഷ്ക്കാരങ്ങളൊക്കെ ആകും. ”
“ഓ……..”
“എന്നാലും എന്നാ ഒരു ഭംഗിയാ കാണാൻ . എന്റടുത്ത് വന്ന് പേര് വിളിച്ചപ്പൊ ഞാൻ ശരിക്കും ഞെട്ടിപ്പോയി. ”
“ന്തായാലും എന്റെ ഗീതൂന്റത്രേന്നുമില്ല…”
ഞാൻ മെല്ലെ പതപ്പിച്ച് നേരെ അവളുടെ മടിയിലേക്ക് നിരങ്ങി…..
“സുഖിപ്പിക്കല്ലേ…..”
“എന്തോന്ന് സുഖിപ്പിക്കല്……. ?”
“അവളുടെ അത്ര ഭംഗി ഒന്നുമില്ല എനിക്ക്…..”
“ആരു പറഞ്ഞ്. അത് വെറും ചാത്തൻ . ഒർജിനൽ സാധനം എന്റെ ഗീതുവല്ലേ… സൗന്ദര്യത്തിന്റെ യഥാർത്ഥ രൂപം. ”
അവളുടെ മടിയിൽ കിടന്ന്, കഴുത്ത് വഴി മുമ്പിലോട്ടിട്ടിരുന്ന ഗീതൂന്റെ കൊറുക്ക മുടിയിൽ മുഖമൊളിപ്പിച്ച് ഞാനവളെ കളിയാക്കി…..
“ആക്കല്ലേ……”
“ഹി….ഹി…… സത്യമാടി …. ദേ നിന്റെ ഈ മുടീടെ പകുതീടെ പകുതി ഉണ്ടോ അവൾക്ക് ”
“അതില്ലാ….. ” ചുണ്ടിന്റെ കോണിൽ അഭിമാനത്തിന്റെ ഒരു ചെറുപുഞ്ചിരി ഗീതുവിന്റെ കണ്ണാടിയിലെ പ്രതിബിംബത്തിൽ കണ്ടതോടെ ഞാൻ തുടർന്നു.
“ഉള്ളത് തന്നെ സ്ട്രയ്റ്റ് ചെയ്ത് അവിടവിടെ കളർ ചെയ്തിട്ടുണ്ട്.. എന്ത് ബോറാണെന്നറിയോ അത് …..”
“അവൾക്ക് പക്ഷെ അത് സൂപ്പറാ . സ്വർണ്ണ നിറത്തിലെ മുടി. പിന്നെ അത്രയ്ക്കൊന്നും കളർ ചെയ്തിട്ടില്ല. ആവശ്യത്തിനല്ലെ ഒള്ളു…..”
“ഉവ്വ….. എന്നാലും എനിക്കിഷ്ട്ടല്ല മുടി കളർ ചെയ്യുന്നവരെ . ”
“ശാരദമ്മായി അബോർഷനെ പറ്റി ചോദിച്ചു. “
“ഓ തുടങ്ങിയോ. എല്ലാരും .അതാ ഞാൻ കല്യാണത്തിന് വന്നാൽ മതീന്ന് പറഞ്ഞത്. നിനക്കാരുന്നല്ലോ വാശി ” .