അതിനായി നമ്മുടെ ഏതെങ്കിലും ലോറികൾ അവിടെ കൊണ്ടിട്ടാൽ മതിയാവും പക്ഷേ ആർക്കും സംശയം തോന്നാത്ത പോലെ മുൻകൂട്ടി പ്ലാൻ ചെയ്തിട്ടേ ചെയ്യാവു. ഇനി ഇതൊന്നും നടന്നില്ല എങ്കിൽ പിന്നെ ഉള്ള ഒറ്റ വഴി ആ ക്യാമറ നമ്മൾ തൂക്കണം. അത്ര തന്നെ.”
മഹീന്തർ : “നീ പറഞ്ഞത് ഒക്കെ നമുക്ക് ചെയ്യാവുന്ന കാര്യങ്ങൾ തന്നെ ആണ്, പക്ഷേ ആ പവർ കട്ട് ചെയ്താലും അവർ അത് 12 മണിക്കൂറിനു ഉള്ളിൽ ശെരിയാക്കില്ലേ? അത് എന്ത്‌ ചെയ്യും?”
ഹരി : “മ്മ് അത് ഞാൻ ആലോചിച്ചു ഭായ്. ഞാൻ കൂട്ടിയ കണക്ക് വെച്ചിട്ട് 22 ട്രാൻസ്‌ഫോർമർ ഉണ്ട് നമുക്ക് കറന്റ്‌ കളയേണ്ട റൂട്ടിൽ. അതിൽ വലിയ വലിയ സ്ഥാപനങ്ങൾ ഒക്കെ ഒഴിവാക്കാം. അങ്ങോട്ടുള്ള കറന്റ്‌ കളഞ്ഞാലും അവർ ജനറേറ്റർ ഓൺ ചെയ്യും. അവിടെ നമുക്ക് കാഴ്ച മറക്കാൻ എന്തെങ്കിലും പരിപാടി ചെയ്യാം.
ബാക്കി ഉള്ള നമ്മൾക്ക് ഹോൾഡ് ഇല്ലാത്ത സ്ഥലങ്ങളിലെ കറന്റ്‌ ആണ് കളയണ്ടത്. അല്ലാത്തവരോട് കാര്യം പറഞ്ഞാൽ അവർ തന്നെ ഓഫ്‌ ചെയ്ത് ഇടും ക്യാമറ. അപ്പൊ ഹോൾഡ് ഇല്ലാത്ത സ്ഥലത്തെ ട്രാൻസ്‌ഫോർമർ എല്ലാം നമ്മൾ കേടാക്കുന്നു. ട്രാൻസ്‌ഫോർമർ കേടായാൽ എന്തായാലും മാറ്റി വെക്കാൻ അല്ലെങ്കിൽ നന്നാക്കി എടുക്കാൻ ടൈം എടുക്കും.
എന്നാലും ഒരു സേഫ്റ്റിക്ക് നമ്മൾ ആ ദിവസം റോഡിൽ നല്ലൊരു ബ്ലോക്കും ഉണ്ടാക്കുന്നു. അങ്ങനെ ചെയ്താൽ അവരുടെ അറ്റകുറ്റപ്പണി ഒക്കെ പിന്നേം വൈകും. പക്ഷേ ഒരു കാര്യം ശ്രദ്ധിക്കണം നാസിക്കിൽ നിന്ന് ഇങ്ങോട്ടുള്ള വണ്ടികൾക്ക് അധികം ബുദ്ധിമുട്ട് ഉണ്ടാക്കാതെ വേണം ബ്ലോക്ക് ഉണ്ടാക്കാൻ അല്ലെങ്കിൽ അസ്ലൻ ഇവിടെ എത്താൻ വൈകും.”
മഹിന്ദർ : “എട ബുദ്ധിമാനേ… നീ അവനെക്കാൾ വലിയ കുബുദ്ധി ആണല്ലോ. ഓർമ്മയില്ലാത്തപ്പോ തന്നെ ഇങ്ങനെ നിന്റെ ഓർമ്മ ഉണ്ടാരുന്ന സമയത്ത് അപ്പൊ നീ എങ്ങനെ ആയിരിക്കും ഹ..ഹാ..”
ഹരി : “പിന്നല്ലാ… നിങ്ങൾ എന്നെപ്പറ്റി എന്ത്‌ വിചാരിച്ചു…”
ജാനകി : “എട ഏട്ടാ… ചിരിക്കാതെ ബാക്കി പ്ലാൻ പറ. അവൻ ഇവിടെ എത്തി. എന്നിട്ട്?”
ഹരി : “അതെ.. അവർ ഇവിടെ എത്തും, സ്വഭാവികമായി ട്രക്ക് കണ്ട്പിടിക്കും, അതിന്റെ ഡ്രൈവറെ കണ്ട്പിടിക്കും. എന്നിട്ട് അവർ ഒരു പ്ലാൻ ഉണ്ടാക്കും നമ്മളെ കൊന്ന് ഈ പിള്ളേരെ വീണ്ടും തട്ടിയെടുക്കാൻ ഉള്ള പ്ലാൻ. അത് പക്ഷേ അവർ പകൽ ചെയ്യാൻ സാധ്യത ഇല്ല കാരണം ഇത് നമ്മുടെ ഏരിയ ആണ് പിന്നെ ഇവിടെ വേറേം ഇഷ്ടംപോലെ ആളുകൾ ഉണ്ട്. എത്ര വലിയ കില്ലാടി ആണെങ്കിലും ജനം ഇളകിയാൽ പിന്നെ തിരിഞ്ഞു ഓടുകയേ നിവർത്തി ഉള്ളു.
അത്കൊണ്ട് ഇരുട്ടിൽ ആരേം ഉണർത്താതെ ആവും അവൻ നമ്മളെ തേടി എത്തുന്നത്. എന്നാൽ നമ്മൾ അവനെ കാത്തിരിക്കണം. അവന്റെ ആ പ്ലാൻ കൂടെ അറിയാൻ പറ്റിയാൽ നമുക്ക് ഒന്നുകൂടി വ്യക്തമായ ഒരു ധാരണ കിട്ടിയേനെ. മ്മ്… അത് എന്തായാലും നോക്കാം.
ഭായ് ഒരു കാര്യം ചെയ്യണം, കിഷോർ നിന്റെ കയ്യിൽ അവന്റെ ഫോട്ടോസ് ഇല്ലേ? അത് നമ്മൾ കുറച്ച് പ്രിന്റ് എടുക്കണം എന്നിട്ട് നമ്മുടെ ആളുകൾക്ക് കൊടുക്കണം. അവനെ ഇവിടെ എവിടെ കണ്ടാലും ഒരു ഗ്യാപ് ഇട്ട് അവനെ വാച്ച് ചെയ്യാൻ പറയണം.
ചുരുക്കത്തിൽ പറഞ്ഞാൽ അവൻ ഇവിടെ എത്തി കഴിഞ്ഞാൽ അവൻ ശ്വാസം വിടുന്നത് പോലും നമ്മൾ അറിയണം അത്ര തന്നെ.
എല്ലാവർക്കും ഹരിയുടെ ആ പ്ലാൻ കൊള്ളാം എന്ന് തോന്നി. പിന്നെ ഉള്ള രണ്ട് ദിവസങ്ങൾ അവർ ആ പ്ലാൻ പല തരത്തിൽ തിരുത്തി. മഹീന്തറിന്റെയും സുഹൃത്തുക്കളുടെയും കോൺടാക്ട് വെച്ച് ആ ഏരിയയിൽ ഉള്ള ഒരുപാട് ആളുകൾ ഈ പ്ലാനുമായി സഹകരിക്കാൻ മുന്നോട്ട് വന്നു.
അത് തന്നെ ആയിരുന്നു ഹരി ആഗ്രഹിച്ചതും. എല്ലാവർക്കും അസ്ലന്റെയും അവന്റെ കൂടെ ഉള്ള കുറച്ച് പേരുടെയും ഫോട്ടോസ് നൽകി. ആ വർക്ഷോപ്പിലും ചുറ്റും ഉള്ള മിക്ക കടകൾ, ധാബകൾ, ഹോട്ടലുകൾ എന്ന് വേണ്ട സകലതിലും ഒരാൾ എങ്കിലും ഈ പ്ലാനുമായി സഹകരണം ഉള്ളൊരാൾ ആയിരുന്നു.
ഈ സമയം ഒക്കെയും പൂനെയിലേക്ക് പോയ ടീമിന്റെ അപ്ഡേറ്റ് വന്നുകൊണ്ടേ ഇരുന്നു.
ഒടുവിൽ ആ ദിനം വന്നെത്തി. അസ്ലൻ ട്രക്ക് നാസിക്കിലേക്ക് ആണ് പോയത് എന്ന് കണ്ടുപിടിച്ച ആ ദിനം. അവർ നാസിക്കിലേക്ക് തിരിച്ചു എന്നറിഞ്ഞ നിമിഷം മുതൽ എല്ലാവരും കാത്തിരിക്കുകയായിരുന്നു അവന്റെ വരവിനായി.
നീ വന്നു… ഞങ്ങൾ വിചാരിച്ച പോലെ തന്നെ നീ ട്രക്കും കണ്ടുപിടിച്ചു അതിന്റെ ഡ്രൈവറിലേക്കും നിന്റെ കൈ എത്തി. പക്ഷേ അത് കഴിഞ്ഞ് ഈ പ്ലാനിൽ ഒരു ട്വിസ്റ്റ്‌ ഉണ്ടായി, നീ പ്ലാൻ ഉണ്ടാക്കാൻ എടുത്ത ഹോട്ടൽ റൂം. അവിടെയും ഞങ്ങളുടെ ആളുകൾ ആണ് നിന്നെ വരവേറ്റത്. നിനക്ക് തന്ന റൂമിൽ അവർ ചെറിയൊരു ഫോൺ ഓൺ ആക്കി വെച്ചിരുന്നു. അതിൽ നിന്ന് ഇങ്ങോട്ട് കാൾ ചെയ്ത് അത് ആ റൂമിൽ മറച്ചുവെച്ചതിനു ശേഷം ആണ് നിനക്ക് റൂം തന്നത്. അത്കൊണ്ട് തന്നെ നിന്റെ പ്ലാൻ ഞങ്ങൾ ഇവിടിരുന്നു കേട്ടു.
പക്ഷേ സത്യം പറയാല്ലോ…അങ്ങനെ ഒരു സംഭവം ഉണ്ടാവും എന്ന് ഞങ്ങൾ തന്നെ കരുതിയില്ല. കാശ് കൊടുക്കുമ്പോ നിന്റെ കൂടെ എന്ത്‌ തന്തയില്ലാഴികയ്ക്കും നിൽക്കുന്ന ദേ ബോധം ഇല്ലാതെ ഈ കിടക്കണവന്മാരെ പോലെ അല്ലടാ ഇവിടുള്ളവർ…. കശുകൊടുത്തു വാങ്ങാൻ പറ്റാത്ത പലതും ഉണ്ട് ഈ ഭൂമിയിൽ. അതാണ് നിന്നെപ്പോലെ ഉള്ളവർ ആദ്യം മനസ്സിലാക്കേണ്ടത്.
ആദ്യം മുകളിലെ ഗ്രിൽ തുറന്ന് അകത്ത്‌ കയറിയവനെ ഞങ്ങൾ കയ്യോടെ തൂക്കി ഇൻജെക്ഷൻ കൊടുത്തു. പിന്നെ ഞങ്ങൾ തന്നെ ആണ് പോയി മുന്നിലെ ഡോർ തുറന്ന് കൊടുത്തത്. പാവം ഇരുട്ടിൽ ആരാണ് തുറന്ന് തന്നത് എന്ന് പോലും അറിയാതെ ഓടി ഉള്ളിലേക്ക് വന്നവന്മാരെ നിമിഷങ്ങൾക്കുള്ളിൽ തന്നെ ഞങ്ങൾ പൂട്ടി.
ബാക്കി ഇനി പറയണ്ടല്ലോ അല്ലേ… എല്ലാം നിനക്ക് മനസ്സിലായി കാണും എന്ന് വിശ്വസിക്കുന്നു. ബുദ്ധിരാക്ഷസൻ അല്ലേ നീ.
അങ്ങനെ ഒരു നാട് മുഴുവൻ നിന്റെ വരവ് കാത്തിരുന്നു ഇവിടെ. അതിനിടയിലേക്ക് ആണ് നീ വന്ന് പെട്ടത്. ഇനി നീ പറ നീ ഇവിടെ നിന്ന് തിരിച്ചു പോകും എന്ന് നിനക്ക് ഇപ്പോഴും തോന്നുന്നുണ്ടോ അസ്ലൻ? ” കിഷോർ ഒരു പുച്ഛത്തോടെ പറഞ്ഞു നിർത്തി. *****************************
കിഷോർ പറഞ്ഞതെല്ലാം കേട്ട് തലക്ക് അടികിട്ടിയ പോലെ ഇരുന്നുപോയി അസ്ലൻ. തന്റെ ജീവിതത്തിൽ ഇങ്ങനൊരു തിരിച്ചടി അവൻ നേരിട്ടിരുന്നില്ല. മാത്രമല്ല ഈ പീറ പെണ്ണുങ്ങൾ വിചാരിച്ചാൽ തന്നെ ഒരു ചുക്കും ചെയ്യാൻ പറ്റില്ല എന്നൊരു അഹങ്കാരം ആയിരുന്നു അവന്. താൻ വിചാരിച്ചതിനേക്കാൾ മുകളിൽ ആയിരുന്നു അവരുടെ ചിന്ത എന്ന് അയാൾക്ക് ആ നിമിഷം മനസ്സിലായി.
എന്നാൽ അവൻ ഒരിക്കലും താഴ്ന്ന് കൊടുക്കുവാൻ തയ്യാറായിരുന്നില്ല. കാരണം അസ്ലന്റെ കയ്യിൽ അപ്പോഴും മിഴി എന്ന ബ്രഹ്മാസ്ത്രം ഉണ്ടായിരുന്നു. അത് ആലോചിച്ചതും അവൻ ഒന്ന് പുഞ്ചിരിച്ചു.
