10 മിനിറ്റ് കൊണ്ട് അവൻ അതിന്റെ രണ്ട് കമ്പി ഇളക്കി ഒരാൾക്ക് അതിനുള്ളിൽ കൂടെ അകത്തേക്ക് വരാൻ പറ്റുന്ന രീതിയിൽ ആക്കി. അവൻ പതിയെ അതുവഴി താഴേക്ക് ഇറങ്ങാൻ തുടങ്ങി.
അപ്പോഴേക്കും ഇനി മുകളിൽ എത്താൻ അസ്ലൻ മാത്രം ആയിരുന്നു. ബാക്കി ഉള്ള അഞ്ചുപേർ വിവേക് ഡോർ തുറക്കുന്നതിനായി വെളിയിൽ കാത്തിരുന്നു. ഇരുട്ടിന് ഒന്നുകൂടെ കനം വെച്ചപോലെ തോന്നി അവർക്ക്.
അൽപ സമയത്തെ കാത്തിരിപ്പിന് ഒടുവിൽ ഉള്ളിൽ വാതിൽ തുറക്കുന്ന ശബ്ദം കേട്ടു. പതിയെ ഒരു പാളി മാത്രം തുറന്നതും സാജിദും ബാക്കി ഉള്ളവരും സമയം പാഴാക്കാതെ ഉള്ളിലേക്ക് കയറി മെയിൻ ഡോർ ഉള്ളിൽ നിന്നും പൂട്ടി.
അവർക്ക് ഇനി ഒരു രക്ഷപ്പെടൽ ഉണ്ടാവില്ല അസ്ലന്റെ നീരാളി പിടുത്തത്തിൽ നിന്ന്. അത്ര വെടിപ്പായി തന്നെ അയാൾ അയാളുടെ പ്ലാനുകൾ എക്സിക്യൂട്ട് ചെയ്യാൻ തുടങ്ങി.
അതേ സമയം തന്നെ അസ്ലൻ മുകളിൽ എത്തി. അവർ നാല് പേർ ശ്വാസം പോലും അടക്കി പിടിച്ച് താഴേക്ക് ഇറങ്ങാൻ തുടങ്ങി. പോകുന്ന വഴി എല്ലാം അവർ ഓരോ മുക്കും മൂലയും ശ്രദ്ധിച്ചാണ് പോയത്. മുകളിലെ രണ്ട് റൂമിലും കയറി എന്നാൽ അവിടെ ആരും തന്നെ ഉണ്ടായിരുന്നില്ല. എല്ലാവരും താഴെ തന്നെ കാണണം അപ്പൊ.
ഇതേ സമയം താഴെ ഉള്ള ടീമും അവരുടെ സെർച്ചിങ് തുടങ്ങിയിരുന്നു. മുകളിൽ നിന്ന അസ്ലനും മറ്റുള്ളവരും താഴേക്ക് പതിയെ ഇറങ്ങി തുടങ്ങി. കൃത്യമായ ഗ്യാപ് ഇട്ട് ആണ് ഓരോരുത്തരും ഇറങ്ങുന്നത്.
അസ്ലൻ തന്നെ ആണ് അവരെ മുന്നിൽ നിന്ന് നയിക്കുന്നത്. അൽപ സമയത്തിന് ശേഷം അസ്ലൻ താഴെ നടുമുറ്റത്തു എത്തി. അങ്ങിങ്ങായി അയാൾക്ക് താഴെ ഉള്ള ടീമിന്റെ നിഴൽ കാണാം. എന്നാൽ അവർ തേടി വന്നത് മാത്രം ഇതുവരെ കണ്ടില്ല.
അസ്ലൻ അടുത്ത അടി എടുത്ത് വെച്ചതും പെട്ടന്ന് ആണ് അത് സംഭവിച്ചത്. നടുമുറ്റത്തെ ലൈറ്റുകൾ എല്ലാം ഒന്നിച്ചു ഓൺ ആയി. ആ ഒരു നിമിഷം അയാൾ അനങ്ങാൻ ആവാതെ നിന്നുപോയി. ആകാരണമായ ഒരു ഭയം അയാളെ പൊതിഞ്ഞു.
പെട്ടന്ന് സമനില വീണ്ടെടുത്ത അസ്ലൻ തന്റെ കയ്യിലെ കത്തി ഊരി എടുത്ത് തിരിഞ്ഞതും നെഞ്ചിന് താഴെ കിട്ടിയ ഒരു ചവിട്ടിൽ ശ്വാസം പോലും എടുക്കാൻ വയ്യാതെ നിന്ന് പോയി. ശ്വാസം കിട്ടാതെ കണ്ണ് തുറിച്ചു നിന്നപോയ അസ്ലൻ എന്നാൽ അവിടുത്തെ കാഴ്ച കണ്ട് ഒന്ന് നടുങ്ങി. കത്തുന്ന കണ്ണുകളുമായി ജാനകി….തന്റെ പ്ലാനിൽ ഒന്നും ഇല്ലാത്ത ഒരു യൂട്ടേൺ അയാൾ അവിടെ കാണുകയായിരുന്നു.
അത് മാത്രമല്ല തന്റെ തോളോട് തോൾ ചേർന്ന് ഇത്ര നേരം വന്ന ഒമ്പത് പേർ ബോധം ഇല്ലാതെ ആ നടുമുറ്റത്തു കിടക്കുന്നു.
“അപ്പൊ… അപ്പൊ ഞാൻ ഇപ്പൊ കണ്ട നിഴലുകൾ??? അത് ആരുടേതാണ്??” അസ്ലൻ ആ നിഴൽ കണ്ട ഭാഗത്തേക്ക്‌ ഞെട്ടിതിരിഞ്ഞു നോക്കി. അയാൾക്ക് അത് വിശ്വസിക്കാൻ ആകുന്നുണ്ടായില്ല.
സ്വന്തം ടീമാണ് അവിടെ നിൽക്കുന്നത് എന്ന് കരുതിയ അയാൾക്ക് തെറ്റി. അതാ അയാൾക്ക് മുന്നിൽ ഊരി പിടിച്ച വാളുമായി മഹീന്തറും ചോട്ടുവും വിജയ് ഉം പിന്നെ വേറെ കുറച്ച് ആളുകളും.
അയാൾക്ക് ആലോചിച്ചിട്ട് ഒരു എത്തും പിടിയും കിട്ടിയില്ല. ഒരിക്കലും നടക്കാൻ സാധ്യത ഇല്ലാത്ത ഒരു കാര്യം. ദേഷ്യവും നിരാശയും അയാളുടെ സമനില തെറ്റിക്കാൻ തുടങ്ങി. തല ഒന്ന് കുടഞ്ഞു അസ്ലൻ ജാനാകിയുടെ നേരെ കുതിച്ചു…
“പൊലയാടി മോളേ… അസ്ലന്റെ നേരെ ആണോഡി നിന്റെ കളി..” അസ്ലൻ അവൾക്ക് നേരെ പാഞ്ഞടുത്തിട്ടും ജാനകി നിന്നിടത്തു നിന്നും അനങ്ങിയില്ല. അവൻ അവളുടെ തൊട്ടടുത്തു എത്തിയതും പിന്നിൽ നിന്നുള്ള ചവിട്ട് കൊണ്ട് അവൻ ജാനാകിയെയും കടന്ന് നടുമുറ്റത്തു ഇട്ടിരുന്ന കട്ടിലിനു മുകളിലേക്ക് വീണു.
അരിശത്തോടെ ചാടി എഴുന്നേറ്റ അയാളുടെ മുഖത്തു വീണ്ടും ഒരു ഞെട്ടൽ കണ്ടു. താൻ ആരെയാണോ തേടി വന്നത് അവർ അതാ തന്റെ കണ്മുന്നിൽ ഒരു കൂസലും ഇല്ലാതെ എരിയുന്ന കണ്ണുകളോടെ നിൽക്കുന്നു. അവരുടെ എല്ലാം മുന്നിൽ ഒരു കാവൽ മാലാഖയെ പോലെ ഒരുവനും…
ശ്രീഹരി… കൂടെ തന്നെ കിഷോറും ഉണ്ട്. ഹരിയുടെ ചുണ്ടിൽ ഒരു പുഞ്ചിരി വിടർന്നു.
“അസ്ലൻ….. The corrupted genius…സർപ്രൈസ്!!! സുഖം തന്നെ അല്ലേ? വഴി കണ്ട് പിടിക്കാൻ ഒരുപാട് ബുദ്ധിമുട്ടി എന്ന് തോന്നുന്നല്ലോ?” ഹരി പുച്ഛത്തോടെ അവനെ നോക്കി ചോദിച്ചു.
“അയ്യോ… ഞാൻ അങ്ങ് പേടിച്ചു. ഡാ… നീ എന്താ എന്നെ കുറിച്ച് കരുതിയത്.. ങേ? നിന്നെക്കാളും മദം പൊട്ടിയ കൊമ്പന്മാരെ എല്ലാം ഈ കൈ കൊണ്ട് തന്നെ വെട്ടി വീഴ്ത്തിട്ടാണ് ഞാൻ ഇവിടെ വരെ എത്തിയത്. അത്കൊണ്ട് എന്റെ ആൾക്കാരെ ബോധം കെടുത്തി കിടത്തി എന്നെ ഒറ്റക്ക് ആക്കി എന്നെ അങ്ങ് ഒണ്ടാക്കാം എന്നാണ് മക്കടെ വിചാരം എങ്കിൽ അത് ഏട്ടായിട്ട് മടക്കി കാലിന്റെടെയിൽ അങ്ങ് വെച്ചാ മതി.
ഇത് ആള് വേറെ ആണ്. നിന്നെയൊക്കെ ഒതുക്കാൻ ഞാൻ ഒറ്റക്ക് തന്നെ മതി. അത്കൊണ്ട് ഒരുപാട് അങ്ങ് നെഗളിക്കണ്ട കേട്ടോടാ പന്ന….”
“നീ ഇവരെ നക്ഷത്രങ്ങളിൽ കൂടൊരുക്കി അവിടെ കൊണ്ടുപോയി ഒളിപ്പിച്ചാലും ഇവരെ ഞാൻ തേടി എത്തും. നിന്റെ സ്വന്തം അനിയത്തിയെ നിന്റെ കണ്മുന്നിൽ നിന്ന് തൂക്കിയവൻ ആണ് ഞാൻ, ആ എനിക്ക് ഇവരെ ഇവിടുന്ന് കടത്തിക്കൊണ്ട് പോകുക എന്നത് അത്ര വലിയ കാര്യമല്ല. ഇത്ര നേരം നിന്നെയൊക്കെ കൊന്ന് തള്ളണം എന്നതായിരുന്നു എന്റെ ചിന്ത. പക്ഷേ ഇപ്പൊ നിന്റെ അനിയത്തിയുടെ പെർഫോമൻസ് കണ്ട് ഞാൻ വേറൊരു കാര്യം ഉറപ്പിച്ചു. ഇവൾ ജീവിക്കും, ഇവിടെ അല്ല ഏതെങ്കിലും ചുവന്ന തെരുവിൽ അത് കാണാൻ നീ ജീവിച്ചിരിക്കണം അതാണ്‌ ഞാൻ ഇനി നിങ്ങൾക്ക് തരാൻ പോകുന്ന ശിക്ഷ.” ആദ്യത്തെ ഒരു അമ്പരപ്പ് മാറിയതും അസ്ലൻ സംസാരിച്ചു തുടങ്ങി.
അത് കേട്ട ഹരി മുഷ്ടി ചുരുട്ടി അവന്റെ ദേഷ്യം കടിച്ചമർത്തി.
“ശിക്ഷ ഒക്കെ വിധിക്കാൻ വരട്ടെ. ആദ്യം നീ ഇവിടെ നിന്ന് രക്ഷപ്പെടണം. അത് എന്തായാലും ഞങ്ങൾ ജീവിച്ചു ഇരിക്കുമ്പോൾ നടക്കില്ല. നീ ഞങ്ങളെ തേടി എത്തിയത് അല്ല അസ്ലൻ… ഞങ്ങൾ ആണ് നിന്നെ ഇങ്ങോട്ട് എത്തിച്ചത്. നിനക്കായുള്ള കാത്തിരിപ്പിൽ ആയിരുന്നു ഞങ്ങൾ എല്ലാവരും.
ശെരിയാണ്… നീ ഒരു ബുദ്ധിരാക്ഷസൻ തന്നെ ആണ്. നിന്നെ ഒരിക്കലും ഞങ്ങൾ അണ്ടർ എസ്റ്റിമേറ്റ് ചെയ്തിട്ടില്ല. അത്കൊണ്ട് തന്നെ ആണ് നിന്നെ കുടുക്കാൻ നിന്റെ പ്ലാനിനും മുകളിൽ ഞങ്ങൾ ഒരു പ്ലാൻ ഒരുക്കിയത്. അത് വിജയിച്ചു എന്നതിനുള്ള തെളിവ് ആണ് 10 പേരുമായി ഇരുളിന്റെ മറവ് പറ്റി വന്ന നീ ഇപ്പൊ ഒറ്റക്ക് ഞങ്ങൾ ഇത്രേം പേരുടെ മുന്നിൽ വെളിച്ചത്ത് നിൽക്കുന്നത്.” ഹരിയുടെ വാക്കുകൾ കേൾക്കും തോറും അസ്ലന്റെ കണ്ണുകൾ കുറുകി.
“എന്റെ ഏട്ടാ.. ഇങ്ങനെ നെടുനീളൻ ഡയലോഗ് അടിച്ചാൽ ഒന്നും ഇവന് മനസ്സിലാവില്ല. ഇവനിപ്പോഴും ഇതെങ്ങനെ സംഭവിച്ചു എന്നുള്ള ചിന്തയിൽ തന്നെ ആണ്. ആ സർപ്രൈസ് ഏട്ടൻ തന്നെ അങ്ങ് പൊളിക്ക്. അത് കഴിഞ്ഞ് വേണം എനിക്ക് ഇവനോട് രണ്ട് പറയാൻ.” ജാനകി പല്ലിറുമ്മി.
