“നാളെ അവൻ ഒടിഞ്ഞ കൈ കൊണ്ട് താലി കെട്ടിയാ മതി.” കൈലാസ് കൂട്ടി ചേർത്തു.
“അവര് കേസ് കൊടുത്താൽ?”
“കേസ് കൊടുത്താൽ നീയെന്റെ കൂടെ നിൽക്കില്ലേ?” കൈലാസ് അവളുടെ കണ്ണുകളിലേക്ക് നോക്കി.
ഹന്നയുടെ കണ്ണുകൾ വീണ്ടും നിറഞ്ഞു. കണ്ണുകൾ തുടച്ചുകൊണ്ട് അവൾ തല കുലുക്കി.
“ഞാൻ നദീമിനെതിരെ കേസ് കൊടുക്കും. വഞ്ചനാക്കുറ്റത്തിന്. അൻസിയ്ക്കും കിട്ടും. Fb ലൈവും ചെയ്യും. ബാക്കി നാട്ടുകാർ ഏറ്റെടുത്തോളും. പിന്നെ അവൻ ഗൾഫിൽ പോവേണ്ടവൻ അല്ലേ? ഇവിടെ കേസ് ആയാൽ ശരിയാവില്ല.”
കൈലാസിന് സന്തോഷമായി.
“ദാറ്റ്സ് മൈ ഗേൾ.” അവനവളുടെ താടിയിലൊന്ന് പിടിച്ചു കുലുക്കി.
ഹന്നയുടെ കണ്ണുകൾ അവന്റെ തോളിലൂടെ ഒഴുകി.
“വേദനയില്ലേ?”
അവന്റെ തോളിലെ ചുവപ്പിൽ അവൾ വിരലമർത്തി.
“ആവൂ..” അവൻ ഒച്ചയുണ്ടാക്കി.
ഹന്ന കൈ വലിച്ചെടുത്തു.
“സോറി. മരുന്ന് എന്തെങ്കിലും ഉണ്ടോ?”
“എണ്ണയുണ്ട്.”
“എന്നാ അതിട്ടിട്ട് ചൂട് പിടിക്കാം.”
കൈലാസ് തിരിഞ്ഞ് അലമാരയിൽ നിന്ന് എണ്ണയെടുത്തു.
അവനെത്തന്നെ നോക്കി ഹന്ന നിന്നു.
ലുങ്കി മാത്രമാണ് വേഷം.
ചുമലിലും മുതുകിലും പാടുകളുണ്ട്. അടി അങ്ങോട്ട് മാത്രം കൊടുക്കാൻ പറ്റുന്ന സാധനമല്ലല്ലോ.. ഇങ്ങോട്ടും കിട്ടും.
ഒരർത്ഥത്തിൽ അവനീ അടി കിട്ടാനുള്ള കാരണം താനല്ലേ?
താനെന്നൊരാൾ ഇല്ലായിരുന്നുവെങ്കിൽ അൻസിയും നദീമും ഇങ്ങനൊന്നും ചെയ്യുമായിരുന്നില്ല.
അവളുടെ കണ്ണുകൾ കലങ്ങി.
എണ്ണയും കൊണ്ട് തിരിഞ്ഞ കൈലാസത് കാണുകയും ചെയ്തു.
“നിനക്കീ കരച്ചിൽ മാത്രേ ഉള്ളോ? ബോറടിക്കുന്നില്ലേ?”
അവൾ കണ്ണു തുടച്ച് ചിരിച്ചു.
“പാപി ചെന്നിടം പാതാളം എന്ന് പറയുന്ന പോലെയാ എന്റ കാര്യം.”
കൈലാസ് അവളെ നോക്കി കണ്ണുരുട്ടി.
“ഓവർ തിങ്ക് ചെയ്യുന്നതെന്തിനാ? ചുറ്റുമുള്ള വിഷങ്ങളെ തിരിച്ചറിയാൻ ഓരോ അവസരങ്ങൾ വരുന്നു.”
“ചേട്ടൻ പാവം. വേറെ ആരെങ്കിലും ആയിരുന്നെങ്കിലോ?”
അവൾ വീണ്ടും സെന്റി ട്രാക്കിലാണെന്ന് കണ്ടതും കൈലാസ് മീശ പിരിച്ചു.
“ഞാൻ പാവമാണെന്ന് ആര് പറഞ്ഞു?”
ആ നോട്ടവും മുഖത്തെ കുസൃതിയും കണ്ടപ്പോൾ ചിരി വന്നു അവൾക്ക്.
“പാവം തന്നെയാ..”
“പാവം അല്ലെന്ന് തെളിയിക്കാൻ നീയൊരു അവസരം തന്നാ മതി.”
“അയ്യേ.. പൊയ്ക്കോ അവിടുന്ന്.” കണ്ണുരുട്ടി ചിരിച്ചു കൊണ്ട് അവൾ മുറിയിൽ നിന്ന് പുറത്തിറങ്ങി.
കുറച്ചു നേരത്തിനു ശേഷം എണ്ണയുമായി കൈലാസ് ഹാളിൽ ഇറങ്ങി. കസേരയിൽ ഇരുന്ന് നെഞ്ചിലും കൈയിലും എണ്ണ തേച്ചു.
“എണ്ണ തേച്ചൊ?” അടുക്കളയിൽ നിന്നിറങ്ങി വന്ന ഹന്ന അവനോട് തിരക്കി.
“മ്മ്. കയ്യിലും നെഞ്ചിലും തേച്ചു.” പറയുന്നതിനൊപ്പം അവൻ വലം കൈ ഉഴിയുന്നുണ്ട്.
“അപ്പൊ പിറകിലോ?”
“കൈ എത്തുന്നില്ല.”
ഹന്ന രണ്ട് മൂന്ന് നിമിഷങ്ങൾ നിന്നിടത്ത് തന്നെ നിന്നു.
പിന്നെ അവന്റെ അരികിലേക്ക് നടന്ന് വന്ന് എണ്ണക്കുപ്പി എടുത്തു.
“ഞാനിട്ട് തരാം.” കണ്ണ് മിഴിച്ചു നോക്കുന്നവനോട് കുറച്ചു ബദ്ധപ്പെട്ട് പറഞ്ഞു.
വീണ്ടും അവനാ നോട്ടം തന്നെയാണ്.
“ചേട്ടന് ബുദ്ധിമുട്ട് ആണോ?”
“ഏയ്.. എന്ത് ബുദ്ധിമുട്ട്? തേച്ചോ.” അവൻ നിവർന്നിരുന്നു.
“എന്നെ അങ്ങനെ പെണ്ണുങ്ങളൊന്നും തൊട്ടിട്ടില്ല കേട്ടോ..” അവന് കള്ളച്ചിരിയാണ്.
“തൊട്ടാ ഉരുകി പോകുമോ എന്ന് ഞാനൊന്ന് നോക്കട്ടെ.” എണ്ണ കയ്യിൽ ചരിച്ചെടുക്കുമ്പോൾ അവളിലും ചിരിയായിരുന്നു.
തോളിൽ തേച്ച് മെല്ലെ തടവുമ്പോൾ ഹന്നയ്ക്ക് വിരലുകൾ തുടിക്കുന്നത് പോലെ തോന്നി. അവളും ഒരു പുരുഷന്റെ ദേഹത്ത് ഇങ്ങനെ തൊടുന്നത് ആദ്യമായാണ്.
“മിനിഞ്ഞാന്ന് കണ്ട പോലല്ല. പാവം പോലെ ഇരിക്കുന്നതാണല്ലേ..
എന്തൊരു നാക്കാ..”
“ഓഹ്. ഞാനിനി ഒന്നും മിണ്ടുന്നില്ല.”
അവളിനി സീരിയസ് ആയിട്ട് പറഞ്ഞതാണോ എന്നറിയാൻ അവൻ തിരിഞ്ഞു നോക്കി.
ആ തല പിടിച്ച് നേരെ വച്ചവൾ.
“മുന്നേ പ്രേമം ഒന്നും ഉണ്ടായിരുന്നില്ലേ?”
“അതൊക്കെ ഉണ്ടായിരുന്നു. സ്കൂളിൽ പ്ലസ്ടു പഠിക്കുമ്പോ ഒരെണ്ണം പിന്നെ കോളേജിൽ പോയപ്പോ വേറൊരെണ്ണം. എല്ലാം പൊട്ടി പാളീസായി.” അവൻ സരസഭാവത്തിലാണ്.