ഒരു നിമിഷം ഞാൻ അവളെ നോക്കി ചിരിച്ചു.. അത് കണ്ട് അവൾ പറഞ്ഞു.
“ആ സമയം സാർ എന്ന മാത്രമേ കണ്ടുള്ളൂ. ആതുവിനെ കണ്ടില്ലേ…? പാവം എത്ര മാത്രം വേദനിച്ചു കാണും. അവൾക്ക് എന്തെകിലും പറ്റിയോ എന്ന് സാർ അന്വേഷിച്ചോ..?
ഞാൻ വീണപ്പോൾ അവൾ ശരിക്കും പേടിച്ചു പോയി. അവിടെ ഉണ്ടായിരുന്ന അവളുടെ കൂട്ടുകാർ ഒക്കെ അപ്പോൾ ചിരിക്കുകയായിരുന്നു. എന്റെ നെറ്റിയിലെയും കൈയിലെയും ചോര കണ്ടു അവൾ എന്താ അപ്പോൾ ചെയ്തത് എന്ന് അറിയുമോ സാറിന്.
അപ്പോൾ അവൾ കരയുകയായിരുന്നു
അവൾ അവളുടെ പാവാട വലിച്ചു കീറിയിട്ട എന്റെ ചോര തുടച്ചു തന്നത്. . പകരം അവൾക്ക് സാർ ഒരു പുതിയ പാവാടയും ബ്ലൗസും വാങ്ങി കൊടുക്കണം. ”
“പുതിയതോ…? എന്തിന്..? നമ്മൾ വരുമ്പോൾ കുറേ വാങ്ങിയില്ലേ..? അതിൽ ഏതെങ്കിലും കൊടുത്താൽ പോരെ..? ” ഞാൻ ഗൽബിയോട് ചോദിച്ചു.
“പോര. സാർ തന്നെ അവളേയും കൊണ്ട് പോയി വാങ്ങി കൊടുക്കണം. ” അവൾ പറഞ്ഞു.
ഞാൻ ഫരിയോട് ചോദിച്ചു.
“എന്താ നീ ഒന്നും മിണ്ടാത്തത് ഫരി. നീയും അത് തന്നെ ആണോ പറയുന്നത്..?”
ഗൽബിയുടെ മുന്നിൽ വെച്ച് ഞാൻ ഒരിക്കലും ഫരിയുടെ പേര് വിളിച്ചിരുന്നില്ലേ. ഇന്ന് ആദ്യമായി അങ്ങനെ വിളിച്ചു. ഇനി എന്നും അങ്ങനെ വിളിക്കും.
“അതേ സാറേ. എനിക്കും ഇവൾ പറയുന്നതാ ശരി എന്ന് തോനുന്നു. സാർ പറഞ്ഞത് ഇത്തിരി കൂടുതൽ ആയിരുന്നു. ഇനിയെങ്കിലും
സാർ അവരോട് കുറച്ചു സ്നേഹത്തിൽ പെരുമാറണം. എല്ലാവരും സാറിനെ കുറച്ചു നല്ലത് മാത്രം പറയണം. അതാ ഞങ്ങളുടെ ഇഷ്ട്ടം . ആഗ്രഹം. ” ഫരി പറഞ്ഞു
“പാവം ആതു അവൾ നന്നായി പേടിച്ചിട്ടുണ്ട്. അവൾ ഇപ്പോൾ എന്ത് ചെയ്യുകയാണോ എന്തോ..? ” ഫരി ആത്മഗതം പോലെ പറഞ്ഞു.
അപ്പോഴാണ് ഞാനും അത് ഓർത്തത്. ഞാൻ ആ സമയം കാടനെ പോലെ എന്തൊക്കെയോ വിളിച്ചു പറഞ്ഞു പോയി. ആ കൊച്ചു പെണ്ണിന്റെ മനസ്സ് വല്ലാതെ വേദനിച്ചു കാണും.
നേരത്തെ അടുക്കളയിലേക്ക് ഓടിപ്പോയ ആതു. പണ്ട് അവളുടെ അമ്മ സങ്കടം വരുമ്പോൾ ഇരുന്നു കരയുന്ന അതേ സ്ഥലത്ത് , അടുക്കളയിലെ ഒരു മൂലയിൽ പോയി ഇരുന്നു കരഞ്ഞിരിക്കയായിരുന്നു. ഞങ്ങൾ അവിടെ നിന്ന് ഇറങ്ങുമ്പോൾ
ഇന്ദുവും അവളെ വഴക്ക് പറയുന്നുണ്ടായിരുന്നു..
ഗൽബിയുടെ നിർബന്ധം കാരണം ഞങ്ങൾ നേരെ വീട്ടിലേക്കാണ് പോയത്.. കാറിന്റെ ശബ്ദം കേട്ടപ്പോൾ തന്നെ ഇന്ദു വേഗം ഓടി പുറത്തേക്ക് വന്നു . പക്ഷെ ആതു വന്നില്ല.
കാറിൽ നിന്ന് ഇറങ്ങിയ ഗൽബിയുടെ കൈ പിടിച്ചു ഇന്ദു ചോദിച്ചു. .
“മോൾക്ക് എങ്ങനെ ഉണ്ട്. വല്ലതും പറ്റിയായിരുന്നോ ..? .”
“ഏയ്! അങ്ങനെ ഒന്നും പറ്റിയില്ല. വീണപ്പോൾ അവിടെ അവിടെയായി കുറച്ചു മുറിഞ്ഞു. അതിന്റെ ഒരു വേദന അത്രയേ ഉള്ളൂ. ആതു എവിടെ ഇന്ദു ചേച്ചി…?” ഗൽബി ഇന്ദുവിനോട് ചോദിച്ചു.
ഇന്ദു അതിന് മറുപടി പറയാതെ ഇങ്ങനെ പറഞ്ഞു.
“മോള് വാ. ഇന്ദു ചേച്ചി കഴിക്കാൻ എന്തെങ്കിലും എടുക്കാം. വാ..”
ഇന്ദു അവളുടെ കൈ പിടിച്ചു അകത്തേക്ക് നടന്നു. എന്നെ ഒന്ന് നോക്കിയത് പോലും ഇല്ല. അത് എനിക്ക് സങ്കടം ആയി. ഞാൻ അവളോട് മിണ്ടാതിരിക്കുമ്പോൾ … അവളെ നോക്കുക പോലും ചെയ്യ്യാതിരിക്കുമ്പോൾ അവൾക്ക് എത്ര മാത്രം വേദനിച്ചു കാണും എന്ന് എനിക്ക് അപ്പോൾ മനസ്സിലായി.
കത്തിയെടുത്ത് കുത്തുന്നതിനേക്കാൾ വേദന ആണ്. ഈ അവഗണന എന്ന് എനിക്ക് ആദ്യമായി തോന്നി.
അവർ മൂന്ന് പേരും അകത്തേക്ക് കയറിപ്പോയി. ഞാൻ മെല്ലെ ഇറയത്തു കയറി അവിടെ ഇരുന്നു.
അകത്തു കയറിയ അവർ കാണുന്നത്. അകത്തു ഒരു മൂലയിൽ ചുരുണ്ടു കൂടി കിടക്കുന്ന ആതുവിനെ ആണ്. ആതു ആരേയും നോക്കുന്നു പോലും ഇല്ല. ആ കാഴിച്ച കണ്ട് ഫരിയുടേയും ഗൽബിയുടെയും ഉള്ള് തകർന്നു .
“വാ മോള് ഇവിടെ ഇരിക്ക്. ” ഒരു സ്റ്റൂൾ നീട്ടിയിട്ട് ഇന്ദു ഗൽബിയോട് പറഞ്ഞു.
“ഇന്ദു ചേച്ചി ! ആതു എന്താ ഇങ്ങനെ ഇവിടെ..?” എന്ന് ചോദിച്ചു ഗൽബി അവളുടെ അടുത്തേക്ക് പോയി. എന്നിട്ട് ആതുവിനെ വിളിച്ചു.