ഞാൻ ഡ്രൈവർ സീറ്റിൽ കയറി ഇരുന്നിട്ട് ഫരിയെ വിളിച്ചു.
” ഫരീ.. ”
അത് കേട്ട് ഫരി വേഗം കാറിന്റെ മുന്നിലെ ഡോർ തുറക്കാൻ നോക്കിയപ്പോൾ ഞാൻ പറഞ്ഞു.
“ഫരി…. ഇന്ദു… ഇന്ദുവിനെ നോക്കിക്കോണം. എപ്പോഴും ഇന്ദുവിന്റെ കൂടെ ഉണ്ടാകണം.. ഞാൻ വിളിച്ചോളാം. ”
അതും പറഞ്ഞു ഞാൻ കാർ സ്പീഡിൽ ഓടിച്ചു പോയി. നേരത്തെ എത്തിയതിനേക്കാളും വേഗത്തിൽ അതേ ഹോസ്പിറ്റലിൽ എത്തി. എത്തിയ ഉടനെ ആതുവിനെയും എടുത്തു എമർജൻസി കെയർ യൂണിറ്റിലേക്ക് ഓടി.
പെട്ടന്ന് തന്നെ ഡോക്ടർ മാർ വന്നു ആതുവിനെ നോക്കി. ആതുവിന് ഡ്രിപ്പ് ഇട്ടു. കൂടെ ഇഞ്ചക്ഷൻ എടുത്തു. ഗൽബി അവളുടെ അടുത്ത് തന്നെ നിന്നു. ഞാനും അവളെ കിടത്തിയ കട്ടിലിൽ അവളുടെ കാലിന്റെ അടുത്തായി ഇരുന്നു.
ഒരു അര മണിക്കൂറിനുള്ളിൽ തന്നെ ആതുവിന്റെ പനി മാറി. അവൾ കണ്ണ് തുറന്നു എന്നെ നോക്കി. കരഞ്ഞുകൊണ്ട് അവൾ വീണ്ടും പറയാൻ നോക്കി.
“സാർ ഞാൻ ചേച്ചിയെ! ”
“മോള് ഒന്നും പറയേണ്ട. കിച്ചു ഏട്ടന് എല്ലാം അറിയാം. കിച്ചു ഏട്ടൻ മോളെ എന്തൊക്കെയോ പറഞ്ഞു പോയി. മോള് കിച്ചു ഏട്ടനോട് ക്ഷമിക്ക്. കിച്ചു ഏട്ടൻ അറിയാതെ പറഞ്ഞു പോയതാ. ഇനി അങ്ങനെ ഒന്നും കിച്ചു ഏട്ടൻ മോളോട് പറയില്ല. ” ഞാൻ ആതുവിന്റെ കൈയിൽ തഴുകികൊണ്ട് പറഞ്ഞു. എന്റെ കണ്ണിൽ നിന്നും താനേ വെള്ളം ഒഴുകി. അത് അവളുടെ കൈയിൽ വീണു.
അത് കണ്ട് ആതു അമ്പരന്നു കാണും. അവൾ കൈ നീട്ടി എന്റെ കണ്ണുനീർ തുടച്ചു.. എന്നിട്ട് പറഞ്ഞു.
“കിച്ചു ഏട്ടൻ എന്തിനാ കരയുന്നത്. കിച്ചു ഏട്ടൻ എന്തിനാ എന്നോട് ക്ഷമ ചോദിക്കുന്നത്. കിച്ചു ഏട്ടൻ എന്നോട് ക്ഷമ ചോദിക്കരുത്. ഞാൻ കുറച്ചു കൂടെ ശ്രദ്ധിക്കണം ആയിരുന്നു. ചേച്ചി വീഴാതെ ഞാൻ നോക്കണമായിരുന്നു. എന്റെ അടുത്താ തെറ്റ്. കിച്ചു ഏട്ടൻ എന്നോട് ക്ഷമിക്ക്. ഞാൻ ഇനി ശ്രദ്ധിച്ചോളാം. ”
അപ്പോഴേക്കും ഡോക്ടർ അവിടെ വന്നു. എന്നിട്ട് ആതുവിനെ നോക്കിയിട്ട് പറഞ്ഞു.
“ആഹാ!! ആള് ഉഷാർ ആയല്ലോ..? ഇനി ഇവിടെ കിടക്കേണ്ടല്ലോ..? നാളെ നല്ലൊരു ഓണം ആയിട്ട് അത് വെറുതെ ഹോസ്പിറ്റലിൽ ആക്കണോ..? . ഇനി വീട്ടിലേക്ക് പോകാലോ. ”
അത് കേട്ട് ആതു ചിരിച്ചു. അതിന് ശേഷം പെട്ടന്ന് പറഞ്ഞു.
“കിച്ചു ഏട്ടാ. എന്റെ അമ്മ.. അമ്മ പേടിച്ചു കാണും. നമുക്ക് വീട്ടിൽ പോകാം.”
“ശരി നമുക്ക് പോകാം. ” ഞാൻ പറഞ്ഞു.
ഞങ്ങൾ ഹോസ്പിറ്റലിൽ നിന്ന് ഇറങ്ങി. കാറിൽ കയറി. അപ്പോൾ ഗൽബി പറഞ്ഞു.
“സാറേ അമ്മിയുടെ നമ്പറിൽ ഒന്ന് ഫോൺ വിളിക്കാമോ. അവരോട് കാര്യം പറയാലോ.. വെറുതെ അമ്മിയും ഇന്ദു ചേച്ചിയും പേടിക്കണ്ടല്ലോ..?”
അത് ശരിയാണ് എന്ന് തോന്നിയ ഞാൻ ഫോൺ എടുത്തു ഗൽബിക്ക് കൊടുത്തു.
ഗൽബി വേഗം ഫരിയുടെ ഫോണിൽ വിളിച്ചു. ഫരി ഫോൺ എടുത്ത ഉടനെ ഗൽബി പറഞ്ഞു.
“അമ്മീ. ഞങ്ങൾ ഹോസ്പിറ്റലിൽ നിന്ന് ഇറങ്ങി. ദേ ആതു ഉഷാർ ആയി. ആതുവിന് ഒരു കുഴപ്പവും ഇല്ല.
ഞങ്ങൾക്ക് വിശക്കുന്നുണ്ട്. ഞങ്ങൾ ഏതെങ്കിലും ഹോട്ടലിൽ കയറി എന്തെങ്കിലും കഴിച്ചിട്ട് മാത്രമേ വീട്ടിലേക്ക് വരൂ. ഞാൻ ആതുവിന് ഫോൺ കൊടുക്കാം.”
ഗൽബി ഒറ്റ ശ്വാസത്തിൽ പറഞ്ഞു.
“ഗൽബി.. വീഡിയോ കാൾ ചെയ്. അപ്പോൾ രണ്ടാൾക്കും കാണാലോ..? ” ഞാൻ പറഞ്ഞു.
“അത് ശരിയാണല്ലോ… ” അങ്ങനെ പറഞ്ഞ ശേഷം ഗൽബി ഫോണിൽ പറഞ്ഞു.
“അമ്മി. ഞാൻ വീഡിയോ കാൾ ചെയ്യാം. അമ്മി നെറ്റ് ഓൺ ചെയ്.”
അങ്ങനെ പറഞ്ഞു ഗൽബി ഫോൺ കട്ട് ചെയ്തു. എന്നിട്ട് വീഡിയോ കാൾ വിളിച്ചു.
ഫരി വേഗം തന്നെ ഫോൺ എടുത്തു. എടുത്ത ഉടനെ ഫരി പറഞ്ഞു.
“ദേ ഇന്ദു മക്കൾ. വാ വന്ന് നോക്ക്. ദേ ആതു.”
അങ്ങനെ പറഞ്ഞു ഫരി ഫോൺ ഇന്ദുവിന്റെ കൈയിൽ കൊടുത്തു.
ഗൽബിയും ആതുവും കെട്ടിപിടിച്ചു ഇരിക്കും പോലെ കാറിന്റെ പിൻ സീറ്റിൽ ഇരിക്കുകയായിരുന്നു. ഫോണിൽ ഇന്ദുവിനെ കണ്ട ഉടനെ ആതു പറഞ്ഞു.