“അതല്ല സര്. കല്യാണം ഇപ്പോ തന്നെ നടത്തിത്തരും എന്നു പറഞ്ഞത് കൊണ്ടാ.”
ഇതിനിടയ്ക്ക് മായയെ ആശ്വസിപ്പിക്കാനും രാജേഷ് ശ്രമിക്കുന്നുണ്ട്.
“ഞങ്ങളുടെ ഇഷ്ടം വീട്ടില് അറിഞ്ഞാല് വലിയ പ്രശ്നങ്ങള് ഉണ്ടാകാന് സാധ്യത ഉണ്ട്. അപ്പോ സാര് ഇടപെട്ട് കല്യാണം നടത്തിത്തരുക ആണെങ്കില് സന്തോഷമേ ഉള്ളൂ.”
“നീ കൊള്ളാളോടാ.” പോലീസ്കാരന് പറഞ്ഞു.
രാജേഷിന് നല്ല ധൈര്യമായിരുന്നു. തെറ്റായിട്ടു ഒന്നും അവര് ചെയ്തിട്ടില്ലല്ലോ. പിന്നെന്തിനാ പേടിക്കുന്നത്.
അതിനിടയ്ക്ക് രാജേഷ് താന് ജോലി ചെയ്യുന്ന സ്ഥാപനത്തിന്റെ ഐഡെന്റിറ്റി കാര്ഡും കാണിച്ചിരുന്നു. മായ ജോലി ചെയ്യുന്നതാണെന്നും ഒക്കെ പോലീസിനെ അറിയിച്ചു.
പോലീസ്കാര്ക്ക് ഇവര് തരികിടകള് ഒന്നുമല്ല എന്നു ഏകദേശധാരണ വന്നിട്ടാണെന്ന് തോന്നുന്നു ഇവിടെ കൂടുതല് കറങ്ങി നടക്കാതെ വീട്ടില് പോകാന് നോക്ക് എന്നു പറഞ്ഞു രാജേഷിനെയും മായയെയും അവിടുന്നു പറഞ്ഞു വിട്ടു.
ഒരു ആണും പെണ്ണും തമ്മില് ഒരുമിച്ചിരുന്നു സംസാരിച്ചാല് എന്താ കുഴപ്പം എന്നൊക്കെ ചോദിക്കണമെന്നുണ്ടായിരുന്നു രാജേഷിന്. പക്ഷേ എന്തുകൊണ്ടോ മായയുടെ കരച്ചില് കണ്ടപ്പോ അവരില് നിന്നും എത്രയും വേഗം ഒഴിവായി വരാന് ആണ് അവന് തോന്നിയത്.
അതും കണ്ടു കമെന്റ് പറയാന് കുറേ തെണ്ടികളും. ആ സാഹചര്യത്തില് പ്രതികരിക്കണം എന്നു വിചാരിച്ചെങ്കിലും മായയുടെ അവസ്ഥ രാജേഷിനെ പിറകോട്ടടിപ്പിച്ചു.
പെട്ടെന്നു തന്നെ അവര് ഒരു ഓട്ടോയ്ക്കു അവിടുന്നു ടൌണിലേക്ക് പോയി.
മായയെ സമാധാനിപ്പിച്ചു വീട്ടിലേക്ക് പറഞ്ഞു വിട്ടു.
എത്രയും പെട്ടെന്നു ഈ കാര്യം വീട്ടില് അറിയിക്കുന്നത് തന്നെ ആണ് നല്ലത് എന്നു രാജേഷിന് തോന്നി. ഈ കാര്യം എന്നു ഉദ്ദേശിച്ചത് മായയോടുള്ള ഇഷ്ടം ആയിരുന്നു. അല്ലാതെ പോലീസ് പിടിച്ചതല്ല.
എങ്ങിനെ ഈ കാര്യം വീട്ടിൽ അറിയിക്കും? വലിയ എതിർപ്പ് ഒന്നും ഉണ്ടാകില്ല എങ്കിലും കാര്യം അവതരിപ്പിക്കണ്ടേ?
അനിയത്തിയുടെ കല്യാണം കഴിഞ്ഞില്ലല്ലോ. അതിനു മുന്പ് എങ്ങിനെ ഞാൻ പോയി കല്യാണം കഴിക്കണം എന്നു പറയും?
എങ്കിലും ജസ്റ്റ് ഒന്നു സൂചിപ്പിക്കണ്ടേ ? അനിയത്തിയോട് തന്നെ പറയാം. അവൾ വഴി അച്ഛനോടും അമ്മയോടും അറിയിക്കാം.
എന്റെ വീട്ടിൽ മാത്രം സമ്മതിച്ചാൽ പോരല്ലോ. മായയുടെ വീട്ടിലും സമ്മതമാകണ്ടേ. അങ്ങിനെ ഒന്നുണ്ടാകും എന്നു പ്രതീക്ഷ തൽകാലം ഇല്ല. ഒരേ ജാതി, ജാതകം അങ്ങിനെ കുറേ കടമ്പകൾ ഉണ്ടല്ലോ.
രാജേഷിനാണെങ്കില് ജാതകം എന്നു പറയുന്ന സാധനമേ ഇല്ല. അച്ഛൻ പണ്ട് ജാതകം എഴുതിക്കണം എന്നു പറഞ്ഞപ്പോ എന്റെ ജാതകം ഞാൻ തന്നെ എഴുതും എന്നു പറഞ്ഞവനാണ്.
അച്ഛനും ഇതിലൊന്നും വലിയ വിശ്വാസം ഉണ്ടായിരുന്നില്ല. അതുകൊണ്ടു തന്നെ തന്റെ വീട്ടുകാരുടെ ഭാഗത്ത് നിന്നും വലിയ എതിർപ്പ് ഉണ്ടാകും എന്നു തോന്നുന്നില്ല.
അങ്ങിനെ അടുത്ത ആഴ്ച നാട്ടില് പോകുമ്പോള് കാര്യം സൂചിപ്പിക്കാം എന്നു കരുതി.
അന്നത്തെ പോലീസ് ജീപ്പ് സംഭവത്തോടെ മായക്ക് രാജേഷിനോട് കുറച്ചു കൂടി ഇഷ്ടം കൂടിയിട്ടുണ്ട്. നീരജിന്റെ കാര്യം ഇപ്പോ മായ അവനോടു മിണ്ടാറേ ഇല്ല. അല്ലെങ്കില് എന്തു പറയുമ്പോഴും നീരജിന്റെ കാര്യം എടുത്തിടുന്നതാ.
ഇനി ഒരുപക്ഷേ എനിക്കു വിഷമമാകും എന്നത് കൊണ്ടായിരിക്കും. അല്ലാതെ നീരജിനെ മറക്കാന് ഒന്നും അവള്ക്ക് കഴിയില്ല.
എന്തായാലും രാജേഷ് ഇപ്പോ ഹാപ്പി ആണ്. ഇപ്പോ വിളിക്കുമ്പോഴും മെസേജ് ചെയ്യുമ്പോഴും ഒക്കെ കുറച്ചുകൂടി റൊമാന്റിക് ആയി മായയും സംസാരിക്കാന് തുടങ്ങി. ഐ ലവ് യു പറയലും ഉമ്മ കൊടുക്കലും ഒക്കെ തുടങ്ങി.
അന്നത്തെ സംഭവത്തോട് ഇനി പെണ്ണുകാണാന് വീട്ടിലേക്ക് വരുമ്പോള് അല്ലാതെ നേരിട്ടു കാണില്ല എന്നു മായ തീര്ത്തു പറഞ്ഞു.
ചെറിയ വിഷമം രാജേഷിനുണ്ടായെങ്കിലും ഫോണില് കൂടി ഉള്ള അവരുടെ പ്രണയം തഴച്ചു വളര്ന്നു.
അങ്ങിനെ അടുത്ത ആഴ്ച രാജേഷ് വീട്ടില് പോയി. മായയുടെ കാര്യം സൂചിപ്പിച്ചു.
കാര്യങ്ങള് സമചിത്തതയോട് കൂടി തന്നെ അച്ഛന് കേട്ടു.
വിവരങ്ങള് ചോദിച്ചറിഞ്ഞു. രാജേഷ് കൃത്യമായി എല്ലാം അച്ഛനോട് പറഞ്ഞു കൊടുത്തു.
അച്ഛന് രണ്ടു കാര്യങ്ങളില് എതിര്പ്പ് ഉണ്ടായിരുന്നു. ഒന്നാമത്തേത് അവളുടെ വീട്ടിലേക്കുള്ള ദൂരം. മൂന്നു ജില്ലകള്ക്കപ്പുറത്താണ് അവളുടെ വീട് എന്നത്. രണ്ടാമത്തേത് ഞാന് തീരെ പ്രതീക്ഷിക്കാത്തതായിരുന്നു. വേറെ ജാതിയില് പെട്ടതാണ് എന്നത്. ജാതിയും മതത്തേക്കാളും വലുത് മനുഷ്യന് ആണെന്ന് പറഞ്ഞു പഠിപ്പിച്ച അച്ഛന് തന്നെ അത് പറഞ്ഞപ്പോ ശരിക്കും ഞാന് ഞെട്ടിപ്പോയി. നാട്ടുകാരും ബന്ധുക്കളും മോശം പറയും എന്ന കാരണം ആയിരുന്നു അതിനു അച്ഛന് പറഞ്ഞത്.
തല്കാലം ഇപ്പോ കല്യാണത്തിനെ ക്കുറിച്ച് നോക്കേണ്ട. അനിയത്തിയുടെ കല്യാണം കഴിയട്ടെ. അതിനു ശേഷം ആലോചിക്കാം എന്ന് അച്ഛന് തീര്ത്തു പറഞ്ഞു.
ഇനി ഇപ്പോ എന്താ ചെയ്യാ? അനിയത്തിയുടെ കല്യാണം വേഗം നടത്തുക. അവള് ആണെങ്കില് ആരെയും പ്രേമിക്കുന്ന ടൈപ്പ് ഒന്നുമല്ല. അപ്പോ പിന്നെ പറ്റിയ പ്രൊപ്പോസല്സ് കണ്ടുപിടിക്കുക, കല്യാണം നടത്തുക എന്നായി.
ഒരു ടെന്ഷന് മാറിയപ്പോ അടുത്ത ടെന്ഷന്.
എന്നാലും വേണ്ട എന്നു ഒറ്റയടിക്ക് പറഞ്ഞില്ല എന്നത് ഒരു ആശ്വാസം. അല്ലെങ്കിലും അച്ഛന് പറഞ്ഞതിലും കാര്യമില്ലേ? കല്യാണപ്രായമായ അനിയത്തിയുടെ കല്യാണം നടത്താതെ ചേട്ടന് കല്യാണം കഴിക്കുന്നത് ശരിയല്ലല്ലോ. ആകെ പണി കിട്ടിയതു അനിയത്തിക്ക് ജാതകം ഉണ്ടാക്കിയപ്പോഴാണ്. ആണുങ്ങള്ക്ക് ജാതകം ഇല്ലെങ്കിലും പെണ്ണുങ്ങള്ക്ക് ജാതകം നിര്ബന്ധമാണല്ലോ. അനിയത്തിക്ക് ചൊവ്വാദോഷം. തീര്ന്നില്ലേ എല്ലാം. അച്ഛന് ആകെ നിരാശനായി നടക്കാന് തുടങ്ങി. അതിനിടയ്ക്ക് ഞാന് കല്യാണം കഴിക്കണം എന്നു വാശി പിടിച്ചാല് ഉള്ള അവസ്ഥ എന്തായിരിക്കും? പിന്നെ എല്ലാ ഞായറാഴ്ചകളിലും മാട്രിമോണി കോളം നോക്കുന്നത് പതിവാക്കി. ഒരു പ്രാവശ്യം ഞങ്ങളും കൊടുത്തു ഒരു പരസ്യം. അത് കണ്ടു കുറേ പേര് വിളിച്ചു. ഒരുപാട് ആലോചനകളില് നിന്നും അവള്ക്കിഷ്ടമായ ഒരു ചെക്കനെ കണ്ടെത്തി. കല്യാണവും നടത്തി.
ഇതൊക്കെ നടന്നത് ഒരു ആറുമാസത്തിന്റെ ഇടയില് ആണ്. അനിയത്തിയെക്കുറിച്ചും കല്യാണത്തെക്കുറിച്ചും ഒന്നു സൂചിപ്പിച്ചു പോകുന്നതേ ഉള്ളൂ. കാരണം ഇത് മായയുടെയും രാജേഷിന്റെയും കഥ ആണല്ലോ.