അമ്പിളിയെ ഡിവോഴ്സ് ചെയ്യാനും വിജയൻ തയ്യാറല്ല..അമ്പിളിയാണെങ്കിൽ അവന്റെ കൂടെ പോവുകയുമില്ല.. കുടുംബക്കാരൊക്കെ ഇരുന്ന് പലവട്ടം ചർച്ച ചെയ്തിട്ടും ഒരു തീരുമാനമായില്ല.. ഡിവോഴ്സ് പെറ്റീഷനിൽ ഒപ്പിടില്ലെന്ന് വിജയനും, അവന്റെ കൂടെ ഇനി ജീവിക്കില്ലെന്ന് അമ്പിളിയും ഉറപ്പിച്ച് പറഞ്ഞു.. ഒരു തീരുമാനവുമാകാതെ രണ്ട് വർഷമായി അവർ ജീവിക്കുകയാണ്.. എല്ലാവരും ഇടപെട്ട് അമ്പിളിയുടെ വീട്ടിലേക്കുള്ള വിജയന്റെ വരവ് നിർത്തിച്ചിട്ടുണ്ട്..
വിജയൻ ഒന്ന് ഒഴിവായിക്കിട്ടിയാൽ മകളെ വേറൊരാളെക്കൊണ്ട് കല്യാണം കഴിപ്പിക്കാൻ കാത്തിരിക്കുകയാണ് അമ്പിളിയുടെ അമ്മ.. പക്ഷേ, വിജയൻ ഒഴിവാക്കിയാലും ഇനിയൊരു വിവാഹം വേണ്ടെന്ന നിലപാടിലാണ് അമ്പിളി..ഒന്ന് കൊണ്ട് തന്നെ അവൾക്ക് ജീവിതം വെറുത്ത് പോയി..മോളുണ്ടായിക്കഴിഞ്ഞ് പിന്നെ കുറേ കാലം അമ്പിളി വേറൊന്നും ചിന്തിച്ചില്ല.. മോള് മാത്രമായിരുന്നു അവളുടെ ലോകം.. വളർന്ന് വരുന്നതിനനുസരിച്ച് മോൾക്ക് അമ്പിളിയുടെ അമ്മയുമായിട്ടായി കൂടുതൽ അടുപ്പം.. എന്തിനും ഏതിനും അവൾക്ക് മുത്തശി മതി.. മുല കൊടുക്കുന്ന പണി മാത്രമേ അമ്പിളിക്കുള്ളൂ..
രണ്ട് വയസ് കഴിഞ്ഞപ്പോ മുല കൊടുക്കുന്നതും നിർത്തി..പിന്നെ അമ്പിളിക്ക് സ്വന്തം മോളെ തൊടാൻ പോലും കിട്ടാതായി… ഉറക്കം പോലും മോള് അമ്മയോടൊപ്പമാക്കി..
പതിയെപ്പതിയെ തീർത്തും ഒറ്റപ്പെടുമെന്ന് തോന്നിയ ഘട്ടത്തിലാണ് അമ്പിളി ജോലിക്ക് പോകാൻ ഒരുങ്ങിയത്.. അവളങ്ങിനെ ഒരാഗ്രഹം പറഞ്ഞപ്പോ അമ്മയും സമ്മതിച്ചു..
ഇപ്പോൾ ആഴ്ചയിൽ ആറ് ദിവസം അമ്പിളി ജോലിക്ക് പോകും.. ജോലിയും ആ സ്ഥാപനവും അവൾക്കിഷ്ടമായി.. ഇപ്പോഴവൾ സന്തോഷവതിയാണ്..
ജോലി കഴിഞ്ഞ് വരുമ്പോ മോളും നല്ല അടുപ്പം കാണിക്കുന്നുണ്ട്..അമ്മയും മോളുമായി അവൾ സമാധാനത്തോടെ ജീവിച്ചു..
പക്ഷേ, ഒരാഴ്ചക്കകം വിജയൻ അവിടെച്ചെന്ന് പ്രശ്നമുണ്ടാക്കി..ആ മുതലാളി നല്ലവനായിരുന്നു.. ഈ സ്ഥാപനത്തിലേക്കിനി കാല് കുത്തിപ്പോകരുതെന്ന് പറഞ്ഞ് അയാൾ
വിജയനെ പിടിച്ച് പുറത്താക്കി.. റോഡിൽ നിന്ന് മുതലാളിയെ നാല് ചീത്തയും പറഞ്ഞാണ് വിജയൻ പോയത്.. എങ്കിലും പിന്നെ അവന്റെ ശല്യമൊന്നും ഉണ്ടായിട്ടില്ല..
ഇപ്പോൾ രണ്ട് മാസത്തിലേറെയായി അമ്പിളി ആ സ്ഥാപനത്തിൽ ജോലി ചെയ്യുന്നു.. അവൾക്കിപ്പോ സന്തോഷവും സമാധാനവുണ്ട്.. കുറച്ച് കാലം മുരടിച്ച് പോയ ശരീരവും മനസും ഒന്ന് തളിർത്തിട്ടുണ്ട്.. വിജയനുമായി ബന്ധം വേർപെടുത്താത്തത് മാത്രമാണ് അവൾക്കൊരു പ്രയാസമുള്ളത്.. മരിക്കേണ്ടി വന്നാൽ പോലും വിജയനുമൊത്ത് ഒരു ജീവിതം ഇനിയില്ല എന്നവൾ ഉറപ്പിച്ചിരുന്നു.. ഒരാണ് തന്നെ തന്റെ ജീവിതത്തിലിനി വേണ്ട എന്നാണ് അമ്പിളിയുടെ തീരുമാനം..
ഇപ്പോൾ രണ്ട് മൂന്ന് ദിവസമായി ഒരു ചെറുപ്പക്കാരനെ അവൾ വഴിയരികിൽ കാണുന്നു.. ദിവസവും പലരേയും കാണാറുണ്ടെങ്കിലും ഇവനെ അമ്പിളി ശ്രദ്ധിക്കാൻ കാരണമുണ്ട്.. കണ്ടപ്പോഴൊക്കെ അവളെയും കാത്ത് നിൽക്കുന്നത് പോലെയാണ് അവൾക്ക് തോന്നിയത്.. പിന്നെ തന്നെക്കാണുമ്പോഴുള്ള അവന്റെ മുഖഭാവം.. ഒരു തരം ആരാധനയാണവന്റെ മുഖത്ത്.. അമ്പലത്തിൽ ചെന്ന് ദേവിയെ നോക്കും പോലെ.. കണ്ണുകളിൽ കടുത്ത പ്രണയവും..
പലജാതി നോട്ടത്തിൽ ഈ നോട്ടം വ്യത്യസ്ഥമാണെങ്കിലും അതിനോട് പ്രതികരിക്കാനൊന്നും അമ്പിളിക്ക് താൽപര്യമില്ലായിരുന്നു.. വിജയനെന്ന ഒറ്റ ആണിനെ മനസിലാക്കിയതോടെ ആൺ വർഗത്തിനെത്തന്നെ അവൾക്ക് വിശ്വാസമില്ലായിരുന്നു..
വീട്ടിൽ നിന്ന് അൽപ്പം നടന്ന് വേണം അമ്പിളിക്ക് ബസ് സ്റ്റോപ്പിലെത്താൻ.. ഒൻപത് മണിക്കാണവൾ വീട്ടിൽ നിന്നിറങ്ങുന്നത്.. ഒൻപതേകാലിന് ബസ് വരും.. വൈകിട്ട് അഞ്ച് മണിക്ക് ജോലി സ്ഥലത്ത് നിന്നിറങ്ങും.. ആറ് മണിയോടെ വീട്ടിലെത്തും..
ബസ് കയറാൻ പോകുന്ന വഴിയിലും,ബസ് സ്റ്റോപ്പിലും, ചിലപ്പോൾ ജോലി ചെയ്യുന്ന സ്ഥാപനത്തിന് മുന്നിൽ വരെ അമ്പിളി ആ ചെറുപ്പക്കാരനെ കണ്ടു..