‘അതൊന്നും ഇനി പറഞ്ഞിട്ടു കാര്യമില്ലാഡോ , യോഗല്ല്യ എന്നു കൂട്ടിയ മതി ‘
‘അങ്ങനല്ല ഹരിയേട്ടാ, യോഗം ഉണ്ടായിരുന്നത് ഞാന്‍ ആയിട്ട് തട്ടി തെറുപ്പിച്ചതല്ലേ ‘ അവളുടെ കണ്ണു നനയുന്നത് എനിക്കു കാണാമായിരുന്നു .
കൂടുതല്‍ പറഞ്ഞാല്‍ വീണ്ടും സീന്‍ ആകും , ഇപ്പോള്‍ അവളുടെ ഉള്ളില്‍ കിടക്കുന്ന രണ്ടു ബോട്ടില്‍ വൈന്‍ തലക്ക് പിടിച്ചതാണെന്ന് ഞാന്‍ ഊഹിച്ചു . വിഷയം മാറ്റുവാനായി ഞാന്‍ പുറത്തു ആകാശം തെളിയുന്നത് നോക്കാന്‍ പറഞ്ഞു . അവള്‍ പുറത്തേക്ക് നോക്കി .
‘ഭൂമിയില്‍ നിന്നു സൂര്യോദ്ധ്യായം കാണുന്നത് പോലെ അല്ല ആകാശത്തുനിന്ന് കാണുന്നത് , നല്ല ഭങ്ങിയാണ്’
‘ഹരിയേട്ടന്‍ മുന്പ് കണ്ടിട്ടുണ്ടോ ‘
‘ഓ , കണ്ടിട്ടുണ്ട് , പക്ഷേ അത് കഴിഞ്ഞാല്‍ എനിക്ക് ഒരു തല വേദന വരും . അത് സഹിക്കാന്‍ പറ്റൂല .’
‘ഓഹോ,അപ്പോ ഞാന്‍ സൂര്യോദയം കണ്ടു തലവേദനിച്ചു കിടക്കട്ടെന്നു ല്ലേ’
‘അങ്ങനല്ല’
‘ഉം’ , അവള്‍ പുറത്തേക്ക് തന്നെ നോക്കി ചാരി ഇരുന്നു,ഞാനും
കുറച്ചു കഴിഞ്ഞും അവളുടെ ആനക്കമൊന്നും കേള്‍ക്കതായപ്പോള്‍ ഞാന്‍ മെല്ലെ ഒന്നു നോക്കി , അവള്‍ ഉറങ്ങിയിരിക്കുന്നു . അടുത്ത സീറ്റില്‍ കിടന്നിരുന്ന ഞങ്ങല്‍ക്ക് തന്ന പുതപ്പുകളില്‍ ഒന്നെടുത്ത് ഞാന്‍ അവളെ പുതപ്പിച്ചു . വിന്ഡോ ക്ലോസ് ചെയ്തു , അവള്‍ നല്ല ഉറക്കത്തിലാണ് …ഞാന്‍ അവളെ നോക്കി കിടന്നു .
ഇവൾക്ക് എന്താണ് സംഭവിച്ചത് ? ലുക്കിൽ ആകെ ഒരു മാറ്റം . ഗ്രാമീണ സുന്ദരി പരിഷ്കാരിയായിരിക്കുന്നു . നാടൻ വേഷത്തിൽ പോവാൻ ഉള്ള മടിക്കാവും ,പോകുന്നത് വേറെ ഒരു രാജ്യത്തേക്കല്ലേ .
എത്ര നിഷ്കളങ്ക ആയിട്ടാണ് ഇവൾ കിടക്കുന്നത് , എന്നോട് ചെയ്തതാണെന്നും ഈ ജന്മത്തിൽ മറക്കാൻ ആവുന്നതല്ല . സാധാരണ തേപ്പ് എന്ന് പറയാൻ ആവില്ലായിരുന്നു …… 2004 ലിൽ തുടങ്ങിയ നീണ്ട എട്ടു വർഷത്തെ പ്രണയം അവൾ നല്ല രീതിയിൽ തന്നെ അവസാനിപ്പിച്ചു . അന്നവള്‍ അതിനുവേണ്ടി ഉണ്ടാക്കിയ തിരക്കഥ അത്രക്കും ഗംഭീരം ആയിരുന്നു .
2012 ൽ ആയിരുന്നു അത് സംഭവിച്ചത് . നിരാശാ കാമുകനായി കുറച്ചു കാലം നാട്ടിൽ തെണ്ടി തിരിഞ്ഞു , അതിനിടക്ക് പല പ്രാവശ്യം ഇവളെ കാണാനും സംസാരിക്കാനും ശ്രെമിച്ചു . നിരാശ തന്നെ ആയിരുന്നു ഫലം . പിന്നെ മടുത്തു , എന്നാലും വിട്ടു കളയാൻ തയ്യാറായില്ല .നല്ല ഒരു ജോലി നേടി അവളുടെ വീട്ടിൽ പോയി ആലോചിക്കാമെന്നൊക്കെ കരുതി നാട്ടിൽ കുറച്ചു നാളുകൾ ജോലി ചെയ്തു , ശേഷം പ്രവാസിയായി .
രണ്ടു വർഷത്തെ കഷ്ട്ടപാടിനൊടുവിൽ ഇപ്പോൾ ജോലി ചെയ്യുന്ന കമ്പനിയിൽ ജോലി കിട്ടി.വെറ്റിനറി മെഡിസിനും സപ്പ്ളിമെൻറ്സും കൂടെ കുതിരക്കുള്ള സ്പെഷ്യൽ റേസിംഗ് ഫീഡും വിൽക്കുന്ന സ്ഥാപനം.
ഇതിനിടയിലും അവളെ ബന്ധപ്പെടുവാൻ ഞാൻ ശ്രെമിക്കുന്നുണ്ടായിരുന്നു . പക്ഷെ അവളുടെ തീരുമാനത്തിൽ മാറ്റം ഒന്നും ഇല്ലായിരുന്നെന്നു മാത്രം. ഒന്നരവര്ഷങ്ങള്ക്കു ശേഷം പ്രൊമോഷൻ ആയി . കഴിഞ്ഞ വർഷം ഭാഗ്യദേവത ചെറുതായൊന്നു കടാക്ഷിച്ചു . എന്നാലും ജോലി ഒഴിവാക്കിയില്ല . പർച്ചേസിങ് മാത്രമേ ഇപ്പോൾ ചെയ്യുന്നുള്ളു . എല്ലാം വിശദമായി പറയാം .. ഇപ്പോൾ ഈ യാത്രയിൽ …….
ആലോചനകൾക്കൊടുവിൽ ഉറക്കം എന്നെ വേട്ടയാടുന്നത് ഞാൻ അറിഞ്ഞു . മെല്ലെ എഴുനേറ്റു അടുത്ത സീറ്റിലേക്ക് മാറി ഇരുന്നു . അവൾക്കു ഇനി ഒന്നും തോന്നേണ്ട . ഇപ്പോൾ ഞങ്ങൾക്ക് നടുവിൽ ഒരു സീറ്റ് കാലിയായി കിടക്കുന്നു. പുതപ്പെടുത്ത് പുതച്ചു . സീറ്റ് ഫുൾ ബാക്കിലേക്കു പുഷ് ചെയ്ത് ചാരി കിടന്നു . അറിയാതെ ഉറങ്ങി പോയി .
—————————————————————————————————————ഇടയ്ക്കു എപ്പോഴോ എഴുനേറ്റു നോക്കിയപ്പോളും അവൾ നല്ല ഉറക്കത്തിൽ ആയിരുന്നു , പുറത്ത് നല്ല വെളിച്ചം ഉണ്ട് . വിൻഡോ അടച്ചിട്ടതിനാൽ ശല്യം ആയി തോന്നിയില്ല . സമയം നോക്കിയപ്പോൾ എട്ടു മണി ആയിട്ടുണ്ട് . ഫോണിൽ ഖത്തർ സമയം സെറ്റ് ചെയ്തു വച്ചിരുന്നു . ഫ്ലൈറ്റ് ടെയ്ക്ക് ഓഫ് ചെയ്തിട്ട് ഏകദേശം ആറു മണിക്കൂർ കഴിഞ്ഞു . സ്ക്രീനിലെ മാപ്പിൽ സ്റ്റാറ്റസ് നോക്കി . ഇപ്പോൾ ഫ്ലൈറ്റ് ഇന്ത്യൻ മഹാ സമുദ്രത്തിന്റെ മുകളിലൂടെ ആണ് പറക്കുന്നത് . ഫോണിലെ സമയം ന്യൂ സീലാൻഡ് സമയമായി സെറ്റ് ചെയ്തു . ശേഷം കുറച്ചു വെള്ളം കുടിച്ചു . കുറച്ചു കൂടെ ഉറങ്ങണം , അവളെ ഒന്നുകൂടെ നോക്കി , ആള് ഇപ്പോളൊന്നും ഉണരുന്ന ലക്ഷണം കാണുന്നില്ല . ഞാൻ ഒന്ന് കൂടി ഉറങ്ങാൻ ആയി വീണ്ടും കിടന്നു . .
പിന്നെ എഴുന്നേറ്റത് എയർ ഹോസ്ട്രെസ്സിന്റെ വിളി കേട്ടാണ് , അവർ സ്നാക്ക്സ് ബോക്സ് തന്നു . അവൾക്കുള്ളതും കൂടി വാങ്ങിച്ചു . രണ്ടു ബോട്ടിൽ വെള്ളവും വാങ്ങി ,എല്ലാം നടുവിലെ സീറ്റിലെ സ്റ്റാൻഡിൽ വെച്ച് വീണ്ടും ഉറങ്ങി . അപ്പോളും അവൾ ഉറക്കം തന്നെ . വെളിച്ചം കണ്ണിൽ അടിച്ചപ്പോളാണ് പിന്നെ എഴുന്നേൽക്കുന്നത് . ഉറക്കം അത്യാവശ്യം കഴിഞ്ഞിരിക്കുന്നു .
എല്ലാവരും എഴുനേറ്റു വിന്ഡോ തുറന്നതിനാൽ ഫ്ലൈറ്റിന്റെ ഉള്ളിൽ ഇപ്പോൾ നല്ല വെളിച്ചം ഉണ്ട് . പക്ഷെ ഞങ്ങളിടെ വിൻഡോ അടഞ്ഞു തന്നെ , അവൾ ഇപ്പോളും എണീറ്റിട്ടില്ല . വാച്ചിൽ സമയം നോക്കി ,പതിനൊന്നു മണി ആവുന്നു
,ഖത്തർ സമയം ആണ് .ഇനിയും എട്ടു മണിക്കൂർ യാത്ര ഉണ്ടാവും . ഓക്‌ലാൻഡ് സമയം പുലർച്ചെ മൂന്ന് മണിക്കാണ് ലാൻഡിംഗ് .
‘ഡോ’
ഞാൻ നിമ്മിയെ ഒന്ന് വിളിച്ചു , കേട്ടില്ല എന്ന് തോന്നിയപ്പോൾ മെല്ലെ ഒന്ന് തോണ്ടി വിളിച്ചു , അവൾ എഴുനേറ്റു .
‘നേരം വെളുത്തോ ‘
‘നേരം വെളുത്തിട്ടു ഇപ്പൊ കുറെ നേരം ആയി ‘ ഞാൻ മറുപടി കൊടുത്തു..
അവൾ ഫോൺ എടുത്ത് സമയം നോക്കി ,
‘അതിൽ നോക്കണ്ട, നമ്മൾ പറന്നുയർന്നിട്ടു ഇപ്പോൾ ഏകദേശം എട്ടു മണിക്കൂർ കഴിഞ്ഞു ,ഖത്തർ സമയം പതിനൊന്നു മണി ആയി ,ഓക്‌ലാൻഡ് സമയം വൈകിട്ട് 8 മണിയും . നല്ല ഉറക്കം ആയിരുന്നല്ലോ .വൈൻ തലയ്ക്കു പിടിച്ചോ ‘
അവൾ ഒന്ന് ചിരിച്ചു
‘അല്ല , ഹരിയേട്ടൻ എപ്പോളാ അങ്ങോട്ട് മാറി ഇരുന്നേ ?’ഡ്രസ്സ് ശെരിയാക്കി ഇടുന്നതിനിടക്ക് അവൾ ചോദിച്ചു
‘അതോ , നീ നന്നായി ഉറങ്ങിക്കോട്ടെ എന്ന് കരുതി മാറി ഇരുന്നതാ , നിനക്കൊരു അസൗകര്യം ആവണ്ട വിചാരിച്ചു’
‘ഓഹോ ‘ അവൾ എന്നെ ആകുന്ന രീതിയിൽ ആണ് അത് പറഞ്ഞത്
‘ഇതൊക്കെ എപ്പോൾ വന്നതാ’ നടുവിലെ സീറ്റിന്റെ ടേബിളിൽ ഉണ്ടായിരുന്ന സ്നാക്ക് ബോക്സും വെള്ളവും കണ്ടു അവൾ ചോദിച്ചു
‘കുറച്ചു മുന്നേ കൊണ്ട് തന്നതാ , ഞാൻ വാങ്ങി വെച്ചു ‘
‘മ്’ അവൾ മൂളി
‘ഒന്ന് ഫ്രഷ് ആവണ്ടേ’ ഞാൻ ആകെ മുഷിഞ്ഞു ഇരിക്കുകയായിരുന്നു
‘വേണം’
ഞാൻ അമിനിറ്റി കിറ്റിൽ നിന്നും ബ്രഷും പേസ്റ്റും എടുത്ത് എഴുനേറ്റു . കൂടെ അവളും , ബാത്‌റൂമിൽ പോയി നന്നായി ഒന്ന് ഫ്രഷ് ആയി , രാവിലെ കുളിക്കാൻ പറ്റാത്തതിനാൽ ഉള്ള വിഷമം ഉണ്ട് . മുടിയൊക്കെ നന്നായി ഒന്ന് നനച്ചു . പുറത്തു വന്നു , അവൾ പുറത്തു ഇറങ്ങിയിട്ടില്ല . കുറച്ചു സമയങ്ങൾക്കുള്ളിൽ അവൾ വന്നു , മുടിയെല്ലാം പാറി കിടക്കുന്നണ്ട് , കുളിക്കാൻ പറ്റാത്തതിൽ അവൾക്കും വിഷമം ഉള്ളതുപോലെ തോന്നി .ഞങ്ങൾ സീറ്റിലേക്ക് മടങ്ങി
