അമ്മയുടെ വീട് ഇരിക്കുന്ന സ്ഥലത്തിന്റെ പേരാണ് പിച്ചിക്കാവ് എന്ന്. പൊന്മല വലിയൊരു പ്രദേശം ആയത് കൊണ്ട് ചില സ്ഥലങ്ങൾക്ക് ഒക്കെ തിരിച്ചറിയാൻ മറ്റൊരു പേര് കൂടി ഉണ്ടാകുമായിരുന്നു. ആറു വീട്ടുകാർ താമസിക്കുന്ന ചെറിയൊരു സ്ഥലമാണ് ഈ പിച്ചിക്കാവ്.. അവിടേക്ക് ഇറങ്ങിയപ്പോ തന്നെ കണ്ടത് ഒരു നാലുകെട്ട് പോലെ പണിതിരിക്കുന്ന വീടാണ്.. എന്നാൽ ഇല്ലം അല്ല.. ഇതാണ് പാലയ്ക്കൽ വീട്..
അത് കഴിഞ്ഞു കാണുന്ന വീടാണ് മായച്ചിറ്റയുടെ.. അതും കഴിഞ്ഞു രണ്ട് വാർക്ക വീടുകൾക്ക് ഇടയിലാണ് ഞാൻ താമസിക്കാൻ പോകുന്ന എന്റെ വീട്. എന്റെ വീടിന് ഇപ്പുറമുള്ള പെയിന്റ് ചെയ്ത വാർക്ക വീട്ടിൽ ഒരു മുസ്ലിം ഫാമിലി ആണ് താമസിക്കുന്നത്. അതാണ് റംല ഇത്തയുടെ വീട്. മറ്റേ വാർക്ക വീട് രമ്യ ചേച്ചിയുടെയും.. രമ്യ ചേച്ചിയുടെ വീട് കഴിഞ്ഞു അങ്ങേ അറ്റത്തു ഇരിക്കുന്ന ചെറിയ വീടാണ് സന്ധ്യ പേരമ്മയുടെ… അതിനപ്പുറം മുത്തപ്പൻ കാവാണ്…
ഇതൊന്നും അവിടേക്ക് ചെന്നു കയറുമ്പോ എനിക്ക് അറിയുന്ന കാര്യങ്ങൾ ആയിരുന്നില്ല. കുറച്ചു ദിവസം കൊണ്ട് പഠിച്ചെടുത്തതാണ്… വീട്ടിലേക്ക് ഞങ്ങൾ കയറുമ്പോൾ മെലിഞ്ഞു സുന്ദരിയായ ഒരു പെൺകുട്ടി വാതിൽക്കലേക്ക് വന്നു.. എന്നെ നോക്കി അവളൊന്ന് പുഞ്ചിരിച്ചു.. ഇത് ഇവരുടെ മകളാണ്. ഇവർക്ക് ഒരു മകൾ ഉള്ള കാര്യം എനിക്ക് അറിയാമായിരുന്നു. എന്റെ അച്ഛൻ ഇവരെ വിവാഹം ചെയ്യുന്നതിനും മുമ്പ് ഇവർക്ക് ഉണ്ടായ കുട്ടിയാണ്. അതായത് ഈ അമ്മയുടെയും രണ്ടാം വിവാഹം ആയിരുന്നു എന്റെ അച്ഛനുമായി.. അത് കൊണ്ട് തന്നെ ഈ നിൽക്കുന്ന പെൺകുട്ടി എന്റെ ചേച്ചി ആണെന്ന് പറയാൻ കഴിയില്ല. രണ്ട് അച്ഛനും അമ്മയ്ക്കും ആണ് ഞങ്ങൾ ജനിച്ചത്.. എന്നേക്കാൾ പ്രായം മൂപ്പ് ഉള്ളത് കൊണ്ട് ചേച്ചി എന്ന് തന്നെ വിളിക്കേണ്ടി വരും.. നാട്ടിൽ മീൻ കൊടുക്കാൻ പോകുമ്പോൾ എല്ലാവരെയും ചേച്ചി എന്നും അമ്മേ എന്നുമൊക്കെ വിളിച്ചു ശീലിച്ച എനിക്ക് അതൊരു ബുദ്ധിമുട്ട് ഉള്ള കാര്യമല്ല…
അമ്മയുടെ പിന്നാലെ ഞാൻ ആ വീട്ടിലേക്ക് കയറി. ചെറിയൊരു വീടാണ്. രണ്ട് മുറി ഒരു അടുക്കള ഇടയിൽ ചെറിയൊരു ഹാൾ. എന്നാലും എന്റെ ഇടിഞ്ഞു വീഴാറായ വീടിനെക്കാൾ നല്ലത് തന്നെ.. ഇനി ഇവിടെ ആണ് താമസിക്കേണ്ടത് എന്ന് ഞാൻ ഓർത്തു. എന്നെ മുറി കാണിച്ചു തന്നത് ആ ചേച്ചി ആയിരുന്നു.. അവളുടെ പേര് എനിക്ക് അറിയില്ല.. പണ്ടെങ്ങോ കേട്ടിട്ടുണ്ട് പക്ഷെ ഓർത്തെടുക്കാൻ പറ്റുന്നില്ല.. എങ്ങാനും പേര് അറിയുമോ എന്ന് ചോദിച്ചാൽ അറിയില്ല എന്ന് പറഞ്ഞാൽ നാണക്കേട് ആകുമല്ലോ.. ഞാൻ ഒന്ന് പരുങ്ങി. ആ പെൺകുട്ടി പക്ഷെ എന്നോട് വളരെ അടുപ്പത്തോടെ ആയിരുന്നു പെരുമാറിയിരുന്നത്…
‘സ്നേഹേ… ഒന്നിങ്ങോട്ട് വന്നേടി..’
എനിക്ക് മുറി കാണിച്ചു തന്ന പെൺകുട്ടിയെ അമ്മ അടുക്കളയിൽ നിന്നും വിളിച്ചു. പേര് പിടികിട്ടി.. സ്നേഹ.. ഞാൻ ആ മുറിയിൽ കണ്ട കട്ടിലിൽ ഇരുന്നു.
അടുക്കളയിൽ നിന്നും സ്നേഹ ചേച്ചി വന്നത് ഒരു പാത്രത്തിൽ ഉപ്പുമാവും ഒരു ഗ്ലാസ്സ് ചായയും ആയി ആയിരുന്നു.. ഞാൻ വേണ്ട എന്നൊരു ഭാവം കാണിച്ചെങ്കിലും ചേച്ചി നിർബന്ധിച്ചു എനിക്ക് അത് കയ്യിൽ തന്നു.. പുതിയ സ്ഥലം ആയത് കൊണ്ട് എനിക്ക് ഇണങ്ങി വരാൻ സമയം എടുക്കുമെന്ന് അറിഞ്ഞത് കൊണ്ടാവണം സ്നേഹ ചേച്ചി എന്നോട് കൂടുതൽ ഒന്നും ചോദിച്ചില്ല..
അത് കൊണ്ട് തന്നെ അടുത്തുള്ള അയല്പക്കത്തെ ആളുകൾ ഒന്നും എന്നെ കാണാൻ അങ്ങനെ വന്നില്ല.. ഞാൻ മുറിക്കകത്ത് തന്നേ ഇരുന്നു. എന്നെ കാണാൻ വന്നില്ല എങ്കിലും അപ്പുറത്തെ വീട്ടിലെ ഇത്ത അടുക്കള ഭാഗത്തു വന്നു അമ്മയോട് എന്നെ കുറിച്ച് എന്തോ ചോദിക്കുന്നത് എനിക്ക് കേൾക്കാമായിരുന്നു. അവർ പോയി കഴിഞ്ഞു അമ്മ എനിക്ക് ഒരു പാത്രത്തിൽ അലുവ കൂടി കൊണ്ട് തന്നു. അപ്പുറത്തെ വീട്ടിലെ റംല ഇത്ത തന്നതാണ് എന്നും എന്നോട് പറഞ്ഞു…
കുറച്ചു നേരം അകത്തു തന്നെ ഇരുന്നപ്പോൾ എനിക്ക് ചടച്ചു. ഞാൻ പതിയെ അടുക്കള വഴി പുറത്തേക്ക് ഇറങ്ങി.. നിറയെ മരങ്ങളും ചെടികളും ഒക്കെ കൊണ്ട് നിറഞ്ഞ സ്ഥലമാണ് പിച്ചി കാവ്.. പ്രധാനമായും പിച്ചി പൂവ് എല്ലായിടത്തും പൂത്തു നിൽക്കുന്നുണ്ട്. അങ്ങനെ ആവണം ഇവിടെ ഈ പേര് വീണത്.. വീട്ടിലേക്ക് വരുന്ന വഴി തന്നെ പേരയും മാങ്ങയും അഞ്ഞിലി ചക്കയും ഒക്കെ ഞാൻ കണ്ടിരുന്നു.. എന്റെ വീടിന്റെ അടുത്തായിരുന്നു എങ്കിൽ അതൊന്നും ഇങ്ങനെ പഴുത്തു വെറുതെ കിടക്കില്ലായിരുന്നു.. അണ്ണാറക്കണ്ണനൊക്കെ ഇനി ഇതെല്ലാം തനിയെ സുഭിക്ഷമായി കഴിക്കാമെന്ന് കരുതണ്ട.. ഞാൻ മനസ്സിൽ പറഞ്ഞു.