ഒരു മൂലയ്ക്ക് നിന്ന് പറഞ്ഞു വന്നാൽ ഏറ്റവും അങ്ങേ അറ്റത്തെ ചെറിയ വീട് സുരേഷ് ചേട്ടന്റെ ആണ്. ചേട്ടൻ വാർക്ക പണിക്ക് ഒക്കെ പോകുന്നു.. ആളുടെ ഭാര്യയുടെ പേര് സന്ധ്യ.. അവർക്ക് രണ്ട് മക്കളാണ്. മൂത്ത ആൾ ഗോപിക. രണ്ടാമത്തെ ആൾ ഗോകുൽ…
അത് കഴിഞ്ഞു ആണ് എന്റെ തൊട്ടിപ്പുറെ ഉള്ള വാർക്ക വീട്. അവിടെ താമസിക്കുന്നത് രാജേഷ് ചേട്ടനും അയാളുടെ അമ്മയും ഭാര്യയും ആണ്. അങ്ങേരുടെ ഭാര്യയെ ആണ് ഞാൻ ഇന്നലെ ചാമ്പക്ക പെറുക്കാൻ പോയപ്പോൾ കണ്ടത്. അതാണ് രമ്യ ചേച്ചി.. അവർക്ക് ഒരു ചെറിയ മോൻ കൂടി ഉണ്ട്. പേര് അമ്പാടി.. രാജേഷ് ചേട്ടൻ ഇവിടെ മിക്കപ്പോഴും കാണാറില്ല. പുള്ളിക്ക് തിരുവനന്തപുരത്ത് ആണ് ജോലി. അത് കൊണ്ട് ഇടയ്ക്ക് ഇടയ്ക്ക് ഇവിടെ വന്നു പോകും. ചേച്ചി ഒക്കെ അത് കൊണ്ട് അവിടേക്ക് താമസം മാറാൻ പോകുവാണ്
അത് കഴിഞ്ഞു എന്റെ വീടും കഴിഞ്ഞു ഇരിക്കുന്ന വാർക്ക വീടാണ് സലീമിക്കയുടെത്. അങ്ങേര് ഗൾഫിൽ ആണ്. ഭാര്യ റംല ഇത്ത. അവരാണ് ഇന്നലെ വീട്ടിൽ അലുവ കൊണ്ട് തന്നത്.. അവർക്ക് മൂന്ന് മക്കളാണ് ഉള്ളത്.. മൂത്തവൾ ജസ്ന, രണ്ടാമത്തെയവൾ ആമിന, ഏറ്റവും ഇളയ പീക്കിരി ആയിഷ..
അത് കഴിഞ്ഞു ഇരിക്കുന്ന വീടാണ് മായച്ചിറ്റയുടെ. ചിറ്റയുടെ ഭർത്താവ് രാമകൃഷ്ണൻ ഒരു പലചരക്കു കട നടത്തുന്നു. ഇവർക്കും മൂന്ന് മക്കളാണ്. മൂത്തയാൾ രഞ്ജിത്ത്. രഞ്ജിത്ത് ചേട്ടൻ ഗൾഫിൽ ആണ്. സലീമിക്കയുടെ കെയറോഫിൽ അവിടെ പോയതാണ്.. പിന്നെ രണ്ട് പെൺകുട്ടികൾ. വേദിക കൃഷ്ണയും മേദിനി കൃഷ്ണയും.. രണ്ട് പേരും ഇരട്ടകളാണ്…
ഇനി ഒരു വീട് കൂടെയേ ഉള്ളു. ഇവിടേക്ക് വരുമ്പോ ഏറ്റവും ആദ്യം കണ്ട നാല് കെട്ട് പോലത്തെ വീട്. ശങ്കരൻ മാമന്റെയും അനില അമ്മായിയുടെയും വീട്.. ശങ്കരൻ മാമൻ കൃഷി ഒക്കെ ആയി ജീവിക്കുന്നു.. അവർക്കും രണ്ട് പെണ്മക്കൾ ആണ് ഉള്ളത്. മൂത്തയാൾ ശില്പ. രണ്ടാമത്തെയാൾ ശിവദ. അവരുടെ മുത്തശ്ശിയും അവിടെ ഉണ്ട്..
ആദ്യം എല്ലാവരെയും പറഞ്ഞു തന്നപ്പോ എനിക്ക് മൊത്തത്തിൽ ഒരു ആശയക്കുഴപ്പം ആയി. എല്ലാവരെയും ഒരുമിച്ച് പറഞ്ഞത് കൊണ്ട് പേരുമൊക്കെ മനസ്സിൽ അങ്ങോട്ട് കയറിയില്ല. അലക്ക് കഴിഞ്ഞിട്ടും ചിറ്റ എന്നോട് സംസാരിച്ചു കൊണ്ടിരുന്നു. സംസാരത്തിൽ ചിറ്റ വളരെ പാവം ആണെന്ന് എനിക്ക് തോന്നി. വലിയ ഒരു മോൻ ഉണ്ടേലും ഇവിടുത്തെ അമ്മമാരിൽ ഏറ്റവും പ്രായം കുറവ് മായച്ചിറ്റക്ക് ആണ്. ഒരുപക്ഷെ നന്നേ ചെറുപ്പത്തിൽ കെട്ടിച്ചു വിട്ടത് ആകണം..
എല്ലാവരെയും കുറിച്ച് ചിറ്റ പറഞ്ഞപ്പോൾ ആണ് ഒരു കാര്യം ഞാൻ ശ്രദ്ധിച്ചത്. ഇവിടെ എനിക്ക് കൂട്ടിന് പറ്റിയ ആരുമില്ല. എല്ലാം പെൺകുട്ടികൾ ആണ്. മായചിറ്റയുടെ മോൻ രഞ്ജിത്ത് ചേട്ടൻ ആണേൽ ഗൾഫിലും. പിന്നെ ഉള്ള ആൺതരി സന്ധ്യ പേരമ്മയുടെ മോൻ ഗോകുൽ ആണ്. അവനാണേൽ തീരെ ചെറിയ കുട്ടിയാണ്. എനിക്ക് കൂട്ട് കൂടാൻ ഉള്ളതില്ല.. ഇവിടെ ഒറ്റപ്പെടുമല്ലോ എന്നോർത്തു ഞാൻ ഉള്ളിൽ ദുഖിച്ചു..
ഞങ്ങൾ സംസാരിച്ചു കൊണ്ടിരിക്കുന്നതിന് ഇടയിലാണ് അങ്ങോട്ട് വേറൊരാൾ അലക്കാൻ വരുന്നത്. അവരെ കണ്ടതും മായച്ചിറ്റ ബക്കറ്റുമായി കയറി പോയി. അവരോട് മിണ്ടുകയോ ചിരിക്കുകയോ ഒന്നും ചെയ്തില്ല. രണ്ട് പേരും അത്ര രസത്തിലല്ല എന്ന് എനിക്ക് തോന്നി. ആ വന്ന ആളായിരുന്നു സന്ധ്യ പേരമ്മ. പേരമ്മ ഇവിടെ ആരുമായിട്ടും അത്ര രസത്തിൽ അല്ല. പെട്ടന്ന് വഴക്ക് ഉണ്ടാക്കുന്ന സ്വഭാവം ആണ് അവരുടേത്…
അലക്കുന്നതിന് ഇടയിൽ അവരും എന്നോട് കുശലം ഒക്കെ ചോദിക്കാൻ തുടങ്ങി. എന്റെ നാടിനെ കുറിച്ചും ബന്ധുക്കളെ കുറിച്ചും എല്ലാം അവർ ചികഞ്ഞു ചോദിച്ചു. എനിക്ക് ബുദ്ധിമുട്ട് ആകുമെന്ന് കരുതി സുലോചന അമ്മ പോലും അതിനെ പറ്റി ഒന്നും ഇത് വരെ ചോദിച്ചിരുന്നില്ല. ഇവർക്ക് പക്ഷെ അതൊന്നും എന്നോട് ചോദിക്കാൻ ഒരു ബുദ്ധിമുട്ടും ഇല്ലായിരുന്നു. വളരെ താല്പര്യത്തിൽ അവർ അതൊക്കെ എന്നോട് ചോദിച്ചു അറിഞ്ഞു..
അവരോട് സംസാരിച്ചു കൂടുതൽ കാര്യങ്ങൾ പറഞ്ഞു കൊടുക്കേണ്ട എന്ന് കരുതി ഞാൻ പെട്ടന്ന് കുളി കഴിഞ്ഞു കേറി പോന്നു.. വീട്ടിൽ വന്നപ്പോൾ അവിടെ ഒരു കൊച്ചു കുട്ടി മെല്ലെ പിച്ച വച്ചു നടക്കുന്നത് ഞാൻ കണ്ടു. സ്നേഹ ചേച്ചി അവനെ കളിപ്പിക്കുകയാണ്.. രമ്യ ചേച്ചിയുടെ മോനാണ്.. ഞാൻ ഡ്രസ്സ് മാറി വന്നു. ഇവിടെ എനിക്ക് വേണ്ടി രണ്ട് മൂന്ന് നിക്കർ വാങ്ങിച്ചു വച്ചിരുന്നു എങ്കിലും ഞാനത് ഇട്ടില്ല. എന്റെ കയ്യിൽ ഇരുന്ന കാവി മുണ്ട് എടുത്തു ചുറ്റി. നിക്കർ ഇട്ടു നടക്കാൻ ഞാൻ എന്താ കൊച്ചു കുട്ടിയാണോ..? ഇവിടെ ഉള്ള എല്ലാവരും എന്നെ തീരെ ചെറിയ കുട്ടിയെ പോലെ കാണുന്നു എന്നെനിക്ക് തോന്നി..