💘💘അനസൂയ💘💘 75അടിപൊളി 

വേറെ ഒരു വഴിയും ഇല്ലാത്തതുകൊണ്ട് അനസൂയ തന്റെ ആഗ്രഹത്തെ മൂടിവെച്ച് ഇരിക്കുകയായിരുന്നു. പക്ഷേ കുറച്ചു ദിവസം കഴിഞ്ഞപ്പോൾ ഇൻസ്റ്റഗ്രാമിൽ അവളുടെ ഫ്രണ്ട് ആയ ജിൻസി ഒരു വെഡിങ് റിസപ്ഷന് ധരിച്ച ലഹങ്ക കണ്ടു അനസൂയ പിന്നെയും പ്രലോഭിതയായി. അന്ന് വൈകുന്നേരം ജിൻസിയോട് സംസാരിച്ചു.
“എടി സൂപ്പറാ. വിവാഹത്തിന് വന്ന ആൾക്കാർ നമ്മളെ തന്നെ നോക്കിയിരിക്കുന്നത് കാണുമ്പോൾ ഒരു ഫീലുണ്ട്. എത്ര പേരാന്നറിയോ. ഫുൾ ഫാൻസ് ആണ് എനിക്ക് ഇപ്പോൾ. ലേശം വയറൊക്കെ കാണിച്ചില്ലെങ്കിൽ പിന്നെ എന്താ ഒരു രസം. ശരിക്കും അടിച്ചു പൊളിച്ചു.”
ജിൻസിയുടെ ആവേശമെല്ലാം അവളുടെ ശബ്ദത്തിൽ ഉണ്ട്.
“കസിന്റെ കല്യാണം വരുന്നുണ്ട്. എനിക്കും ഇങ്ങനെ ഒരു ലെഹങ്ക ധരിച്ച് ഷൈൻ ചെയ്യണം എന്നൊക്കെ ഉണ്ട്. പക്ഷെ…”
അനു പറഞ്ഞു.
“എടി നിനക്ക് നന്നായി ചേരും. നീ എന്നെക്കാൾ മെലിഞ്ഞിട്ടാണല്ലോ. നല്ല ഷേപ്പും ഉണ്ട്. ഇട്ടാൽ
സൂപ്പർ ആകും.”
“ആരെയും കൊതിപ്പിക്കാനോ രസിപ്പിക്കാൻ ഒന്നുമല്ല. എൻറെ സ്വന്തം ഒരു സന്തോഷത്തിനു വേണ്ടിയാണ്.”
അനസൂയ പറഞ്ഞു.
“അതുതന്നെയാടി മോളെ ഞാനും പറയുന്നത്.” ജിൻസി തലകുലുക്കി. “പിന്നെ നിന്റെ മുടി ഒന്ന് ചെറുതായിട്ട് ഷോർട്ട് ചെയ്താൽ മതി. നിന്റെ കഴുത്തൊക്കെ ഒന്നു തെളിഞ്ഞു കാണട്ടെ.”
“അങ്ങനെ ഒരു പ്ലാനും ഉണ്ട്.” അനസൂയ ആവേശത്തിലായി.
“എന്നാ പിന്നെ ഒന്നും നോക്കണ്ട മോളെ.”

ജിൻസിയുടെ വാക്കുകൾ കൂടി കേട്ടപ്പോൾ അനസൂയ മനസ്സിൽ ഉറപ്പിച്ചു; ലഹങ്ക തന്നെ.

കല്യാണം നടന്നു. ലെഹങ്ക ധരിച്ച് അനസൂയ കല്യാണത്തിലെ മെയിൻ അട്ട്രാക്ഷൻ ആയി മാറി. ജിൻസി പറഞ്ഞതുപോലെ ആളുകൾ അവളെ കണ്ണിമ തെറ്റാതെ നോക്കിനിന്നു. ആളുകളുടെ, പ്രത്യേകിച്ച് പുരുഷന്മാരുടെ നോട്ടം കണ്ടു പലപ്പോഴും അവൾ ചൂളിപ്പോയി. പക്ഷേ അതിനേക്കാളും തന്നെ പറ്റി അഭിമാനം തോന്നുകയും ചെയ്തു.
നല്ല ഗാംഭീര്യത്തോടെയും തലയെടുപ്പോടെയും തൻറെ ശരീരം അതിന്റെ പൂർണ്ണ മികവിലും വടിവിലും എന്നാൽ സഭ്യമായ രീതിയിൽ അവൾ പ്രദർശിപ്പിച്ചു.

രണ്ട് കുട്ടികളുടെ അമ്മയാണ് അവളെന്ന് പലർക്കും വിശ്വസിക്കാൻ കഴിഞ്ഞില്ല.
കല്യാണത്തിന് ഫോട്ടോ എടുക്കാൻ വന്ന ഫോട്ടോഗ്രാഫർമാർ പലപ്പോഴും വരനെയും വധുവിനെയും തഴഞ്ഞ് തനിക്ക് ചുറ്റും ക്യാമറ കണ്ണുകളുമായി വട്ടമിടുന്നത് അവൾ ശ്രദ്ധിച്ചു.
“ഫോട്ടോ എടുക്കുന്നതൊക്കെ കൊള്ളാം, പക്ഷേ എൻറെ ഫോട്ടോ എനിക്ക് തന്നെ വേണം,” എന്ന് അവൾ പറഞ്ഞപ്പോൾ അവർക്ക് ഉത്സാഹമായി.

നിറയെ ഫോട്ടോസ് എടുത്തു. അവളുടെ ഫോട്ടോ ഫോൺ നമ്പറും മേടിച്ചു.
രാത്രി 11 മണിയാവുന്നതിനു മുമ്പ് അവൾക്ക് അവളുടെ ഫോട്ടോസ് വാട്സ്ആപ്പിൽ ലഭിച്ചു.
“ചേച്ചിയുടെ ഫോട്ടോയാണ് ഞങ്ങൾ ആദ്യം ചെയ്തത്. ബാക്കിയുള്ള ഫോട്ടോസ് ഒക്കെ പിന്നെ.”
ഫോട്ടോഗ്രാഫർ പയ്യൻ പറഞ്ഞു.
ഒരു ഉമ്മ സെൽഫി തിരിച്ചുവിട്ടു.
സന്തോഷമാകട്ടെ. അവൾ കരുതി.

കല്യാണം കഴിഞ്ഞതോടുകൂടി അനസൂയ പാപ്പരായി. കാരണം ലഹങ്ക വാങ്ങാനായി തൻറെ മീൻകുളം വറ്റിച്ച് മുഴുവൻ മീനുകളെയും വിൽക്കേണ്ടി വന്നിരുന്നു അവൾക്ക്.
ഒരു ലിപ്സ്റ്റിക് വാങ്ങണമെങ്കിൽ പോലും ഭർത്താവിനോട് ചോദിക്കേണ്ട അവസ്ഥയായി.

അപ്പോഴാണ് തന്റെ കൂടെ പണ്ട് പഠിച്ച അനിതയുടെ വാട്സ്ആപ്പ് സ്റ്റാറ്റസിലെ ഒരു ഫോട്ടോയിൽ അവളുടെ ശ്രദ്ധ പതിച്ചത്.
അനിത ഒരു ഫംഗ്ഷനിൽ അതിഥികളിലൊരാളായി നിൽക്കുന്ന ഫോട്ടോയായിരുന്നു അത്. സംസാരിച്ചപ്പോൾ അനിത പറഞ്ഞത് അവൾ ഇപ്പോൾ ബിസിനസ് ചെയ്യുകയാണ് എന്നാണ്. ഒരുലക്ഷം ആയിരുന്നു ഇൻവെസ്റ്റ് ചെയ്തത്. ചെറിയതോതിൽ തുടങ്ങിയ പരിപാടി ആണ്. പുതിയ സ്റ്റാർട്ടപ്പുകളെ പ്രോത്സാഹിപ്പിക്കാൻ ഗവൺമെൻറ് സംഘടിപ്പിച്ച പരിപാടിയിൽ അനുമോദനം ഒക്കെ ലഭിച്ചു നല്ല ആവേശത്തിൽ നിൽക്കുകയാണ് അനിത.

“ഒരു ലക്ഷത്തിന്റെ പ്രൊഡക്ട്സ് വീട്ടിലേക്ക് കൊറിയർ ആയി വരും. പല ഓൺലൈൻ സൈറ്റുകളിലും വരുന്ന ഓർഡറുകൾ അവർ നമ്മൾക്ക് ഫോർവേഡ് ചെയ്യും. അത് അവർ പറയുന്നതുപോലെ ക്വാണ്ടിറ്റി തിരിച്ച് പാക്ക് ചെയ്തു വിട്ടാൽ മതി. ഹെൽപ്പ് ചെയ്യാൻ ആരെങ്കിലും ഉണ്ടെങ്കിൽ പിന്നെ നമുക്ക് ഒന്നും അറിയേണ്ട ആവശ്യമില്ല. ആദ്യത്തെ തവണ കാശ് ഇറക്കുന്നു എന്നതല്ലാതെ വേറെ റിസ്ക് ഒന്നുമില്ല.”