💫Evil on earth✨ – 6അടിപൊളി  

എങ്ങനെ എങ്കിലും ഇതൊത്തു തീർപ്പ് ആക്കിയാലേ തനിക്ക് പോകാൻ പറ്റുമെന്ന് മനസിലായ ദേവ് അവിടേക്ക് ചെന്നു

“ചേട്ടാ എന്താ പ്രശ്നം…ബ്ലോക്ക്‌ ആയത് കണ്ടില്ലേ…?

മുൻപിൽ നിൽക്കുന്ന വയസ്സനോട് അവൻ ചോദിച്ചു…

”ബ്ലോക്ക്‌ ആയാൽ നിനക്ക് എന്താടാ…ടോ താൻ ഞാൻ ചോദിച്ചതിന് സമാധാനം പറ…“

വീണ്ടും മുൻപിൽ നിൽക്കുന്ന പ്രായമായ ആളെ നോക്കി ആ ചെറുപ്പക്കാരൻ അലറി…എന്നാൽ ദേവിനെ ഒന്ന് ദയനീയമായി നോക്കുക മാത്രാണ് അയാൾ ചെയ്തത്…അത് കണ്ട ദേവിന് അയാളൊരു പാവമെന്ന് തോന്നി

”ചേട്ടൻ കാര്യം പറ..എന്താ പ്രശ്നം..?

വളരെ സൗമ്യമായി അവൻ ചോദിച്ചു

“അത് മോനെ…ഇവിടെ മുൻപോട്ട് പോകാനുള്ള സിഗ്നൽ വന്നപ്പോ ഞാൻ വണ്ടി മുൻപിലേക്ക് എടുത്തത…പെട്ടെന്നാണ് മറുവശത്തു നിന്നീ പയ്യൻ വണ്ടിയുമായി വന്നത്…ബ്രേക്ക്‌ പിടിച്ചെങ്കിലും ഈ ബൈക്ക് വന്നു തട്ടിയിരുന്നു…കുഞ്ഞിനു സുഖമില്ലാത്തതു കൊണ്ട് ആശുപത്രിയിൽ പോകാൻ ഇറങ്ങിയത അപ്പോളാ ഇങ്ങനൊരു പ്രശ്നം…”

അയാൾ സങ്കടം നിഴലിച്ച സ്വരത്തിൽ പറഞ്ഞു

“കൂടെ വേറെ ആണുങ്ങൾ ഒന്നുമില്ലേ…?

പിറകെ നിക്കുന്ന സ്ത്രീകളെ നോക്കിയവൻ ചോദിച്ചു

”മരുമോൻ ഉണ്ടായിരുന്നു കൂടെ…ഓഫീസിൽ എന്തോ പ്രശ്നം ഉണ്ടെന്നു പറഞ്ഞു വിളി വന്നതോടെ പാതി വഴിക്ക് അവനെ ഇറക്കി പോന്നതാ ഞങ്ങൾ..“

അയാളുടെ സംസാരം കേട്ടപ്പോഴേ ദേഷ്യം കൊണ്ടാ പയ്യൻ ദേവിനെ തള്ളി മാറ്റി വയസ്സനു മുൻപിൽ കേറിനിന്ന് ചീറി

”മരുമോനേം മോളേം ഒണ്ടാക്കാൻ പോണതിന് താൻ എന്തിനാടോ പരട്ടെ എന്റെ വണ്ടിയിൽ വന്നു കുത്തിയത്…ഏഹ്..!!!

“മോനെ സിഗ്നൽ കണ്ട് ഞാൻ മുൻപോട്ട് എടുത്തതല്ലേ….മോനല്ലേ ഇങ്ങോട്ട് വന്നിടിച്ചത്…”

അയാൾ തന്റെ ഭാഗം പറഞ്ഞവനെ മനസിലാക്കിക്കാൻ ശ്രമിച്ചു..എന്നാലാ പയ്യൻ അമ്പിനും വില്ലിനും അടുക്കാത്ത വിധം നിന്ന് ഒച്ചപ്പാടുണ്ടാക്കി

“എടാ നിന്നോടല്ലേ അയാള് കാര്യം പറഞ്ഞെ…സംശയം ആണേൽ പോലീസ് വരട്ടെ…ഇവിടെ ചുറ്റിനും ക്യാമറ ഉള്ളതാ ആരാ വന്ന് ഇടിച്ചതെന്ന് അപ്പോ നോക്കാം…!

അവർക്കിടയിലേക്ക് കയറിക്കൊണ്ട് ദേവ് പറഞ്ഞു…എന്നാലാ പയ്യൻ ഇവനാരടെ എന്ന ഭാവത്തിൽ ദേവിനെ നോക്കി

”നിന്നെ ആരെങ്കിലും ഇങ്ങോട്ട് ഷെണിച്ചോ…നിനക്ക് പോയിട്ട് ഇത്ര തിരക്ക് ഒണ്ടേൽ നടന്നു പോടാ…ഇത് ഞാനും ഇയാളും തമ്മിലുള്ള പ്രശ്നമാ..അത് തീർക്കാൻ എനിക്കറിയാം…“

ദേവിനെ നോക്കി പല്ലു കടിച്ചുകൊണ്ടവൻ പറഞ്ഞു….അവൻ ദേവിന് നേരെ തിരിഞ്ഞതെ ഏതോ കൂതറ റമ്മിന്റെ നേരിയ ഗന്ധം ദേവ് അറിഞ്ഞിരുന്നു…മദ്യലഹരിയിലാണ് ഇവനീ ബഹളം മുഴുവൻ കാണിക്കുന്നതെന്ന് മനസിലാക്കിയ ദേവ് ഉള്ളിൽ നിറഞ്ഞു വന്ന ദേഷ്യം പുറത്തു കാണിക്കാതെ അവനെ പറഞ്ഞു മനസിലാക്കാൻ ശ്രമിച്ചു……

വഴിനീളെയുള്ള ബ്ലോക്കും ഒച്ചപ്പാടും കണ്ടാണ് ആന്റണി കാറിൽ നിന്നിറങ്ങിയത്…എന്താ പ്രശ്നം എന്നൊന്നുമറിയാതെ പിറകിലിരിക്കുന്ന ആദിയും ജെസിയും മുഖാമുഖം നോക്കി…രാത്രി ഭക്ഷണം പുറത്തു നിന്ന് കഴിക്കാമെന്നുള്ള ജോയുടെ വാശിയിൽ Hotel Raviz ലേക്ക് ഇറങ്ങിയത് ആയിരുന്നവർ…..

”നിങ്ങളിവിടെ ഇരിക്ക് ഞാൻ പോയെന്നു നോകീട്ടു വരാം..“

അതും പറഞ്ഞിറങ്ങിയതായിരുന്നു ആന്റണി….

”ആ വേഗം ചെല്ല്…“

വിശപ്പ് കാരണം കുടല് കരിഞ്ഞു തുടങ്ങിയ ജോ സീറ്റിലേക്ക് ചാരി ഇരുന്നുകൊണ്ട് പറഞ്ഞു….വണ്ടികൾക്ക് ഇടയിലൂടെ എന്താണെന്ന് അറിയാൻ ആന്റണി നടന്നു….ചെന്നതെ കാണുന്നത് ആ പയ്യനെയും വയസ്സനെയും ഇരുവർക്കിടയിൽ നിന്ന് പ്രശ്നം ഒഴുവാക്കാൻ ശ്രമിക്കുന്ന ദേവിനെയുമാണ്….പയ്യന്റെ നിൽപ്പും ഭാവവും കണ്ടതെ അവൻ വെള്ളമാണെന്ന് അയാൾക്ക് മനസിലായി…. ആന്റണി ഫോൺ എടുത്തു ജോയെ വിളിച്ചു

”ആഹ് എന്നതാ അവിടെ..?

എടുത്തപാടെ അവൻ ചോദിച്ചു..

“അത് വെള്ളമടിച്ച ടീംസ് ആടാ..ഞാൻ പോയി ഒത്തു തീർപ്പ് ആക്കാൻ പറ്റുമോന്ന് നോക്കട്ടെ ഇല്ലേൽ ഇന്ന് മുഴുവൻ ഇവിടെ കിടക്കേണ്ടി വരും നമ്മൾ…”

അതും പറഞ്ഞയാൾ ഫോൺ വെച്ചു മുൻപിലേക്ക് നടന്നു….

“അങ്ങേര് എന്താടാ പറഞ്ഞെ….?

ഫോൺ വെച്ചതും പിറകിൽ നിന്ന് ജെസി അവനെ തൊണ്ടിക്കൊണ്ട് ചോദിച്ചു…

”അത് ഒരുത്തൻ വെള്ളമടിച്ചു പ്രശ്നം ഉണ്ടാകുന്നതാ…ചെറിയച്ചൻ പോയിട്ടൊണ്ട്…“

കണ്ണുകളടച്ചു കിടന്നുകൊണ്ടവൻ പറഞ്ഞു

അത് കേട്ട ജെസി ഒരു പേടിയോടെ ജോയെ നോക്കി…മദ്യപാനവും അത് കുടിക്കുന്നവമ്മാരെയും ജെസിക്ക് പണ്ട് മുതലേ പേടിയാണ്

”പോലീസിനെ വിളിച്ചില്ലേ ആരും…?

പേടിയോടെ അവർ ചോദിച്ചു..അത് കേട്ട ജോ ഒരു ചിരിയോടെ പിറകിലേക്ക് തല ചെരിച്ചു കൊണ്ട് പറഞ്ഞു

“എന്റമ്മ…നാലു റോഡും ബ്ലോക്കാണ്…ഇതിനിടെൽ കൂടി അവരു വരുമ്പോളേക്കും നേരം വെളുക്കും….”

“എന്ന നീയും കൂടെ ചെന്നൊന്ന് നോക്ക് ജോമോനെ…ആ മനുഷ്യൻ ഒറ്റക്ക പോയേക്കണേ..”

ആധിയോടെ അവർ പറഞ്ഞു…ജെസിയുടെ മുഖത്തു നിഴലിച്ച പേടി കണ്ട ജോ ഒന്ന് ശ്വാസം നീട്ടിയെടുത്ത ശേഷം ഡോർ തുറന്നു പുറത്തേക്ക് ഇറങ്ങി…

“നാശം പിടിക്കാൻ വിശന്ന് കണ്ണ് കാണുന്നില്ല…”

പിറുപിറുത്തു കൊണ്ടവൻ മുൻപോട്ട് നടന്നു….ജെസിയുടെ പേടിയുടെ കാരണം അവന് അറിയാമായിരുന്നു…വെള്ളമടിച്ചു അടിയും കുത്തുമായി ഇടക്കിടെ ഓരോ കേസുകളും അവൾക്ക് മുന്നിലൂടെ പോകാറുള്ളത് ആണ് അത് കൊണ്ട് തന്നെ ആണ് ജോ ഒന്നും മിണ്ടാതെ പുറത്തേക്ക് ഇറങ്ങിയത്

ആളുകളെ മാറ്റി അവൻ വന്നതും കാണുന്നത് മുൻപുള്ള മൂന്ന് പേർക്ക് കൂടെ നിന്ന് സംസാരിക്കുന്ന ആന്റണിയെ ആണ്…അയാളുടെ ഭാവവും വേഷവും കണ്ടൊരു മാന്യനായി തോന്നിയെ ദേവ് അയാളോട് കാര്യങ്ങൾ പറഞ്ഞു കൊടുത്തിരുന്നു ആദ്യമേ…തനിക്ക് മുൻപിലെ കിഴവന് വക്കാലത്തുമായി ആളുകളുടെ എണ്ണം കൂടിയത് കണ്ട പയ്യൻ ദേഷ്യം കൊണ്ട് അവർക്ക് നേരെയും ശബ്ദമുയർത്തി….

ജോ മറിഞ്ഞു കിടക്കുന്ന ബൈക്കിന് മുൻപിലെ ഷിഫ്റ്റ്‌ കാറിന് സൈഡിൽ പേടിച്ചു നിൽക്കുന്ന സ്ത്രീകളെ കണ്ടവർക്ക് അടുത്തേക്ക് നടന്നു…ഒച്ചപ്പാടിലും ബഹളത്തിലും വല്ലാതെ ഭയപ്പെട്ടു പോയ അവരെ നോക്കി അവൻ പറഞ്ഞു

“ചേച്ചി വണ്ടികത്തു കയറി ഇരുന്നോ..,ഇതിപ്പോ തീരും…കുഞ്ഞിനേയും കൊണ്ടു അധികനേരം വെളിയിൽ നിൽക്കണ്ട..”

അവർക്കായി വണ്ടിയുടെ ഡോർ തുറന്നു കൊടുത്തു കൊണ്ടവൻ പറഞ്ഞു…അവനെ ഒന്ന് നോക്കിയ ശേഷം അവർ രണ്ടു പേരും കുഞ്ഞിനേയും കൊണ്ടു വണ്ടിക്കകത്തു കയറി..ഡോർ അടച്ച ശേഷമവൻ മുൻപിൽ നിൽക്കുന്ന ആന്റണിയുടെ അടുത്തേക്ക് ചെന്നു….ആന്റണി അവനെ നോക്കിയതും അയാളെ നോക്കി ഒന്ന് ചിരിച്ച ശേഷം ജോ സൈഡിലേക്ക് കൈ കെട്ടി മാറി നിന്നു

+4

0