അദ്വൈതം 56അടിപൊളി  

“കുട്ടി അന്വേഷിച്ചെന്ന് ആമി പറഞ്ഞു…..”

“ഉവ്വ്….. അത് ഞാൻ പറയാം……അച്ഛമ്മ വന്നത് നന്നായി, ഇത് കേൾക്ക് ”
അഗ്നി പറഞ്ഞുകൊണ്ടിരുന്നത് തുടർന്നു…
“വിളക്ക് തെളിയിക്കുന്ന സമയം “ദീപജ്യോതി പരംബ്രഹ്മ ദീപജ്യോതി ജനാർദ്ദന:
ദീപോ ഹരതു മേ പാപം ദീപജ്യോതി നമോസ്തുതേ” എന്ന ശ്ലോകം ചൊല്ലണം…. തെളിയിച്ചു കഴിഞ്ഞതിനുശേഷം “ശുഭം കരോതു കല്യാണം ആരോഗ്യം ധനസമ്പദഃ
ശത്രുബുദ്ധി വിനാശായ ദീപജ്യോതി നമോസ്തുതേ” എന്ന ശ്ലോകം ചൊല്ലണം…. ശ്ലോകങ്ങൾ ഞാൻ എഴുതി തരാം എല്ലാവരും വൃത്തിക്ക് പഠിച്ചോളൂ…..തെളിയിക്കുമ്പോൾ ശ്രദ്ധിക്കേണ്ട കാര്യം തീപ്പെട്ടി ഉരസി നിലവിളക്ക് തെളിയിക്കരുത്…. ചെറിയ ദീപത്തിലോ മെഴുക് തിരിയിലോ തീ പകർന്നിട്ടുവേണം നിലവിളക്ക് തെളിയിക്കാൻ….വിളക്ക് തെളിയിച്ചു കഴിഞ്ഞതിനുശേഷം നിലവിളക്കിൽ നോക്കി ഇവിടത്തെ കുട്ടിക്കുവേണ്ടി മനസ്സുരുകി പ്രാർത്ഥിച്ചോളൂ…..

ആർത്തവ സമയത്ത് സ്ത്രീകൾക്ക് വിട്ടുവീഴ്ച്ച ഉള്ളതല്ലാതെ ഇതിനു ഒരു മുടക്കം വരാൻ പാടില്ല….പുലർച്ചെ പൂജാമുറിയിൽ വിളക്ക് തെളിയുന്ന സമയം പുരുഷന്മാരുടെ സാന്നിധ്യം അവിടെ ഉണ്ടാകണം, നിർബന്ധമാണ്…. എന്ത് വലിയ കാര്യമുണ്ടെങ്കിലും ഇനി അങ്ങോട്ട് അതൊക്കെ മാറ്റി വച്ചേ പറ്റു…..പിന്നെ ചികിത്സ നടക്കുന്ന സമയം കുടുംബത്തിലെ ഒരു സ്ത്രീ കൂടെ ഉണ്ടാവണം, അത് പാടില്ലെന്നാണ് എങ്കിലും ഒരു പെൺകുട്ടി അല്ലെ….”
അഗ്നി അതീവ ഗൗരവത്തോടെ പറഞ്ഞു…… രാജശേഖരൻ എല്ലാം സമ്മതിച്ചു…. ദേവകി അഗ്നിയുടെ കണ്ണുകളിലേക്ക് തന്നെ ഉറ്റുനോക്കുകയായിരുന്നു….അഗ്നിദേവിന്റെ മേൽ ദേവകിക്ക് ഉണ്ടായിരുന്ന സങ്കല്പങ്ങൾ മുഴുവൻ തെറ്റിയ നിമിഷമായിരുന്നു അത്….പ്രായത്തിനു അധീതമായ അറിവ് വഹിക്കുന്ന ശിരസ്

അഗ്നി തുടർന്നു…..

“സന്ധ്യക്ക് പൂജാമുറിയിൽ വിളക്ക് തെളിയിക്കുന്ന സമയവും ഇതൊക്കെ ആവർത്തിച്ചാൽ നല്ലത്, നിർബന്ധമില്ല പക്ഷെ നാളെമുതൽ സുഭദ്രയുടെ ചികിത്സ തീരുന്ന അന്നുവരെ നിർബന്ധമായും തറവാടിന്റെ പൂമുഖത്ത് അഞ്ഞൂറ്റിയൊന്ന് ചിരാതുകൾ തെളിയണം….. അത് കുടുംബത്തിലെ കന്യകയോ, സ്ത്രീയെ അറിയാത്ത പുരുഷനോ ചെയ്താൽ ഉത്തമം….. ഇങ്ങനെ വിളക്ക് തെളിയിച്ചാൽ ദേവഗണങ്ങളുടെ ദൃഷ്ടി ഭവനത്തിൽ പതിയും…..”

“അങ്ങനെ ചെയ്തോളാം…..”രാജശേഖരൻ പറഞ്ഞു…..

“മ്മ്ഹ്….വൈകിക്കണ്ട…. മറ്റന്നാൾ തന്നെ ട്രീറ്റ്മെന്റ് തുടങ്ങാം…..കുട്ടിയുടെ ശരീരത്തിൽ ഒരുപാട് നീർക്കെട്ടുകൾ കാണുന്നുണ്ട്…. ഉള്ളിൽ കഫകെട്ടും…. അതത്ര നല്ലതല്ല…..ദിവസവും എല്ലാ ജോയിന്റ്സും സ്‌ട്രെച്ച് ചെയ്ത് കൊടുക്കേണ്ടതായിരുന്നു, …അതൊക്കെ പറഞ്ഞു തരേണ്ടത് ട്രീറ്റ്മെന്റ് ചെയ്ത ഡോക്ടർമാരുടെ കടമയാണ്….. അവർക്ക് സമയമില്ലല്ലോ….”

“അഗ്നി…. നിന്റെ ട്രീറ്റ്മെന്റ് എങ്ങനെയാണ്…..”

“മൂന്നുനേരം ഉള്ളിൽ കൊടുക്കാൻ ദിവ്യദേത്രി ഇനം കരിക്കിൻ വെള്ളത്തിൽ അർക്കനം ചെയ്ത് തയ്യാറാക്കുന്ന ഒരു അർക്ക പാനീയം… ..ദിവസത്തിൽ രണ്ടുമണിക്കൂർ എണ്ണ തോണിയിൽ കിടത്തി ഉഴിച്ചിൽ…..പാനീയവും ഉഴിച്ചിലിനുള്ള എണ്ണയും രോഗിയുടെ ശരീരത്തിന് അനുസരിച്ച് ഇവിടെ തയ്യാറാക്കണം…..എണ്ണ തോണിയും, ഔഷധ സസ്യങ്ങളും, പൗർണമിയിൽ ആട്ടി എടുക്കുന്ന വിശേഷാൽ വെളിച്ചെണ്ണയും, കരിക്കുകളും, ആവശ്യമുള്ള പാത്രങ്ങളും മനയിൽ നിന്ന് ഇന്ന് രാത്രി ലോറിയിൽ കയറ്റി പുറപ്പെടും…..പകൽ വന്നാൽ സസ്യങ്ങൾ ചൂടിൽ വാടും…. അതുകൊണ്ടാണ് ഈ രാത്രി സഞ്ചാരം…….”…. അഗ്നി പറഞ്ഞു…..ഭൈരവശ്ശേരിക്ക് പാരമ്പര്യമായി ലഭിച്ച ഏക്കറുകണക്കിന് ഭൂമിയിൽ നട്ടുവളർത്തിയിരിക്കുന്ന പതിനായിരക്കണക്കിന് അപൂർവ ഔഷധ സസ്യങ്ങൾ മനയിലേക്ക് പോയ ദിവസം രാജശേഖരൻ കണ്ടിരുന്നു…..

“എല്ലാം അഗ്നിയുടെ രീതിക്ക് ചെയ്തോളു….ഇവിടെ മരുന്ന് തയ്യാറാക്കുന്നിടത്ത് സഹായത്തിന് എത്രപേരെ വേണം എന്ന് പറഞ്ഞാൽ ഞാൻ ഏർപ്പാടാക്കാം…. പിന്നെ amount ഞാൻ അക്കൗണ്ടിലേക്ക് ട്രാൻസ്ഫർ ചെയ്തിട്ടുണ്ട്…..”

“ആയിക്കോട്ടെ…..
മരുന്ന് ഉണ്ടാക്കുന്നയിടത്ത് പുറത്തു നിന്നുള്ള ആരും വേണ്ട ഞാൻ മതി…..കൈ സഹായത്തിന് തറവാട്ടിലുള്ള ആരെങ്കിലും ഒരാൾ കൂടെ ഉണ്ടെങ്കിൽ നന്നായിരുന്നു…..സസ്യങ്ങളുടെ ഇലകൾ ചെറിയ കഷ്ണങ്ങളായി നുറുക്കേണ്ടതുണ്ട്…..”