അദ്വൈതം 56അടിപൊളി  

“ഇവിടെ എവിടെയാ തെച്ചിപൂ കിട്ടാ?…”അഗ്നി ചോദിച്ചു….

“പറമ്പിൽ ഉണ്ടാവും….എന്ത്യേ…..”

“കുറച്ച് വേണം…..”

“ന്നാ വാ… നോക്കാം….”

“ഈ നട്ടുച്ചക്കോ…. വേണ്ട ഞാൻ തനിയെ പൊയ്ക്കോളാം…..”….

“അതിന് ഡോക്ർക്ക് വഴി അറിയോ…..”

“വഴി കണ്ടുപിടിച്ചോളാം…..”

“എന്തിനാ ഇത്ര കഷ്ടപ്പാട്…. ഞാനും കൂടെ വരാന്ന്…..”
യക്ഷമിക്ക് ദേഷ്യം വന്നു തുടങ്ങിയിരുന്നു…..

“സൂര്യദേവന്റെ കൈ പതിപ്പിച്ച് വെറുതെ ഈ പൂമേനി വാടിയ താമരപോലെ ആക്കണോ…..”അഗ്നി ചിരിച്ചു….

“വാടിയാൽ ഡോക്ടർക്ക് എന്താ…. ഇങ്ങട് നടക്കാ….”

യക്ഷമി ശാലയിലേക്ക് ഇറങ്ങിയതും അഗ്നി അതേ ചിരിയോടെ അവൾക്ക് പുറകെ ഇറങ്ങി….. അടുക്കളയിൽ നിന്നും ഹാളിലേക്ക് വന്ന രുക്മിണി ഒന്നിച്ചു നടന്നു വരുന്ന അഗ്നിയെയും യക്ഷമിയെയും കണ്ട് വാതിൽക്കൽ തറഞ്ഞു നിന്നു…..ഒറ്റമുണ്ടും ഉത്തരീയവും ധരിച്ചുവരുന്ന അഗ്നിയെയും അവനോട്‌ ചേർന്ന് നടക്കുന്ന യക്ഷമിയെയും കാണാൻ സാക്ഷാൽ സീതാരാമന്മാരെപ്പോലെ ഉണ്ടായിരുന്നു…..

“ഞങ്ങള് പറമ്പിൽ പോയിട്ട് വരാ….”
യക്ഷമി അമ്മയെനോക്കി വിളിച്ചു പറഞ്ഞതും രുക്മിണി അറിയാതെ ശിരസ് ചലിപ്പിച്ചു….

.
.

അഗ്നിയും യക്ഷമിയും തറവാട് ചുറ്റി പുറകിലെ പറമ്പിലേക്ക് ഇറങ്ങി….. പ്ലാവും മാവും തുടങ്ങി പല ഇനം ഫല വൃക്ഷങ്ങൾ തിങ്ങി നിറഞ്ഞ കണ്ണെത്താ ദൂരത്തോളം പടർന്നു കിടക്കുന്ന ഭൂമിയിലൂടെ ഇരുവരും നടന്നു….ഒക്കെ ദേവഗിരിയുടെ കൈമാറി വന്ന തറവാട്ട് സ്വത്ത് ആയിരുന്നു

“ദേ ആ ഭാഗത്താ കുളം…. ”

യക്ഷമി ചൂണ്ടി കാട്ടിയ ഭാഗത്തേക്ക് അഗ്നി നോക്കി….. ഓട് പാകിയ അത്യാവശ്യം വലിയൊരു കുളപ്പുര അവൻ കണ്ടു…. അതിനപ്പുറമാണ് കുളം….സ്ത്രീകളുടെ പ്രൈവസി മാനിച്ച് കുളത്തിലേക്ക് ഇറങ്ങുന്ന പടവുകൾക്ക് മേലെ ചെറിയ വീടുപോലെ കെട്ടി മറക്കുന്നതാണ് കുളപ്പുര… വസ്ത്രം മാറാനും മറ്റുമായി….

“അങ്ങട് പോകാമോ…..”
കുളപ്പുരയിലേക്ക് നോക്കി അഗ്നിദേവ് ചോദിച്ചു… അവന് ഭൈരവശ്ശേരിയിലെ കുളം ഓർമ്മ വന്നു….

“നട്ടുച്ചക്ക് കുളത്തിൽ പോകാൻ പാടില്ല…..”

“അതെന്താ…..”

“നീർയക്ഷി കുളത്തിൽ വലിച്ചിട്ട് കൊല്ലുന്നാ അച്ഛമ്മ പറയണേ….”

വലിയ കാര്യത്തിൽ യക്ഷമി സംസാരിക്കുന്നത് അഗ്നി കുട്ട്യോളെ നോക്കുന്നപോലെ നോക്കി

“ഞാനുള്ളപ്പോ ഒരു നീർയക്ഷിയും ദേവിയെ തൊടില്ല….”

അഗ്നി യക്ഷമിയുടെ ഇടതുകൈതണ്ടയിൽ പിടിച്ചു….. അവളൊന്ന് ഞെട്ടി, അവന്റെ ഉറച്ച കൈയിലെ ചൂട് പടരുന്ന തന്റെ കൈയിലേക്കും അഗ്നിയുടെ മുഖത്തേക്കും അവൾ അലിയുന്ന ഭാവത്തോടെ നോക്കി….

“ഡോക്ടർക്ക് ഇപ്പോ തെച്ചിപൂ അല്ലെ വേണ്ടത്…., കുളത്തിൽ വൈകുന്നേരം പോകാം….. എനിക്ക് കുറെ തുണി കഴുകാനുണ്ട്….”

“എങ്കിൽ വൈകുന്നേരം പോകാം….”
അഗ്നി യക്ഷമിയുടെ കൈവിട്ടു…..കൈതണ്ടയിൽ അമർന്ന ചൂട് അകന്നതും അവൾക്ക് വിഷമം തോന്നി

“അതവിടെ പിടിച്ചൂന്ന് വച്ച് എന്താ ചേദം….”
യക്ഷമി ചുണ്ട് കൂർപ്പിച്ച് ചോദിച്ചതും അഗ്നി അവളുടെ ഉള്ളം കൈയിലൂടെ തഴുകി വിരലുകളിൽ കോർത്ത് പിടിച്ചു….

“എന്തിനാ ഇപ്പോ തെച്ചിപൂ…..”

“ഭൈരവനെ പ്രതിഷ്ഠിക്കാൻ…..”

“എവിടെ…..”

“ന്റെ മുറിയിൽ….. ഞാൻ ഇവിടന്ന് പോകുന്നവരെ ന്റെ കൂടെ അവിടെ ഒരു സ്ഥാനം…..”

“അത്ര ഇഷ്ടാണോ ഭൈരവനെ…..”

“ജീവനാണ്…..”

തെച്ചിപൂവിനുവേണ്ടി ഇരുവരും തലങ്ങും വിലങ്ങും നടന്നു ഒടുവിൽ വെള്ളം വറ്റിയ ഒരു തൊടിന്റെ അരികിൽ ഒരു പറ്റം
തെച്ചിപൂക്കളെ യക്ഷമി കണ്ടെത്തി

“ദേണ്ടേ…. പൂവ്….”

യക്ഷമി ചൂണ്ടി കാണിച്ച ഇടത്തേക്ക് അഗ്നി ഇറങ്ങി പൂക്കൾ പറിച്ചു തിരികെ കയറി….

അഗ്നി തന്റെ മുറിയിൽ ഈശ്വരന് സ്ഥാനം പണിയുമ്പോൾ കൂടെ യക്ഷമിയും ഉണ്ടായിരുന്നു….നേരത്തെ വടക്ക് കിഴക്കേ മൂലയിൽ ചേർത്തിട്ട മേശയുടെ പുറത്ത് അഗ്നി വിഗ്രഹം പൊതിഞ്ഞിരുന്ന ചുവന്ന പട്ട് വിരിച്ചു….. പറിച്ചുകൊണ്ടുവന്ന രണ്ടുകുല തെച്ചിപൂക്കളിൽ നിന്ന് ഒരു പൂങ്കുല വേർപെടുത്തി പൂക്കൾ അടർത്തി പട്ടിനുമേലെ വിതറി…..

യക്ഷമി കണ്ണുകൾ അടച്ച് പ്രാർത്ഥനയോടെ നിൽക്കെ അഗ്നി ബാഗിൽ നിന്നും നൂറ്റാണ്ടുകളായി ഭൈരവശ്ശേരിയിലെ സന്തതിപരമ്പരകൾ ആരാധിച്ചുവരുന്ന ഭൈരവന്റെ പഞ്ചലോഹ വിഗ്രഹം കൈകളിലെടുത്തു….